السلام عليكم، مش عارفة أنا فهمي صح ولا لأ، بس أنا حاسة من كلامك إنك مش حابة البرمجة وكل الفكرة اللي مركزة عليها إنك تشتغلي حاجة تكون مصدر دخل كويس. فنصيحة، اوعي خالص تختاري على أساس الترند وإيه أكتر حاجة الناس بتتعلمها دلوقتي، يعني مثلا هتلاقي كتير يقول لك اتعلم برمجة دي دخلها كويس وبالدولارات، لأ اتعلم ذكاء اصطناعي ده هو المستقبل وهكذا. لو هتبدأي تتعلمي حاجة عشان تشتغلي بها لازم تعرفي الأول هل عندك إمكانية تعلم وتطوير المهارة دي والمنافسة فيها ولا لأ. جربي الأول تعرفي ميولك ومهاراتك ولو لقيتِ إن البرمجة ما زالت بالنسبة لك معقدة وغير مفهومة يبقى أنتِ مش هتقدري تتطوري فيها وتنافسي وخاصة إن سوق العمل عامة مُشبع. *** ده رابط لمباردة العمل من المنزل المقدمة من أكاديمية ابن سينا، ممكن تسمعي المحاضرات وتطبقي النصائح اللي فيها. https://t.me/workremotelyfreelance/61 هي بتعرفك الأول إزاي تعرفي شخصيتك وميولك والمهارات المناسبة لك وبعد كده إزاي تبدئي في تعلم المهارات دي وتطويرها وإزاي بعد كده تبحثي في سوق العمل الحر وتلاقي العملاء وتبدئي شغل. *** نصيحة بجد، لا تستعجلي لمجرد إنك عاوزة تلاقي مصدر دخل. لأن مهما كانت المهارة اللي هتختاريها لازم تبذلي مجهود الأول علشان تلاقي مقابل بعد كده. إن شاء الله المتخصصين بالبرمجة يفيدوك أكتر من ناحية المجال لكن أنا حبيت أنصحك في العموم عشان تقدري تحددي اختياراتك صح وتختصري الطريق على نفسك. بالتوفيق إن شاء الله.
لعرض الإجابة في فدني اضغط هنا