كنت مرتبطة بحد هو بمعايير المجتمع اعلي مني اجتماعيا و اهله كلهم ف منصب عالي برضه و مستقبله مضمون و مستقبل عيالنا هيبقي حلو و كنا متفقين هيخلص و نتخطب و رسمت حياتي معاه و مستقبلي مرة واحدة بطل يكلمني و المهم بعد م واجهته اخيرا من ضمن الكلام الي قاله انه احنا مش شبه بعض و انه كان إعجاب بس مش حب و مبقاش في مشاعر مع انه كان بيقولي انا بعشقك و قالي انا حسيت ماشي ف طريق غلط و بعدين قالي مقصدش كده و حاول يوضح بس انا كلامه لسه بيرن ف وداني انا بينتله اني اصلا مبحبوش و لا اتأثرت بكلمة و لا صوتي اتهز قدامه و قلتله احسن ان احنا الاتنين اعترفنا بإننا مبنحبش بعض انا اتشال م عليا ضغط كبير و خدنا الموضوع بضحك و العلاقة انتهت و قفلت بس انا حاليا فاقدة الثقة بنفسي بسبب كلامه انه ممكن شاف انه اعلي مني و انا مش المناسبة ليه مع اني مقصرتش معاه ف حاجة و ع كلامه قالي انتي محترمة جدا و بنت ناس انا الي مبقاش ف مشاعر و كل الناس بتشهدلي ان انا محترمة و متعوضش و جميلة بس حاليا كل ما افتكر كلامه افقد الثقة بنفسي و قاعدة اسأل نفسي هو انا عملت ايه غلط او انا كان ناقص ايه اعمله و الحاجة التانية ان انا عندي تخوف م المستقبل اني ملاقيش حد مناسب زيه مع ان مشاعري معاه ف الاول مكانتش قد كده كنت بضغط علي نفسي و امشي الدنيا بس حاليا خايفة م و الجواز و بالذات انه كان مناسب بمعايير المجتمع مع اني لما كنت بتخيل حياتنا كنت بحس اني مش هبقي سعيدة السعادة الي هي بس هتبقي مظاهر ازاي ارجع ثقتي بنفسي
بصي يا بنت الحلال ربنا لما بيقفل باب بيبقى حماية ليكي قبل ما يكون حرمان منه وعسى أن تكرهوا شيئا وهو خير لكم ربنا نجاكي من حياة كنتي انتي نفسك حاسة إنها هتبقى مظاهر وبس وده معناه إن قلبك كان حاسس إن فيه حاجة غلط فماتخليش كلام بشر يقلل من ثقتك في نفسك لأن قيمتك الحقيقية عند ربنا بتقواكي وأخلاقك مش بمستوى اجتماعي ولا بكلمة من حد مش عارف قيمة النعمة اللي كانت في إيده وإفتكري دايما إن اللي بيسيب حاجة لله ربنا بيعوضه بالأحسن منها وانتي سيبتي علاقة كانت هتتعبك نفسيا عشان كدة ربنا هيرزقك بالشخص اللي يشوفك الدنيا وما فيها ويقدرك بجد ويريح قلبك فاستعيني بالله واعرفي إن رزقك في الجواز زي رزقك في الحياة مكتوب ومحدش هياخد رزقك أبداً وتأكدي إن ربنا شايلك الأجمل والأنسب ليكي ولدينك ودنيتك. وجد والله ربنا يحفظك ويسعدك .....ثقتك بنفسك يا بنتي لازم تستمديها من ربك اللي خلقك في أحسن تقويم مش من رأي بشر زيك يخطئ ويصيب فإنتي كريمة عند الله بقلبك النضيف وأخلاقك وده الرصيد الحقيقي اللي بيفضل فمتخليش وسواس الشيطان يوهمك إن فيه نقص فيكي لمجرد إن شخص مشي بالعكس ربنا بيبعد عنك اللي ميعرفش قدرك عشان يفتحلك طريق للي يستاهلك بجد وإفتكري إن قيمتك ثابتة ومستمدة من تكريم ربنا ليكي كإنسانة ومؤمنة فاسترجعي قوتك بالله وقولي الحمد لله إن ربنا كشفلك الحقيقة بدري عشان تمشي في طريق كله رضا وسكينة بعيد عن المظاهر الكدابة اللي لا بتغني ولا بتسمن من جوع وخليكي واثقة إن ربنا شايلك عوض يبهرك ويمسح كل وجع حستيه بس إنتي ارضي بقضاء الله وخلي يقينك فيه
تم النشر السبت، ٤ أبريل ٢٠٢٦
السلام عليكم أهلا بيكى .... الله يعينك ويعديلك الفترة ديه على خير ويرجع ثقتك فى نفسك .... بس عايز أفهمك حاجه هو من الأول عارف إنك مش مناسبة وعارف هو انه مش هيكمل مش اكتشف دا مرا واحدة يعنى بس عجبه حاجه فيه او عجبه فيكى وحب يكلمك وبالفعل انتى استجابتى وكلمتيه و "" ارتبطوا """" ارتبطوا فى علاقة ملهاش ملامح ارتبطوا فى علاقة فى الضلمه مش ف طالحة فى النور وليها أصل ثابت وإيه اللى حصل استنزاف تام ل مشاعرك وأحاسيسك دمر قلبك وعقلك بعد ما بدأتى بالفعل تبنى مستقبل كامل وحياة كاملة من الأوهام وفى الأخر نزلك على جدور رقبتك زى ما بيقولوا والكارثة هنا فى العلاقات ديه هو اللى ترتب عليها بعدين يعنى حضرتك بتقولى أنا فقدت الثقة فى الزواج أصلا يعنى انتى مدركة الكارثة ذنبة الراجل الراجل ها مش عيل داخلك من على شات أيا كان مستواه الاجتماعى أو مناصب عيلته ذنبه إيه الراجل اللى هيدخل من بابك جايلك انتى دونا عن بنات العالم طالب خطبتك فعلا فى علاقة تكون فى النور يلاقيكى مستنزفه كدا ومدمرة لازم تراجعى نفسك وترجعى لثقتك تانى ولنفسك تانى وتزودى ثقتك فى نفسك وتحافظى على قلبك وعقلك ونفسك يا بنت الحلال لحد مايجى حلالك اللى هتحسى والله معاه بالجنة وهترسموا المستقبل مع بعض انتوا الاتنين مش هتعيشى نفسك فى أوهام لوحدك وفى الأخر خاطرك ينكسر كدا انتى غالية يا بنتى وخاطرك ونفسيتك دول غاليين والعلاقات عمرها ما كانت بتتبنى بالمناصب ولا قد ايه عنده فلوس والله يا بنتى + ..... هتقولي بس هو قالى بعشقك ووعدنى بالخطبة وخلافة هقولك بصى احنا الشباب لما يكون لينا غرض من بنت مثلا سواء حاجة وحشة أو قذرة مثلا أو أكلمها لمجرد إنى أكلمها وأحس إنى جامد ومحدش يقدر يكرفلى أو حتى معجب ب حاجة فيكى وعايز يكلمك رغم معرفة فى قرارة نفسة إنه مش هيكمل ولا ينفع العلاقة ديه تستمر بس هو زى ما تقولى كدا كيف بقى كل دول بقى ساعتها الشاب هيحسيك انك قد إيه ملكة هيغرقك فى اهتمام وحنية غير مشروطة هيوهمك بوعود ملهاش آخر من خطبة وزواج وخلافه مش بعيد يسمى معاكى عيالكوا دا بيوصل الدرجة انه بيغير عليكى أصلا فاهمانى بس كل الحاحات ديه احنا بنعملها علشان نوصل للبنت ديه ونكلمها ونعلقها بينا وضمان استمرار العلاقة فاهمانى هتقوليلى طب يعنى الشاب من دول مش بيحس بذنب لا إطلاقا لأنك بمجرد ما وافقتى تكلميه ورديتى عليه وتتكلموا ف هو انتى عايزه كدا انتى كمان ف تستاهلى بقى فاهمانى لأن العلاقة من الأول أصلا مش موجودة فى النور ف بيبقى شايف ان مشاعرك واستنزافها مباح بقى لأنك انتى اللى فتحتى الباب دا من الأول هدانا اللة وإياكى إلى ما يحبه ويرضاه
تم النشر الأحد، ٥ أبريل ٢٠٢٦
كويس انك رديتي بشياكه وبكل ثقه بعدين باين من رده فعله انه كان كداب ولا كان بيحب ولا غيره زمانها تسليه او شاف له شوفه تانيه وبعدين مفيش حاجه اسمها اعلي مني اجتماعياً ولا أهله في مناصب مع احترامي للجميع لكن انتي أعلي منهم اخلاقياً وذوقيا ً،، ومجتمعيا قريبا بإذن الله وبالنسبه لأنه قال احنا مش شبه بعض والله ربنا أراد لك الخير في انه يبعد شخص اهم حاجه عنده الاجتماعيات وأنه ياخد حد من مستواه زي ما بيقول اللي بيعشق وبيحب بجد ما بتفرفش معاه حاجه في الحياه لا ماديات ولا غيرها ،،،، ولِنفترض حسن النيه وأنه مكنش بيتلاعب وكان بيحبك او معجب فعلا فمكنش ليه الحق يقولك انتي مش شبهي كان ممكن يقول مفيش نصيب حبيبتي سؤال ليه تفقدي ثقتك في نفسك؟ ليه خايفه؟ لا طبعا ثقي في نفسك وماتخافيش هتلاقي اللي يحبك واللي يعيشك احلي حياه ،،،والله ربنا بيحب يبعد الأشياء الشر من حياة الإنسان فتوكلي علي الله كده ومتزعليش وربنا يعوضك بكل جميل أنا معاكي لو محتاجه تتكلمي❤️
تم النشر الأحد، ٥ أبريل ٢٠٢٦
غلطك ان انتي سمحتي لنفسك وليه ف ان بيبقي في ارتباط غير رسمي وسيبك من حكاية الطبقات دي علشان لو مكنتوش اتكلمتوا يمكن كان جه يتقدملك لكن لما لقي انك موافقة تتكلموا ف خلاص -وسيبك من حكاية الحسابات وانه مناسب وغيرة البنت مننا محتاجة حنية امان احتواء احترام تقدير حب اكتر ما بتحتاج الفلوس ف خلي بالك وادعي ربنا يرزقك بالزوج الصالح اللي يتقي الله فيكي مش اللي يغرقك بفلوسه - ومتحطيش في دماغك انك مستوي المادي ضعيف ف مش هتتجوزي جوازة حلوة او مش هتعيشي عيشه حلوة لاء وبعدين انتي غالية اوي ومشاعرك غالية بلاش تديها لاي حد وهو ميشتاهلهاش رزقك هيجيلك لغاية عندك
تم النشر الأحد، ٥ أبريل ٢٠٢٦
طيب يا غالية مشاعرك غالية أولًا ثانيًا ثقتك ليه تتهز هو بصي أكبر خطأ أن البنت تدخل علاقة غير شرعية مش بس خطأ دا حرام شرعًا .... ثانيًا فكرة الزواج ربنا مديرها بس إحنا بنستعجل فـ ندخل علاقات تستنزف طاقتنا وتضلم الدنيا بس الخطأ عندك ليه تدخلي علاقة شرعية. الأمر الأهم سيبك من دا كله ورجعي علاقتك بالله وثقتك هترجع ليكِ من غير ما تفكري
تم النشر الأحد، ٥ أبريل ٢٠٢٦
الجواز صحيح مبني على توافق بين طرفين .. و رغم أن الماديات واحده من ضمن عناصر التوافق بين شريكين فالحياه إلا أنها اخر نقطه في نقاط التوافق .. اللي وصلني من كلامك انك كنتي مبهوره بمركز اجتماعي و مستوى مادي و ده كان أول حاجه بتدوري عليها ده مش عيب .. بس لازم ناخد بالنا أن الفلوس بتروح و تيجي و المال مش دايم و المركز الاجتماعي اوقات بيكون ستار لخلل كبير .. التوافق محتاج بين اي اتنين محتاج يكون توافق فكري و نفسي و توافق فالطباع و الأفكار و الخلفيه الاجتماعيه و بعدين يجي التوافق المادي .. أما كونه واجهك بشجاعه أنه مشاعره اتغيرت و أعاد تفكيره و شاف أن اللي بينكم كان خطوه غلط ف ده تصريح رغم قسوته اللي أنه كان كاشف ل حقيقة اللي جواكي.. وهو انك كنتي داخله العلاقه دي عاوزه تحققي طموح شخصي كان هو وسيله لتحقيقه و ده بعيد كل البعد عن المشاركه .. محتاجه تعيدي ترتيب نفسك و يمكن بعدها تكتشفي أن رغم قسوة الموقف على نفسك إلا أنه كان هديه من ربنا بيساعدك بيها تعرفي نفسك اكتر و تعيدي ترتيب أولوياتك و أفكارك عشان يكون ليكي خط واضح فالحياه أن شاء الله ... حقيقي انا سعيده جدا بصراحتك و شجاعتك و وضوحك مع نفسك قبل ما يكون وضوحك معانا في مشاركتنا مشاعرك .. ربنا يراضيكي يارب و ينور بصيرتك
تم النشر الاثنين، ٦ أبريل ٢٠٢٦
علشان عيلتي كلها كده و مستقبلي و شغلي لما اخلص مبني ع المنصب و المحيط الي حواليا كله كده فده كان المناسب ليا مش اكتر كنت عايزة واحد شغلنا يبقي زي بعض علشان هنفهم بعض اكتر و نفهم الضغوط الي بنمر بيها بس قلت بمعايير المجتمع اعلي لإن هو كان مستقبله يمكن مضمون اكتر
تم النشر الاثنين، ٦ أبريل ٢٠٢٦
ليه كل تفكيرك ان لازم اللي تتجوزيه يكون غني جدا و من عيلة ذات منصب
تم النشر الاثنين، ٦ أبريل ٢٠٢٦
لعرض السؤال في فدني اضغط هنا