ليا صديق قريب اوي معايا في نفسي الكليه احنا في تانيه كليه بنتكلم كل يوم
ادركت اني بحبه من قريب اوي لدرجه كبيره و مش عايزه اكلم حد غيره ولا شايفه مستقبلي منغيره
و ساعات كنت بحس من كلامه انه بيحبني و ساعات اننا مجرد صحاب بس
و امبارح اتقدملي عريس و اهلي موافقين بس سايبلي فرصه افكر لغايه بعد الامتحانات يعني كمان شهر كدا
من ساعه ما عرفت عماله اعيط و مش متخيله مستقبلي مع حد غير اللي بحبه
فانا المفروض اعمل ايه ؟ مش عايزه اعترف الاول
استناه و نفضل صحاب و يا عالم يعترف ولا لا ؟ ولا اخلي حد يقوله منغير ما يعرف مثلا اني اللي قلت ؟ و اقابل العريس ولا ارفضه علشان خايفه اظلمه و انا قلبي متعلق بحد تاني ؟ قولولي اي ممكن اعمله دلوقتي
(اعرف صديقي دا من حوالي ١٠ شهور و بينا حاجات مشتركه كتير و تفاهم عالي اوي )
السلام عليكم .. انا من رأيي ان دي مشاعر طبيعية جدا من الأنثى تجاه الذكر بمعنى لو قعدتي تتكلمي مع اللي أتقدم لك لمدة عشر شهور فأنتي غالبا هتحسي بنفس المشاعر تجاهه .. فمتتوهميش بحاجة اسمها الحب وتوأم الروح لأن دي مشاعر بتشبك بين أي ذكر وأنثى بحكم الغريزة البشرية .. يعني انتي متخيلة انك ممكن تحبي ذكر فقط من خلال انك شفتي وجهه فمابالك بواحد بتكلميه عشر شهور اكيد هيحصل ابتسامات ونكت واعجاب وكل ده وفي النهاية قد يكون غير مناسب .. فالإعجاب مش طريق لإختيار شريك في الحياة ومع احترامي لمشاعرك واحتياجاتك العاطفية ولكن الموضوع فيه ابناء وبني آدمين مش هزار فالإختيار بيكون حسب معايير اخلاقية وغيرها .. ثانيا هو زي ما بيكلمك هيكلم غيرك وبالتالي هيعجب بغيرك فالعلاقة غير مستقرة .. ثالثا ده ميعنيش بالضرورة ان الشخص اللي أتقدم لك مناسب فيجب ان تكون فترة الخطوبة طويلة لمدة تكفي عشان تتكشف الطباع الحقيقية .. رابعا انا ضد الكلام اللي فيه خضوع بين الذكر والأنثى احتراما لتعاليم الاسلام
تم النشر الجمعة، ١٩ ديسمبر ٢٠٢٥
مفيش حاجه اسمها اعتراف اللي بيبقى عاوز واحده بيروح للأب وكل حاجه تبقى رسمي مش بينه وبينها كده + كمان ماينفعش أبداا أبداا ترخصي نفسك علشان حد حتى لو هتموتي عليه علشان والله لو إنتي اعترفتيله أو حتى عرف من حد تاني هتحسي بعدها بندم عمرك ماحسيتيه قبل كده ،، ((البنت مرغوبه وليست راغبه )) خدي بالك من نقطه زي دي ،، والحاجه الأهم بقا إنك محتاجه تفهمي نفسك ، إنتي للأسف دخلتي في دوامة تعلق بسبب إنك بتقولي إنك بتتكلمي معاه بشكل شبه يومي وده غير إنه حرام كده كده أكيد هيخليكي تتعلقي بالشخص ، فإنتي دلوقتي في حاله من التعلق لازم تعالجي نفسك من التعلق ده . أنصحك وبشده بدورة الداء والدواء للشيخ علاء حامد أتمنى إن ربنا يوفقك لسماعها
تم النشر الأربعاء، ١٧ ديسمبر ٢٠٢٥
10 شهور مدة كويسة جدًا لإنه يعترف لك لو في مشاعر تجاهك، طالما مقالش يبقى هو مش موجود، واقفلي معاه، وانهي العلاقة دي، أما بالنسبة لضيقك من العريس المتقدم لك، فعشان قلبك متعلق، ومشغول بحد تاني، حاول تنهي العلاقة، وتاخدي وقت في التعافي، عشان تقدري تفكري في العريس وتاخدي قرار في الموضوع (قرار بكل حيادية بدون تحيّز لزميلك عشان أنت عرفاه، وبينكم حجات مشتركة، وبدون مقارنة بين الاتنين) عشان زميلك ما صرّحش بمشاعره، ولا وعدك بحاجة، أنت اللي حاسة كدا، وعايشة قصة الحب دي مع نفسك فقط، ولو جيتي تقوليله حاجة هيقولك أنا موعدتكيش بحاجة، ورجعت في كلامي معاكي ولا حاجة، والصراحة عنده حق، أنت اللي حكمتي إن دي علاقة أساسًا سواء صداقة، أو حب (من طرفك بس طالما التاني مقالش إنها حب) راجعي نفسك، واعطي نفسك فرصة تفكري كويس، ويمكن العريس دا فرصة حلوة ليك، ربنا يوفقك، ويكتب لك الخير ياربّ :))
تم النشر الأربعاء، ١٧ ديسمبر ٢٠٢٥
السلام عليكم ورحمة الله وبركاته بصي الحب ده مش مش كلمه. سهله يعني كلمه بحبه دي مش من 10 شهور اتكلمت فيهم كل يوم عن حاجات مشتركه بينكم كلمه بحبك لدرجة إن أنا ارفض انسان اتقدم من الباب ودخل البيت واتكلم بطريقه رسميه معايا ده ما ينفعش ده ما بيتحسش باحبه بالحاجات المشتركه ما بيننا طبيعي جدا جدا ان انت تشوفي ان هو الشخص المناسب حاجات مشتركه ودائما كل يوم. كلام واكيد الكلام ده كذا مره في اليوم يعني تقريبا واخد معظم وقتك هو شاغل معظم فطبيعي ان انت هتحسي انجذاب ناحيته بس صدقيني عن تجربه اي حاجه بعيده عن علاقه رسميه. 80% ان مكنش 90% ما بتبقاش حب لا من طرفك ولا من طرفه تمام كلمه بحبه. وابني مستقبلي عليه، وما اشوفش مستقبلي من غيره تتقال لما يبقى هو فعلا المستقبل ده تمام لما يجي يتقدم رسمي لما يقول لك صريحه ثانيه يا بنت الناس، انا بحبك وهاجي أتقدم حتى لو ما معيش فلوس حتى لو لسه بندرس حتى لو انا لسه في سنه ثانيه على الاقل هعرف اهلك علشان خاطر تبقي محجوزه ليا عشاني ساعتها باجي اقول لك اقعدي استني براحتك. لكن ده ما حصلش تمام فده ممكن يكون مجرد اعجاب من ناحيتك وهو عادي هو ملمحش هو مجبهاش صريحه وفي ظل الجيل بتاعنا ده انا اعتبر من سنك اولا انا مش كبيره انا 22 سنه يعني اكبر منك بثلاث سنين بس في نفس جيلك يعني الموضوع ده عباره عن حرفيا ومن غير والله العظيم ما ابص لك على ان انت اصغر او كده ولا اهون الموضوع ده لعب عيال لعب عيال. عباره عن ان احنا عايزين كبنات ان احنا عايزين حد يهتم بينا حاجات مشتركه بيننا وبينه ونقدر نتكلم كل يوم وهو من الناحيه الثانيه لحتى لو في حاجه هيبقى نفس الكلام. آه وبالمناسبه كلامك معاه كل يوم ده اولا حرام. انجذابك ليه في غير اطار رسمي مش هنقول حرام لان احنا مالوش سلطه على قلبنا ولكن غلط. تمام فاهم حاجه تعمليها ان انت هو نفسك وان انت تبعدي عن الحرام اولا. الشخص اللي اهل جابوه. اقعدي معه. تمام انت كل يوم بتتكلم تمام قولي للشخص اللي انت عارفاه ده وقولي له ان في عريس متقدم لك وشوفي رد فعله هيكون ايه عشان خاطر تطلعي من قلبك ولو انك نصيحه فعليه اقول لك عليها ولازم يعني بقدر طاقتك كلها اعمليها اقطعي كلامك معاه نهائي ان ده غلط وحرام قبل ما يكون غلط وسواء اهلك يعرفوا او ما يعرفوش بس غالبا اهلك ما يعرفوش هيبقى منظرك وحش جدا جدا جدا قدامهم وقدام نفسك لو الشخص اللي انت تعرفيه ده مش نصيبك وانت تحطي شخص دخل من الباب وقال عايزك بالحلال وانت رفضتيه علشان خاطر واحد حتى هو ما قالش انه حتى بيحبك عشان نقول قاعده مستنيه. دي حاجه تاني حاجه 10 شهور دي فتره قليله جدا جدا جدا جدا وعشان كده انا بقول لك ده لعب عيال ما تضيعيش فرصه ممكن تكون هي حلالك ممكن يكون الشخص ده نصيبك يعيشك اللي عمرك ما كنت تتخيل ان انت هتلاقيه يعيشه لك وتلاقوا برضه حاجات مشتركه بينكم وبين بعض. نصيحتي ليكي. اقطعي اي كلام محرم بينك وبين اي شاب عشان والله العظيم هتندم والله هتندمي والله كمان مره هتندمي وعن تجربه الموضوع بعد كده هيبقى ان انت. بتندمي على كل لحظه فرطت فيها في نقطه واحده من مشاعرك للشخص اللي مش حلالك ومش بتاعك تمام؟ فعلشان خاطر. ما تندميش انت شخصيا؟ على على كل كلمه قلتيها في غير موضعها. خليكي في الحلال خليكي الحلال احسن لدينك اولا وصورتك قدام ربنا واحسن بقلبك ثانيا واحسن لنفسك ثالثا واحسن لعيلتك رابعا واحسن من كل ناحيه وبعدين انت ايش عرفك ممكن يكون الشخص اللي متقدم ده برده في حاجات مشتركه بينك وبينه وبرضه ينسيكي اللي انت بتكلميه ده وينسيكي اسمه حتى تمام روحي قولي له ان انت متقدم لك عريس بس قبل ما بتقدم لي عريس دي قوليله الموضوع حرام بصي ما تسيبيهوش عشان خاطر انت بيتقدم لك عريس لان انت ممكن العريس ده ما يعجبكيش ما يحصلش نصيب وما تتجوزهوش هنرجع بقى نقول لا خلاص العريس مشي انت سيبيه عشان حرام عشان غلط عشان هتستنزفي والله هتستنزفي مشاعرك في الاتجاه الغلط هتستنزفي حياتك في الاتجاه الغلط وحتى لو كنت نصيب بعض واتجوزتوا بعض هيحصل مشاكل تكرهكم في اليوم اللي اتكلمتوا فيه قبل ما في علاقه رسميه ما نبدأه غير رضا ربنا بينتهي باللي ما يرضيناش تمام ربنا ما يتعاندش ربنا قال لنا حرام يبقى حرام مش حرام علشان خاطر وخلاص لا والله العظيم ده حرام عشان قلبنا. اي علاقه اقسم بالله اي علاقه بين ولد وبنت غير رسميه غير شرعيه اقسم بالله العلي العظيم ما حد بيخسر فيها قدهم اقسم بالله ما صح ولا حلال. انهي العلاقه. اللي بينك وبينه عشان رضا ربنا اولا ومن ثم ثقه اهلك فيكي ومن ثم علشان خاطر نفسك اولا وبعد كده عشان ثقة اهلك بس اولا اولا اولا عشان خاطر ربنا سبحانه وتعالى يرضى عنك ويكتب لك اللي فيه الخير ومن ثم استخيري الله واقعدي مع الشاب اللي اهلك عارضين عارضين عليك اقعدي وانت خاليه الزهد اقعدي وانت عايزه من الشخص اللي بتحلمي بيه مش قاعده معاه مثلا عشان تتصيدى له الاخطاء. تمام اللي هو انت بتدوري على حاجه ترفضيه بيها عشان خاطر انت لسه متعلقه بالاولاني وهو قدامك شهر و صدقيني شهر ده لو حاولت ان انت تنسي فيه والله هتنسيه لو استعنت بالله ان انت تنسيه فيه هتلاقي نفسك من نسياه يومين لانها كانت لعب عيال انت خلاص انت بس مجرد انك عرفتي ان اللعبه غلط فسبتيها خلاص تمام ولما تقعدي معاه ان شاء الله يكون فيه الخير والصلاح. لو نصيبك هتنسي اي حاجه هو هينسيكي بحلاوه الحلال وينصيكي كل حاجه للناس بتقول ازاي انا كنت في الطريق ده تمام ولو ما حصلش نصيب ما ترجعيش تكلم الشاب ده ثاني وهو لو هو عايزك تمام بمجرد ما انت هتقولي له هننفصل هتلاقيه هو مش عارف وهيحاول يتواصل معاكي فلو كان نصيبك هيتقدم لك وساعتها بقى هيظهر الشكل الرسمي هيظهر الشكل الحقيقي لكن اي علاقه خارج اطار رسمي لا بتبقى جد ولا بيظهر فيها الحقيقه ولا بيظهر فيها الشكل الصحيح للانسان اللي قدامنا لا منك ولا منك. حافظي على نفسك انت جوهره محدش ليه اي حد ان هو يبصلها غير من ورا لوح قزاز تخين. من ورا حراسه تمام ربنا صانك وحطك جوه فاترينه قزاز عليها حراسه جد كده اهلك والشرع والحجاب والبيت والاسره والقواعد ما تجيش انت في لحظه ان انت عايزه عايزه حب ولا اهتمام ولا حنيه بتيجي في لحظه وتضيعي كل الحراسه دي هتندمي والله العظيم هتندم. اعرفي قيمه نفسك يا جوهره وعززي بنفس. وحطي رجل على رجل واقعدي كده واللي عايز يقدم فروض الولاء والطاعة ولاء بس بلاش الطاعه الطاعه لله وحده ويجيلك لحد عندك. تمام. وخير ان شاء الله وفي فتره الشهر دي يا ريت يعني لو في فتره اطول شويه لو مقدرتيش تنسي الراجل بس خديها اولا ان انت تنهي العلاقه الغلط وتهدي كده صلاه استخاره وادعي ربنا يختار لك الاحسن وربنا والله هيختار لك الاحسن هو الاحسن لما تقدم لك لو الاحسن في اللي انت تعرفيه بالحلال ان انت بكده هتقولي لربنا انا اخترت حلالك حتى لو ضد قلبي حتى لو ضد مشاعري وغلبت شيطاني وغلبت هوايا عشان خاطرك انت يا رب وساعتها ربنا هيختار لك الاحسن ولو الخير في واحد غير الاثنين هيجيبوه لك بس الحلو في ده كله انت تبقي جاهده كده روحك. خفيفه وحاسه ان انت عامله اللي عليك عشان انت رجعت عن طريق. مكانش هيرضي ربنا ورجعت لربنا في الاخر. تمام يا رب يا رب يا ربنا يرزقك بالخير وبالاحسن ولو ورزقك في اقصى الارض او ادناها رب ربنا يجمع بيه ويحقق لك اللي نفسك فيه.
تم النشر الثلاثاء، ١٦ ديسمبر ٢٠٢٥
أولا حرام مفيش حاجه اسمها صحاب ثانياً لو هو معجب بيكي اصلا والله كان هيقولك اي يخليه في مشاعر وميقولش طالما كدا كدا بتتكلموا بلاش تضيعي نفسك في حاجه حرام وكمان مفيش فايده فيها شوفي العريس واستخيري ربنا وابعدي عن الشخص دا واتقي الله في نفسك
تم النشر الثلاثاء، ١٦ ديسمبر ٢٠٢٥
حاولي تركزي وتفكري كويس بين الصح والغلط والحلال والحرام
تم النشر الثلاثاء، ١٦ ديسمبر ٢٠٢٥
مفيش بنت بتبدأ.... هتكون مستهلكة بالنسباله.... طيب لو هو رد وقال بالمقال او بالحال انه مش حاسس من ناحيتك بحاجه... ايه هيكون شعورك؟
تم النشر الأربعاء، ١٧ ديسمبر ٢٠٢٥
هل هوه اصلا يستحق ده يعني شريك الحياة فعلا عشان يستاهل ده لازم يكون كويس ... راجل الي بيصاحب بنات ده غلط وحرام وده مش كويس... وهل هوه بيصلي الفروض مثلا... اخلاقه عاملة ازاي... يعني اقصد لازم تغيري مفاهيمك الأول صح لان مفاهيمك غلط
تم النشر الثلاثاء، ١٦ ديسمبر ٢٠٢٥
لعرض السؤال في فدني اضغط هنا