السلام عليكم
أنا كان عندي شغف جدا وبحب المذاكره وأني أتعلم حاجات جديده وكان عندي شغف أني أعمل حاجات كتير في الحياه فجأه من غير أي مقدمات لقيت نفسي معنديش شغف في الحياه نهائي ولا عايزه أعمل أي حاجه في الحياه
من أول تانيه ثانوي والشعور دا كان بيزيد مع الوقت وأنا دلوقتي في تالته ثانوي وأجلت سنه قلت ممكن مثلا دا يكون من ضغط المذاكره قبل كدا لأني قبل كدا كنت بذاكر كتير جدا فلما أجلت سنه حسيت أن حالتي النفسيه تعبت أكتر ومش عايزه أقابل حد ولا أقعد مع حد ومش عارفه اللي أنا في دا من أيه
وحاسه أن مفيش حاجه في الحياه بتفرحني وأنا كنت مصاحبه بنات هما بيحاولوا يبقو أحسن بس علطول كانو متشائمين في الحياه بقول هما ممكن يكونو أثرو على تفكيري لان أنا حاسه أني بقيت زيهم وكمان حالتي أصعب منهم
و دلوقتي حصل مشاكل مبنا وأنا مبقتش بكلمهم تاني بس أنا مش عارفه أطلع من إلي أنا فيه دا أزاي ومش عارفه دا هو السبب ولا في سبب تاني
أنا بابا وماما واثقين فيا أوي ومستنيين مني مجموع عالي بس أنا مش قادره بس أقعد على الكتاب
لما بقعد علي الكتاب بحس بخنقه وأني مش هعرف أعمل حاجه وأن مفيش وقت ودا من أول السنه وأنا كدا من أول السنه بقول مفيش وقت أنا ضيعت وقت وكل محاول أقوم وأقول خلاص بقا أنا هتتغير وأرجع زي زمان بقع تاني مع أني قبل كدا مكنتش كدا أنا كنت واثقه من نفسي أوي وبعمل كل حاجه توصلني لحلمي بس الوضع أتغير ١٨٠ درجه مره واحده وأنا معنديش صحاب خالص وآسفه أني طولت بس عايزه تفسير لحالتي فضلا
ازيك اتمنى انك تكونى بخير ، احساسك بفقدان الشغف بدون مقدمات ظاهرياً وارد ، لكن احب اقولك انه ممكن يكون بسبب تراكمات ، ووارد طبعا يكون بسبب اصحابك اللى ديما متشائمين ، وحتى لو كان ف اعتقادك انك مكنتيش بتتأثرى الا انه عقلك اللا واعى كان بيخزن التشاؤم دا ، خلينى اسألك ياترى ايه الهدف اللى حابه تحققيه ، وايه المتاح عندك لتحقيقه ، وايه اكبر عائق قدامك وتعتقدى ازاى تتخطى العائق دا . وهل انتى بتعرفى تقدّرى نفسك ، ولا شايفة نفسك ازاى ، عايزة تنجحى علشان بابا وماما ولا علشان عندك هدف ليكي عايزة تحققيه ، كل شخص مننا بيكون رسالة لغيره ، بيدعم بيساعد او حتى بيعلم غيره من علمه ، تعتقدى انتى ايه رسالتك اللى ربنا منّ عليكى علشان توصليها لغيرك واللى زيك وبيحب يتعلم ويقرأ اكيد بيحب يساعد ويفيد غيره ، ثقى فى نفسك واعرفى هدفك وقدّرى مميزاتك وسم اللّه وابدأى والوقت ما اتأخرش اننا نبدأ دلوقتى ونسعى لهدفنا *وإن ليس للانسان الا ما سعى وان سعيه سوف يُرى* انا واثقة انك هتلاقى طريقك وهدفك قريب
تم النشر الجمعة، ١٣ مارس ٢٠٢٦
وعليكم السلام ورحمة الله وبركاته حبيبتي، أول حاجة، أشكرك إنك شاركتيني اللي جواكِ بكل صراحة، وأنا فاهمة تماماً اللي بتمرّي بيه.. ده شعور صعب أوي، خاصة في مرحلة الثانوية العامة اللي ضغطها رهيب، وأنتِ مش لوحدك فيه. التغيير الـ180 درجة ده غالباً بيحصل بسبب تراكم الضغط النفسي (زي الإرهاق الدراسي، الخوف من الفشل، أو حتى تأثير الأصحاب المتشائمين اللي كنتِ معاهم)، وده ممكن يؤدي لـ فقدان الدافعية أو حالة اكتئاب خفيف (anhedonia، يعني فقدان المتعة في الحاجات اللي كنتِ بتحبيها). مش لازم يكون سبب واحد، بس الثانوية العامة بتكسر كتير من البنات زيكِ، وأجل السنه زاد الإحساس بالضياع. الحلول العملية خطوة بخطوة (ابدئي النهارده): قسّمي المهام لأجزاء صغيرة جداً : متقعديش على الكتاب أكتر من 10 دقايق الأول، ركّزي على صفحة واحدة بس، وكافئي نفسك بكوباية شاي أو سماع قرآن. كل يوم زيدي 5 دقايق. ده هيرجّع الثقة تدريجياً. رُتِين يومي بسيط : صحي 6-7 ساعات نوم، صلّي الفرائض في وقتها مع قراءة صفحة قرآن أو أذكار الصباح/المساء (ده بيجدّد الطاقة النفسية إن شاء الله). امشي 15 دقيقة يومياً في الشارع أو الحديقة، مش رياضة ثقيلة. كلّمي ماما وبابا بصدق : قوليلهم "أنا بحاول بس محتاجة دعمكم مش ضغط"، هما هيفهموا ويخفّفوا عنكِ. التوكل على الله أولاً، وتذكّري قوله تعالى: "وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ" . تابعي تقدّمك : اكتبي في دفتر يومي 3 حاجات شكرتِ الله عليها، وهدف واحد لليوم. ده هيغيّر تفكيرك من التشاؤم للإيجاب. أنتِ كنتِ قوية قبل كده، وهترجعي أقوى إن شاء الله، بس الصبر مفتاح الفرج. لو عايزة دعم أكتر، ابحثي في فدني عن أسئلة مشابهة زي "فقدان الشغف في الثانوية" هتلاقي إجابات كتير. أنتِ تستاهلي النجاح، خلّيكِ مع الله ومع نفسك. 💕 ربنا ييسر أمركِ يا رب.
تم النشر السبت، ١٤ مارس ٢٠٢٦
نصيحة اجعلي أحد والديك يقوم برقيتك .. ظني أنه م أصابك من فتور وكره للدراسة حسد
تم النشر الجمعة، ١٣ مارس ٢٠٢٦
لعرض السؤال في فدني اضغط هنا