انا عمري 16 سنه وكان في واحد بيحبني وانا مكنتش واخده بالي بعد كده لحوالي شهر خدت بالي انو بيحبني وبدأ يهتم بيا واول ما اتعلقت بي قرر انو يبعد
انا وهو عمرنا متكلمنا وانا حاليا نفسي أنساه بس المشكله اني بشوفه كل شويه لأننا جران ياريت حل
بالظبط هو ده اللي هو عايزه .. فقد تمت المهمه بنجاح. هو بس كان بيشغل بالك، علشان تقعي فيه وبعد كده خلاص هو حس كده بنفسه وبأهميته والدور خلص ومشي .. هو مكانش بيحبك، ولا انتي كمان بتحبيه. انا قولتلك هو عمل ايه .. لكن مقولتش لسه ايه اللي حصل معاكي بالظبط. الحب حاجه، وفكرة انك تعجبي بحد ده حاجه تاني. انا متقبله ان في السن ده ممكن يكون عاجبك حد، بس في الحقيقة مفيش شئ اكتر من كده في السن ده .. غير انك تنجذبي لشخص. الحب محتاج مواقف وسنيين علشان يتبني وعلشان تبقى متيقنه انه حب. تقدري تسألي نفسك سؤال؟ انتي بتحبي الشخص ده ليه؟ عمل ايه علشانك؟ اهتم بيكي شوية؟ هل الاهتمام حب! هل الكلام الحلو حب؟ اكيد لا، ثانيا ده مراهق .. يعني ل اما اكبر منك بشوية ل اما قدك في السن منتظرة ايه من ولد صغير؟ ومنتظرة ايه من نفسك انتي وانتي عندك 16 سنة! ماذا بعد؟ لو دخلتي في اي علاقة هتعملي فيها ايه وانتي لسه بنوتة صغيرة ؟ هتقعدي فيها 10 سنيين مثلا لحد ما الطرف التاني ده يكون نفسه مثلا؟ ولا لحد ما انتي تحسي انه مش هو ده اللي انتي عايزاه او هو مثلا! ما هو ده اللي بيحصل .. السن ده بالذات وفيما فوق اي طرف لو دخل علاقة بيبقى الاحتمال الاكبر انه يمشي منها. حتى لو كان صادق؟ اه حتى لو كان صادق لانه مع نضوج الشخصية والفكر انتي بتتغيري وهو كمان .. ف مرة واحده هتقولي لنفسك ايه ده انا مش هو ده اللي انا عايزاه. حطي ببالك ان مش اي حد تصدقيه، مش اي حد يهتم بيكي شوية تقولي ده بيحب، لان الطبيعي طبعا انك مش هتعرفي تفرقي في السن ده ما بين مشاعرك .. فاي شعور حلو هتقولي عليه حب ولكن هو بيكون انجذاب فقط لاشياء معينه. ركزي ع دراستك ونفسك ف الوقت الحالي، ومتقلقيش الحب والجواز هيجي هيجي والمسؤولية كمان، ف هتروحي منها فين! ومتصدقيش اي واحد وخلاص، علشان تقولي الشخص ده صادق لازم يجي البيت علشن يتقدم، غير كده اعرفي انه بيكدب عليكي. وعلشان تنسييه .. فهو مفيش حد بيفقد ذاكرته ولا بينسى! انتي عليكي فقط انك تعرفي انه مش حب، وبعد كده هتفوقي لنفسك.
تم النشر الأحد، ٢٤ سبتمبر ٢٠٢٣
حاولي تجنبيه قدر الإمكان. عارفة إن ده صعب، بس حاولي تقليل كمية الوقت اللي بتقضيه معاه. لو ممكن، حاولي تمشي في طرق مختلفة عن اللي بيمشي فيها، أو تروح أماكن مختلفة عن اللي بيروحها. ركزي على نفسك. ركزي على تنمية مهاراتك واهتماماتك. اقضي وقت مع أصحابك وعائلتك. خليك مشغولة بأشياء تحبيها.
تم النشر الأحد، ٢٤ سبتمبر ٢٠٢٣
فى البداية سنك صغير جدا على حكاية الحب والكلام ده فلازم تعرفى ان أى حد هيحاول يتكلم معاكى ومحادثات طول الليل ومكالمات وكلام مزيف اعرفى ان غرضه مش شريف فلازم متتعلقيش بحد دلوقتى وأكيد إنتى فى مرحلة دراسة فأهتمى بيها حاليا وإعرفى ان أى حد غرضه شريف لما يحبك فعلا هيسأل عليكى ويتقدم لوالدك ومتنسيش إن لو انتى دخلتى فى موضوع المحادثات طوال الليل هتكتسبى سمعة سيئة بين الجميع فتجنبى الموضوع ده
تم النشر الاثنين، ٢٥ سبتمبر ٢٠٢٣
لعرض السؤال في فدني اضغط هنا