ابن عمتى كان بيحبنى اوي صارحنى بالموضوع كذه مره لكن انا ف كل المرات كنت اقوله احنا اخوات ولا مره عشمته بس هو كان يقول ماشي وانا هحاول أنسى بس برضو هقعد اتكلم معاك احنا كده كده اخوات مفهاش حاجه مرضيتش اكسر بخاطره في دى برضو وقعدنا نتكلم كتير ونهزر مع بعض كان يساعدني في حلول مشاكل ساعات وكان بيخاف ع زعلى كان بيدلعنى علطول ويقولى اى حاجه انتى عايزاها هعملها وكان تجى سيره نفس الموضوع تانى واقوله احنا اخوات تانى مرات كان يقول خلاص انا هحاول ابعد عشان أنسى مرات كان يبعد ومرات لا وكنا برضو نرجع نتكلم تانى وكويسين تانى وجوده ف حياتى كان موضوع لطيف وهو طريقته معايا اتعودت عليها
تمر بتاع ٨ شهور كتير من المحاولات كتير من التعود فجأه عايز اى يجى يخطب اختى مع العلم انه انا ١٩ سنه واختى ١٦ المهم ازاى ده تكون بتحبني وعايز تتجوز اختى ايوه صح انا رفضاك بس برضو ليه كده
المبرر انه عمتى عايزه تاخد واحده منا لأنها بتحبنا اووى جابت سيرتى هو مقالش انه اتكلم معايا او انه رفضته لا قال هى عايزه تكمل تعلميها خلاص شافوا اختى واتو اتكلموا ف الموضوع على فكره برضو موضوع اختى مرفوض ...
سيبنا من ده دلوقتي وخليني احكى الجزء التانى من حوالى ١٠ ايام دخل شخص قال انه عايز يجى يتقدم لى وباخد رأي، انا معرفوش وهو مش من البلد انا قلت يمكن مقلب وكلمت ابن عمتى عشان يكلم الشاب ده ويقوله عيب انه يدخل كده هو متاخرش وحصل المهم شتمه جامد والواد طلع محترم ومش رد عليه جه بعدين الولد رن عليا كم رقم تانى انا بقول الووو بكل هدوء واحترام طيب ينفع اللى حصل ده انا كنت طالب خير مش شر
المهم قفلت ف وشه ورن كتير روحت فكيت البلوك وقلته بترن كتير ليه حكالى كل حاجه وانه فعلا طالب البيت من بابه نهيت معاه الكلام وقلت اللى عايزنى يشوف اهلى انا مش بجى كده بينى وبينكم هو كل مواصفاته كويسه وحاسه انه كويس وممكن أوافق فقلت اديله فرصه مرضيتش اقول لابن عمتى االى حصل تانى قلت بلاها مشاكل خصوصا انه بيحبنى
المهم حصل وعرف مش مهم للتفاصيل عشان مش أطول اكتر من كده بس ابن عمتى غلط فيا جامد قالى انتى نزلتى من نظرى انتى تكلميه ليه طيب ملكيش اهل انتى وانتى وانتى..
مش ادانى فرصه افهمه االى حصل وقالى اوعى تكلميني تانى وانتى ملكيش ابن عمه وعملى بلوكات من يوم اللى حصل ده أول مره يجى بيتنا النهارده عشان العيد محطش عيونه عليا خالص ومرضيش خالص يتكلم معايا ولا يعملى اى اعتبار كأنه مش موجوده بيسلم كده وكده وقاعد الوقت كله باصص ف الموبايل ويضحك كأنه بيقولى غيابك يعني ماثرش فيا ولا حاجه او انه انتى مش كويسة وده االى فاهمه
مع انه أنا والله العظيم محترمه جدا جدا وهو نفسه كان بيشكر فيا جامد علطول ويقولى انتى احسن واحده ف الدنيا عمرى ما وجهه نظري تتغير فيكى انتى محترمه اوووى مع انه كان بيقول كلام مش محترم كتير وانا كنت بسكته وجاى بعد المشكله يقولى اى اوعى تفتكرى انك الملاك كفايه تمثيل...
دلوقتي هو ازاى اتغير معايا كدا انا الموضوع ماثر عليا جامد ومش عارفه افهمه ازاى انه فهم غلط ولو حتى انا غلطانه يسمعنى مش كده الطريقه
طيب فكري معايا بصوت عالي انت دلوقتي عايزة ايه بالضبط؟
تم النشر السبت، ٧ يونيو ٢٠٢٥
السلام عليكم.. ازيك يا قمر .. معلش لو كلامي معاكي هيبقى قاسي شوية .. متحاوليش توضحي لحد انك كويسة بجد .. اللي مفهمش انك كويسة بعد العمر والعشرة ف متحاوليش توضحيله انتي ايه.. المهم ربنا عارف وعالم انك كويسة ومحترمة .. وحاولي تبعدي عن المشاكل دي كلها علشان اخرتها وحشة .. اركزي ع مستقبلك ومتستعجليش ع العريس علشان تعرفي تختاري صح .. انتي لسه صغيرة .. وعايزاكي تفهمي حاجة الإنسان المحترم بجد مش هيحاول يكلمك .. لو عايزك هيكلم باباكي .. ومتقوليش هيجيب الرقم منين والكلام دا .. اللي خلاه يحاول وجاب رقمك كان يخليه يجيب رقم باباكي .. فمتحكميش ع اللي قدامك أنه محترم بسرعة كدا .. لو محترم وخايف عليكي مكنش كلمك من ورا اهلك .. ف خلي بالك من نفسك وربنا يبعد عنك كل شر يارب
تم النشر الاثنين، ٩ يونيو ٢٠٢٥
في هذه اللحظة سيبنا من ابن عمتك و سيبنا من الراجل اللي جه اتقدملك و سيبنا من وجع الدماغ و الحاجات اللي ملهاش لازمة، مفيش داعي انك تبرري لابن عمتك موقفك، اهم حاجة انتي عارفة نفسك كويس، لازم تقعدي قاعدة مع نفسك تفكري انتي موافقة ع الشخص ده ولا لا بغض النظر عن ان انتي كلمتيه و ابن عمتك عرف و اضايق و كده انا عارفة ان انتي بتعزيه بس اهم حاجة نفسك، هو يمكن اضايق عشان انتي حطتيله حدود و اديتي فرصة للي جه اتقدملك ف هو زعل شوية و ده حقه بس مش معناه ان انتي السبب أو انتي المشكلة هي فترة زعل و هتعدي، بس انا عايزاكي تركزي ع نفسك انتي و تعرفي انتي عايزة الشخص اللي جه اتقدملك ده ولا لا، و طالما انتي عايزة تديله فرصة اديله و جربي و خوضي التجربة و ابن عمتك لما يهدى شوية ساعتها اتكلموا مع بعض و وضحوا سوء التفاهم اللي حصل بما انه برده شخص عزيز عليكي و زي اخوكي، بس في الأول و الاخر انتي ليكي الحرية انك تختاري و الاختيار اختيارك انتي و استخيري ربنا عشان تعرفي ايه الأحسن ليكي و متخلبطيش نفسك و تدخلي في دوامات ملهاش لازمة اهم حاجة انتي و صحتك
تم النشر الاثنين، ٩ يونيو ٢٠٢٥
السلام عليكم انتى كنتى مبسوطه من حالة الحب وانك مرغوبه حتى لو انتى بترفضى واصراره حسسك انه مخلص ليكى رغم رفضك او يمكن كان نفسك يفضل متعلق بيكى لحد ما انتى ترضى بيه انتى اختارتى طريق وهو من حقه يختار طريقه ومش من حقك تقولى ازاى عمل كده طالما ماقولتيش لنفسك ازاى انتى عملتى كده هو حقه ياخد منك موقف لانك كبرتيه وصدرتيه يكلملك الشخص ده وبعدها صغرتيه وما اخدتيش حتى رأيه او بلغتيه انك هتديله فرصه زى ما بتقولى
تم النشر الأحد، ٨ يونيو ٢٠٢٥
لعرض السؤال في فدني اضغط هنا