انا طالبة جامعيه فى اخر سنه بل فى اخر شهر فى الجامعه ال حصل إن التلت سنين بتوع الجامعه كنت الطالبة الدحيحة ال بتلبس نظارة وكل ده اتغير اول ما قابلت شاب اعجبت بيه وباهتمامه بيا وهنا كنت فى سنه تالته وكنت على طول اصلى وادعيلى لحد فى اخر سنه تالته وتعرفت على بنت معايا فى اللجنه وعرفت الشلة الجديد ال انا عرفتها فى سنه تالته وال منهم الولد ال أعجبت بيه وعرفتهم على البنت دى و معداش حرفيا كام ساعه لحد ما لقيت الشاب ال انا معحبه بيه بيبعتلى ويقولى انوا. معحب بيها و عاوزنى اديلوا رقمها عشان. يتوصلوا وانا قعدت اكلموا باسلوب واحش وعيب وحرام لان الموضع جديد عليا وفى نفس الوقت حاسة بكسرة ووجع قلب عشان البنت بتاعت تيك توك وكده فكنت فاكره هيحذرنى منها ده كان اقصى ما اتمنى
وساعتها كرهتوا لكن مقدرتش ادعى عليه كنت بصلى وادعيلوا ربنا يهديه لكن جات سنه رابعة وهنا كان التغير بتاعي من بنت عادية ل أحلى بنت فى الشلة بقيت بحط ميكب واشترى لبس والبس صح بقيت حرفيا واحدة تانية الحصل بقى انوا اهتم بيا جامد اوى اوى يعنى لكن فى نفس الوقت لقيت شباب كتير برضوا بقوا مهتمين وانا لسه زى ما انا فى نقطة انى مش هرتبط ولا احب واتحب واقول الكلام بتاعهم عوزه افضل محافظة على حاجات زى دى وماعداش اربع خمس شهور وبقى الشخص ال انا معجبه بيه مش مهتم وبقى مهتم ببنات تانية لحد انى حسيت انى اكسرت مره تانية ل درجة انى كنت اكون فى الموصلات او فى اى مكان والقى نفسى بدمع وعيط حتى الفترة دى مكنتش بضحك زى الاول
ولسه من اسبوع حاسه انى بتخطاه لانوا بقا مش فارق معايا زى الاول وكمان فى كذا شخص عوزنى ارتبط بيهم و فى واحد منهم حاسه انى قلبى مال ناحيتوا من الحاجات البيعملها زى انوا يلبسنى خاتم للخطوبة بس بينى وبنوا يعنى زى انوا يعملى اغنية بأسمى و حاجات تانية بسيطة يقعد جنبى يغمزلى يعنى حاجات بتخلنى افكر فى وشخص تانى مهتم بيا اوى وشخص تالت معجب وشخص رابع بيحبنى لكن خايف يقولى انا مش عارفة بس ده ال انا فيه دلوقتى وبدعى ربنا إن أخر شهر ده يخلص عشان ارتاح 😢😢 @Ahmad Belal
شكرا على توجيهك السؤال وإن شاء الله الاجابة تكون مفيدة. كل ده ممكن يكون له ابعاد نفسية كتير فمينفعش يتشخص السبب كده بدون جلسات. النقطة الثانية التغيير عشان الآخرين هتلاقي نفسك مع الوقت بتضحي بحاجات انتي مكنتيش متخيلة انك تضحي بيها. ولما تفوقي هتضايقي من نفسك لان محدش هيقدر التغيير ده. فالانسان مهم يكون هو ميتغيرش عشان حد. البنت طبيعي تفرح لما تحس ان في شباب كتير يتمنوا يكلموها.لكن ماذا بعد؟ طول ما التغيير او القرارات هوائية هتلاقي نفسك بتكلمي كل شوية حد. النقطة الأخيرة مفيش حب حقيقي قبل الجواز، الجواز اما يثبت الاعجاب او يحولو لمشاكل وعدم قبول وراحة. فمتتغريش بالكلام الحلو لانها وسيلة لاصطياد البنات اللي محتاجة اهتمام وحب. اهتمي بنفسك وحبي نفسك وخليكي نفسك وحطي اهدافك واشتغلي عليها لحد ما الرجل المناسب يجي.
تم النشر السبت، ٢ مايو ٢٠٢٦
عارفة يعني ممكن يكون سبب اللي انتِ فيه انك بتقولي كنتِ(البنت الدحيحة اللي مش بتبطل مذاكرة) ممكن اللي انتِ فيه دا لإنك زهقتي من اللي كنتِ بتعمليه قبل كدا او لانك كنتِ منغلقة على نفسك اوي فلما بصيتي برا القوقعة اللي كنتِ فيها اتشتتي او غفلتي؛ مش هلومك بس حاولي ... حاولي ترجعي نفسك القديمة بل و أحسن كمان ... عارفة كل واحد لينا بيجيله وقت و بيقع بيقع اوي بتجيله فترة و بيبقى تايه مش عارف هو ايه اللي جابه هنا و ايه اللي بيعمله و عشان مين؛ ممكن متكونيش لبستي و اهتميتي عشانه علفكرة يمكن لانك حسيتي انك عاوزة تطلعي و تغيري من نفسك (قولتي انك طول كام سنة كنتِ بتذاكري و تقريبا مكنتيش بتعملي حاجة غير كدا ) فيمكن عشان كدا اول ما جيتي تصاحبي، صاحبتي واحدة بتاعة تيك توك كل احترامي ليها و الله يمكن هي أحسن مننا عند ربنا و عرفتي شاب من كلامك انه لسة مش شخص بالغ فكريا انك تفكري فيه اصلا المشكلة مع نفسك من جوا و الحل جواكي ركزي مع نفسك و شوفيها عاوزة ايه و ايه اللي بتحبه و اعمليهولها و صاحبيها و براحة على نفسك خليكي هينة عليها لو معاملتيش نفسك بلين مين هيعاملك كدا ؟؟؟
تم النشر الأحد، ٣ مايو ٢٠٢٦
بصي يا حبيبتي انتي دلوقتى بتعملي ذنوب انتي مش فاهمة أو فاهمة بس مش قادرة تهتمي لصوت ضميرك .... المهم انتي اتزينت في سبيل إنك تجذبي الشخص اللي أعجبتي بيه ليكي وده حصل ولكن بِعِد تاني ... عارفة ليه ؟ لأنه مش راجل لو هو راجل بصحيح هيخش البيت من بابه علطول ما تقوليش بقي لازم أحبه الأول ولازم نكون فاهمين بعض ولازم ولازم لأ لحد هنا ... الحب بيكون بعد الجواز حتي ولو حصل خطوبة بتكون بضوابط شرعية وما بتسمحيش لنفسك بإنك بتميلي مشاعرك ناحيته علشان حتي ما تتعلقيش بيه .... لو اتفركشت ..عارفة ليه نسبة الطلاق بتزيد لأن البنت والشاب لما بيحبوا بعض قبل الجواز بل قبل الخطوبة .... بعد ما يتزوجوا بيملوا وبيبدأوا يفقدوا اهتمامات بعض ... انتي دلوقتي في غفلة والله أنا آسفة لو كنت وجهتلك نصيحتي بطريقة غلط أو أسلوب جارح ولكن والله العظيم قلبي علي مصلحتك .... انتي في ايدك تتوبي والله... كونك حاسة بإعجاب ناحية شخص معين أو كدة فده شعور بتحس بيه أي بنوتة ومنهم أنا ولكن الصح إن أنا عمري ما أبين كدة ولا أتخطي حدودي في إظهار مشاعري لو أنا بحبه بصحيح أدعي ربنا وأستخيره لو فيه الخير هييجي وإن ما كانش فيه يبعده عني .... لأن ربنا أدري بالخير لينا فين ....قال تعالى في كتابه الكريم...( وعسي أن تكرهوا شيئاً وهو خير لكم وعسي أن تحبوا شيئاً وهو شر لكم والله يعلم وأنتم لا تعلمون) وقال تعالى ( ومن يتقي الله يجعل له مخرجا و يرزقه من حيث لا يحتسب) يعني اتقي ربنا في نفسك كويس وتوبي لربنا وهو هيقدم اللي فيه الخير إن شاء الله وبطلي تتزين لأنك كدة في حكم التبرج وتوبي لربنا وإلزمي الإستغفار وإن شاء الله ربنا يتوب علينا وعليكي ويرزقنا وإياكي الزوج الصالح التقي النقي الغني عاجلاً غير آجل يارب العالمين 🤲💗
تم النشر السبت، ٢ مايو ٢٠٢٦
اتفق معاكى جدا الصراحه...وكمان ع ما اعتقد ان مشاعر اللغبطه اللي انتي فيها كمان من الذنوب دي لان الارتباط حرام ما بالك بقا انتي ارتبطي مش بشاب واحد ع حسب ما فهمت و كمان بسبب التبرج الشباب حبتك و اعجبت بيكي و حرام و غلط كمان...انتي بدل ما تحافظي ع نفسك و تدعي بالزوج الصالح روحتي غيرتي لبسك للتبرج علشان تلفتي نظره و دا حرااام و غباء منك ازاي تغيري لبسك و حياتك علشان واحد اصلا عايز يتسلى بس لانه اعجب بالبنت بتاعت التيك توك و اعجب بيقي لما بقيتي متبرجه و دا اللي عايزه و اظن انتي عارفه كدا انا بكلمك زي اخت ليا و خايفه عليكي جدا و زعلت عليكي و حسيت بكسرتك لما الولد اعجب بالبنت ولما كمان بطل يهتم بيكي بس من البدايه الغلط من اختي اللي هو انتي لانك عملت حاجات حرام علشان واحد ميستاهلش نظرة منك...تعرفي لو رجعتي لربنا و تبتي كل اللي انتي حاسه بيه هيختفي و انتي هتتغيري للأحسن...انصحك تبعدي عن الاولاد و دا لازم منك اصلا لانهم مش مضمونين خالص استني الزوج الصالح مش الذكر اللي هيهتم بيكي اكتر و هيحبك اكتر و معرفش اي افتكري ان طول ما انتي مش ميراته هيعاملك بالطريقه الحلوه دي علشان متمشيش و تسيبيه هو ممكن او اكيد واخدك كـ تسليه بس لحد ما يشوف البنت اللي هو مقدرش يكلمها و يتجوزلها و يسيبك ساعتها انتي اللي هتتاذي والله لانه كدا كدا حاطك ف خانة التسليه اما انتي هتتعلقي بيه و هتحبيه اكتر و هتبني مستقبل ف خيالك هو اساسه و لما يسيبك هتتدمري...والله احنا غلابه اووي بجد نتعلق و نحب و نحلم بالشخص كذا و هو اصلا كل همه ازاي اخليها معايا لحد ما الاقي غيرها بس .. ربنا يهديكي و يهدينا يارب و يبعد عننا الاولاد الشريرة دي🤦🏼♀️😂🤎
تم النشر السبت، ٢ مايو ٢٠٢٦
واحنا هنا يا حبيبتي خوات ليكي إسألي وفضفضي وأحنا معاكي وعبري عن مشاعرك كلها 💕🥹
تم النشر السبت، ٢ مايو ٢٠٢٦
بصي يا حبيبتي كلنا بنغلط ولكن الغلط هو أننا نبطل محاولة ... انتي أكيد مريتي بعبارة من ترك شيئاً لله عوضه الله خيراً منه دلوقتي الساعة 12 عايزاكي تروحي تتوضي وتصلي ركعتين قيام... بصي بقي تصلي بكل صدق... تنوي التوبة اتكلمي مع ربنا أيقني إن هو شايفك ... فضفضي بالله عليكي مع ربنا اتكلمي بكل اللي جواكي بكل صدق هو حاسس بيكي فاهمك ربنا بيحب العبد التواب جداً.. كل بني آدم خطاء وخير الخطائين التوابون ... أكيد ربنا فاهمك وحاسس بيكي أكتر مني ومن أي حد بل أحن عليكي أكتر من أمك وأبوكي ...وبالنسبة لاحتياجك للكلام الحلو .. والله أنا محرومة منه ومش بلاقيه بس حاطة أمل بربنا ويقين إني لما أتزوج زوجاً صالحاً إن شاء الله هيعوضني بكل ده فهمتيني يعني خلي عندك يقين بربنا ..... وممكن تسمعي الشيخ محمد حجازي علي اليوتيوب هيقولك تفسيرات فظيعة وربنا يرزقنا وإياكِ زوجاً صالحاً تقياً نقياً غنياً معافي يحب الله ورسوله ويتقي الله فينا بإذن الله تعالى 🤲❤️🫶😊
تم النشر الأحد، ٣ مايو ٢٠٢٦
مش عرفة يمكن وجودى فى بيئه عبارة عن ارتباط وحب وكلام حلو قبل الجوز هو الخلانى كده ويمكن عشان ارضى غرورى انى اقدر اعلق كذا حد بيا بس انا مرهقه فعلا انا الحياتى الدنية نفسها مش زى الاول وبرضوا حاسه بذنب اتجاه اى شاب معجب و فى اول كلامى بقول اننا اخوت وانا مش هرتبط وبخاف برضوا حد فيهم يتعلق بيا عشان ميحسش ال انا حاسه انا كل البعملوا دلوقتى انى بحاول ارجع زى الاول حتى المكيب بقللوا وبحاول الاتزم بصلاة و إن شاءلله هخالص الامتحانات ويكون علاقتى تنقطع بيهم
تم النشر الأحد، ٣ مايو ٢٠٢٦
إيه العبث ده ؟! لازم تخرجي نفسك من الحوارات دي وآخر شهر يعدي على خير وتبعدي عن المكان المختلط ده أصلًا . والجانب الأهم إنك تراقبي قلبك دايمًا وتسعي إنك تخلصيه من أي تعلق عشان ربنا مايغضبش منك وعشان نفسك اللي هتتبهدل لو تعلقتي وعشان زوجك المستقبلي ذنبه إيه إن مشاعرك المفروض تكون ليه وتديها لغيره ده غير إنك مش هتستمتعي ولا دلوقتي لإنه حرام ولا بعدين لإن قلبك هيكون أرهق ، اتق الله في نفسك وحافظي على قلبك
تم النشر الأحد، ٣ مايو ٢٠٢٦
ليه دا كله ؟ انتي في غفله حرفيا يلبسك دبله ويقعد جنبك ويغمزلك !؟؟؟؟؟؟ انتي مستوعبه الي انتي بتقوليه؟
تم النشر السبت، ٢ مايو ٢٠٢٦
لعرض السؤال في فدني اضغط هنا