السلام عليكم، حاولي تفصلي كل الأحاسيس دي وتركزي على المطلوب منك حاليًا. حددي أولوياتك.. أولويتك دلوقتي إنك تركزي على مذاكرتك وتهتمي بها فممكن نؤجل أي أسئلة من دي لحد بعد الامتحانات. ممكن تلاقي في الآخر إن كل دي أسئلة ومشاعر بسبب مشكلتك في الدراسة. بتقولي إنك في سنة مهمة فأتوقع تقصدي ثانوية عامة؟ ضغط الدراسة والتوقعات اللي بتبقى عليكِ بتخليكِ تفكري في كل ده وتبدأي تشوفي كل المشاكل اللي محتاجة تتصلح في حياتك. ممكن كمان تكون سبب إحساسك إنك أقل وإنك معندكيش ثقة بنفسك. إحساس إن محدش فاهمك أو بيلومك، ممكن تيجي تشكي لحد فيقول لك بتدلعي فتزيد المشكلة، ممكن يقول لك روحي شوفي اللي وراكِ. أنتِ مضغوطة وحساسيتك النفسية هتخليكِ تتأثري بسرعة بردود أفعال الناس حتى لو كانت عادية أو مش مقصود منها إساءة لكِ. *** على فكرة، أكتر حد ممكن يدعمكِ في الفترة دي هو أنتِ. نمي إحساسك بالمسؤولية وحبك لنفسك، فكري في مستقبلك. اقعدي واكتبي كل اللي انتِ حاسة به واكتبي كل السيناريوهات اللي ممكن تحصل في حياتك إذا مفوقتيش لنفسك وبدأت تهتمي باللي وراكِ. ** أجلي خالص دلوقتي احتياجك للناس وقلقك بالنسبة لعلاقتك بهم ونظرتهم لك وكلامهم... كل ده ملوش لازمة حاليًا. لو أهملتِ دراستكِ هيفضل عندك إحساس إنك أقل من الناس. اهتمامك بدراستك وتعلمك مهارات تانية جنب الدراسة حتى لو عشر دقايق في اليوم هيخليكِ تدريجيُا تثقي بنفسك وقدراتك وإنك بتتغيري وهيخلي ثقتك بنفسك تعلى مع الوقت وهيبدأ إحساسك بالحاجة للآخرين وتقديرهم تقل. هتلاقيكِ بتستمدي القوة وإحساس الاكتفاء الذاتي من نفسك ومش هتدوري على رضا الناس ولا تتنازلي عشانهم. شوفي الفيديو ده هيساعدك تصححي شوية مفاهيم عشان تخرجي من الدايرة دي وتبدأي تهتمي بحياتك ودراستك. https://www.youtube.com/watch?v=8xO-FS0IJKs&t=942s&ab_channel=dr_AsmaaElkady بالتوفيق.
لعرض الإجابة في فدني اضغط هنا