السلام عليكم ورحمة الله وبركاته
من فضلكوا محتاجة حد يعرفني ازاي اتصدى لبلطجة صاحب البيت ..
هو طول عمره بلطجي وبيضرب اي راجل وساكن وبيتهجم ع الستات كمان .. سواء الموجود مستأجر ايجار قديم او حتى واخد الشقة تمليك .. وبيفضل يرازي الناس بكل الطرق .. شتايم .. ضرب .. قطع المياه .. قطع نور السلم .. اتلاف مرافق العمارة عشان يرجع يصلحها ويسرق مبالغ كبيرة فيها ..
بيمتنع عن دفع فواتير المياه وكهرباء السلم والتنظيف .. وصل بيه انه بيتخانق معانا لو شغلنا خلاط ولا نزلنا السبت من الشباك .. ده غير انه كداب وبيتهم الناس بالباطل.
اتعمله كذا محضر من اشخاص مختلفة قبل كده ومؤخرا مني انا لانه طلع يجري ورايا ع السلم عايز يضربني وشتمني شتيمة وحشة جدا عشان اختي طلعت وماسلمتش عليه ..
مع العلم اننا متجنبينه تماما لاننا ستات لوحدنا مفيش اخ ووالدي توفاه الله.
عملت له المحضر وقررت ادفعله الايجار في المحكمة لانه بيتاخر في تسليم الوصولات اللي بتثبت دفعنا وده ممكن يعرضنا للطرد برغم اننا بندفعله قبل الشهر مايبدا بيومين اصلا ..
وعشان هو حرامي وعنده تهرب ضريبي بدأت المحكمة تخصم منه الايجار عشان ممتنع عن تسديد الضرايب المستحقة عليه لامتلاكه عقارات كتيرة وبيشتغل كمان فيها ..
بدأ يئذينا تاني لانه عايز يمنعنا ندفع ف المحكمة .. وبدأ تاني يضايقنا بقطع المياه واتلاف ماتور المياه وكمان ركب منشر على شباكه اللي مش محتاج منشر لانه عنده بالكون وفيها منشر كبير ..
كل ده عشان يضايقنا ننزل السبت وهو في الدور الاول واحنا التالت يعني حاطط عائق فجاة مستحيل نعرف ننزل منه السبت .. وبعتلنا تهديد مع الجيران عشان ماننزلش السبت ..
روحت القسم تاني عشان اعمله بلاغ جديد .. القسم كلموه وطلبوه يجي عمل نفسه مش مصدق ان ده القسم عشان مايجيش ..
القسم بعت معايا مسؤول من المباحث فضل يخبط عليه الباب وسامعينه جوه ومش بيفتح .. اتصل بيه لاقاه قفل تليفونه .. وهو دايما موجود لانه عاطل مش بيشتغل ومش بينزل لانه غني وعنده املاك وبيتاجر ف سبائك الذهب ونظام حياته معروف طول اليوم هو جوه البيت ..
المسؤول مشي وفي نفس اليوم صاحب البيت لم الناس ف الشارع وقالهم اني جيباله بلطجي يضربه هو ومراته وهو عارف كويس انه مسؤول من الحكومة وفضل يقوم الناس علينا واتخانقت معاه ..
يعني عنده تهرب ضريبي وبيسرق في الكهربا لاعب في العداد وبيفتري علينا ومحدش عارف يوقفه ولا فارق معاه الحكومة .. وفوق شره اللي مش سايب بيه حد من السكان لدرجة انه طلع شتم ست ف اخر دور وكانت متملكة الشقة مش مستأجرة واتهجم عليها وهانها لحد ماباعت لناس تانية ومشيت .. مزود العيار عشان احنا مسلمين وهو مسيحي ..
ارجوكوا قولولي اعمل ايه .. احنا عايشين ف توتر وقلق طول الوقت انا واختي وامي الست الكبيرة .. وارجوكوا محدش يقول سيبولوا البيت احنا معندناش قرايب ولا املاك ولا مكان تاني نروحه .. ساعدونا من فضلكوا وشكرا ليكوا
وعليكم السلام ورحمه الله وبركاته بصي استمري في دفع الإيجار في المحكمة بانتظام زي ما بتعملي، دي أهم خطوة بتحميكي من الطرد وبتخلي موقفك قانونياً 100%. وكل حركة يعملها (شتم، جري وراكي، قطع مية) لازم يقابلها محضر بسرعه. كتر المحاضر بيخلي موقفه قدام النيابة مسجل خطر وبيضمن حقك لو الموضوع كبر. ولو تقدروا تجيبوا كاميرا صغيرة قدام باب شقتكم، دي هتلجمه تماماً. البلطجي بيخاف من االدليل المادي اللي ميعرفش يكدب و أي مرة يحاول يتعرضلك فيها، افتحي تسجيل الصوت أو فيديو من بعيد. ده بيخوفه وبيثبت حقك في المحكمة. و بما إنه بيسرق كهرباء، بلغي عنه في شركة الكهرباء (مباحث الكهرباء). دي جهات مابتهزرش وممكن تدفعه غرامات تقطم وسطه وتخليه يلف حوالين نفسه وينساكي شوية ونفس الكلام بخصوص التهرب الضريبي، قدمي شكوى في مصلحة الضرائب العقارية وماترديش عليه بكلمة، ولا حتى عتاب. الشخص ده بيدور على خناقة عشان يمارس بلطجته. لما يلاقيكي ساكتة تماماً وبتاخدي إجراءات قانونية من ورا ظهره، هيبدأ يقلق. و انتي وجيرانك المتضررين لازم تبقوا إيد واحدة. لو عملتوا محضر جماعي بأسماء كذا حد تضرر منه، القسم هياخد الموضوع بجدية أكبر بكتير . وجد والله ربنا يحفظك ويوفقك
تم النشر الاثنين، ١٦ مارس ٢٠٢٦
وعليكم السلام ورحمة الله وبركاته يا حبيبتي، أنا آسفة جداً للي بتمرّي بيه أنتِ وأمك وأختك، ده ظلم كبير وتوتر مُرهق، خاصة إنكم ستات لوحدكن. ربنا يفرج همّكم ويحميكم، وأنتِ قوية وبتتصرّفي صح بالمحاضر والمحكمة. هاقولك خطوات عملية واضحة عشان تتصدّي له بالحكومة، خطوة بخطوة، مع الالتزام بالقانون والصبر: استمرّي في المحاضر بالقسم : كل مرة يقطع مياه أو يهدّد أو يخرّب (زي المنشر أو الماتور)، روحي القسم فوراً وعملي محضر جديد مع شهود (جيران موثوقين). اطلبي "أمر تفتيش" من القسم لفحص العدادات والتخريب، ولو مش بيرد، كرّري الإبلاغ يومياً لحد ما يجيبوه. لو القسم بطيء، روحي المجلس القومي للمرأة (خط ساخن 15115 ) أو وحدة مكافحة العنف الأسري في النيابة العامة – هما متخصصين في حماية الستات زيكم. المحكمة الإيجارية : استمرّي دفع الإيجار هناك، واطلبي من المحكمة "أمر قضائي مؤقت" بحماية الشقة ومنع الإيذاء. قدمي طلب "تدابير حماية" ضد التهديدات، ولو عنده تهرّب ضريبي، أبلغي مصلحة الضرائب العقارية بكل الشقق اللي عندهم – هيخصموا منه أكتر ويوقفوه. جهات أعلى فوراً : جهاز حماية المستهلك (خط 19588 ): بلّغي عن قطع الخدمات والسرقة في الكهرباء/المياه. شركة توزيع الكهرباء/المياه : بلّغيهم عن التلاعب في العدادات، هيجيبوا فني يفحص ويعمل محضر. النيابة العامة : لو القسم مش بيتحرّك، قدّمي بلاغ مباشر هناك عن "الإرهاب والتهديد" خاصة إنه بيفتری ويحرّض الجيران. حماية يومية : صوّري كل حاجة (فيديو للمنشر، التهديدات، التخريب) وخزّنيها كدليل. لو نزل يجري وراكم تاني، اتصلي بالطوارئ 122 فوراً وقولي "بلطجي بيهاجم ستات". أنتِ ماشية صح، والحكومة هتوقفه لو استمرّيتِ بالبلاغات المتكرّرة – البلطجي ده خايف من الورق الرسمي. ربنا قال "وَمَنْ يَتَّقِ اللَّهَ يَجْعَلْ لَهُ مَخْرَجًا"، فتوكّلي عليه وادعي بغضب الظالم. لو محتاجة محامي متخصص، روحي صفحة الخبراء في Fedni: https://www.fedni.net/experts قاومي التوتر بالصلاة والقرآن، وربنا يعزّكم ويفرجها عليكم قريب. لو عايزة تفاصيل أكتر، قوليلي! 💪❤️
تم النشر الاثنين، ١٦ مارس ٢٠٢٦
السلام عليكم لو كتره المحاضر مش بتجيب نتيجه حاولي لو حصل اي خناقه حد من اخواتك يصوره وينزله على النت لو هو فعلا غلطان في الفيديو الداخليه هتجيبه بسرعه ويهتمو اكتر بي لان عمليه البلطجه هيكون ناس كتير عرفتها والموضوع ينشهر .زي خناقات كتير الايام دي اي حد بيتصور بيتجاب بسرعه عكس المحاضر الرسميه ساعات بتطول او ميهتموش بيها
تم النشر الاثنين، ١٦ مارس ٢٠٢٦
فى حلين ، الحل السهل انكم تمشو من المكان ، الحل الصعب انكم تعملو محاضر فيه و تتعاملو قانونيا
تم النشر الثلاثاء، ١٧ مارس ٢٠٢٦
حياك الله اختي الغاليه الله ﷻ قال دع أذاهم وتوكل على الله حضرتك خدي اخواتك البنات واتفضلي دوري على مكان تاني مش مشكله ايا كان بس الي بيحصل دا حرام انك تعرضي نفسك للخطر و اخواتك ايضا اتفضلي دوري على مكان تاني حتى لو اغلى وسيبي المكان وامشي كلفي نفسك كتير مقابل راحتك النفسيه والأمان مواصفات الرجل دا بشع استغفر الله ولكن دا الحل الأمثل لتتجنبي يحصل تعديات اخري
تم النشر الثلاثاء، ١٧ مارس ٢٠٢٦
لعرض السؤال في فدني اضغط هنا