ماما كان عندها مشاكل كتير مع بابا كانت عامله فرق في البيت مين هيبقى معاها ومين هيبقى مع بابا واللي كان هيبقى مع ابوه اكيد وحش وكانت بتحاول بشتى الطرق تشده ناحيته وفي صفها واكنها حرب !
الحقيقه طفولتي كلها كانت في مشاكل بين ابويا وامي
انا كنت متعلقه بأبويا جدا ومات للاسف وانا عندي ١٢ سنة كنت مستنيه حنان من ماما يغرقني ملقتش دا ..في مره سألتها يا ماما انتي مش بتديني حنان ليه قامت قالتلي مش كفايه بديكي فلوس؟!
اخر سنتين فاتوا كانوا صعبين مع ماما فعلا لدرجة انها وصلت انها رمتني برا البيت واختي كانت بتشدني وبترميني برا فعلا (اختي٢٥ سنة)اليوم دا حصل كمية حاجات فوق استيعابي لدرجة اني بجد نسيت احنا كنا بنتخانق علي اي بس اللي عارفاه ان مهما عملت انا مكنتش استحق اترمي برا البيت اوقات بسأل نفسي هو بابا لو كان عايش كانت قدرت تعمل كدا ؟؟
بتقولي روحي لعمامك وعالله تروحي لحد من اهلي (مع العلم عمامي من ساعة ما بابا مات واحنا منعرفش عنهم حاجه)هيا عارفه اني مليش حد كانت عايزه ترميني في الشارع فعلًا؟ نزلت فعلا من البيت مش عارفه اعمل اي حاله هستريا من العياط في الشارع ملقتش مكان غير المسجد رحت صليت واتصالت بصحبتي غلطتي اني متصلتش بخالتي او خالي ..وام صحبتي كلمتني وقالتلي لازم ترجعي البيت يابنتي انتي بنت اقولها يا طنط بتقولي لو جيتي مش هفتحلك وهعمل واسوي فيكي بس كلام ام صحبتي صح هعمل اي في الشارع؟
رجعت البيت واللي كنت فاكره اني لو دخلت اوضتي وقعد مش هتيجي جنبي الا اني لاقيتها دخلت وقعدت تضرب فيا ضرب قبل ما يعلم علي جسمي هو علم علي قلبي ولسه معلم علي قلبي والله ما فاكره اي سبب الخناقه بس هيا مجبتنيش من شقه مع حد يعني عشان تعمل معايا كدا
الفتره دي كانت صعبه جدا عليا انا الحمدلله قريبه من ربنا بس اللي كان بيدور في دماغي ان ازاي هعيش بعد اللي حصل دا ازاي وهقدر انسى واعيش وانسى كمية الخذلان اللي اتعرضه مفكرتش وللأسف الشيطان كان اقوى مني قومت فضلت اخد في كمية ادوية وهما لاحظوا جت وهيا مرعوبه مش عارفه بصراحه هيا كانت خايفه عليا ولا خايفه حد يدنها ويقولها انتي السبب ..دخلت اوضى ونمت صحيت علي الساعة ١١ بليل لاقيت خالو موجود برا كانت جيباه عشان فكراه هينصفاها خالو غلطها اول مره اشوف خالو بيتكلم معايا هادي اوي كدا عشان كان شايف حالتي التشتت وعدم الانتباه اللامبالاه من الصدمه اللي خدها ..بعديها بيومين تقريبا اتخانقنا حرمتني من الفلوس مع شوية كلام صعب..نزلت اشتغل الكلام دا كنت ١٧ سنة اتمرمط والله بقيت اسأل في كل مكان علي شغل بس كان بالنسبالي مرمطة الغريب تكسر الكرامه بس ..لاكن مرمطه القريب تكسر كل حاجه جواك الحقيقه تعبت من الشغل شغل من غير شهاده صعب جدا وقررت هصلح الامور وانا اللي رجعت وصلحت الامور مش عيب والله بس حقيقي انا اللي جوايا متصلحش ومش هيتصلح
اوقات لما اطلب منها لبس فعلا من أولوياتي الحاجه اللي عندي دابت تصر انها متجبليش هيا بتعاند معايا في الغلط
وعلي فكره انا بجد مكنتش بطلب حاجه مستحيله من زمان وهيا حالتنا الماديه مش احسن حاجه فعشان كدا طلبتنا عمرها ماكانت كتير ..وانا شايفه ان معاها فلوس عادي بدليل انها سلفت اخويا
بس هيا كانت بترد عليا لما بسألها انتي بتعملي معايا كدا ليه تقولي بعمل زي ما ابوكي عمل معايا يكش تحسي
تعرفوا ان في مره اخويا شتم ابويا بسبب ماما وهيا كانت قاعده ومبسوطه اوي بابا معملش حاجه بس اكيد نفسه اتكسرت دا ابنه يعني اللي شتمه بس هو قالي كلمه اللي امك بتعمله في اخوكي دا هيطلع عليها بعدين
فعلا من فتره اخويا ضرب امي بالقلم بس هيا روحها فيه حرفيا عادي دلوقتي بتكلمه
انا عارفه ان ماما بتصرف عليا تعليمي وجبتلي لبس بس هو دا يحق ليها انها تكسرني ؟انا لو اتكسرت في بيتي هروح بيت جوزي مُهانه هطلع اطفال مرضى ..يمكن اكون مريضه نفسيا جمله كانت بتقولهالي برضو اوقات بحس انها بتتكلم عن نفسها هيا مش قادره تقول دا لنفسها بس بتقوله لنفسها وارد اكون مريضه نفسيا فعلا بس اللي متأكده منه ان هيا كانت السبب
اوقات كانت بتسألني انتي جاحده عليا ليه يابنتي ؟اوقات كنت ما بيني وبين نفسي اسألني فعل السؤال دا ا بس مع نهاية السؤال عقلي يفتكر كل مشهد من طرد واساءه وذل وقلبي يفضل يدق جامد ..ربنا يهديها عليا يارب ..امي كانت بتدعي عليا
اتعامل معاها ازاي ؟جربت انا اللي ابادر بس جرحي مش قادر يلم مش قادره ارجع اتعامل معاها كويس لو رجعت واتعاملت كويس بيبقى من ورا قلبي
وعلي فكره تعاملها معايا دا خلى اختي يتأجروا عليا
في مره حصلت مشكله مع اختي (مشاكل اخوات عاديه)رجعت لاقتها راميه حاجاتي برا الشقه وبتقولي مش هتخشي الاوضه
لما قعد فكرت قولت يعني هيا ماما لو مكنتش طردتني برا بيتي كانت اختي هتستجرأ تعمل حركه زي دي ؟
اخويا في مره كان في موقف عبيط اوي لاقيته شتمني بأبويا والحقيقه انه لو كان شتمني لذاتي كنت سكت بس هو شتم ابويا الميت لاقيت نفسي بدافع عنه بإستماته واقوله متشتمش ابويا
اوقات بحس ان ماما غيرانه من حبي لبابا ودفاعي عنه
عشان تحب تكسرني تقلل قصاد عيني بابا اخر ايامه تعب وانا كنت صغيره كانوا هما اللي بيشلوه عشان هما ولاده ودي مراته
ماما لحد النهارده تقولي انا شلت ابوكي بنبرة كلها تفاخر بالذات وتكمل في حتة ابوكي اللي كان بيعمل ويسوى اقولها بابا مات انتي بتتكلمي عنه ليه تقولي انا حره
وعلي فكره لاحظت ان ماما مشاكلها مع اخواتها نفس الكلام
اوقات تعمل ردود فعل اكبر من الموقف وكانت مقطعاهم لفتره طويله بسبب ان امها زقتها وكان في اسباب تانيه
بس قاطعتهم برضو
لما بتحصب مشكله بيني وبين اخواتي بلقى ماما اتحمقت للطرف التاني حتى لو هو اللي غلطان يعني افتكر لما قولت لماما بنتك رمتلي حاجاتي برا تقولي اه مانتي الغلطانه مكنتش مستنيها تقولي اختي اللي غلطانه بس علي الاقل تعوم المشكله بحيث انها متغلطش حد والتاني يقعد علي التل ويدلدل رجليه اوقات بحس ان ماما بتعمل كدا عشان اخواتي بيدفعوا في البيت عشان بيشتغلوا وانا مش بدفع اصل يعني انت شايف حد بديلك فلوس هتغلط ..اللي خلاني احس الاحساس دا اختي قبل ما تشتغل كانت ماما بتمرمطها برضو لاسباب عبيطه
نهاية الامر مش عارفه الموضوع هينتهي ازاي بس اتمنى قلبي يتعافي واعدى وانسى عشان ولادي خايفه اطلع اعمل مع ولادي كددا والله ..ربنا يهديها عليا يارب اتمنى اي حد قرأ الكلام دا يدعلها كتير
ربنا يهديها و اعرفي ان كما تدين تدان و كل اللي بتعمله ده سواء هي او عيالها هيترد برضو ليهم بس اصبري و قولي حسبي الله و نعم الوكيل و ان شاء الله ربنا هيجازيكي خير و يرحم باباكي و اموات المسلمين
تم النشر الاثنين، ١٣ مايو ٢٠٢٤
لعرض السؤال في فدني اضغط هنا