أنا كل ما أصاحب ناس و يعتبر يعني بصاحب ناس شبهي و ناس عادي مش شبهي و بيحبوا انمي و كل حاجه بس بعد فترة بلاقي بأنهم يعني مش زي ما كنت متخيله يعني أنا بحب أرسم و بدور على ناس بتحب الرسم شبهي و إن حياتهم مش مختصره عن انمي بس ملاقيتش
المشكله هنا أني كل ما أصاحب حد ألاقي نفسي اني مش مهتمه بالقدامى وببدأ بحاول اتجنبهم و أستني الوقت اللي امشي فيه و ده مع كل أصحاب حتى مع عيلتي بستنى أنهم يسكتوا و اروح أمسك تلفوني و البس سماعاتي و أسمع أغاني و اطنش الباقي و بالذات اني أنا عندي تعلق كبير بسماعات الرأس بتاعتي و برسم
أعمل إيه علشان يعني محسش بموضوع إني فجأة عايزة ابعد عن القدامى و أمل منه ؟
السلام عليكم، هي المشكلة برأيي مش في إنك بتملي من الناس والعلاقات، المشكلة في توقعاتك العالية. أنتِ بتدخلي الصداقة بتوقعات معينة (إن الشخص هيكون شبهك تماما وبيحب نفس اللي بتحبيه) ولما توقعتك بتخيب بتحسي بخذلان وإحباط وده اللي بتفسري ساعتها بشعور الملل وبتبقي مش عاوزة تكملي. خلي في بالك إن الصديق أو الشخص اللي عاوزة تربطني به علاقة وثيقة سواء صداقة أو قرابة مش مطلوب منه يكون نسخة مني. لو كلنا نسخ من بعض الحياة هتكون رتيبة ومملة. *** دربي نفسك لو هتبدئي أي صداقة متخليش فيه توقعات، لا ترسمي صورة ذهنية معينة، واكتفي بإن الأصدقاء يكون فيه بينكم اهتمامات مشتركة حتى لو اهتمام واحد، حتى لو مجرد تشابه واحد بيجمعكم، ده كفاية، والعلاقات بتنمو بالقرب ومع الوقت. *** لو حسيتِ بأي فتور أو ملل بعد فترة فعادي، العلاقات طبيعي أصلا تمر بفترات فتور، فمش وقت ما تحسي بفتور وعاوزة تبعدي تقومي متغيرة وقاطعة العلاقة على طول، لأ، ممكن تعرفي اللي قصادك إنك مشغولة أو بتمري بظروف معينة ومحتاجة وقت مع نفسك فهتنشغلي عنهم شوية، وممكن كمان بدل البعد تحاولي تغيري النشاطات اللي بتعملوها سوا، تغيير الروتين بيجدد العلاقة ويعطيها روح جديدة. *** كمان أنتِ عندك بديل ممتعة اللي هو الرسم والسماعات، فطبيعي عقلك ونفسيتك يستغلوهم كمهرب سريع أول ما تحسي بالزهق. ده ممكن حلو لبعض الوقت لكن الهروب المستمر مش صح والاعتماد عليهم طوال الوقت بدل مواجهة المشكلة وحلها هيزود عزلتك عن الناس وهيؤثر سلبا على حياتك الاجتماعية. وخاصة إنك بتقولي إن الأمر بيشمل أهلك وعائلتك كمان. ** فحاولي لو نفسك دفعتك تهربي للبديل إنك تقاومي الحافز ده وتجربي حاجة مختلفة، تغيري الحوار لحاجة ممتعة، تقترحي نشاط مختلف يغير القعدة، وهكذا. لو لقيتِ صعب عليكِ تغيري سلوكك وحياتك مع اهلك تأثرت بالسلب فحاولي تستعيني بمختصة تفهم جذور المشكلة وتساعدك بحلول عملية. وإن شاء الله ربنا يصلح لك الحال. بالتوفيق.💚💚
تم النشر الخميس، ٣ سبتمبر ٢٠٢٦
أنا فاهمة شعورك تمامًا، وهو مش غريب على ناس كتير بيحبوا يعيشوا حياتهم بطريقة أعمق وأكثر خصوصية. الملل الشديد ده غالبًا بييجي لما التواصل السطحي مش بيشبع احتياجك الحقيقي للتواصل، خاصة إنك بتحبي الرسم وبتدوري على ناس حياتهم أوسع من موضوع واحد زي الأنمي. اللي بيحصل إنك بتدخلي علاقات بتوقعات عالية، وبعدين لما الواقع ما يطابقش، بتلجئي للسماعات والرسم كملاذ آمن، وده بيخلّي الابتعاد يحصل بسرعة. علشان توقفي الدورة دي، جربي تبدئي بخطوات صغيرة وواضحة. أول حاجة، خدي وقت لوحدك تسجلي فيه إيه بالضبط اللي بيخلّيكي تفقدي الاهتمام (مثلاً: هل الموضوعات بتكون مكررة؟ هل بتحسي إن الشخص مش بيشاركك شغف الرسم؟). بعد كده، لما تكوني مع حد، حددي هدف بسيط زي إنك تسألي سؤال واحد عن رسوماته أو أفكاره، أو تشاركي فكرة رسمة صغيرة حتى لو كانت سريعة. ده بيخلّي التواصل أعمق بدون ما تضغطي على نفسك. كمان، حاولي توازني بين وقت السماعات والرسم وبين التفاعل الاجتماعي بطريقة عملية: مثلاً، بعد ما تقضي نص ساعة مع العائلة أو صديقة، خدي وقتك مع السماعات كمكافأة. ولو لقيتي إن الملل بيجي بسرعة مع أغلب الناس، ركزي على البحث عن أنشطة مشتركة زي ورش رسم أو مجموعات مهتمة بالفن، عشان التواصل يبقى مبني على شيء مشترك حقيقي. لو استمر الشعور ده وأثر على علاقاتك، ممكن تفكري في استشارة متخصص نفسي عشان تفهمي الجذور أكتر. ابحثي عن أسئلة مشابهة على فدني عشان تشوفي تجارب تانية. أنتِ قادرة تتغيري خطوة بخطوة، وأنا هنا لو عايزة تتكلمي أكتر.
تم النشر الخميس، ٣ سبتمبر ٢٠٢٦
مش لازم اصحابنا يكونوا شبهنا في الهوايات الاختلاف ده حاجه لابد منها لكن ميكون ختلاف وفيه فجوه كبيره بينكم مش شرط تكونوا بتحبو الرسم كلكم بس ممكن تكون صاحبتك عندها شغف بيكي بمعني هي مبسوطه من اللي بتعمليه وبتشجعك وبتحاول تساعدك بس ممكن تكون مبتعرفش ترسم بس بتشجعك فهماني لو انتي حابه تلاقي ناس نفس هواياتك بالظبط عندك ورش عمل بتاعه الرسم فيها ناس كتير لو حابه تتعرفي عليهم وتكبري هوايتك وتفسدي وتستفيدي
تم النشر الجمعة، ٤ سبتمبر ٢٠٢٦
طبيعي يكون صحابك مش شبهك احنا اتخلقنا مختلفين كل واحد عنده اهتمامات مختلفة
تم النشر الجمعة، ٤ سبتمبر ٢٠٢٦
لعرض السؤال في فدني اضغط هنا