السلام عليكم ورحمة الله وبركاته
ازاي اتقبل نفسي واحب نفسي زي ما هي واتقبل ان احنا مختلفين وزي ما في الحلو في الوحش بس احنا مش شايفينه
يعني مثلا كان ليا زميله ما شاء الله عليها خاتمه للقرآن واعتقد كمان اخدت الإجازه ومن صغرها بتطلع من الاوائل وكل المدرسين بيحبوها وجابت مجموع عالي في ثانويه عامه ودخلت بشري حكومي في حين ان انا كنت بحفظ قرآن بس مختمتهوش ولا جبت مجموع في ثانوي ودخلت خاص وكمان بعمل ذنوب لولا ستر ربنا عليا مكنش حد هيبصلي فليه انا وحشه اوي كدا لي انا مش زيها او مش زي اي حد ناجح
وانا مش بحقد عليها والله بس كان نفسي ابقى ابنه باره ماما تفتخر بيا قدام الناس بس العكس غير كدا حاسه اني عبء عليهم وربنا رزقهم بيا عشان يبتليهم،
بحاول ارضي بس دي دايما اساله جوايا عايزه اوي حياتي تتحسن ومبقاش شايفه غير نفسي والمشكله كمان يا جماعه اني بيجلي افكار باللي هو لو هي كمان ان شاء الله يعني مش بكرهلها الخير والله المهم لو هي كمان حياتها مستقبلا كانت حلوه وكدا فاللي هو اشمعنا انا كل حاجه في حياتي بايظه ومش عارفه يمكن بشوف الحلو بس في حياتها ومعرفش بيتهم من جوا عامل ازاي بس مش عارفه مش عارفه بجد بفكر كدا لي بجد،،
شوفولي حل وياريت محدش يقولي كلام وحش وسلبي عشان بجد الحاله مش ناقصه انا اصلا كارهه التفكير دا يعني مبحقدش عليها ولا حاجه واي حد بيقولي حاجه حلوه في حياته بقعد اباركله وبكون فرحناله جدا بس غصب عني بفكر في كدااا
السلام عليكم .. السلام عليكي و على قلبك .. بصي يا حبيبتي انتي مش وحشه زي ما الشيطان مصورلك ده .. هفكر نفسي و افكرك بحاجه ربنا بيقولنا في كتابه الكريم "ونفس وما سواها فألهمها فجورها وتقواها قد أفلح من زكاها وقد خاب من دساها" .. و كمان بيقولنا "ولا تمدن عينيك لما متعنا به أزواجا منهم زهرة الحياة الدنيا لنفتنهم فيه" الشيطان بقى عشان يشككنا في نفسنا و يكرهنا فيها اول حاجه بيعملها معانا هو أنه ينسينا بشريتنا ينسينا أننا مخلوقين من ضعف و بنغلط و بنقع و بعدها يبتدي واحده واحده يعرض لينا صور لناس تانيين فرحانين عندهم مال عربيات أو علم أو جوازه و ينسينا تماما أن ربنا بيرزقنا بالخير و الشر فتنه .. يعني مثلا علمها و حفظها للقرٱن ممكن يكون فتنه كبيره ليها لو دخل في قلبها العجب و حست للحظه أن كل العلم ده من نفسها و مش فضل من ربنا عليها و يمكن كمان كسرتك قصاد ذنوبك و خوفك من ربنا و سعيك لأصلاح قلبك أكبر و أعظم عند الله من أعمال علماء و شيوخ كتير .. "رب معصية أورثت ذلا خير من طاعة أورثت كبرا" هوني على نفسك يا حبيبتي و متسيبيش الشيطان ينسيكي أننا كلنا جايين الدنيا و مخلوقين فيها عشان نسعى طول الوقت اننا نكون أحسن نسخه من نفسنا مش من غيرنا .. و هقولهالك تاني انتي بشر ياحبيبتي و لم نخلق كاملين كل واحد فينا في حته معطوبة إنما الشيطان بيزين لك الظاهر عشان يفتنك..
تم النشر الأحد، ١٢ أبريل ٢٠٢٦
طب انتى ليه حاسة إنك عبء على والديكى ؟ إيه الأسباب اللى خليتك تقولى كدا ... انت غالبا أهلك من صغرك كانوا بيقارنوكى كتير والمقارنة أسلوب حياة ف دا نشأ عندك عدم حب لحياتك لأنك بتقارنيها بزميلة ليكى لأنك مهما كانت حياة الشخص حلوة وفيها مميزات كتير وفيها من الجمال ما فيها بيبقى معمى عن دا كله ومش شايفة بمجرد ما يدخل حياته بمقارنة وغالبا ببنشأ شئ من الحقد والحسد اللى انتى بتكررى بنفيه بس للأسف دا واقع بس انتى نيتك صالحة .... المهم دلوقتى بداية علاجك وحبك لحياتك أن تتعلمى الحمد وهو أن تتعلمى كيف نحمد الله لازم تعرفى ان حياتنا ديه كلها ربنا كاتبهالنا سواء شايفينها حلوه بقى وحشة المهم أيا كان الحمد لله وفيه حاجات كتير يوتيوب تقربك وتعلق قلبك بالحتة ديه أى الحمد لله فى السراء والضراء فى الخير والشر، أولا وأخرا حاولى لسانك دايما مربوط بالحمد لله ودا يساعدك جدا فى التعافى من إحساسك دا ....... تانى حاجة المقارنة لازم تمسحى البنت ديه من دماغك بأستيكة لأن المقارنة بتمحى من قدامك الحلو اللى عندك وهتفضلى شايفه نفسك وحشة وقليلة لازم متفكريش فيه ولا فى حياتها لكل منا طريقة الخاص لازم لازم لازم .... تالت حاجة شوفى انتى بتحبى إيه وقادرة تعملي إيه وكافئى نفسك بمعنى يوميا مثلا عندنا خمس صلوات لو مثلا صلتيهم كلهم فى معادهم دون تأخير هتلاقى نفسك تحسى بالإنجاز ودا هيجيب انجاز وهكذا مثلا الكلية اجتهدى فيها وطلعى كل طاقتك فيها واثبتى لنفسك انك كويسة اعملى مثلا خطة معينة تنجزى فيها أشياء بسيطة كل دا هيرفع إحساسك وحبك لذاتك .... أما بقى بتعملى ذنوب ولولا ستر الله عليكى فدا كل البنى آدمين مش انتى بس احنا يا بنتى ماشيين بستر ربنا أصلا محدش خالى من الذنوب...... ربنا يوفقنا ويوفقك 🤍
تم النشر الأحد، ١٢ أبريل ٢٠٢٦
بصي انتي مش بتحقدي عليها بس كل انسان بيتمنى يكون احسن تمام، بس تكوني احسن في حياتك في مجالك وبلاش تقارني نفسك بغيرك يمكن غيرك حياته أصعب منك ميت مره وانتي معترفه بده، بس طول مانتي متابعه حياة اصحابك هتفضلي تفكري بنفس التفكير لانك شايفه نفسك مش احسن حاجة، بص حاولي تصلحي حياتك واعرفي انك مش عبء زي مانتي بتقولي انتي عملتي اللي عليكي وده قدرك ولازم ترضي بي عشان ربنا يعوضك بالاحسن وانتي مش وحشه ولا حتى مجالك لو قليل وحش بس انتي محتاجه ترضي الرضا احسن شي وبعدين حياتك هتتغير 100 درجه وانتي عمرك ما كنتي تتوقعي التغير ده اتوكلي على ربنا واعلمي ان عوض ربنا كبير ربنا بيحبك واكيد ده اختبار منه حاولي بس ما تقارني نفسك بحد ربنا يهديكي أتمنى اكون افدتك
تم النشر الأحد، ١٢ أبريل ٢٠٢٦
بصراحة بقا … انتي مش تعبانة عشان حياتك وحشة، انتي تعبانة عشان مقتنعة إنك أقل من غيرك وخلاص. انتي خدتي واحدة زميلتك وحطيتيها كأنها المقياس الصح وبقيتي تقيسي نفسك عليها في كل حاجة: دراسة، دين، شكل، قبول الناس… وطبيعي جدًا مع الطريقة دي تطلعي دايمًا خسرانة. بس الحقيقة إنك شايفة منها الجزء الحلو بس، ومش شايفة ضغوطها، عيوبها، ولا أي حاجة تانية. وفي نفس الوقت، انتي عاملة العكس مع نفسك: مركزة على كل حاجة غلط، مكبرة أخطائك، وناسية أي حاجة كويسة عندك. فطبيعي توصلي لإحساس إنك “وحشة” أو أقل… مع إن ده مش حكم حقيقي، ده نتيجة طريقة تفكيرك بس. وكمان موضوع الذنوب اللي مضايقك، بدل ما يخليكي تتحسني، انتي مخلياه سبب تكرهي نفسك وتوقفي مكانك… وده مش صح. لأن ببساطة:مفيش حد مستقيم 100%، والفرق الحقيقي إن في ناس بتغلط وبتكمل، وناس بتغلط وتفضل واقفة عند إحساس الذنب وخلاص. (خليني أقولك المهم بقى بدل الكلام النظري): لو فضلتي تقارني نفسك بحد معين، عمرك ما هتحسي إنك كفاية. ولو فضلتي قاسية على نفسك كدا، مش هتشوفي أي تقدم حتى لو حصل.انتي مش محتاجة تبقي زيها،انتي محتاجة تبطلي تقيسي نفسك عليها أصلاً...ركزي في نفسك: إيه اللي ينفع يتصلح؟ صلحيه بهدوء إيه اللي كويس عندك؟ كبّريه و طوّريه (غير كدا كله ضياع وقت وطاقة) انتي مش أقل من حد… انتي بس حاطة نفسك في مقارنة غلط، وظالمة نفسك أكتر ما أي حد ظالمك. و ربنا يسعدك و يوفقك ف حياتك عموما 🤍
تم النشر الاثنين، ١٣ أبريل ٢٠٢٦
السلام عليكم ورحمة الله وبركاته يا حبيبتي 🌸 أول حاجة، أنا فاهمة تمامًا إحساسك ده، وده طبيعي جدًا يحصل مع بنات كتير زيكِ، خاصة لما بنقارن نفسنا باللي حوالينا. بس أنتِ مش وحشة خالص، ولا عبء على حد – ربنا اختاركِ لأهلكِ عشان يبارك فيكِ ويكون لك طريقتكِ الخاصة. الزميلة دي ربنا أعطاها نعم معينة، وأنتِ عندكِ نعم تانية مش شايفاها دلوقتي، زي قلبكِ الطيب اللي بيبارك للناس وفرحان ليهم (ده بحد ذاته صفة عظيمة مش كل الناس عندها!). الحل العملي خطوة بخطوة، عشان تحبي نفسكِ وتتقبلي الاختلافات: ابدئي بشكر الله يوميًا : كل صباح، اكتبي 3 حاجات شاكرة عليها في حياتكِ (حتى لو صغيرة زي "صحتي كويسة" أو "عندي أهل يحبوني"). قولي: "الحمد لله على كل حال" – ده هيغير نظرتكِ تدريجيًا، زي ما ربنا قال في القرآن: {لَئِنْ شَكَرْتُمْ لَأَزِيدَنَّكُمْ}. ركزي على ربنا مش على الآخرين : المقارنة دي من الشيطان، زي ما النبي ﷺ قال: "انظروا إلى من هو دونكم في الدنيا". شوفي اللي أقل منكِ، وادعي لزميلتكِ بالخير (أنتِ بتعملي كده أصلاً، برافو عليكِ!). اقرئي قرآن يوميًا شوية، حتى لو صفحة، وابدئي تحفظي من جديد ببطء – ربنا يحب الإخلاص. حددي أهداف صغيرة لنفسكِ : مش لازم تدخلي بشري حكومي عشان تكوني ناجحة. ابدئي بإنجاز يومي زي "أدرس ساعة لتحسين مجموعي" أو "أعمل عمل خير صغير زي مساعدة أمكِ". كل أسبوع، احتفلي بنفسكِ بكوباية شاي أو حاجة حلوة. هتشوفي نفسكِ بتنجحي وأمكِ هتفتخر بيكِ. غيري نظرتكِ للـ"وحش" : كلنا فينا حلو ووحش، بس اللي يفرق هو اللي نركز عليه. اكتبي قائمة بـ5 صفات حلوة فيكِ (زي طيبتكِ، أو إنكِ بتحاولي ترضي ربنا)، واقريها كل يوم قدام المراية وقولي: "أنا كفاية كده، وربنا يحبني زي ما أنا". أنتِ مش لوحدكِ يا قمر، حياتكِ هتتحسن إن شاء الله لما تركزي على اللي تقدري تغيريه. جربي الخطوات دي أسبوع وشوفي الفرق، وادعي ربنا يرزقكِ الرضا والتوفيق. لو عايزة دعم أكتر، دوري في فدني على أسئلة مشابهة عن "الرضا بالنفس" أو "التعامل مع المقارنة"، هتلاقي إجابات كتير مفيدة. ولو محتاجة استشارة متخصصة، شوفي الخبراء هنا: https://www.fedni.net/experts 💕 ربنا يفرح قلبكِ ويجعلكِ ابنة باره دايمًا، آمين! 😊
تم النشر الأحد، ١٢ أبريل ٢٠٢٦
هديكي مثال جامد جدا خلاني اغير مفهومي عن النجاح بشكل كامل ...... تعالي نتخيل ان عشان تكون رئيس امريكا حلم عند البعض عشان نوضح الفكره .... اوباما حقق حلمه وهو عنده ٤٧ سنه في حين ترامب حقق حلمه وهو عنده ٧٠ سنه فرق ٢٣ سنه تقريبا الاثنين اتهنو بنجاحهم على الرغم من اختلاف الاعمار بس واحد لسه عايش وبيستمتع بحلمه (قال يعني) والتاني مات تقريبا...... الفكره مش في امريكا وكلام الفاضي الفكره ان احنا مش عايشين في سباق اصلا وقصه حياتي غير قصه حياتك غير قصه حياتها غير وغير كل شخص انولد في بيئة مختلفه عن الاخر في تحديات مختلفه عن الاخر فلذلك هنتحاسب عند ربنا بـ"العدل" وليس بـ"المساواه" لان انتي عشتي ٥٠ هو عشان ٢٠ ازاي هنقارن عبادات ده بعبادات ده ممكن صاحب العشرين سنه طول حياته بيتعب في عباده ربنا وصاحب الخمسين عاش نص حياته (٢٥ سنه) وعمل نفس المجهود (الله العالم كيف سيكون الحساب) ولاكن مثال لاثبات ان احنا مش في سباق احنا بنحاول نوصل لافضل نسخه مننا ونتعب عشان ربنا يجازينا على تعبنا ومواجهه تحديات بيئتنا الي كانت غير مسانده لنا من الصغر ..... وخلينا متفقين كمان ان هدفك غير هدفها وهدفه غير هدفي ...... وفي النهايه ان تصل متأخرا خير من الا تصل ابدا فا اسعي للي نفسك توصليله ومتركزيش في حياه حد ولو عجبك شيء في حد نفسك تكوني زيه فيه وهدفك قابل للتحقيق ابدئي من اليوم وتحسني وقربي لهدفك كل يوم ولو ١% لان بعد سنه هتكوني افضل من اول يوم ٣٧ ضعف عن اول مره
تم النشر الاثنين، ١٣ أبريل ٢٠٢٦
المقارنه غير عادله تماما حبيبتى ودى ظلم ف حق نفسك لانو انتو الاتنين معشتوش نفس الظروف م طالعين من نفس البيئه أهدافكو احلامكو مختلفه وكمان قدراتكو مختلفه عن بعض ركزى ف حياتك شوفى انتى يتحبى ايه وبتكرهى ايه ايه اللى عايزه تغيريه من نفسك اتعرفى ع نفسك اكتر وحبيها أصل لو م انتى اللى حبيتها مين هيحبها عايزه تختمى القرءان اتحدى نفسك واحفظى كل يوم جزء وهكذا ع اى حاجه عايزه تحقيقها قربى من ربنا وصلى قيام ليل وتشكيله عن كل اللى جواكى هترتاحى صدقينى والتزمى بالاذكار صدقينى لو ركزتى مع نفسك وعرفتيها اكتر هتحبيها وهتبقى راضيه عنها ربنا يريح قلبك 💗
تم النشر الأحد، ١٢ أبريل ٢٠٢٦
في دعاء بحبه اوي و بقوله كتير لما بحس اني متلخبطه أو زعلانه .. هكتبهولك... اللهم امنحني السكينة لأتقبل الاشياء التي لا استطيع تغييرها و الشجاعة لتغيير الاشياء التي استطيع تغييرها و الحكمة لمعرفة الفرق بينهما
تم النشر الأحد، ١٢ أبريل ٢٠٢٦
هلق بالأول انتي احكي مين قلك انك وحشه ومين قلك انو عبئ على عائلتك ومين قال انو لازم تقدمي لهم وشو بالنسبة لائلك البر إذا بدك ناقشيني بهدول اشياء عشان نكمل حديثنا
تم النشر الاثنين، ١٣ أبريل ٢٠٢٦
لعرض السؤال في فدني اضغط هنا