مشكلاتي كل ما احاول أعالجها معرفش واقف عمال بدور في دايرة بنفس كل حاجة يومي مفهوش حاجة مميزة
اعتذر على الاطالة
1.بضيع وقت
2.مش بشغل بجد وكل ما اشتغل نص ساعة احلم اكني ايلون ماسك
3.بتمرقع كتير
4.لازم عشان اعمل مهمة تكون قبلها كل حاجة مثالية
5.احلام اليقظة بالذات لما اسمع اغاني
6.لازم استنى حاجة معينة عشان اعمل حاجة مهمة
7.حتى لو كملت والتزمت يوم اتنين تلاتة اوقف واقعد شهر نايم واقف مكاني اكل واشرب بس
8.انا بعد تانية اعدادي بالتفصيل مع بداية الترم التاني لما قعدنا اجازة الترم كله بسبب حظر
تجوال عشان كورونا مرض حاسس ان كل حاجة اتغيرت فيا بعدها علي طول فضلت قاعدت لغايت تانية ثانوي وانا مش بخرج عاداتي
9.بضيع وقت ضخم
10.بقعد في مهمة معية وقت اكتر من المطلوب وغيري بيعملوا في نص وقتي
11.العادة السرية ولافلام الاباحية كل ما اوقف ارجع بعد تلت ايام وبعصي ربنا رغم اني وعدته بس اسف
12.انا غبي حاسس اني هطلع الاول علي العالم وانا معدوم وناس كلها احسن مني وعيال اكبر مني واصغر مني عملوا حاجة وانا واقف وعايش في احلامي لدرجة اني عشان اهرب من مسئوليتي وواقعي بتاعي اقعد اعيش هناك
13.معنديش ثقة في نفسي متزحزح القرارات
14.مش عارف اخرج من منطقة الراحة بقالي خمس سنين فيها
اتمني اني اكون وضحت مشاكلي انا عاوز حل لاني منهار ومش عارف ابدا وعاوز اطور بس مش عارف
شكرا
الهدف هو الحل ان شاءالله مفيش هدف واضح لنفسك ولحياتك مش هيكون فى دافع يقومك تعمل اللى وراك الاحلام مش اهداف الهدف بيكون محدد مثلا ..انا عاوز اكون صاحب شركه و بتشتغل فى كذا ويكون مكسبها كذا واحقق ده وانا سنى كذا كل الخطوات الصغيرة فى حياتك ضرورى تتربط بالهدف ده عشان يكون فى معنى دائم لكل حاجة فى حياتك كمان محتاجين يكون عندنا انتباه وتقدير للنعم اللى فى حياتنا ويكون جزء من هدفنا اننا نحافظ عليها ونخاف اننا نخسرها استخدام النعم اللى عندنا بشكل كويس هو اللى بيأكد شكرنا ليها
تم النشر الخميس، ٢٤ أبريل ٢٠٢٥
اولآ حسن علاقتك مع ربك وحاول وحاول تحسنها عشان دي لو حسنتها كل حاجه هتبقى سلسه استيقظ للدنيا الدنيا دي تحديات متوقع ايه ثانيا ابدا وحده وحده مش لازم تبدأ كل حاجه مره وحده نصيحه مني لو عاوز تبطل مشاهدة الحاجات دي امسحها من علي هاتفك تخلص من اي حاجه تتفعك انك تتفرج عليها حاول تقرب من ربك وعارفه ان الموضوع صعب عليك بس لازم تحاول تبدأ تمشي خطوه خطوه نصيحه مني لو شايف ان ده كله صعب تعالى اقولك حاجه هي سبب توبتي وال غيرت حياتي كلها ادعي ادعي ادعي حتى لو مش في صلاتك ادعي عادي ابحث عن ادعيه وادعي وما تخلي الدنيا أكبر همك افتكر ان في الاخر يا نار او الجنه وابحث ان بودكاست ديني وحاول تفهم نفسك وتحترمها
تم النشر الجمعة، ٢٥ أبريل ٢٠٢٥
حلو إنك تكون على وعي ودراية بالمشاكل ونقاط الضعف اللي عندك ، بس طول ما انت حاطط كل المشاكل دي قدام عينك وعايز تحلهم كلهم مع بعض وبتسعى خلف المثالية ف عمرك ما هتلاحظ أي تغيير ولا هتحس بأي نتيجة حتى لو بدأت تحقق تقدم بسيط مش هتكون مقتنع بيه وده اللي بيخليك كل مرة تزهق بسرعة وتستسلم وتبطل تسعى.. ده أولاً . ______ ثانياً أنا ملاحظة إنك بتسخر من نفسك وبتقلل من نفسك ومنشغل بمقارنتها بالآخرين والمقارنة دي بتهدم لو أخدناها من منطلق النقد اللاذع للنفس وجلد الذات بدل ما ناخدها دافع للتحدي وتكثيف المحاولات عشان شايفين قدامنا نماذج قدرت تحقق نجاحات معينة ف ده يزود إيماننا إننا نقدر احنا كمان نحقق نجاحات زيهم وبالإجتهاد والمثابرة ممكن كمان نسبقهم!. _____ ثالثاً ودي نصيحتي ليك انت محتاج في ظل التشتت الكبير اللي انت فيه ده إنك تحدد أولوياتك وتركز على الأساس اللي بيدور حواليه معظم عناصر التغيير الإيجابي الباقية زي علاقتك بربنا وتخليك عن العادات السيئة المحرمة واللي خطورتها على النفس كبيرة زي الأغاني والعادة السرية.. إلخ واللي هيساعدك وهيعينك على كده هو إنك تبدأ تشغل وقتك بما ينفعك وبالحاجات اللي المفروض تكون بتعملها بس انت مأجلها لحين توفر الظروف المثالية ، صدقني الظروف المثالية عمرها ما بتيجي ولو جت مرة مش هتيجي ألف والوقت اللي بنقضيه ف الندم والتحسر واللوم بيضيع من عمرنا ومابيغيرش أي حاجة يعني زي ما تقول نتيجة كل ده صفر ف النهاية!.. _____ لو مش هتبدأ تتحرك وتربي نفسك على الصبر والتأني والرضا ماحدش هيقدر يشدك ويخرجك من الحفرة اللي انت وقعت نفسك فيها أتمنى تبدأ خطوات فعلية عشان دايماً الحل لمشاكلنا هو الحل اللي احنا بنهرب منه أو بنأجله أو مابنصبرش عليه للآخر " الدوا مر بس بنتحمله عشان نخف " نفس الشيء بالنسبة للسعي عمره ما كان سهل بس النتيجة فعلاً تستاهل ، وتذكر قوله تعالى : ﴿.. إِنَّ اللَّهَ لا يُغَيِّرُ ما بِقَومٍ حَتّى يُغَيِّروا ما بِأَنفُسِهِم ..﴾ .
تم النشر الخميس، ٢٤ أبريل ٢٠٢٥
أخي العزيز، أقدر صراحتك ومشاركتك لمشاعرك وتجاربك. يبدو أن الأمور التي تمر بها قد تسببت لك في شعور بالإحباط والضياع، ولكن الوعي بمشكلتك هو الخطوة الأولى نحو التغيير. إدارة الوقت : حاول تنظيم وقتك باستخدام جدول زمني يحدد أوقات العمل وأوقات الاستراحة. ابدأ بأداء المهام الصغيرة أولًا لتكسب الزخم. تحقيق الأهداف : يمكنك تحديد أهداف صغيرة وقابلة للتحقيق، وضع خطة للالتزام بها. كل إنجاز صغير يساهم في بناء ثقتك بنفسك. التخلص من العادات السلبية : العادة السرية ومشاهدة الأفلام الإباحية تؤثر سلباً على نفسيتك وثقتك بنفسك. حاول إيجاد بدائل تشغلك، مثل ممارسة الرياضة أو قراءة كتب مفيدة. الاهتمام بالنفس : يمكنك ممارسة أنشطة تحبها والتي تعزز من مزاجك، مثل الهوايات أو اللقاءات مع الأصدقاء. الدعم الخارجي : لا تتردد في طلب المساعدة من المتخصصين إذا شعرت أنك وحدك في تلك المعركة، وهناك أطباؤ نفسيين ومؤسسات يمكن أن تقدم الدعم. تغيير التفكير السلبي : حاول تغيير الأفكار السلبية إلى إيجابية، فأنت لديك القدرة على التطور والنمو. خطوات صغيرة نحو التغيير : قم بخطوة واحدة يوميًا للخروج من منطقة الراحة، سواء كان ذلك بالتواصل مع أصدقاء أو الخروج لنشاط جديد. الفشل لا يعني نهاية الطريق، بل جزء من رحلة التعلم. ابدأ بخطوات صغيرة، وكن صبورًا مع نفسك. تذكر أن التحسن يتطلب وقتًا وجهدًا. إذا احتجت إلى مزيد من الدعم، يمكنك النظر إلى استشارة مختص في الصحة النفسية أو تطوير الذات. دمت بخير ونجاح.
تم النشر الخميس، ٢٤ أبريل ٢٠٢٥
حاضر شكرا علي النصيحة
تم النشر الأربعاء، ٣٠ أبريل ٢٠٢٥
صديقي انت حد حلو جدا وطموح وعندك طاقه حلوه بس محتاج تعمل حاجه بسيطه انك تشتغل وتشغل وقتك بحاجه مفيده علشان تبعد عن التفكير الزياده
تم النشر الثلاثاء، ٢٩ أبريل ٢٠٢٥
لعرض السؤال في فدني اضغط هنا