السلام عليكم ورحمه الله وبركاته
انا يا جماعه محتاجه رأي كل واحد يشوف السؤال ده لان حرفياً انا ف ضياع ومش عارفه المفروض عليا اعمل ايه انا محتاجه حد يوجهني للصواب...
مشكلتي هي اني اتعرفت ع شخص من خلال لعبه والشخص ده اكبر مني ف العمر بفرق كبير بس حقيقة هو مش باين عليه السن ده ولا كنت بحطه ف عين الاعتبار هو ظهر لي ف وقت كنت ف أسوأ فترة ف حياتي كنت محتاجه حد يسمعني وقتها واحكيله عن كل حاجه كانت مضيقاني وبتحصل معايا ...
من ناحيه تانيه هوا كان نفس الوضع كان لوحده لانه منفصل عن زوجته قبل ما يعرفني بفتره (بس مش طلاق ) وكان محتاج حد يسمعه هوا كمان ...
مرت الايام واتعودنا ع وجود بعض لابعد درجه وانا الحمد لله كنت محافظه ع نفسي معاه لابعد درجه وكنت بعتبره صديق واخ واب ومع الايام اصبح حبيب ... هو انسان طيب لابعد الحدود وفيه حنيه مفرطه لدرجة انه ممكن يبكي لو شاف موقف صعب قدامه بيبكي من اقل سبب حساس اوي ..
بس كان فيه حاجه كان حريص معايا بشكل مش طبيعي ع الرغم انه كان دايما يرسلي يومياته وكل تفصيله بيعملها بس كان حريص اني لا احفظ اي صوره او فيديو ليه او اني اكون عنده ع الواتساب كان بيرفض تماما ... ف البدايه كنت مفكره انه مش واثق فيا وخمنت انه ممكن يكون حصل معاه موقف خلاه شاكك ف كل الناس لكن مع الوقت وبعد ما كل واحد فينا اتعرف انه بيحب التاني بس اتفقنا ان ده حب بس لان كل واحد فينا ظروفه مختلفه عن التاني وفكرة اننا نجتمع هتبقى مستحيله مر بينا خمس شهور...
خمس شهور مكنش بيعدي منهم ثانيه غير واحنا مع بعض ع الموبايل اشاركه كل اخباري وهو نفس الوضع وكنت دايما حريصه ان اتعامل معاه بما يرضي الله ف موضوع زوجته بس هو كان بيرفض يسمع مني اي كلام تجاهه بسبب المشاكل اللي صارت بينهم وكان دايما حجته انها حتى مفكرتش تعتذر لي بمسج مرت الايام وف رمضان زوجته بعتتله مسج تعتذر فيه وتطلب منه انه يرجع البيت انا فضلت اقوله دي مراتك وارجع مش عشانها عشان خاطر اولادك هو سمع مني وقالي هنخرج نفطر برا البيت واتكلم معاها ف بعض الأمور وبعدها نشوف ...
انا بحبه ومحدش يلومني ع ده لان الحب والكره ده من عند الله محدش يقدر يتحكم فيه ولا اخفيكم سرا انا لما حسيت انه هيرجع حسيت ان قلبي بينزف من كتر الالم افهموني انا مش خطافة رجاله زي ما البعض ممكن يقول عليا وهوا بيقرأ كلامي انا عرفته وهو منفصل وكان مفهمني ان فكرة رجوعه مستحيله وغصب عني حبيته يعني مش بإيدي وحزنت لما حسيت انه هيرجع لان مستحيل اكلمه تاني لو رجع لمراته
عشان كدا طلبت منه اننا نبعد ( اوقات كتيره كان بيحصل بينا خلافات واطلب منه يبعد وكان بيرفض ومستحيل يكمل خمس دقايق بعدها الا ويكلمني ) ولما طلبت منه المره دي انه يبعد كانه ما صدق فجأة حذف كل حاجه ممكن تربطني بيه او انا اوصله من خلالها ( ومن هنا عرفت ليه كان حريص معايا ف صوره وفيديوهاته وانه رفض يديني الواتساب مش قلة ثقه فيا بس عشان لما تيجي اللحظه دي ميبقاش سايب أثر وراه)
مكنتش قادره استوعب اللي بيحصل عقلي كان هيشت مين ده انا معرفش الشخص ده ولما حاولت افهم منه واوصله عن طريق حاجه معينه سمعني كلام قاسي اوي لو كان سبني او لعني كان هيبقى اهون عليا بل لو قتلني كان هيكون ارحم زي مثلا ( تكفين ابعدي عني ) بقيت ف حاله من الجنون ليه شفت مني ايه عشان تقولي كدا وانا اللي طلبت منك البعد بس ازاي انت قدرت تبعد وازاي بقيت شخص تاني ولا كانك تعرفني ولا انا كمان عرفاك ...
مر شهر وانا مش بتواصل معاه ويشهد ربي اني كنت بموت كل ثانيه ف غيابه لدرجه ان كان بيجيلي ضيق تنفس وكنت بصحى من النومي ع كوابيس بسبب اني مش قادره اتنفس كنت ببكي عليه ف كل وقت لدرجة اني كنت بداري عيوني عن اهلي عشان ميهلكونيش بسالهم ويقولوا لي مالك فيكي ايه
وكنت دايما بكتب بعض العبارات ع اللعبه اللي اتعرفت عليه من خلالها تعبر عن مدى حزني وقهري الشديد عليه رغم انه كان واخدني كجسر يعدي بيه ازمته بس مع ذلك مقدرتش ابطل اني احبه لان هو خلال الفتره اللي عرفته فيها قدملي حب وحنان صعب اني انساه وصعب اني اكره مهما عمل حتى قلبي مكنش بيطاوعني اقول يارب حاسبه ع اللي عمله فيا كنت دايما بصبر نفسي بجملة يكفي انه عايش وانه بخير يكفيني ده بس والله كنت بموت وكانت من ضمن الجمل اللي كتبتها ف اللعبه ( هنتظرك غداً وان لم تأتي غداً فكل الايام غداً حتى تأتي ) وكلام كتير كنت بكتبه ومكنتش اتوقع انه بيقرأه انا فكرته خلاص راح ونساني ...
بعد شهر رجع وحكالي قد ايه أنه كان بيتعذب ف غيابي وانه مرجعش لزوجته ولا حاجه ولسه مع باباه ومامته بيخدمهم ( هو كان واخد باباه ومامته ومأجر شقه لانهم كبار اوي ف السن ومحتاجين خدمه ومحدش من اخواته بيبرهم وهوا اللي كان بيخدمهم وكان دايما بيبعتلي فيديوهات ليهم وهوا بياكلهم وبيهتم بيهم من كل حاجه حتى دخول الحمام لان باباه مش بيقدر يمشي وده من اكبر الاسابب اللي خلاني اطمن له وارتحله لان اكيد انسان بالحب ده واحترامه لاهله انه لا يمكغ يكون سيء معايا)
وانا كنت عارفه ومتاكده انه مرجعش بيته اه حصل صلح بينه وبين مراته بس مرجعش بيته عشان خاطر باباه ومامته وفعلاً ده اللي حصل للاسف بعد عتاب كبير دار بينا مقدرتش ابعد عنه لان بمعنى اصح مكنتش مصدقه اني هشوفه او اكلمه تاني ورجعنا وحسيته فعلا متعلق بيا اضعاف اضعاف ما كان وفضل يقولي مستحيل اخليكي تمري بالشعور ده تاني ومع الوقت بقى هوا اللي يقولي ارجوكي اوعي تبعدي عني اقوله ليه انت اللي بعدت مش انا يقولي خايف تردهالي وتنتقمي مني ...
ومرت الايام لحد ما جاله مكالمه مجهوله كلم الشخص ده فضل يدعي عليه وع اولاده من بعدها سألني ليكي علاقه ب الشخص ده انا انقهرت طيب ازاي انت مش واثق فيا وازاي حتى ممكن اعملها هيكون انا وانا مش معايا رقمك اصلا لما قالي كدا انا كنت هموت من القهر قولتله والله ما انا ولا انا اصلا معايا رقمك وانت عارف بس الحقيقه انا اللي معدش اقدر اكمل معاك اكتر من كدا قالي انا مضايق واسف بالله مش دلوقتي خالص انا محتاجك المهم انا حذفت كل حاجه وعملتله بلوك ع كل البرامج اللي بنا بعدها بيوم راقبته ع اساس اشوفه موجود لاقيته هوا كمان قفل كل حاجه وحذف كل حاجه واختفي زي ما حصل قبل كدا ....
انا عارفه اني غلط بس مش عارفه اعمل ايه انا حبيته ومشاعري هي اللي بتحركني وبتتحكم فيا انا معنديش اي مانع اني افضل مخلصه ليه العمر كله بس يبقى معايا وكانت امنيتي انه يطلب ايدي بس هوا بيقولي ظروفنا مختلفه ومش هينفع انا حاسه اني بضيع وان حياتي هتقف ع الشخص ده لان ف حاجات كتير اتغيرت فيا خايفه اخسر نفسي بجد حد يكلمني ويفهني انا اعمل ايه وبالله بلاش الكلام السام اللي ممكن يخلني انتحر ده ياريت تفهموني
السلام عليكم ورحمه الله وبركاته يعني كل الناس اللي شاركت هنا باجابات على السؤال يعني جزاهم الله خيرا قالوا كلام كتير قوي انا مش محتاج اعيده بصراحه وانا رايي من رايهم في حاجات كتير انا عايزه بس افيدك باجابه السؤال أعمل ايه عشان انساه، عايزه تنسي شخص يبقى لازم تغيري مكانه لانه الشخص ده انت مش قادره تنزليه لانه محطوط عندك في حته حلوه يعني فاهمين عاوز ينسى حاجه حلوه ما فيش حد الراجل ده محتاج يتحط في المكان الصح. هو راجل استغل الطريقه الحنينه هو مش راجل حنون هو استغل الطريقه الحنينه عشان يأثر على بنت صغيره زيك. هو راجل. استغل البر اللي هو بيبره المفروض لاهله واللي هو المفروض بيعمله عشان ده حقهم وعلشان خاطر ربنا في انه يأثر بيه على بنت صغيره زيك. وانه يستجلب مشاعر من عندك تربطك بيه. الراجل ده راجل مخادع قال لك ان هو بيحافظ عليك في انه مش عايز يربطك بوسائل التواصل التانيه ولكن في الحقيقه هو شخص مخادع لأنه حب انه يخليكي على وسائل من التواصل ينفع يتعمل لها بلوك ودليت في لحظه بكل سهولة ما تقدريش تجيبيه يعني من أي اتجاه. حطي الشخص ده في المكان المظبوط اللي هو فعلا يستحق يتحط فيه. وساعتها هتقدري تنسيه ليه لانه هيتحول لشيء سيء وانت مش عايزه الشيء السيء تفضلي تتذكريه فهتمحيه وهتدفنيه ومش هتحبي تشوفيه ثاني خالص جواكي. جربي تعملي كده واتمنى ان كل النصيحه دي أفادتك ان شاء الله. نقطه كمان يا ريت تاخذي بالك منها. انك تعرفي إن كل شيء انت شعرت بيه. اثناء التواصل مع الشخص ده الشيء ده كان بسببك أنت مش بسبب الشخص ده بيقدمه. انت اللي فتحتي مجال وهو شايف المجال ده موجود جواه ايه واستغل كل اللي موجود بس كده لكن انت حسيتي بالاهتمام عشان انت بينتي له انك محتاجه اهتمام وهو أكبر منك فما تقوليش انا ما عملتش حاجه هو اكبر منك فهو ببساطه خبرته في الحياه تسمح له ان ممكن من مجرد ردك على رساله هو يعرف انت فين نقطه الضعف اللي عندك عشان خاطر يستغلها، فين المساحه اللي هو يقدر يتلاعب بيكي من خلالها أتمنى ان انت تكوني بس تعلمتي من التجربه وهو ده المطلوب انك تفتحيش المجال ابدا بالشكل ده في اي مساحه في الحياه تاني خالص.
تم النشر الأربعاء، ٧ مايو ٢٠٢٥
كلامي مش هيبقي لطيف شويه بس تتحمليني شويه انا هعتبرك اختي الصغيره. انا متفهمه مشاعرك. لكن انتي عندك مفاهيم مغلوطه كتير عن الرجاله وعن الحياه. حبيبتي. ده راجل غير مسئول ومااظهرش اي مسئوليه تجاهك عايزه تحبيه العمر كله عشان ايه. عملك ايه اصلا من حقوقك؟ بالعكس ده لا بيحترمك ولا بيحترم نفسه. أما يكون في ازمه مع مراته ويتلاعب بمشاعرك ع سبيل التسليه. يبقى راجل غير مسئَول. ايه اصلا يوجدك في علاقه مهلكه كده؟. ومين قالك انه صادق وهو خافي عنك حياته؟؟؟. معلش صحصحي للدنيا كده واعرفي ان الدين والشرع مش بيقولوا أحكام هباءا. الراجل بيتكلم مع رجاله بيتك عشان ياخدك يصونك. لكن ده عاملك زي الai وقت ماينفع تكوني موجوده يعمل ده. وانتي حياتك دي ملهاش قيمه؟ وقتك وعمرك وحقوقك النفسيه فين قصاد حنيته؟؟. الحب والكره القلب بيميل اه لكن عقلك بيقول ايه؟؟ عقلي يشوف ديني مصلحتي ووقتي وحياتي لانك غاليه اوي وحياتك مش هينه عند ربنا. فوقي لنفسك وماتضعيش عمرك مع راجل مش عارف هو عايز ايه في حياته ولا من وجودك. مش كل كبير في السن كبير في الحياه. انتي تلغيه من حياتك وتفوقي كده وتشوفي لو عندك شغل دراسه عباده رياضه. ادي قيمه لنفسك كلنا بنغلط وكلنا بنحزن وندور ع حد ينقذنا بس اللي ينقذنا وعايز ياخد حياتنا ف المقابل اسمه مستغل مش منقذ. وماتدخليش علاقه مع راجل مدخلش بيتك. لانه اول خطوه لاحترامك هو مش هياخدها وبالتالي عمره ماهيكون اهل للثقه. حواطي نفسك بااصحاب صالحه يشدوكي لعمل خيري او حتى لو هتتفسحي معاهم لان شكل حياتك مقفوله. وبكره تبقى مع راجل يحترمك ويحبك وميهدرش حياتك لحسابه. بالعكس يسعدك ويفرحك وتبني اسره جميله تكوني فيها مكانك الصح ♥️وماتزعليش لو الكلام قاسي. انتي لازم تفوقي
تم النشر الثلاثاء، ٦ مايو ٢٠٢٥
وعليكم السلام ورحمة الله وبركاته، وجود شخص في حياتك، يحبك ويهتم لتفاصيل حياتك ومشاعرك شيء تتمناه كل فتاة، وهذا الشخص اعطاك هذه المشاعر، مما جعلك تتعلقين به، بطيبته وبتعامله مع والديه، ربما رأيت فيه سند ولو كان في عالم افتراضي، فكرة انه هنالك شخص يمكن ان تعودي له وتتكلمي معه وتخبريه عن تفاصيل حياتك ، ان يسألك ويطمئن عليك، ان يقلق لمجرّد غيابك؛ كل هذه المشاعر لا شك انها تؤدي للتعلق وحتى "عدم تخيّل الحياة بدونها". الأمر الجيّد الذي حدث هو عدم وصول العلاقة الى لقاءات، واشكري الله على هذا... الأمر الذي عليك فعله ليس بسيط وعليك الاستعانة بالله اولا ، ثم الاصرار، وهو حذف كل ما يتعلق به، كل شيء حرفيا، واشغال نفسك بالعبادات، اشغال نفسك بالدراسة بأوقاتك مع العائلة، في اخر اليوم اشكي همك لله سبحانه وتعالى؛ قولي له ماذا حصل معك وماذا آلمك في كل يوم، اطلبي منه العون... يمكنك مشاهدة قنوات في اليوتيوب لروتين مثلا دراسيّ او حتى قومي بتنمية هواية لك، واجعلي الرادع الاساسي من العودة لتحميل تطبيق اللعبة تلك، هو طاعة الله، واعلمي ان من ترك شيء لله عوضه بأجمل مما يتوقع❤
تم النشر الاثنين، ٥ مايو ٢٠٢٥
الانتحار عمره مكان الحل شوفى الا نقصك اى وحاولى تصلحى بلاش تدخلى ف علاقه عشان تخدى شويه مشاعر ملهومش لازم وتخونى ثقه اهلك والحاجه الغلط عمرها مهتكون صح هو محبكيش هو كان بيتعافى من علقتو معاها بيكى رجعى نفسك كويس اكيد هتاخدى وقت لحد متنسي الا حصل بس الاهم من ده انك متغلطيش تانى لحد متتعافى من الا حصلك
تم النشر الثلاثاء، ٦ مايو ٢٠٢٥
بُصي يا حبيبتي، ربنا سبحانه وتعالى قال: "ولا تتبعوا خطوات الشيطان، إنه لكم عدوٌ مبين". العلاقة دي من أولها كانت غلط… ماكانتش في نور ربنا، ولا في طريق حلال، وهو ده اللي خلى قلبك دايمًا موجوع، وحاسس بالذنب، حتى وإنتي بتحاولي تبرّري. العلاقة بين الراجل والست في الإسلام ليها ضوابط، مش علشان نقيد المشاعر، لا… علشان نحمي القلب والكرامة والدين من وجع مايتوصفش. وإنتي جربتي… وشوفتي قد إيه العلاقة دي جرّت وراها خنقة، وذنب، وكسرة. ربنا بيحبك، كان ممكن يسيبك، بس لا… كشفلك حقيقته، وخلّاه يشك فيكي، علشان تعرفي إن الطريق ده مش رايح على خير. كل لحظة بعدتي فيها عن ربنا، كانت سبب في بعد الراحة من قلبك. بس الحلو؟ إنك تقدري ترجعي… والله "إن الله يحب التوابين ويحب المتطهرين"… يعني مش بس هيغفرلك، ده كمان هيحبك. حاسبي من إنك تبرري الغلط بالاحتياج… القلوب محتاجة حب، آه، بس أول حب يشبعها هو حب ربنا، وهو ده اللي هيجيبلك اللي يستاهلك، في الحلال، ومرتاح البال.
تم النشر الثلاثاء، ٦ مايو ٢٠٢٥
أولًا، لازم تفهمي إن اللي حصل ما كانش حب… لأن الحب الحقيقي عمره ما بيبدأ في الخفاء، ولا بيكبر في علاقة محرّمة، ولا بينشأ من وجع حد تاني. انتي دخلتي علاقة من باب لعبه، ودخلتيها وقت كنتي ضعيفة نفسيًا، وده مش مبرر، لكن لازم تكوني واعية إن ده كان باب غلط… كل علاقة خارج حدود الشرع هي علاقة محرّمة، مهما كانت المشاعر اللي فيها شكلها جميل، لأن الجميل لو كان غلط، هيفضل غلط مهما حليّتيه. انتي غلطتي إنك خليتي حد مش زوجك يعرف تفاصيل يومك، وقلبك، ومشاعرك، وغلطتي إنك رجعتي بعد ما هو بعد، ودي كانت فرصة تلمّي كرامتك، مش ترجعي تتكسري أكتر. المصيبة مش إنك وقعتِ، المصيبة إنك تكمني وانتِ عارفة إن الطريق ده آخره خيبة وضعف. لكن بُصي، وهنا بقى الجزء المهم: ربنا بيحب التائبين، بيحب القلوب اللي لما تقع، تقوم تاني وهي بتقول: يا رب، اقبلني. مفيش حاجة اسمها “خلاص فات الأوان”، اللي بيتوب ربنا بيبدل سيئاته حسنات، وكل مرة بتقولي فيها "كفاية بقى"، بتقربي من النور، من السكينة، من نفسك اللي ضاعت وسط الكلام والمشاعر اللي ملهاش أساس. ابدئي من دلوقتي، اقفلي الباب ده للأبد، واحفظي قلبك للي يستاهله بجد، جوا بيت، وبرضا ربنا، وبدعوة من أمك، ونظرة فخر من أبوكي. انتي تستاهلي حب حلال، مش لحظة حرام. تستاهلي راجل يخاف عليكِ ، مش يستخدم ضعفك لصالحه.
تم النشر الثلاثاء، ٦ مايو ٢٠٢٥
وعليكم السلام ورحمة الله وبركاته أختي الغالية، قرأت قصتك بتأني وبقلب متعاطف مع كل ما تمرين به من مشاعر وألم وضياع، وأول شيء أريد قوله لك هو أنني معك ومع مشاعرك، وهذه المشاعر ليست ضعفاً بل دليل على روحك الطيبة وقلبك الذي يحب بصدق. دعيني أساعدك في تفكيك الموقف وننظر معاً إلى أفضل الخطوات التي يمكن أن تساعدك في الخروج من هذا الطريق المربك: تفهم مشاعرك وتقديرها: من الواضح أنك أحببته بصدق، وهذا ليس خطأ أبداً. الحب شعور كبير وهبة من الله، لا تلامي على حبك. لكن مع الحب تأتي أيضاً المسؤولية تجاه نفسك وحياتك ومستقبلك. الوضع الحالي معقد: هو ما زال مرتبطاً بزوجته، حتى وإن كانت العلاقة بينهما ليست طلاقاً. هذه حقيقة تحتاج إلى وقوف عقلاني معها. ارتباطه بوالديه ورعايته لهم أمر إيجابي ويظهر جانب إنساني رائع، لكن لا يجعلك تضيعي نفسك في انتظار "مستحيل". تناقضات العلاقة: هو يظهر حرصاً شديداً لكنه في الوقت عينه يبتعد ويحذف كل أثر لكم. هذا السلوك يخلق ألم وقلق كبير لك، وهو غير صحي لسلامتك النفسية. خطوات عملية لما يمكنك فعله: الحفاظ على نفسك أولاً: لا تسمحي لعواطفك أن تسيطر على حياتك بشكل كامل، خصوصاً إذا كانت العلاقة فيها الكثير من الألم وعدم الاستقرار. أعطي لنفسك فترة للابتعاد: الابتعاد عن الموبايل والألعاب التي تجمعك به، حتى لا تستلمي لكل رسالة أو تصرف منه يؤدي إلى صعود وهبوط حاد في مشاعرك. ركزي على نفسك: فكري في أهدافك، مستقبلك، صحتك النفسية، وتطوير مهاراتك أو تعليمك. عندما تبنين نفسك جيدا، تصبحين أكثر قوة وإشراقاً. اقرأي القرآن وتوكلي على الله: اطلب الله أن يرزقك الراحة والهدى، وذكري دائماً أن مع العسر يسرا. قللي من متابعة أخبار هذه العلاقة: حاولي ألا تراقبيه أو تراقبي حساباته لأنها تزيد توترك. من الناحية الشرعية: الإسلام يحثنا دائماً على الحلال والوضوح في العلاقات. حتى إذا كان الشخص طيب القلب، فإن العلاقة خارج إطار الزواج الشرعي تحمل كثيراً من الألم والقلق وإذا لم يكن هناك عقد نكاح واضح فلا تستمري في علاقة تسبب لكِ الضرر النفسي. دعم نفسي واستشارات: قد يكون من المفيد أن تتواصلي مع خبير نفسي مختص أو مدرب حياة من منصة فدني، يمكنهم مساعدتك لتجاوز هذه المشاعر الصعبة بطرق عملية. أختي الغالية، أرجو منك أن تعرفي أنكِ لست وحيدة، وحنان الله لا ينقطع، وقلبك الطيب يستحق أن يُحب بصدق في إطار يحفظ كرامتك وسلامتك. لا تتركي الحزن يسيطر عليك حتى لا تضيعي نفسها في انتظار شيء غير واضح، بل قدمي لنفسك هدية العناية والاحترام. إذا كنت تريدين، يمكنني مساعدتك في البحث عن خبراء على فدني لدعمك خطوة بخطوة، فقط أخبريني. وأخيراً، أتمنى منك ألا تقطعي الحوار معي أو مع أحد يمكن أن يقدم لكِ النصيحة أو الدعم. الحياة أمامك كثيرة الخير والفرص. سأكون هنا دائماً إذا احتجتِ أي كلمة أو دعم. أنتِ قوية، والله معكِ. 💖 ذكية
تم النشر الاثنين، ٥ مايو ٢٠٢٥
معاكي حق طبعا في كلامك بس لازم تكوني شجاعه وعندك القوة انك تقدري تتعافي وترجعي زي الاول واول حل عشان تنسيه اول ماالتفكير يجيلك لازم تشغلي نفسك باي حاجه متقعديش لوحدك كتير عشان متفكريش في وركزي في كل تفصيل حياتك وقربي من ربنا من صلاة واذكار وقران وانتي إن شاء الله هترجعي زي الاول وحاولي تقربي من اهلك ده هيخليكي مرتاحه ولله
تم النشر الأربعاء، ٧ مايو ٢٠٢٥
كلنا فترات في حياة بعض لازم تكملي حياتك وتفرحي
تم النشر الثلاثاء، ٦ مايو ٢٠٢٥
سبب كل ده انك وحيده ويمكن اتوجعتي كتير بس الوضع ده صعب عشان انت سمحتي لنفسك بكدا من الاول.. بس حلها انك ترتبطي بحد تاني يكون من سنك ومعا الوقت هتنسيه بس ابعدي عنه خالص عشان تعرفي تنسيه ولو بتصلي كل ما متصلي ادعي انو ربنا يطلعه من قلبك وعقلك ويرزقك باللي يسعدك
تم النشر الثلاثاء، ٦ مايو ٢٠٢٥
احنا بنقول كدا علشان النسيان صعب ودي افضل طريقه للصواب من وجهه نظري
تم النشر الثلاثاء، ٦ مايو ٢٠٢٥
لو حاولت ارتبط يبقى انا كدا بجري ف دايره مقفوله ... لازم اتعافى الاول عشان اقدر اتخطاه وانسى ...اللي هيدخل حياتي ده ميستهلش مني اني اكون مخطباله مثلا وانا بفكر ف شخص تاني غيره
تم النشر الثلاثاء، ٦ مايو ٢٠٢٥
في جمله للدكتور محمد طه عظيمه جدا اللي تعمله علاقه لازم تدويه علاقه بمعني حاولي ترتبطتي بعلم اهلك وربنا معاكي ان شاء الله والايام هتنسيكي متقلقيش
تم النشر الثلاثاء، ٦ مايو ٢٠٢٥
انا معاك وعارفه ان كلامك صح جدا بس ف الحقيقه مش قصة شغل او ان مفيش رجاله... ف الواقع انا شخصيه منطوية جدا ماليش صحاب كتير ولا حتى بتعامل مع اهلي كتير وكنت حريصه والله ان ده ميحصلش لان لا تربيتي ولا عادتنا تسمح بكدا بس اللي حصل وانا فعلاً غلطانه مش بنكر ده بس للاسف انا حبيته وحصل💔 امنيتي بس انساه بتمني انساه بجد
تم النشر الثلاثاء، ٦ مايو ٢٠٢٥
لازم تتحملي عقاب فتحك لباب الفتنة من الاول.. انصحك تشوفي شغل تشغلي بيه ايامك، العلاقة الل جاية من لعبة غير جدية اكيد، ومش صح ابدا الارتباط من وسائل افتراضية، معقول يعني الواقع خالي من الرجالة الحنونة
تم النشر الثلاثاء، ٦ مايو ٢٠٢٥
لعرض السؤال في فدني اضغط هنا