انا طالبة في تالته ثانوي، وبجد مش عارفه استمر في المذاكره، ببقى اكتر حاجه بمسكه هو «الفون»، لكن «الكتاب» فَـ فين فين، ولما اليوم بيخلص بندم ندم شديد اوي، ان يومي ووقتي ضاعوا منّي!!
انا بسهر لحد الساعه 5ص بصلي الفجر وبنام، وقبل ما بنام بظبط المنبه على الساعه 9.25ص، لكن مش بصحى، وبصحى متأخر على الساعه 12م قبل الظهر، وبندم اني سهرت ومذاكرتش حاجه في السهر اللي سهرته،
كل يوم على الوضع ده، وانا طالبه في تالته ثانوي، نفسي بجد والله احقق حلمي واجيب مجموع«97٪» وافرّح بابا في غربته و ماما الله يرحمها في تربتها، بجد عايزه احقق اللي اختي محققتهوش وارفع راس عيلتي، بس ازااي؟!!
انا صحابي بيقولولي"انتي ضعتي بجد، انتي مكونتيش كده انتي كنتي دايماً بتطلعي من الأوائل»، انا بجد والله زعلانه على مستوايا اللي راح، انا كنت متفوقه ومجتهده جدا وده كان بفضل ماما الله يرحمها بعد ربنا سبحانه وتعالى، بس هي توفّت من 4سنين فاتوا،
ف اهلي كانوا يقولو"متعلقيش فشلك و مستواكي اللي نزل في وفاة امك"، بجد خايفه محققش حلمي واجيب المجموع اللي بحلم بيه. انا عايزه حل او أي حاجة، المهم ارجع لمستوايا اللي كنت عليه🥺
السلام عليكم، مشكلتك كلها تتلخص في الخوف والتوقعات، وأنتِ بنفسك أشرتِ لده في كلامك. كتير كانوا متفوقين في سنين دراسية وبعد كده مستواهم تراجع لأسباب مختلفة كان من ضمنها الخوف الشديد والقلق من التوقعات. الحل إنك تركزي بس على إنك تعملي اللي عليكِ. ملكيش دعوة بالنتائج دلوقتي خالص، ركزي على هدفك واشتغلي عليه كل يوم. وطالما اجتهدتِ خلي عندكِ يقين إن ربنا مش هيضيع تعبك... النتائج والطريق اللي ربنا هيختاره بعد كده سواء جه على هواكِ أو لأ هيكون الخير لكِ وربنا أعلم مننا بالخير فين. *** انسي أي توقعات أو كلام من الأهل أو مخاوف جواكِ لأن كل ده هيشل تفكيرك ويوقفك. *** متسمعيش لكلام صحابك خالص لأن مش هم اللي يحددوا مستواك ولا نظرتك لنفسك. خدي بالك عقلك الباطن بيمتص الكلام ده ولو أنتِ صدّقتِ عليه هيخليكِ تنجحي في تحقيقه وهيخليكِ فعلا تفضلي تقلي في المستوى لأن مهمته ينفذ اللي بتقولي له عليه. فركزي بس تدخلي له أفكار إيجابية عن نفسك وقدراتك. ** ملحوظة أخيرة، إن شاء الله تكوني بتنتبهي لكلامك مع أختك، حاسبي تشيري بأي طريقة في كلامك معها إنها "محققتش" اللي أهلك كانوا عاوزينه، حتى لو بتفضفضي معها عن مخاوفك وإنك كمان متحققيش توقعات أهلك، وخدي بالك لأن ممكن هي تكون حزينة بسبب النقطة دي ومأثرة في نفسيتها وانتم مش منتبهين لها. *** توكلي على الله واستيعني به وجددي النية من المذاكرة وقسمي جدول مذاكرتك مع مواعيد الصلاة وإن شاء الله ربنا هيرزقك البركة في الوقت والتحصيل الدراسي. بالتوفيق إن شاء الله.
تم النشر الأحد، ٢٨ سبتمبر ٢٠٢٥
انا ممكن احكيلك تجربتي في تلاته ثانوي ممكن تفيدك اول شهر كنت مواعد نفسي اني هقلل من الموبايل وكده بس لقيتني مش قادر وبيسحب وقتي وعلى فكره ايامنا كانت السوشيال اقل متعه من دلوقت المهم قررت وحذفت كل حساباتي وكل تطبيقات السوشيال من عندي وبعدة عن النت تقريبا طول فترة الدراسه تقدري تعملي ده اذاي دلوقتي عشان طبعا في دروس على النت في تطبيق تبع النظام على اوبو معرفش باقي الاجهزه فيها ده ولا ايه اسمه الرفاهية الرقميه بيعرفك مدة استخدام كل تطبيق وكمام تقدري تحددي منه الوقت اللي مسموح تتفرجي على التطبيق بعد الوقت المحدد ما يخلص التطبيق بيتقفل وما بيفتحش الا تاني يوم
تم النشر الأحد، ٢٨ سبتمبر ٢٠٢٥
اولا ظبطي نومك نامي بدري واصحي بدري وصاحبي ناس بتذاكر وخليهم يشجعوكي اللي هو من الساعة 5 ل 6 هنذاكر كذا واقفلي موبايلك خالص.. افتكري انك هتندمي ندم عمرك وانتي بتشوفي ناس داخلين كلية احلامك وانتي قاعدة مكانك مكسوفة تقولي مجموعك افتكري المشهد ده بس اسفة لو كلامي شديد بس بحاول افوقك لنفسك انتي من كلامك باين انك شاطرة ربي يبارك فتضيعي نفسك ليه مامتك ربنا يغفر لها ويرحمها لو شافتك كده هتكون مبسوطة؟ مستحييل لو مش علشانك فعلشانهم... صلي وادعي ربنا وحددي اهدافك في rooms مذاكرة بتبقى بنات بس فممكن تذاكري معاهم بيشجعو انك تكملي حقيقي وبتلاقي صحبة تشدك للطريق ده وصدقيني لسه قدامك وقت ارمي اللي فات خالص على جمب وابدأي من جديد وربنا يوفقك يارب 🥰
تم النشر السبت، ٤ أكتوبر ٢٠٢٥
أختي العزيزة، أول شيء أحب أقولك إنّي حسّاس جدًا لقصتك، وربنا يجزيكِ خير الصبر والقوة اللي عندك رغم كل الظروف الصعبة التي مررتِ بها. فقدان الأم خصوصًا شيء مؤلم جدًا، وفاقد الحافز والتركيز بعد الضيقات أمر طبيعي، ومش نقطة ضعف فيك أبداً. خلينا نحلل الموضوع خطوة خطوة عشان نساعدك تستعيدي توازنك الدراسي وتحقيقي حلمك بإذن الله: تنظيم اليوم : من المهم تبدأي يومك مبكرًا ثم تحددي أوقات للمذاكرة وأوقات للراحة بشكل منظم، ممكن تضبطي المنبه على وقت صحصح عليه، دفعي نفسك للتحرك فورًا. حاولي تنامي قبل الساعة 12 منتصف الليل، لأن النوم المبكر ينعكس إيجابياً على نشاطك وتركيزك. تقليل استخدام الهاتف : من النصائح المهمة أن تحاولي تحددي وقت معين لاستخدام الهاتف، مثلاً بعد الانتهاء من حصص المذاكرة أو المهمة فقط، وحطيه بعيد عنك أثناء المذاكرة. لو حسيتِ إنك مش بتقدري تتحكمي في استخدامه، ممكن تساعدك تطبيقات تقفل استخدام الهاتف بعد مدة معينة أو في أوقات معينة. تقسيم الدراسة : بدلاً من تحملي نفسك ضغط طويل على مذاكرة المستويات كلها في وقت واحد، قسمي المادة لأجزاء صغيرة وابدئي بمذاكرة أجزاء قليلة يوميًا. احرصي على تنويع المواد بين ما هو سهل وصعب حتى لا يشعر دماغك بالتعب أو الملل. التذكير بالهدف : خدي وقت كل يوم تذكري فيه حلمك العظيم، فرحة بابا الغالي، وتضحيات أمك رضي الله عنها، هذا سيكون محفز عميق لقلبك وروحك. اكتبي هدفك واسمعي لنفسك كلام تشجيعي، وذكري نفسك بمن كنتِ قبل التراجع. التعامل مع مشاعر الندم والحزن : مشاعر الندم طبيعية لكن لا تسمحي لها توقفك، صحبتها بالشجاعة والإرادة أفضل لك. كل يوم فرصة جديدة للتغيير والتقدم. اجعلي لنفسك روتين يومي لكتابة شيء إيجابي حدث معك، وكمان اجعلي وقتًا صغيرًا تعبرين فيه عن مشاعرك بالدعاء والتقرب إلى الله. استخدمي المذاكرة بفاعلية : حاولي تستخدمي طرق دراسية مفيدة مثل تلخيص الدروس، حل أسئلة، أو شرح المادة بصوت عالي لنفسك، هذا بيخلي الحفظ والفهم أسهل وأسرع. أنا هنا معاك خطوة بخطوة، وإذا حابة تتابعي مع خبير نفسي أو مدرب دراسي يمكن تفيدك في تنظيم الوقت وتجاوز كل ما يعيقك، تواصلي مع الخبراء في فدني من خلال صفحة https://www.fedni.net/experts ورجاءً لا تستعجلي النتائج، النجاح نوع من السباق الطويل، وأنتِ بالفعل بدأتِ بداية جديدة اليوم بالتوجه ومشاركتك. أكيد مع الإصرار والدعاء ستصلين لهدفك بإذن الله. لو تحبي نبدأ مع بعض خطة يومية بسيطة ننظمها لك؟ أنا معك، ذكية هنا للمساعدة دائمًا. ❤️
تم النشر الأحد، ٢٨ سبتمبر ٢٠٢٥
ابعدي عن الجوال وجيبي تطبيق يحظر التطبيقات الي مدمنه عليها واحظريهن وخليه للاتصال وللمذاكره
تم النشر الثلاثاء، ٣٠ سبتمبر ٢٠٢٥
شيلى التليفون اصلا
تم النشر الثلاثاء، ٣٠ سبتمبر ٢٠٢٥
لعرض السؤال في فدني اضغط هنا