سلام عليكم
انا بنت عندى عشرين سنه اتخطبت مرتين المره الاوله كان انسان مخادع والثاني كان ندل دخلت فى حاله سميه جدآ لانى بقتش اثق فى حد
دلوقتى انا برفض اى عريس يتقدمون حاليا عشان عايزه حد بمواصفات معينه المواصفات دى شبه مستحيله بسبب إننا فى ارياف
انا اخذت عهد على نفسى انى مش اتجوز اللى الشخص اللى القى فيه مواصفاتى انا بتمنى شخص شبه قصص الخيال شخص يحبني قوي اكون كل حاجه ليه ويكون كل حاجه ليه يكون رجل أعمال ناجح يقدرني ويحترمنى ويحترم افكارى
انا بتمنى شخص من مستوى راقى عشان انا تعبت من حاجات كتير اولهم قرايبى شمتو فيا لما فسخت مرتين وكل واحده فيهم تجوز بنتها تيجى تكلم ماما بشماته انى لسه قاعده وبنتهم اتجوزت
لم قلت لصديقتى قالت انى مبصش لفوق والتانيه قالت انى ماديه وانا بجد مش كده بس عشان اللى بيشمتوا فينا واللى خلى صحابى يقولو كده إني تعليمى متوسط انا تعبت نفسيا ممكن تنصحوني لوجه الله
السلام عليكم، فيه كم نقطة محتاجة تنتبهي لهم، أولا، بلاش تاخدي الخطوبتين السابقتين كمقياس أو تفضلي متمسكة بهم كتجربة سيئة لأن ده هيأثر على نظرتك واختياراتك وهيفضل حاجز مانعك ومخوفك من اختيار شخص خاطئ وبالتالي خوف من الزواج رغم الضغط العائلي ورغم إنه يظهر من أفكارك إن فيه رغبة لإيجاد شريك حياة لكن في الحقيقة ممكن المعايير العالية الخيالية زي ما وصفتيها هي مجرد حاجز عقلك وضعه عشان يمنعك من تكرار التجربة. ** ثانيًا، مش عارفة بتقراي روايات رومانسية كتير او بتشوفي أفلام ومسلسلات رومانسية طول الوقت ولا لأ، بس حاولي تكوني واقعية أكثر، من حقك تحلمي بمواصفات معينة لكن لازم يكون فيه حساب للواقع. تعالي احسبيها كده، زي ما قلتِ، أنتِ في أرياف.. مش عارفة تعليمك ومستواك الاجتماعي إيه لكن رجل الأعمال أكيد هيدور على واحدة في مستواه الاجتماعي والمادي والفكري. إلا إذا قصدك من رجل أعمال شخص مثلا عنده شغل خاص حتى لو صغير وتقدري تامني مستقبلك معاه. والغنى مش مقياس ولا ضمان للأمان، ممكن توافقي على شخص غني لكن على المستوى الشخصي يكون زوج بخيل عاطفيًا وماديًا وفيه عيوب متقدريش تعيشي معها. ممكن غني ومعه وظيفة لكن لا قدر الله يخسر وظيفته وماله مستقبلًا، فمفيش ضمان. لازم يكون فيه توافق اجتماعي ومادي وتعليمي بينكم ولازم تتأكدي من أخلاقه ومعاملاته واكيد من حقك تختاري شخص قادر يقوم بالتزاماته المالية تجاه زوجته وأولاده بعد كده. *** ثالثًا، وده مهم جدًا، بلاش خالص تحطي في بالك كلام أهلك ولا شماتة الناس ولا نظراتهم ولا أي حاجة من دي في تفكيرك وتاخدي قرارك بسببها. بنات كتير بسبب خوفهم من كلام الناس والشماتة وضغط الأهل وقعوا مع أزواج سيئين وعاشوا في جحيم سواء كملوا أو اتطلقوا. فبلاش تخلي ده يدفعك لخطأ أكبر تدفعي تمنه بعدين غالي قوي. ** سيبيك من كلام الناس وركزي دلوقتي تطوري نفسك وشخصيتك وتخلي حياتك ناجحة ومتوازنة ونفسيتك سليمة وتفكيرك واعي ووقتها هتعرفي الإنسان الصح لما تقابليه وهتقدري تختاري شريك الحياة اللي يستحقك فعلًا. *** ربنا يوفقك ويكتب لك الخير.
تم النشر الخميس، ٧ أغسطس ٢٠٢٥
السلام عليكم ورحمه الله وبركاته. نصيحه بقى لوجه الله فعلا ملكيش دعوه بكل اللي حواليك ما تستجبيش الاستفزازات الخارجيه دي والمجتمع المحيط بيكي اللي هو شايف انه كده يعني انت اللي متاخره ان انت كده اللي بتضيعي على نفسك فرص انت تمام يعني خدي الكلام ده وما تعمليلوش اي قيمه ويهز راسك وقولي لهم تمام. ان شاء الله ربنا يعمل كل خير لكل الناس وخلاص ما تنقشيش الكلام حتى مع نفسك ليه بقى لانه الكلام ده خطا جدا جدا جدا. انت مش محتاجه تتنازلي عن المواصفات اللي بالنسبه لك هتكون مناسبه واللي هتريحك واللي هتفرق معاكي في الحياه بس محتاجه تعملي حاجه مهمه قوي قوي. محتاجه تبقي عارفه ايه العيوب اللي انت عندك استعداد تتقبليها في الشخص اللي انت هترتبطي بيه او لو هيكون شريك حياتك لانك لو قعدتي تفكري بس في مميزات الشخص وانك قد ايه عايزاه يبقى يعني حاجه كده فوق الخيال قد ما ده هيبقى زيرو واقعي وهو ده اللي هيكون صعب لانه كل شخص عنده جزء من العيوب فانت محتاجه ت اي مميزات تانيه ليكي كل الاحقيه انك تتمسكي بمميزاتك لحد ما ان شاء الله يعني ربنا بيسبب الاسباب يجيبه لك من اخر الدنيا بلدكم بالذات يجي لشيء يعلمه الله علشان يشوفك علشان يحصل نصيب علشان يبقى ربنا بعت لك الشخص المناسب لك. ربنا ان شاء الله يكتب لك الزوج الصالح وامورك.قولي والله لو في كل المميزات بس فيه العيب مثلا ان هو بيحب يلعب بلاي ستيشن والصوت بيبقى عالي قوي انا هستحمله. هستحمل ان هو ما بيعرفش ان هو بيعمل دوشه في البيت وبيعلي الصوت بشكل كبير وانا الصوت العالي بيضايقني فانا هستحمل الصوت العالي قصاد المميزات اللي فيه اللي هي كلها بقى اللي انت بتدوري عليه. او مثلا انا هستحمل عيب فيه ان هو يكون شخص لما بياكل بيفتح حواليه او ان هو يكون بيعمل صوت وهو بياكل شوفي انت ايه العيوب اللي عندك استعداد تحمليها لانك لو ما عملتيش حساب ده تبقي فعلا بتدور على شخص خيالي مش موجود.
تم النشر الثلاثاء، ٥ أغسطس ٢٠٢٥
وعليكم السلام ورحمة الله، السلام عليكي يا أختي العزيزة، وأفهم تمامًا الوجع والحيرة اللي بتمرّي بيهم، خصوصًا بعد تجارب خطوبة صعبة زادت من شعورك بالجرح وفقدان الثقة. خليني أساندك وأحاول أساعدك بخطوات عملية ونصائح تخفف عنك وتدعميك توجهي طموحاتك بحكمة وواقعية: ثقي بنفسك وبحقك في السعادة أنتِ تستحقين أن تكوني مع شخص يحبك ويقدرك ويحترمك بدون شروط تعجيزية. لا تسمحي لتجارب الماضي تلغي أحلامك أو تخليكي تقللي من نفسك. طبيعة المواصفات وطبعًا مش مستحيل، لكن… كوني واقعية شوية في تحديد المواصفات. ممكن ما تلاقيش شخص مثالي تمامًا، لكن حاولي ترتيب الأولويات: الحب والاحترام وعدم الخداع. قدرة المسؤولية والنضج (مش بالضرورة يكون غني أو رجل أعمال ناجح، ممكن الإنسان يكون طموح وملتزم ويبدأ خطوة خطوة). التفاهم والتوافق الفكري والقيمي. التأثير الاجتماعي ونظرة الناس مشكلتك مع الناس اللي بيشمتوا وبيقيسوك على غيرك واردة في مجتمعاتنا، لكن ما تخليهم يحددوا قيمتك أو قرارك. مينفعش تسمحي لرأي الغير يأثر على سكينتك النفسية ومستقبلك. ثقي في الله وقدري الدعاء واليقين اجعلي الله هو الملجأ، واطلبي منه أن يرزقك الخير في الوقت المناسب. الزواج رزق وباب لراحة النفس، وهو بيدبر الأمور أحسن منا. اعملي على تطوير نفسك لو ظروف التعليم أو المكان صعبة، ممكن تواصلي تطوير نفسك بالمصادر الإلكترونية أو الدورات أونلاين. التعليم والثقة بزيادة معارفك يفتح لك مجالات أكثر في الحياة والتعارف. لا تضيعي وقتك في انتظار المثالي بل في بناء علاقة صحية كوني منفتحة على فرص التعارف مع أشخاص جادين، حتى لو كانوا أقل من معياريك المادية، البداية قد تكون طريق لاكتشاف القيم الحقيقية. في النهاية، تذكري أن الزواج ليس فقط علاقة حب رومانسية، بل شراكة حياة قائمة على الاحترام والتفاهم. الله لا يضيع تعبك أبدًا، وصدقيني الخير قادم. لو تحبي، ممكن تتابعي صفحة الخبراء في "فدني" على https://www.fedni.net/experts للتواصل مع خبراء نفسيين واجتماعيين يساعدوكي بشكل مخصص. أنا ذكية دايمًا هنا علشان أساندك وأسمعك، ولو عندك أي أسئلة أو محتاجة دعم أكثر اطرحي عليا بدون تردد. ربنا يكتب لك الخير والبركة يا غالية. ❤️
تم النشر الثلاثاء، ٥ أغسطس ٢٠٢٥
انتي انسانه مش وحشه بس عايزه ترتاحي بسبب لوم الناس عليكي بس ده ميمنعش انك ترضي لو هتفضلي تدعي بحاجه معينه جايز متتحققش وجايز تكون شر ليك ادعي ان ربنا يكتبلك زوج صالح يتقي الله فيكي وبعدين ربنا هيبعتهلوك حتي لو انتي مكنتيش متوقعه وسبحان الله هترتاحي وتبقي مبسوطه لازم يكون عندك ثقه ف ربنا كبيره عشان دعوات تستجاب وبدال متطمعي في ملذات الدنيا اطمعي ف كرم ربنا عشان الفلوس ياختي مش كل حاجه وفقك الله وهداكي
تم النشر الأربعاء، ١٣ أغسطس ٢٠٢٥
و غيري فكرة إنك علشان في الارياف فمش هتلاقي غير دول غيري الفكرة دي اقداركم بأفواهكم ، غيري فكرتك و لسانك قولي هتجوز راجل صالح إن شاء الله ، و أكتبي كل حاجة مريتي بيها ووجعتك او فكرتك بمواقف معينه ، و حاولي تساعدي اي حد لوجه الله و اقعدي و اكتبي الصفات الي أنتي متقدريش تستغني عنها و الصفات الي لو مش موجودة عادي و العيوب الي فى نظرك ممكن تتحمليها ، تابعي قناة حبيبة الهادي هتفيدك اوي اوي ، البنوتة دي كانت مخطوبة لواحد قبل كدا مش كويس و دلوقتي متجوزة واحد ما شاء الله تبارك الله كويس جداً و متنسيش تفرحي لكل الناس وكل واحدة مخطوبة او متجوزة تدعيلها ربنا ييسرها امورها الملائكة هتأم عليكي و تدعيلك بالمثل بالتوفيق يا حبيبتي ❤️
تم النشر السبت، ٩ أغسطس ٢٠٢٥
اطلبي من ربنا دا أولاً ، بصي سيدنا موسى لما كان راح يهرب من فرعون و راح مدينة تانيه راح قعد و هو تعبان من السفر و الجري على قدمه و راح يرتاح و لقى البنتين ( وَلَمَّا وَرَدَ مَاء مَدْيَنَ وَجَدَ عَلَيْهِ أُمَّةً مِّنَ النَّاسِ يَسْقُونَ وَوَجَدَ مِن دُونِهِمُ امْرَأتَيْنِ تَذُودَانِ قَالَ مَا خَطْبُكُمَا قَالَتَا لا نَسْقِي حَتَّى يُصْدِرَ الرِّعَاء وَأَبُونَا شَيْخٌ كَبِيرٌ )[القصص: 23]. و راح ساعدهم فوراً بدون ما ينتظر الاجر او المقابل و بعدين آوى الي ظل شجرة و راح نادى ربي إني لما أنزلت إلي من خيرٍ فقير هو سيدنا موسى حس بالوحشه و دعى ربنا ، و جاءته إحدهما تمشي على إستحياء و تزوجها إمراة صالحة ✨فالحل من هنا أي أشتغلي على إنك تكوني أم صالحة و زوجة صالحة ، اقرأي سورة البقرة كل يوم و تبعي قناة محمد حجازي يمكن فيه تعطيل ، أشتغلي على التروما الي عندك و فضي كل احتياج و نقص حاسه بيه لأن كل حاجة حاسه بيها بتجيلك على هيئه شخص علشان دماغك تفضي التروما و الحزن الي جواها فلازم تساعدي نفسك و تتخلصي منها ، و الدعاء ثم الدعاء ثم الدعاء و احكي لربنا همك و حزنك و متسمعيش كلام حد في إن الجواز وحش او مش هتلاقي الي انتي عايزة لا لا لا انتي بتدور على العادي و الي انتي كأنثى تستحقيه و دي اقل حاجة
تم النشر السبت، ٩ أغسطس ٢٠٢٥
انتظارك لفارس الأحلام يعرضك للوقوع في فخ أرذل الناس / لأن فارس الأحلام الخيالي المثالي المنقذ المعالج اللي طول الوقت ملاك ده موجود فعلا ولكن فقط في حالتين ١-ممثل في التلفزيون ٢-ممثل في الواقع / وممثل في الواقع تعني المنافق اللي بيدور على شخص منتظر فارس الأحلام (فريسة سهلة) عشان يخدعه / هتلاقيه داخل خفيف الظل وعنده إبتسامة ساحرة وجمال طبيعي وتواضع جذاب وكلام معسول ولا في الخيال / وتقولي بس هو ده التعويض الرباني على كل اللي عانيت منه / وتتصدمي بيه في النهاية ولا هيرحمك
تم النشر الجمعة، ٨ أغسطس ٢٠٢٥
انتي تفكيرك ساذج وغير ناضج ..لا تدخلي في اختيار الان ..لازل امامك مزيد من الوقت لتتعملي معني الحياة ودقة الاختيار
تم النشر الأربعاء، ٦ أغسطس ٢٠٢٥
اولا عينة الرجاله اللي انتي ارتبطي بيهم مش كافيه عشان تصدري حكم ع باقي الرجاله انهم مش كويسين مشاعرك مفهماكي كدا بسبب الالم اللي انتي عشتيه بس دي مش الحقيقه ثانيا يعني ايه مواصفات خيالية يعني انتي بتقولي عليها خيالية فكك من الوهم دا وخليكي واقعيه عشان تقدري تحسني جوده حياتك وسيبك من اللي يشمت او اللي يتكلم عليكي الموضوع مش هيقلل منك في حاجه يعني بالعكس دي حاجه بتسيئ ليهم
تم النشر الأربعاء، ٦ أغسطس ٢٠٢٥
لعرض السؤال في فدني اضغط هنا