السلام عليكم
بحس اوقات كتير اني بشخصيتين كأني بتحول حرفياً تعبت
يعني ابقي مبسوطه وكويسه وبالظبط الدقيقه اللي بعدها احس تاني بملل وخوف وتفكير زايد وفقدان شغف في أي حاجه ومش طايقه اي حاجه ولا اي حد مش طايقه اسمع كلام من حد وبالذات السلبي
انا اصلا باخد علاج نفسي واتشخصت اني عندي وسواس قهري بس بحس العلاج مش بيعمل اي حاجه
دايما بعطي الحاجه أكبر من حجمها وافكر فيها زياده عن اللزوم
انا اصلا شخصيتي مضطربه طول الوقت افكاري دايما في حرب شغاله حتي وقت النوم افكار سلبيه وإيجابية بتحارب جوا دماغي تعبت حاسه دماغي مش مرتاحه فيه دوشه جوا
بزهق علطول بحاول اعمل حاجات كتيره وحاجات جديده بس برضوا زهقانه جدا وبجد تعبت لاني انا في الحوار ده بقالي اكتر من ٦ سنين
بتعصب بسرعه اوي مش عايزة اسمع اي صوت ولا حد يتكلم معايا وبالذات اني مش لاقيه حد يفهمني
طول الوقت بحاول اقرب من ربنا واصلي وادعي وأقرأ الاذكار
وعندي يقين تام والله ان ربنا هيعوضني وهيفك عني بس اوقات بحس ان ممكن يكون ربنا غضبان عليا عشان بعمل العبادات بالعافيه بحسها تقيله عليا وللاسف بعمل ذنوب كتير زي اني بسمع اغاني واتفرج ع مسلسلات واحط ميكب وكده
ودايما بحس اني شخصيتي ضعيفه وجبانه لان انا حرفياً بخاف من كل حاجه
حالي بيتقلب بسرعه اوي يعني خلاص احس اني مبسوطه وفجأه اكره حياتي كلها وابقى مخنوقه واعيط من غير سبب
تعبانه نفسي ف حل دائم يعني انا حرفياً عملت كل حاجه ممكن اعملها يعني بكتب اللي جوايا والحمدلله بصلي وباخد علاج وبخرج وبحارب الافكار السلبيه بس دماغي مش بترتاح بجد تعبت
مش عايزة اكون بفتي بس هو اللي انت كاتباه ده اعراض الشخصية الحدية.. انا كنت زيك بالظبط وما زلت وبتعالج نفسيا من سنة ٢٠١٩ وكنت متشخصة اضطراب ما بعد الصدمة النفسية بس مؤخرا الاخصائية النفسية بعد ما ممريت بكذا شيء قالت انه فيه احتمالية كبيرة اكون بورد لاين او شخصية حدية فلما بدأت ابحث عرفت انه الوصف ينطبق عليا الشخصية الحدية ما عندهاش منطقة رمادية يا ابيض يا اسود والمشاعر عندها بتتغير في نفس اليوم بسرعة رهيبة لحظة مبسوط ولحظة حزين لحظة بيحبك ولحظة بيكرهك عقله شغال طول الوقت تفكير في كل شيء .. لو حد اتصرف تصرف عادي جدا هو مش بيشوفه عادي وبيفسره بشكل اعمق واصعب فمحتاجة تشاركي مع المعالج النفسي بتاعك الفكرة دي والاعراض بدقة علشان التشخيص يكون سليم وقولي له انه العلاج مش حاسة بنتيجته علشان يقدر يساعدك
تم النشر السبت، ٢٨ مارس ٢٠٢٦
وعليكم السلام ، الشئ وعكسه مخلوقين يتنافسوا ، في الحياة ، في البشر ،في الكون ، أيا كان ، فاللي جواكي ما هو الا امتداد للكون و للي بيحصل فيه ، و محدش ماعندوش افكار سلبية و محدش ما فكرش مره في حياته ع الاقل انه يعمل حاجه مش بس سلبية لا ده يمكن محرمة ، و ما يعملهاش ، الفكرة ان عندك الصوت عالي شوية ، مش صوت السلبيات لأ ، الصوت بشكل عام ، فالدوشة كبيرة و مأثرة على حياتك ، عامل زي راديو شغال على تردد و مره واحده التردد فصل فتسمعي ،ششششششش بصوت عااالي ، و تضايقي و أول ما تشدي الفيشه ، واو هدووووء ، لما بسمع في راسي صوتين ما بحاولش احاربهم او اوقفهم ، بروح اقعد في مكان هادي و افصل نفسي عنهم و اتفرج عليهم و اركز مع كلامهم ، من غير احكام ، في الأول و في الاخر الاتنين انا ، و تركيزي معاهم بيكشفلي مين انا من جوايا ، بس ما ادخلش بينهم ، اتفرج بس ، لحد ما يخلصوا و أكمل حياتي عادي ، لا اضغط عليهم لا احاربهم لا يضايقوني لا يستفزوني ولا يعطلوا حياتي ولا احرمهم من الكلام ، ادي نفسي و حياتي وقتهم و اسيبلهم وقتهم ، وأوقات بتكلم معاهم و نضحك و نهزر و عايشين و مبسوطين و زي الفل ، واحد يضايقني فيقولي نضربه او نأذيه او يفكرلي في خطة اقوله لأ يجدع مش كده ما تبقاش جاحد 😅 و اخدها بهزار ، اوقات بيجي عليا انا و يقولي انت و انت و انت يفضل يوم فيا و يعاتبني ، واسمعه للاخر و اجاوبه بهدوء انت عندك حق و ده هيتغير و هنعمل واحد اتنين تلاته علشان نصحح كل ده ، و هكذا ، و يسلام لما يبقوا رايقين و نقعد مع منى الشاذلي بنحاوبها ازاي بقينا كده 😂😂 ، اكشن جوايا طول اليوم و أنا في مكاني ، ناس تيجي و تروح و مواقف و مشاكل ، وانا فاصل الفيشة عن كل اللي بره و مبسوط باللي بيحصل جوه ، علشان اكتشفت ان التردد اللي بره هو اللي بيشوشر على التردد اللي جوانا ، فأنتي مش محتاجه تشدي فيشة جواكي ، انتي محتاجه تشدي الفيشة اللي بره ، و تظبطي ترددك مع اللي جواكي ، و هتلاقي الحياة بقت الذ بكتير عن اللي حواليكي ، وبالتوفيق 😊
تم النشر الجمعة، ٢٧ مارس ٢٠٢٦
بصي يا بنت الحلال لازم تعرفي إن اللي أنتي فيه ده جهاد حقيقي وبقالك 6 سنين بتقاوحي وده في حد ذاته قوة مش ضعف وأول حاجة لازم تعمليها هي إنك ترجعي للدكتور بتاعك وتتكلمي معاه بصراحة إن العلاج مش مريحك لأن ساعات الجرعة أو النوع بيحتاجوا ضبط عشان الدوشة اللي في دماغك دي تهدى وتاني حاجة بطلي تجلدي نفسك وتحسي إن ربنا غضبان عليكي عشان العبادات تقيلة عليكي أو عشان بتسمعي أغاني لأن ربنا عارف إنك مريضة وتعبانة والمرض بيخلي أبسط الحاجات جبل فرفقا بنفسك ومتحاربيش الأفكار السلبية بعنف لأن المقاومة هي اللي بتزود الدوشة سيب الفكرة تيجي وتمشي زي السحابة من غير ما تردي عليها ولا تحلليها وصدقيني ربنا شايف محاولاتك دي ومقدرها جدا وهيعوضك خير بس بلاش تضغطي على أعصابك فوق طاقتها وخليكي حنينة على نفسك شوية وجد والله ربنا يحفظك ويسعدك
تم النشر الخميس، ٢٦ مارس ٢٠٢٦
وعليكم السلام ورحمة الله وبركاته يا حبيبتي 🌸، أول حاجة، أنا فاهمة تعبك تمامًا.. اللي بتصفيه ده زي "عاصفة داخلية" بسبب الوسواس القهري والتقلبات المزاجية، وده شائع جدًا، وأنتِ مش لوحدك. الحمدلله إنك بتحاولي وبتصلي وبتدعي، ده أساس قوي. بس خلينا نركز على حلول عملية ودائمة خطوة بخطوة، مع الالتزام بالإسلام والعلاج. 1. استمري في العلاج، بس غيري النهج إذا مش شغال: الوسواس القهري محتاج علاج سلوكي معرفي (CBT) متخصص، مش مجرد أدوية. لو الدكتور الحالي مش بيحقق تقدم بعد 6 سنين، غيريه أو اطلبي رأي ثاني من طبيب نفسي متخصص في OCD. في فدني، شوفي الخبراء هنا: https://www.fedni.net/experts – فيه متخصصين نفسيين هيقدروا يساعدوكِ بشكل شخصي. 2. روتين يومي بسيط لتهدئة الدماغ: ابدئي اليوم بـ5 دقايق قرآن: اقرئي سورة الشرح أو الإنشراح يوميًا صباحًا، وركزي على معناها (فَإِنَّ مَعَ الْعُسْرِ يُسْرًا). ده بيحارب الأفكار السلبية علميًا وروحيًا. أذكار الصباح والمساء ثابتة: اجعليها عادة زي غسل الأسنان، مش "بالعافية". استخدمي تطبيق زي "حصن المسلم" عشان تتابعي. قبل النوم: ورد ليلي قصير – صلاة الوتر + دعاء "اللهم إني أعوذ بك من الهم والحزن" 3 مرات. ده بيقلل الدوشة اللي جوا الراس. 3. حاربي الأفكار السلبية بطريقة عملية: لما يجيلك الزهق أو الخوف، اكتبي 3 أشياء شاكرة لله فيها (مثل: صحتي، عائلتي، إيماني). بعدين، قولي "هذا اختبار من ربنا، وهو هيعوضني خير" – زي ما عندك يقين. قاعدة 5 دقايق: لو حسيتِ مش طايقة حاجة، قولي "هعملها 5 دقايق بس" (زي مشي أو تنظيف). غالبًا هتكملي، وده بيبني الشغف تدريجيًا. عن الذنوب (أغاني، مسلسلات): ابدئي بتقليلها يوميًا بنسبة 50%، واستبدليها بقصص الأنبياء أو بودكاست إيجابي. ربنا غفور رحيم، مش غضبان – الندم ده توبة! 4. للعصبية والتقلبات: حددي "وقت هادئ" يوميًا ساعة لوحدكِ بدون أصوات (اقفلي الموبايل). مارسي رياضة خفيفة زي المشي 20 دقيقة يوميًا – ده بيعدل المزاج طبيعيًا. نامي 7-8 ساعات منتظم، وكلي وجبات متوازنة (فواكه، مكسرات) عشان الدماغ ميتعبش. أنتِ قوية يا بنتي، و6 سنين حرب دي دليل على صبرك. الحل الدائم مش سحر، بس الاستمرار ده + مساعدة متخصص = راحة إن شاء الله. جربي دول أسبوع وشوفي الفرق، وبعدين ابحثي في فدني عن أسئلة مشابهة زي "وسواس قهري" هتلاقي إجابات كتير تساعدكِ. إذا عايزة تتكلمي أكتر، أنا هنا دايمًا. ربنا يفرج همك ويثبت قلبك 💕. الله يشفيكِ ويعافيكِ.
تم النشر الخميس، ٢٦ مارس ٢٠٢٦
قال رسول الله صلى الله عليه وسلم : من لزم الاستغفار جعل الله له من كل ضيق مخرجا ومن كل هما فرجا ورزقه من حيث لا يحتسب .
تم النشر السبت، ٢٨ مارس ٢٠٢٦
انتى منتظمة على العلاج ؟ فية واحد زميلى كان نفس حالتك والحمد لله اتحسن جدا بس كان مواظب مع دكتور مخ وأعصاب كويس وبيكتبله علاج وبيواظب عليه والحمد لله أحسن بكتير أوى + العبادات كنت بقومه للصلاة كان بيقى صعب اه بس كان بيتجاوب معايا فكان التزامه فى العبادات سبب برضه + وفيه حل سحرى حرفيا الالتزام بقرآة سورة البقرة يوميا هتلاقى مفعول السحر حرفيا
تم النشر الجمعة، ٢٧ مارس ٢٠٢٦
لو حاسه الدكتور مش كويس او العلاج مش بيجيب نتيجه شوفي حد تاني لأنه مفروض العلاج يساعدك وبالذات الوسواس اظن بيبقى ليه علاج سلوكي معين مش بس دوا يعني اظن بيقولك على تمارين او حاجات معينه تساعدك ازاي تتعاملي مع الافكار دي والمفروض تتحسني مع الوقت وحقيقي ربنا يهدي عقلك وبالك ويخف من عليكي الغمه دي وصدقيني ربنا كريم اوي واللي انتي فيه ده يخلي اصلا القومه من السرير صعبه فما بالك انك بتحاولي وبتسعي بكل الطرق دي ف بلاش جلد ذات عشان اصلا ده بيغذي المرض اكتر ولو حابه تتكلمي في اي وقت هحب اسمع ونكون صحاب وربنا يكرمك
تم النشر الخميس، ٢٦ مارس ٢٠٢٦
انك تكوني بتعملي عبادات بالعافيه دي بالعكس حاجه كويسه لأن الثواب علي قدر المشقه وليه بصه الموضوع انو عقاب ما يمكن ربنا عاوزك تقربي منو اكتر عاوز يختبر صبرك علي البلاء عاوز يسمع منك الحمد الله رغم الشده وكلنا عندنا ذنوب وعندنا أخطاء وخير الخطاؤون التوابون وجميل انك معترفه بذنوبك هو دا اول طريق التوبه فا جاهدي نفسك و قربي من ربنا اكتر وادعي كتير وطبعا معا الأخذ بالاسباب زي العلاج وانك تتعلمي ازاي تتحكمي في مشاعرك وتبعدي عن أي ضغوطات نفسيه وكده و ربنا يشفيكي ويرزقك راحه البال
تم النشر الخميس، ٢٦ مارس ٢٠٢٦
ممكن يكون تقلب حاد في المزاج ... هل عشتي في بيئة متقلبة ؟ يعني مثلا تكونوا هاديين وفجأة زعيق ومشاكل وبعدين ترجعوا هاديين تاني
تم النشر الأربعاء، ١ أبريل ٢٠٢٦
لعرض السؤال في فدني اضغط هنا