انا حياتي كلها عبارة عن فوضى محدش ابدا فحياتي سواء اصدقاء او اهل او أي حد يعرف عني اي حاجة شخصيتي مختلفة تماما مع نفسي عكس الناس بحسني اني منافقه وساعات بستغرب من نفسي ومن العك الي بيحصل ساعات بيكون نفسي اشارك حد كل العك الي بيحصل وكل حاجة بعملها بس بخاف مش فاهمة بجد انا ليه وبعمل ايه بس حرفيا انا مش انا بعمل حاجات وبعدين استغرب ازاي عملتها او عملتها امتى انا بشخصيتين والاتنين عكس بعض بحس اني منافقه اويى الناس واخدة عني فكره حلوه اوي بس انا وحشه بشكل بشع
السلام عليكم، مين في البشر كلها معندوش جزء خفي محدش يعرفه، معندوش سر أو حاجة ميحبش الناس تطلع عليها. فيه فرق إني أدرك إني بشر مش ملاك وإن البشر عادي يذنبوا ونفسهم الأمارة بالسوء تغلبهم والصح إن الواحد يحاول يصلح ويتوب لما يغلط مهما كانت ذنوبه كبيرة وبين جلد نفسك. اللي بتعمليه ده جلد ذات قاسي لنفسك. والشيطان كمان مستغل الأمر في إنه يحوله لوساوس تسيطر عليكِ وتخليكِ تحسي باليأس من نفسك. *** اقعدي مع نفسك بهدوء قعدة كده تكوني هادية ولسه صاحية ومركزة واكتبي كل أفكارك ومخاوفك. كل فكرة سلبية بدليها، حطي جنبها (إكس) وفي الخانة اللي قصادها اكتبي تصحيح أو فكرة إيجابية تعارضها. اكتبي كل المشاكل اللي شايفاها في شخصيتك وكل العيوب والذنوب اللي بتقعي فيها والحاجات اللي بتقولي الناس متعرفهاش وبتصدمك عن نفسك. بعدين امسكي كل مشكلة وفكري تتخلصي منها إزاي. الدنيا مجاهدة، فجهادك دلوقتي تصلحي مشاكل نفسك وتكوني واقعية وتبعدي عن المثالية السامة عشان تقدري توصلي للنسخة اللي تحبي تكوني عليها. واستعيني بالله بيقين وادعيه دايما يصلح قلبك وحالك. بالتوفيق.
تم النشر الخميس، ٣٠ أبريل ٢٠٢٦
أنا عادتي أني مش بنفي كلام حد عن نفسه، أنا فهمت من كلامك أن الظاهر مختلف عن الباطن وعشان كدا بتعملي أمور متناقضة( وكونك بتستغربي من أفعالك فدي نزعة طيبة جدا) ، فساعتها مهم أنك تهتمي بالجانب الباطني دا (القلب)، أولا: إياك تسيبي الجانب اللي الناس شايفاه كويس لأن دا هو بمثابة خط الدفاع اللي بيصب في مصلحة الباطن، ثانيا: لازم تكتري من الأعمال الصالحة في السر، ثالثا: طريق تزكية النفس وزيادة الإيمان وتطهير القلب من الآفات والأمراض والوصول للقلب السليم والإخلاص لله ومحبته والتعلق به فدا موضوع واسع أرشح فيه موسوعة كتب " موسوعة أعمال القلوب لتعظيم علام الغيوب"
تم النشر الجمعة، ١ مايو ٢٠٢٦
حبيبتي، أنا ذكية هنا معاكي، وأول حاجة: أنتِ مش منافقة، أنتِ بس محتاجة تتواصلي مع نفسك الحقيقية . الإحساس ده شائع جدًا عند بنات كتير زيك، خاصة لما الضغط الاجتماعي يخلينا نلبس "قناع" عشان نحمي نفسنا. اللي جواكِ مش "وحش"، ده جزء منكِ محتاج حنان ورعاية، مش إخفاء. خطوات عملية عشان تخرجي من الفوضى دي: اكتبي يومياتك السرية : كل يوم 10 دقايق، اكتبي "اللي عملته النهاردة" و"إيه اللي حسيتي بيه جواكِ فعلاً". هتقربكِ من نفسك وتفهمي إزاي الشخصيتين دول مترابطين. ابدئي صغير مع نفسك : ادعي ربنا بالهداية والثبات ونقاء الظاهر والباطن وواظبي على الاستغفار...ةالاستغفار والدعاء بيطمنوا الروح ويفتحوا الباب للتغيير (زي قوله تعالى: "وَمَنْ يَتَّقِ اللَّهَ يَجْعَلْ لَهُ مَخْرَجًا"). شاركي تدريجيًا : اختاري شخص واحد موثوق (مش لازم كل الناس)، قولي له حاجة صغيرة عن "اللي جواكِ"، زي "أنا النهاردة حسيت كده بس عملت كده". هتكتشفي إن الناس هيقبلوكِ أكتر لما تكوني حقيقية. حددي هدف يومي صغير : زي "النهاردة هعمل حاجة بسيطة تعبر عن اللي جوا (مثل رفض حاجة مش عاجباكِ)". مع الوقت، الاثنين هيبقوا واحد. أنتِ مش لوحدك، يا قمر! شوفي أسئلة مشابهة في فدني عن هتلاقي إجابات كتير. ولو عايزة دعم أعمق، روحي لصفحة الخبراء هنا: https://www.fedni.net/experts – فيه معالجين نفسيين هيساعدوكِ. أنتِ جوهرة، بس محتاجة تلمعي من جوا. قوليلي إيه الخطوة الأولى اللي هتعمليها النهاردة؟ 💕
تم النشر الأربعاء، ٢٩ أبريل ٢٠٢٦
كلامك جميل جدا شكرا ليكي
تم النشر الجمعة، ١ مايو ٢٠٢٦
@Yona Yona بيقولو اني هاديه واني ملتزمة دينيا واني حافظة القرآن واني طيبه واني بساعد الي محتاج وكدا اكتر حاجة بتحسسني اني وحشه لما حد يكون عايز يبقى زيي او بنت فالمدرسة تقولي عايزة ابقى شاطرة وطيبه زيك واساعد الناس بحس باحساس غريب
تم النشر الخميس، ٣٠ أبريل ٢٠٢٦
العفو يا حبيبتي 💗
تم النشر الجمعة، ١ مايو ٢٠٢٦
عارفة ليه أنا سألتك عن مميزاتك؟ لأني كنت عاوزاكي تشوفي بنفسك اللي أنا شفته. أنا مريت بنفس حالتك دي حرفياً، كنت بحس إن حياتي فوضى وإن الناس مخدوعة فيا، وفضلت وقت طويل بجلد نفسي وبحس إني عايشة بشخصيتين. لكن النهاردة، ومن مكاني كحد خاض التجربة دي، بقولك إن اللي أنتي فيه ده مش نفاق.. ده "صراع نمو". الجانب الكويس اللي أنتي حكيتيه (التزامك، حفظك للقرآن، مساعدتك للناس) هو ده معدنك الأصيل وحقيقتك، أما "العك" اللي بتسميه فوضى، فهو مجرد ضعف بشري طبيعي بنمر بيه كلنا في السن ده، بنبقى تايهين فيه بين الشخص المثالي اللي الناس شايفاه وبين ضعفنا وأخطائنا الإنسانية. أما بالنسبة "للإحساس الغريب" لما حد يقولك نفسي أكون زيك.. الإحساس اللي بيخليكي تقولي لنفسك "أنا مش مثالية، أنتم لو عرفتوا الحقيقة والعك اللي بعمله مش هتقولوا كده".. فده شعور طبيعي جداً، بس تجاهليه. افتكري دايماً الجانب الحلو، وافتكري إننا "مش ملايكة"، الجملة دي دايماً بقولها لنفسي وبحاول أصلح بيها حالي من غير ما أكرهها. أنا لما بدأت أركز على الجوانب الكويسة في حياتي وأمتن ليها، الفوضى اللي جوايا بدأت تهدى. متخليش نظرتك القاسية لنفسك تحرمك من حلاوة الحاجات الصح اللي بتعمليها. أنتي إنسانة جميلة بتعافر، وده في حد ذاته كفاية جداً. كملي في طريقك واقبلي نفسك زي ما هي، وهتلاقي الفوضى دي بتترتب لوحدها مع الوقت.
تم النشر الخميس، ٣٠ أبريل ٢٠٢٦
بصي انا حاسه بيكي جدا وحاسه باللخبطه دي، أنا شايفة إنك قاسية على نفسك زيادة، والناس اللي حواليكي أكيد مش مخدوعين فيكي للدرجة دي.. قولي لي كدة، إيه أكتر 3 حاجات حلوة الناس دايمًا بيقولوها عنك أو بيحبوها فيكي
تم النشر الأربعاء، ٢٩ أبريل ٢٠٢٦
17
تم النشر الأربعاء، ٢٩ أبريل ٢٠٢٦
ممكن أسألك عن سنك ولا مش حابه تقولى
تم النشر الأربعاء، ٢٩ أبريل ٢٠٢٦
لعرض السؤال في فدني اضغط هنا