السلام عليكم ورحمة الله وبركاته
انا بكتب مشكلتي وانا بجد زعلانه جامد ي جماعه هو اغلب اللي حواليا واخدين فكرة ان فلانه شخص ملتزم وفلانه شخص كويس انا ببقى نفسي اقلهم اني حتى لو في نظركم كدا ف انا بجد موصلتش لكدا بالساهل بمر بصراعات نفسيه وذنوب انا بجد تعبتلها نفسي
وبحس والله اني شخص منافق مشكلتي الوحده انا وحيده عند اهلي وهما منفصلين وراضيه الحمد لله بس مشكلتي ان أبواب الذنب بتبقى مفتوحه طول الوقت بحس بصراع نفسي اني بدور ع حد يسمعني من برا وبجي عند آخر لحظه بقول لاء ميصحش مش عاوزين نعمل كدا تاني ونغضب ربنا
فعالجت المشكلة اني نص اليوم بشتغل الفترة المسائية بحيث مش الاقي وقت للتفكير بس وقت الضهر تعبت بجد انا مش عارفه اي اعمل خاصة. اكتشفت تطبيق مليان ناس بس دماغهم غريبه فمشيت وتركته قدرت معملش اي ذنب القيت نظرة بس مدايقه كل شويه هتلاقي حد يسمعك طب دوري برمي الفون واسيب المكان انا مشتته بجد وقلبي واجعني حتى قيام الليل انقطع مني وصلاة الفجر تايهه والله معرفش إيماني قل والصلاة تقيلة علي قلبي
وأفضل اتذكر ذنوب عدا عليها سنه بقى واجلد ذاتي انا مش عارفه اعمل اي @Esmat Ali
وعليكم السلام ورحمه الله وبركاته بصي يابنت الناس طلعي فكرة إنك منافقة من دماغك خالص لأن المنافق ما بيموتش من الوجع والذنب زي ما انتي حاسة ولا بيجاهد نفسه عشان يراددها ويبعد في آخر لحظة، انتي بس حاسة بفراغ وعزلة ومحتاجة حد يسمعك وده شعور إنساني طبيعي جداً مش عيب ولا جُرم واقطعي حتت جلد الذات لأن الشيطان بيستغل ذنوبك القديمة ويكبرها في عينك عشان ييأسك من رحمة ربنا ويتقّل عليكي الصلاة وينغص عليكي عيشتك الحل بجد واللي انصح بيه ...هو إنك تملي وقتك وفراغك اللي بعد الظهر بحاجة بتحبيها ..هوايه .. وتستثمري وقتك في رياضة أو كورسات وتنزلي تختلطي بناس طيبين وكويسين يشبهولك في الحقيقة مش على برامج وتطبيقات مجهولة وقربي من ربنا واحدة واحدة وبلاها تكليفات زيادت على طاقتك حالياً حافظي بس على الفروض الخمسة في وقتها واستغفري كتير وأول ما يجيلك صوت جلد الذات استعيذي بالله واستحضري إنه بيحب التوابين وافتكري دايماً إن ربنا أرحم بيكي من نفسك وسيبك من كلام الناس ورأيهم فيكي وركزي في علاقتك الحقيقية مع ربنا هي دي اللي هتديكي الأمان والسلام الداخلي ... وحاولي لو متاح معاكي حلقات تحفيظ القران الكريم انزلي حلقه واختلطي بناس كويسه تعينك ... وحاجه اخيره متنسيش أننا بشر وبنغلط في كلنا عندنا تقصير مش انتي بس ... وجد والله ربنا يحفظك ويوفقك لما يحب ويرضى
تم النشر الخميس، ٢٧ أغسطس ٢٠٢٦
لعرض السؤال في فدني اضغط هنا