السلام عليكم ورحمه الله وبركاته
أنا مشكلتي مع واحده زميلتي احنا كنا مع بعض من ثلاث سنين بس انا بدات احس ان هي مش احسن حاجه ليا يعني مثلا اكون بكلمها فالاقيها دايما عندها سوء ظن ما بتشوفش نفسها غلط خالص عندها من الاخر انا اساس كل حاجه،
يعني ابعت لها مثلا لو اتاخرت عليها شويه تعمل لي مشكله وتمسح المسج وعندها كل حاجه مشاكل صوتها عالي بتزعق فانا قلت انه طالما انا مش مرتاحه ابعد شويه وفعلا اخذت جنبي شويه وهي ما سألتش ولكن هي راحت تحكي للمس بتاعتي ان انا ان انا ما بكلمهاش وهي بتحاول معايا كثير وانا اللي مش مدياها فرصه
وراحت كمان قالت كده لوالدتي وعملت مشكله كبيره يعني مع والدتي بسبب ان والدتي يعني اي حد ممكن يصعب عليها فهي من الاخر راحت اتمسكنت عليها وماما أجبرتني ان انا اكلمها وبتاع ومع ذلك انا بعثت لها وقلت لها انا ما قطعتش علاقتي بيكي انا نفسيتي الفتره دي مش احسن حاجه وبتاع وانا ما قطعتش علاقتي بيكي انت في الاخر كنت زميلتي مدة طويله قامت رد رد بارد وقايله انا ما كنتش اعرف وقامت بدأت تحكي لي عن مشاكلها وهي بدأت اللي هي تتكلم ولا كان في حاجه يعني حتى ما قصرتش انها تعرف انا كويسه ولا لا
المهم بعديها بيومين كانت هي بتبعث لي فيهم عملت مشكله مع مدرسه ليها بتقول لي هنعمل ايه وبتاع فانا قلت لها ما اعرفش فهي ما ردتش على المسج وراحت شالت رقمي او عملتلي بلوك وراحت عملت نفس الحاجه مع ماما برغم ان ماما كانت واقفه في صفها جدا
فأنا قلت خلاص جت من عندها وبرغم ان انا اتضايقت شويه بس قلت ايه هي كانت بتعمل ده عشان كرامتها المهم ان احنا كان عندنا اصحاب مشتركين لقيتهم كلهم بداوا يبعدوا عني او هم اثنين بدأوا يعاملوني وحش قوي ما يكلمونيش اصلا لو بصوا لي بصوا لي بقرف قلت ماشي وقعدنا فتره على كده
هي دلوقتي راحت بتتودد تاني للمس بتاعتي بحجه ان هي عايزه ترجع لها وبتاع برغم ان هي سابتها من غير سبب فعشان ايه انا شاكه ان هي عشان تكلمها وتحكي لها زي ما بتحكي لزمايلنا غلط ولقيتها تاني رجعت في نفس مجاميع الدروس اللي انا كنت باخد فيها
أنا مش عارفه اتصرف الصح اللي انا اعمله حرفيا كل ما اجي اخد منها جنب ترجع وهي بترجع وقت ما هي عايزه وقت ما هي مش عايزه بتبعد وبتروح تقعد تحكي لكل زمايلنا ان انا ان انا اللي مش بكلمها وان انا اللي مش بسأل
وكمان انا مره كنت ماسكه صوره كانت ليا وانا صغيره فهي قالت لي انا عايزاها فانا اتكسفت اردها فهي أخدتها فانا محتاره هل صح ان حاجه زي دي تفضل معاها بالرغم ان انا بقول لنفسي ان هي لو عايزه تؤذيني هتاذيني بطرق ثانيه كثير
واتعامل معاها ازاي حرفيا انا تعبت كل ما اجي اعاملها كويس الاقيها بتتعامل معايا بمشاعرها انا ما بقتش عايزه اكلمها وفي نفس الوقت ما بقتش قادره على التأثير النفسي اللي بتعمله
حرفيا زمايلنا قطعوا علاقتهم بيا عشان اكيد هي حكيت لهم حاجات مش كويسه عني وضررت علاقتي بماما دلوقتي ماما خفت كلام شويه على الموضوع بس انا مش حابه انها ترجع تاني تكلمها ايه
حبيبتي أنا قريت كل كلمة كتبتيها وحاسة بيكي جداً وعايزة أقولك إنك بنت أصيلة بصراحه لأنك رغم كل اللي صاحبيتك بتعمله لسه باقية على العشرة وبتفكري فيها بس لازم تفهمي إن الصداقة دي بقت "سامة" وبتسحب من طاقتك وصحتك النفسية على الفاضي وعارفة إن أصعب حاجة إن حد نعتبره قريب مننا يطعن في ضهرنا ويطلع كلام كدب ويخلي الناس تبعد عننا والأسلوب اللي صاحبتك دي بتعمله معاكي اسمه "قلب الترابيزه" يعني تغلط فيكي ولما تبعدي عشان تحمي نفسك تطلعك أنتي اللي غلطانة وبايعة العشرة عشان تفضل دايماً هي الضحية وأنتي اللي وحشة في نظر الكل وبالله عليكي بلاش تلومي نفسك ولا تصدقي الكدب اللي هي بتقوله لأنك بنت أصول وطيبة وهي اللي بتستغل طيبتك دي ضدك وأحسن تصرف تعمليه دلوقتي هو "الانسحاب الهادي بكرامة" يعني لا تعاتبي ولا تبرري لأي حد بعد عنك بسبب كلامها لأن اللي بيحبك بجد كان جه سألك مش صدق الكدب ومشى ف وفري طاقتك وصحتك النفسية ليكي وبطلي تردي على كلامها أو محاولاتها إنها ترجعك تاني عشان تكسرك من جديد وخليكي قوية ومكتفية بنفسك وبكرة الحقيقة هتبان والناس اللي مشيت هتعرف إنها ظلمتك لما يشوفوا طبعها ده مع غيرك والوقت كفيل يثبت ده ويرزقك بناس أنضف وأحسن يقدّروا قلبك الأبيض وما يصدقوش فيكي كلمة واحدة وربنا يعوضك خير 🤍
تم النشر الخميس، ٩ أبريل ٢٠٢٦
السلام عليكم ورحمة الله وبركاته يا عزيزتي، أشعر بتعبك تمامًا، وده طبيعي جدًا في صداقات زي دي اللي بتكون سامة وبتأثر على نفسيتك وعلاقاتك مع الآخرين. اللي بيحصل ده مش خطأك، هي اللي بتسيء الظن وبتحكي وراكِ، وده بيظهر عدم نضج عاطفي عندها. في الإسلام، الصداقة لازم تكون مصلحة وطمأنينة، زي ما قال الرسول ﷺ: "المرء على دين خليله، فلينظر أحدكم من يُخالِل"، فلو هي بتضرك، الابتعاد واجب عليكِ لحماية نفسك. خطوات عملية عشان تتصرفي صح: حددي حدود قوية : لو رجعت تكلمك أو تقعد جنبك، قولي بهدوء "أنا مشغولة دلوقتي" أو غيري مكانك مباشرة، بدون تفسير طويل. مترديش على رسائلها إلا لو ضروري جدًا (زي شغل مشترك). تعاملي مع الزملاء : متدخليش في كلامهم، ركزي على اللي يعاملوكِ كويس. ابدئي كلام إيجابي معاهم لوحدك، زي "عاملة إيه النهاردة؟"، وهيبقوا يشوفوا حقيقتك بنفسهم. مع مامتك : اجلسي معاها في وقت هادئ، قوليلها "أنا بحبك ومحتاجة دعمك، بس الصداقة دي بتضرني نفسيًا، وأنا هختار اللي يريحني". شرحي لها شعورك بدون اتهام، وادعي ربنا يلين قلبها. بني علاقات جديدة : انضمي لمجموعات دراسية أو هوايات تانية في Fedni أو خارجها، عشان تلاقي ناس إيجابيين يقدروكِ. أنتِ قوية وقادرة تتجاوزي ده، ومع الوقت هيبقى درس يقويكِ. لو عايزة دعم أكتر، ابحثي في Fedni عن "صداقات سامة" هتلاقي إجابات كتير، أو شوفي الخبراء هنا: https://www.fedni.net/experts – في متخصصين نفسيين هيساعدوكِ. ربنا يفرج همك ويجبر بخاطرك، ورعاكِ يا قمر 💕
تم النشر الأربعاء، ٨ أبريل ٢٠٢٦
وعليكم السلام ورحمة الله وبركاته، أنتِ سنة كام؟ طبعًا في كلام كبير زي مثلًا أنها صديقة سوء فأنا محتاجة اتكلم معاكِ بوضوح بس حساكِ صغيرة، بصي يا غالية حتى لو هتاخد صُحبتك كلها وكلهم هيروحوا في صفها خليكِ فترة كده وحدك وسبحان الله ربنا هيبعتلك صُحبة شبهك، وبعدين واضح أن البنت بتاعت مشاكل فحاولي مثلًا تستقلي بشخصيتك وتقولي لـ والدتك أنها مأثرة على مستواكِ الدارسي فتبدأي تبعدي وصدقيني ربنا هيكرمك بصحبة أفضل تعينك على الخير، متكمليش معاها واضح بجد أنها عايزة تأخدك معاها في مشاكلها الخطأ، لأنها لو مثلًا صديقة كويسة وعندها مشاكل عادي تقفي معاها لكن دي هتضرك الله يرضى عنك اللهم آمين 🤍 🫂
تم النشر الخميس، ٩ أبريل ٢٠٢٦
اختارى نفسيتك انتى ومشاعرك حاولى تختارى نفسك علشان اللى انتى فيه دا من معاملتك مع صاحبتك هيعملك تراكمات
تم النشر الخميس، ٩ أبريل ٢٠٢٦
لعرض السؤال في فدني اضغط هنا