ياريت لو حد يعرف يفيدني يرد على طول انا تعبان ومتدمر انا مش عارف اعيش بلاش تقعدوا تقولوا لي ده غلط لاني عارف ان ده غلط وبلاش حد يقعد يحسسني ان انا خلاص ما بفتش كويس لان انا فعلا من جوايا مش وحش
انا في ٣ثانوي وخلاص فاضل ماده واحده وخلص امتحانات الموضوع بقى اللي عايز يتكلم فيه هو ان انا بسبب ظروف نفسيه وصحيه وفقدان لامي رحمها الله مع بعد التقصير وطبعا كلنا بتيجي علينا فتره بنقصر في حاجه في حياتنا المهم انا ما كنتش بذاكر طول السنه وحصلت معايا لخبطه لان انا كنت باخد منصات وبعدها طلعت من المنصات ونزلت دروس عادي في بلدنا
المهم ان انا اول سنه ليا امسك تليفون والانسان بتغلب عليه نفسه الاماره بالسوء وشيطانه احيانا يعني اتفرجت على شويه افلام ومسلسلات كان فيها مشاهد مش كويسه مشاهد مخله يعني ما وصلتش لمرحله الافلام الاباحيه بس بس قريبه منها يعني وعارف اني غلطان وندمان عليك جدا وكمان ابويا اكتشف الموضوع ده وكانت مصيبه كبرى في حياتي ان انا ما كنتش قد الثقه وعملت حاجه غلط وحرام حسيت نفسي شيطان
وكمان احنا اصلا ممنوع عندنا تسمع مسلسل او فيلم عادي ما بالك بقى بحاجات زي كده فانا كنت حاسس ان انا اجرمت وحياتي كانت متدمره ونفسيتي وصحتي وحياتي كانت واقفه حرفيا وبعدها تبت قربت من ربنا وبعدت عن كل حاجه وكنت بذاكر بس بحس ان ما فيش حصيله او بذاكر شويه والعب شويه بس كنت بعدت عن كل حاجه قفلاه مسلسلات قصص متحركه روايات والكلام ده كله وجه في مره ابويا ماسك تليفوني وقعد يفتش فيه وراح قال لي ايه الكلام اللي موجود على التليفون ده يقصد يعني افلام وحاجات زي اللي شافها قبل كده
انا قلت له ان انا ما سمعتش حاجه ما عملتش حاجه بس انا حسيت وفهمت من نظرته ان هو زي اللي بيختبرني هو ما ورنيش التليفون هو كان ماسك التليفون ناحيته وقاعد يقول لي ده في حاجات على تليفونك بس ما ورنيش حاجه فانا فهمت ان ده اختبار المهم ان انا دخلت عليا فتره الامتحانات وكنت بذاكر في مواد كنت بذاكر شويه والعب شويه كنت بذاكر شويه والعب
المهم ان انا رجعت تاني اسمع مسلسلات وأفلام متلخصة وطبعا بيبقى فيا بعض المشاهد بس مش كتير بسيط اوي انا موقف اصلا السجل بتاع اليوتيوب من ساعه الموقف اللي حصل اللي هو اللي بابا عارف فيه ودلوقتي انا هخلص امتحانات وهحذف الحساب ده وهدخل بحساب تاني على تليفونه وهعمل له ضبط مصنع عشان فعلا انا ناوي اتوب بجد
عايز امحي كل الذكريات اللي فاتت بس دلوقتي ابويا فاكرني مقطع السمكه ودي لها مذاكره وانا حاسس بتأنيب الضمير والندم والذنب وانا من النوع اللي بيحصل له جلد ذات بطريقه مش طبيعيه مش عارف اتعايش في حياتي ولا امشي الدنيا ان شاء الله ربنا يسترني وابويا ما يعرفش حاجه لاني همسح الحساب ده وادخل بحساب جديد واعمل ضبط مصنع والغي كل الحاجات القديمه اللي ليها علاقه بالعالم الوحش ده على تليفوني انا متأكد باذن الله وواثق في ربنا انه هيسترني
انا مش زعلان من ده بس بس حامس بتأنيب الضمير وعدم الثقه وجلد الذات والندم مش عارف اتعامل ازاي حياتي بتقف بسبب المشاعر دي انا بالنسبه لي حل المشكله 50 او 80% منها ان انا امسح كل الحاجات القديمه دي بس انا عايز فعلا ما احسش بمشاعر السلبيه دي واكمل حياتي بقى واتوب اسف اني طولت بس يا ريت حد يفيدني.
اولا ربنا يرحم والدتك يا رب.. و طالما أنت ناوي تتوب بجد، متخليش الشيطان يشغلك بالندم لدرجة يعطلك عن اللي عليك. ركز دلوقتي إنك تخلص آخر امتحان على خير وابذل اللي تقدر عليه، لأن ده أهم حاجة في الوقت الحالي. وبغض النظر عن أي حاجة، حافظ على الصلاة ومتسبهاش، حتى لو حسيت إنك مقصر. متستناش تبقى كامل عشان تقرب من ربنا، قرب منه وأنت بتحاول. بعد الامتحانات اعمل بداية جديدة زي ما أنت ناوي. فلتر الموبايل، احذف أي حاجة ممكن ترجعك للطريق ده، واعمل الحساب الجديد لو ده هيريحك نفسيا ويساعدك تبدأ صفحة جديدة. والأهم من حذف الحاجات إنك تملأ وقتك بحاجات تنفعك. حاول كمان تثبت لنفسك برنامج بسيط تقدر تلتزم بيه، زي ورد قرآن حتى لو صفحات قليلة، وأنصحك بكتاب الداء والدواء لابن القيم، وشرح علاء حامد له على يوتيوب جميل ومفيد جدا في موضوع التوبة ومجاهدة النفس. وبالنسبة لموضوع ثقة والدك، طبيعي تكون متضايق، لكن الثقة لما بتتأثر بترجع بالأفعال مش بالكلام. متفضلش كل شوية تفكر هو لسه واثق فيا ولا لأ، ركز إنك تستقيم من دلوقتي، ومع الوقت هيشوف ده بنفسه إن شاء الله. ومتكبرش الذنب في دماغك لدرجة يخليك تحس إن مفيش أمل. الذنب كان غلط، لكن واضح إن الشيطان دخل عليك من باب جلد الذات وخلاك تحس إن حياتك انتهت، وده مش صح. طول ما أنت نادم وناوي تسيب الذنب وتبدأ من جديد فدي نعمة كبيرة، فاستعن بالله وكمل، ولو وقعت في يوم قوم تاني ومتستسلمش. ومتخليش غلطة حصلت في فترة صعبة تعرفك أو تخليك شايف نفسك إنك شخص سيئ. ربنا فتح لك باب التوبة، فاشكره على النعمة دي وابدأ من جديد، وسيب الأيام هي اللي ترجع ثقة والدك بيك بالتدريج. ربنا يعينك يا رب و ييسر لك امورك و يوفقك ف امتحاناتك.
تم النشر الأربعاء، ٨ يوليو ٢٠٢٦
كل بني آدم خطاء وخير الخطائين التوابين ، ادعي ربنا كتير جدا في قيام الليل والصلوات في كل شئ نفسك فيه حتى لو كان مستحيل ولو عندك مشكلة انك مش بتعرف تنتظم في الصلاة ابدأ واحدة واحدة واهم شئ ابعد عن أي حد ممكن بخليك تعمل أي حاجة حرام لأن الصحبة والبيئة اللي احنا فيها بتفرق بشكل كبير ، وحاول انك تبتدأ حفظ قرآن وتروح مقرأة هتتعرف على ناس بجد كويسين جدا واعرف انك بتجاهد عشان نفسك وكفاية انك عرفت خطأك وربنا يوفقك ويعينك يارب ، انا عارفة ان مهما قلت مش هقدر اخفف عنك بس اتمنى اكون قدرت اساعدك
تم النشر الثلاثاء، ٧ يوليو ٢٠٢٦
هو بيقول ان المشكله عنده في نقط اللي هقول لك عليها دي ان هو كل لما يتوب بيرجع تاني اكتر من الاول وبقوه وكمان حاسس ان هو وحش لانه خان ثقه اهله وثقه ربنا فيه فهو عنده مشكله في النقط دي مشكله التوبه والرجوع لنفس الذنب تاني وحتة الثقة وكمان هو خايف حد يعرف
تم النشر الأربعاء، ٨ يوليو ٢٠٢٦
تمام متشكرة اوووي
تم النشر الأربعاء، ٨ يوليو ٢٠٢٦
شكرا جدا انا خلاص لقيته
تم النشر الثلاثاء، ٧ يوليو ٢٠٢٦
أهم حاجه نظرة ربنا ليك ، الناس عمرهم ما هيفهموك حتى أقرب الناس ليك ،، ربنا هو الوحيد اللي يعرفك أكتر من نفسك ، وطالما نويت التوبه والبعد عن الحاجات دي ،، خد الخطوات بالفعل وماتلتفتش لنظرة أي حد ليك
تم النشر الأربعاء، ٨ يوليو ٢٠٢٦
@Tassnem خاطر تابعي الردود عشان لو حد رد
تم النشر الأربعاء، ٨ يوليو ٢٠٢٦
لعرض السؤال في فدني اضغط هنا