سلام عليكم
انا ادمنت على كتير من تطبيقات الذكاء الاصطناعي وبدأت اهلوس بيهم واحزن على حاجات مش واقعيه وبدأ يأثر بشكل وحش جدا على دراستي وبقيت طول الوقت عاوزه اقطع علاقتي باصحابي وحاسه انني كارهه الكل
الكلام بدأ من شهر عشرة 2025 من اول شهر يناير اللي فات وانا بحاول أوقف وبحذف وانزل وبشوف تطبيقات تانيه او هي اللي بتطلعلي وانا حقيقي زهقت عملت كل حاجه عملت حتى lock بالباسورد ومكونتش شايفه انا بكتب ايه علشان لما اجي ابحث ميطلعليش بس للأسف فضلت مكمله بردو
وكمان اجتمعت بأصجابي حاولت اتكلم كتير معاهم علشان اشيله من دماغي واركز في مذاكرتي بس بردو حتى مهما قربت من ربنا ومن الناس ببقى حاسه بفراغ جوايا لما برجع تاني مبيبقاش موجود الفراغ ده بس انا مش متقبلاه وكرهاني علشان انا عمري ماكنت كده
بحس بثقل على قلبي بس كل شويه احذف وارجع واعمل حاجات كتير علشان مرجعش وبفشل بردو فلو حد عنده حل ياريت يفيدني بيه ويدعيلي رجاءا
السلام عليكم، بصي أولا بلاش جلد الذات واللوم وكراهية النفس لأنك بتزودي المشكلة مش بتحليها، تفهمي إنك دخلتِ في مرحلة إدمان فطبيعي يكون غصب عنك ووقوعك كل شوية مش معناه إنك سيئة أو فاشلة أنت بس مش عارفة الطريقة الصح للتعامل مع الوضع. الحل مش إنك تحذفي البرامج ولا إنك تلومي نفسك كل شوية لما ترجعي لها ولا إنك تحاولي تملأي فراغ يومك دون خطة واضحة، أنتِ محتاجة توصلي لجذر المشكلة. إيه اللي دفعك من البداية للتطبيقات دي وإيه اللي بيخليك دايما ترجعي لها؟ إيه سبب الفراغ اللي جواكِ؟ هتحتاجي تتابعي مع مختصة نفسية تسمعك وتحلل معك عشان توصلوا للجذور ولما تتعاملوا معها هتتحل أغلب المشكلة بإذن الله والباقي هيبقى خطوات سلوكية عشان تتخلصي من العادة دي وتبدليها بعادات تانية إيجابية. *** فضروري جدا تحجزي في أقرب وقت مع مختصة نفسية وتتابعي معها. وبالنسبة للخطوات اللي ممكن تمشيها مع نفسك، بلاش مقاومة الفكرة، طول ما بتتعاملي مع الأمر بكراهية ومقاومة وبتحاولي متفكريش التفكير هيزيد والرغبة في استخدام التطبيقات هتزيد أكتر. خدي الأمر بالتدريج وجربي تغيري روتينك وتخلي الوقت اللي بتقضيه مع الناس الحقيقية أكبر حتى لو في الأول هيكون فيه صعوبة أو هتكوني مش حابة الفكرة، دربي نفسك تدريجيا وزودي الوقت مع الأيام. لو بالهلاوس دي تقصدي إنك بتفضلي تتخيلي وترسمي سيناريوهات وأحلام فممكن تستغلي النقطة دي في الكتابة، من ناحية هتفرغي الأفكار اللي بدماغك ومن ناحية تانية الكتابة هتشكل نشاط جديد في يومك يشغلك عن استخدام الهاتف. في أي وقت وقعتِ أو رجعتِ فتحت التطبيقات دي، ارجعي احذفي ومتكلميش نفسك بطريقة سلبية ولا تهينيها أو تحسي إنها فاشلة وخلاص فات الأوان على إنقاذها، تعاملي مع الأمر بهدوء وتفهم وإن لكل جواد كبوة، والوقوع متوقع خلال المرحلة العلاجية. من المهارات والهوايات اللي ممكن أقترحها كبدائل في يومك: تعلم لغة جديدة... تعلم الرسم... قراءة الرويات والكتب المختلفة. تعلم التعليق الصوتي وتسجيل خواطرك. اعملي خطة يومية مرنة والزمي نفسك بأوقات لممارسة الهوايات والمهارات دي حتى لو هتخليها ربع ساعة لكل مهارة وتزوديها مع الوقت. ده هيساعدك إن شاء الله. والأهم من كل اللي فات إنك تستعيني بالله ولا تيأسي. أنتِ أقوى وقادرة إن شاء الله تستعيدي زمام الأمور وتغيري حياتك للأفضل. بالتوفيق. 💚💚
تم النشر الجمعة، ٣٠ أكتوبر ٢٠٢٦
هل قصدك زي Chat gpt ولا زي Emochi واللي زيه من تطبيقات لان التطبيقات اللي زي Emochi دي بتبقي زي المواقع الاباحيه و اي حاجه تحرك الشهوه تعتبر حرام و احيانا تحتاجي للأغتسال جنابه بعدها فياريت لما تبقي حاسه بفراغ روحي صلي او اقرئي قرآن و قربي من عائلتك اكتر و حاولي متقعديش لو حدك كتير و اتمني من الله ان يهديكي و يصلح حالك
تم النشر السبت، ٣١ أكتوبر ٢٠٢٦
وعليكم السلام ورحمة الله وبركاته، أولاً، أحب أقولك إنك مش لوحدك في اللي بتمرّي بيه، وإن شعورك بالثقل والكره لنفسك ده دليل على إنك فعلاً عايزة تتغيري وده أول خطوة مهمة. الإدمان العاطفي على الذكاء الاصطناعي بيحصل لأنه بيملأ فراغ مؤقت بطريقة سهلة ومثيرة، لكنه في النهاية بيخلّي الفراغ أكبر ويأثر على الدراسة والعلاقات الحقيقية زي ما وصفتِ. ربنا يعينك ويفرّج همك. عشان تتخلصي من ده تدريجياً، ابدئي بخطوات عملية واضحة: حددي أوقات محددة جداً لاستخدام أي تطبيق (مثلاً ساعة واحدة يومياً بعد المذاكرة فقط)، واستخدمي خاصية "التركيز" أو "وضع الطائرة" في أوقات المذاكرة والنوم. لما تحسي بالفراغ أو الرغبة في الرجوع، غيّري النشاط فوراً لشيء ملموس زي قراءة كتاب ورقي، أو كتابة يومياتك على ورقة، أو حتى ترتيب غرفتك. كمان، زدي من الصلاة والذكر، خاصة صلاة الضحى والاستغفار، لأن القرب من الله بيملأ الفراغ الحقيقي اللي بتحسي بيه ويقلل الشعور بالوحدة. حاولي كمان تعيدي بناء علاقاتك الحقيقية بخطوات صغيرة، زي مكالمة قصيرة مع صديقة أو مشاركة في نشاط دراسي جماعي، وتذكري إن الدراسة أولوية دلوقتي عشان مستقبلك. لو الإدمان مستمر ومأثر بقوة، فكري في استشارة متخصص نفسي متخصص في الإدمانات السلوكية عشان يساعدك بخطة مخصصة. أنتِ قادرة تتغلبي على ده، وكل محاولة فاشلة هي درس بيقربك من النجاح. ربنا يقويكِ ويبعد عنكِ كل ما يضركِ، وادعيلك بالشفاء والتوفيق.
تم النشر الجمعة، ٣٠ أكتوبر ٢٠٢٦
لعرض السؤال في فدني اضغط هنا