موضوعي طويل شويه بس هحاول اختصر واتمني اكبر قدر من المختصين يردوا عليا ، أنا اتعرفت ع شخص اكبر مني ب حوالي ١٥ سنه والشخص ده في أول معرفتي بيه حكالي عن مشاكل مر بيها وصدمات كتير خلتني للأسف متعاطفة معاه جدا وانا مكانش عندي اي خبره في اني اتعامل مع حد غريب عني فكنت بتعامل بتلقائيه جدا لحد ما اعترف انه بيحبني
وللاسف انا بعدها بفتره اعترفت اني كمان بحبه بس مش عارفه هو أنا حبيته ولا ده بسبب احساسي اني مسؤوله عنه واني لازم اعوضه عن حاجات وحشه هو عاشها ولا بسبب اني كنت بمر بفتره مش أحسن حاجه فكنت بهرب علاقتي بيه ولا اي بالظبط ،
بس يعني ارتبطنا وكل شويه كنت يكتشف أنه عنده عقد نفسيه كتير وكان موتر جدا وبيضغطني وبيستهلك طاقتي بشكل فظيع وطول الوقت بحاول اعمل اللي هو عايزه علشان بس محسش بالذنب اني بزعله ، كنت بحس أنه حرام ميستاهلش كدا لحد ما للأسف حصل بينا تجاوزات في الموبايل بعد ضغط كتير منه وأنه دايما يحسسني بالذنب لو رفضت واني كدا بجرح كرامته وحاجات كتير وغصب عني للأسف اتنازلت كام مره
وبعدها بقيت بتنازل كتير رغم اني مش حابه الموضوع ورغم اني بقيت بقرف من الشخص ده جدا بس للاسف احساسي بالذنب كان بيخليني أهرب اكتر ليه علشان يسكتلي عقلي خالص ، حرفيا حاسه بذنب هيقتلني ناحيه كل الناس اللي اعرفها حتي لو ملهمش أنهم يحاسبوني اصلا بس فكره أنهم شايفني بطريقه معينه وانا عملت عكسها دا لوحده مش قادره اتحمله بالذات اني عمري ما عملت اي حاجه غلط وفجأه عملت كل الحاجات الغلط اللي ممكن اعملها وحتى الشخص دا انا مش قادره الومه ولا اصدق أنه وحش
واول ما انفجر فيه واحس أنه اتضايق ارجع أضعف تاني والصحه علشان مكونش سبب اذيه ليه ولا ابقي وحشه معاه برغم أنه دمرني ومبقتش عارفه اعمل اي حاجه في حياتي وكمان اخر فتره بينا أنا كنت مضغوطه اوي ومبقتش قادره استحمله وبسبب كدا هو اختفي من حياتي وبرغم اني اصلا عارفه أن ده احسن لي الا اني مش عايزه دا علشان مش عايزه اسيب مجال لعقلي أنه يفكر حتي ، بقى عامل شبه الإدمان لعقلي وضميري ، حتي واصله اني ممكن اوافق ارتبط بيه رسمي وانا عارفه انها علاقه فاشله وتخسر حياتي كلها بس لمجرد ان احساسي بالذنب يخف شويه
السلام عليكم ورحمه الله وبركاته. طيب علشان انت تخلصي من العلاقه السامه دي ومن تعلقك بداخل العلاقه دي لازم نجيب اول الموضوع كده زي ما انت وضحت. انه الحاجه اللي ربطت للشخص ده هو تعاطفك معاه هنا الحاجه اللي رباكي للشخص هي فكره التعاطف انت لاقيه دلوقتي شخص تتعاطفي معاه وتفرجي الجزء الخاص بالتعاطف من عندك انت عندك حس امومه او عندك حس بالمسؤوليه بتحبي تكوني مسؤوله عن حد بتحبك تطلعي حنيتك وتعاطفك مع حد تحسي ان انت كان لك اثر ايجابي ان حد يتبسط او يكون احسن فهي الحته دي اللي مخلياكي لاقيه المساحه دي مش موجوده غير عند الشخص ده ومن هنا لازم نبدا الحل لما بيكون في عندنا تعلق بشيء او شخص لازم واحنا بنتخلص من التعلق لازم نكون حطينا بدايل صحيه لان هي دي اللي هتشدنا بدل العلاقه الس. العلاقه السيئه دي صح احنا هنا لازم ندور على انك محتاجه تمارسي انشطه فيها تعاطف تواجدي اكتر مع الاطفال بتتطبي عليهم وضحكيهم وابسطيهم روحي الاماكن اللي فيها مثلا اطفال ايتام او روحي اماكن يكون فيها ااا اطفال مرضى زي مستشفى 57 ااا علشان تطلعي الطاقه اللي عندك دي كلما طلعت الطاقه دي كلم هتيجي قدام العلاقه بتحسي ان انت ما عندكيش حاجه تديها وما فيش حاجه انت محتاجه تعملي هنا فهتحسي ان الموضوع ينسحب معاكي واحده واحده اللي هو ده اللي رحت للاسف الشخص ده. اتمنى اكون سعادتك في المشكله اللي عندك قدره خبرتك وفي اي حاجه ثانيه اقدر اساعدك بيها عرفيني في التعليق هنا ان شاء الله كل امورك طيبه.
تم النشر الجمعة، ٢٦ يونيو ٢٠٢٦
السلام عليكم، للأسف الشخص ده استغلك وتعمد اللعب على نفسيتك وبرمجتها بحيث تتعلقي به ويتحول لإدمان في حياتك فتفضلي بتحققي له كل اللي عاوزه. الأشخاص اللي زيه دي لعبتهم وبيعرفوا مدخل كل بنت إيه وأي وتر حساس يلعبوا عليه عشان يستغلوها، ومش بعيد فيه بنات غيرك استغلهم او لسه بيستغلهم بنفس الطريقة. ** أنتِ قلت اختفى من حياتك بس مش عارفة هل تقصدي إن ده مؤقتا وممكن يرجع او أنت تتواصلي معه؟ لو فيه احتمالية لده أو حصل قبل كده إنه بعد ورجع بعد فترة فامنعي تكرار ده... اقطعي الطريق تماما. عارفة التنفيذ صعب ومؤلم، لكن تألمي فترة وتعذبي أفضل من الدمار التام. احظريه من كل وسائل تواصلك معه، لو تقدري تعطي موبايلك حتى لحد من أهلك وتؤكدي عليهم ميرجعهوش لك يبقى أفضل عشان وقت ما نفسك تضعف يبقى طريق العودة مقطوع. ** ابدئي ركزي على حياتك وخلي يومك مشغول دايما بحيث متلاقيش وقت تحني أو تضعفي. وقت تحسي بالذنب فوقي نفسك بسرعة وفكريها إن الشخص ده حقير ومستغل ونفسك وكرامتك أغلى من إنك تهدريها عليه بالشكل ده. ** والخطوة الأهم قبل اللي فات إنك تستغفري وتتوبي وتدعي ربنا بصدق إنه يقويك ويشفي قلبك ونفسك، وبعدها تتسامحي مع نفسك وتوقفي جلد ذاتك وتتفهمي إنها بشر، غلطت ووقعت لكن الوقوف وتصحيح المسار مش مستحيل. إذا صعب التعافي بمفردك لا تترددي تستعيني بمختصة تساعدك بخطة عملية وتتابع معك. فيه خبيرات كتير في صفحة خبراء فدني وقت تحتاجي تواصل مع خبيرة اختاري اللي تحسي إنها تقدر تساعدك. وربنا يعينك وتوصلي بر النجاة عاجلًا إن شاء الله.💚
تم النشر الخميس، ٢٥ يونيو ٢٠٢٦
أولاً، أنا آسفة جداً إنك مريتي بكل ده، وأقدر إنك حاسة بالذنب الشديد ده والإرهاق النفسي. العلاقة دي واضح إنها سامة، والشعور بالمسؤولية عن الآخر والضغط المستمر خلّاكِ تتنازلي عن حدودك، وده مش ضعف منك، ده نتيجة طبيعية للظروف اللي مريتي بيها. المهم دلوقتي إنك عايزة تتخلصي، وده خطوة قوية. من منظور إسلامي، التوبة باب مفتوح دايماً، والله غفور رحيم. ركزي على إنك تطلبي المغفرة من ربنا وتشتغلي على نفسكِ، لأن الذنب اللي بيأكل فيكِ ده مش هيخف إلا لما تبعدي عن المصدر وتبدئي تعيدي بناء ثقتكِ بنفسكِ. العلاقة دي مش هتكون أبداً أساس سليم لارتباط رسمي، وأنتِ عارفة كده، فالأفضل تستغلي اختفاؤه كفرصة للانفصال النهائي. عملياً، ابدئي بخطوات بسيطة: امسحي كل الرسائل والصور اللي بتذكركِ بيه، ولو رجع يتواصل مترديش خالص حتى لو حاول يضغط عليكِ بالذنب. ركزي على روتين يومي يملّي وقتكِ، زي الرياضة الخفيفة أو القراءة أو تعلم مهارة جديدة، عشان عقلكِ ما يفضلش يفكر فيه. لو الذنب بيسيطر عليكِ لحد ما بيأثر على حياتكِ اليومية، فكري في استشارة معالج نفسي متخصص في العلاقات السامة، عشان تساعدكِ تفهمي الجذور وتتخلصي من الإدمان العاطفي ده. أنتِ مش لوحدكِ في الموضوع ده، وكتير بنات مرّوا بتجارب مشابهة وقدروا يتعافوا. ابحثي عن أسئلة مشابهة على فدني عشان تشوفي وجهات نظر إضافية. خدي خطوة بخطوة، وهتكوني أقوى مما تتخيلي.
تم النشر الخميس، ٢٥ يونيو ٢٠٢٦
بصي يا غالية دا كان إستغلال وهو كان بيستغلك عشان أنتِ صغيرة وطبعًا هو أكبر بكتير يعني كان بيلعب معاكِ على جزئية العاطفة وهو أصلًا من البداية فهم شخصيتك وإنك بتتأثري فـ عشان كدا كان بيطلب منك وهو متأكد إنك هتنفذي الطالبات، ولكن سيبك منه دالوقتي، المهم أنتِ المهم نفسيتك أنا مش عايزاكِ تدمري نفسك ولا تزعلي نفسك خالص البداية من دالوقتي تكون جديدة القرار في إيدك والماضي أنتِ أتعلمتي منه أكيد وفهمتي الدرس كويس جدًا جدًا
تم النشر الخميس، ٢٥ يونيو ٢٠٢٦
أنا مش عايزاكِ تشوفي نفسك بنظرة ومع الوقت هتنسي بس المهم تأخدي قرار بالتغيير وإنك تكوني واعية وناضجة أكتر وتأخدي قرار إنك مش هتدخلي أي علاقة محرمة وأستعغري وتوبي من أي حاجة حصلت ربنا سبحانه وتعالى فاتح بابه ولا تيأسي أبدًا وخليكِ قوية وأنا متأكدة إنك قوية والحالتك النفسية مع الوقت ومع شغلك على نفسك هتتغير
تم النشر الخميس، ٢٥ يونيو ٢٠٢٦
الشخص دا ببدوفيليا كان بيستغلك مش آكتر وهو حكالك مصايبه عشان يخلي تتعاطفي معاه ويوهمك إنك بتحبيه آنتى عمرك ما حبيبته آنتي بس كنتي متعاطفه معاه وهو استغل طيبتك مش هقدر اقول انك مش غلطانه لا انتي غلطتي عشان سمحتي لحد يتعدى حدوده ودا ميخلكيش تزعلي من نفسك لا ما يخليكي تتعلمي إنك متخليش حد يتعدى حدودك دا شخص مريض وانتي حاولي تبعدي عن أي حاجه تفكرك بيه احذفي أي حاجه تفكرك وركزي في دراستك مش هتقدري تنسي حاجه زي دي لكن على الاقل متقوليش لحد عليها لان المجتمع م بيرحم البنات حتي لو الرجاله هيا إللي غلطانه ،توبي ل ربنا وقربي منه واياك تدخلي في علاقه زي دي ارتباط أو حتي صداقه إللي بجد بيحترمك مش هيعمل حاجه من ورأي أهلك وسامحي نفسك لأنك انتي كنت ضحيه واصبري شويه واشغلي نفسك باي حاجه عشان متحسيش أحساس انك عاوزة ترجعيله وادعي ربنا كتير ادعيييي ( أسفه انفعلت شويه لكن بجد أنا اتعصبت من الراجل دا)
تم النشر السبت، ٢٧ يونيو ٢٠٢٦
اقطعي علاقتك بيه ، والغي متابعته تمامًا والغي أي وسيلة توصله لكِ ، وتوبي من هذه المعاصي وابدأي حياتك بقرب من الله وانسي كل ما مضى ، لإن ده كان ابتلاء من ربنا ليكي ،
تم النشر الخميس، ٢٥ يونيو ٢٠٢٦
فهمتي كلامي؟ لو حابه نتكلم في حاجة تاني أنا معاكِ خطوة بخطوة💕
تم النشر الخميس، ٢٥ يونيو ٢٠٢٦
سامحي نفسك وإنك مش فاهمة وفهمتي وخلاص النسخة الجاية منك تكون أفضل فاهمة وواعية وأعرفي الأنثى بطبعها عاطفية ما بالك لو كانت صغيرة هتتأثر أكتر، بس أنا متأكدة إنك نضجتي أكتر لأني كمان متأكدة إن التجربة لو كانت صعبة ومؤلمة النضج بيكون أكتر حتى ضعفك بقى أقوى عارفة ليييه؟ عشان عرفتي إن في ناس ممكن تستغلك
تم النشر الخميس، ٢٥ يونيو ٢٠٢٦
١٨
تم النشر الخميس، ٢٥ يونيو ٢٠٢٦
طيب أنتِ عندك كام سنة؟
تم النشر الخميس، ٢٥ يونيو ٢٠٢٦
لعرض السؤال في فدني اضغط هنا