اهلا بيكم يا جماعه 🤍
انا عندي 16 سنه وفي تانيه بكالوريا، ومحتاجه استشيركم ف حاجه مهمه جدًا بالنسبالي، وياريت تقروا كلامي للآخر عشان فعلًا محتاره ومش عارفه احدد الصح ليا.و اسفه انو كلامي طويل زياده عن اللزوم بس بجد مضطره اذكر التفاصيل دي.
من اول ما دخلت اعدادي كان فيه مدرس رياضه كويس جدًا، وطريقته حببتني ف الماده بشكل كبير جدًا، ومن وقتها والرياضه بقت اكتر ماده بحبها ف حياتي لحد دلوقتي. الحمدلله مستوايا فيها كويس وبجيب درجات عاليه، ومش بقول اني عبقريه يعني، لكن فعلًا بحبها جدًا، وبعدها الإنجليزي.
انا بطبعي بحب الفهم والاستنتاج اكتر بكتير من الحفظ، والحفظ من الحاجات المتعبه بالنسبالي. بحب اطلع طريقه الحل بنفسي، واحيانًا ببقى عايزه اوصل للمسأله بطريقتي انا حتى لو فيه طريقه معروفه. بحب الاحساس اني فاهمه الفكره فعلًا مش حافظاها وخلاص.
لكن المشكله اني لحد دلوقتي مجربتش غير فروع معينه ف الرياضه زي الجبر والهندسه وحساب المثلثات، فبقيت خايفه… هل لما اقابل باقي الفروع هفضل احب الرياضه فعلًا ولا ممكن اكون متعلقه بس بالاجزاء اللي عرفتها؟
وكمان اوقات بخاف يكون حبي للماده اصلًا بسبب اني كنت ملتزمه ف مذاكرتها وببذل مجهود فيها، فحسيت اني شاطره فيها فحبيتها… مش عارفه هل ده شغف حقيقي ولا مجرد تعود وتفوق وخلاص.
المهم انا دلوقتي محتاره بين مسار الطب ومسار الهندسه لو نظام البكالوريا استمر زي ما هو.
بصراحه، انا من طفولتي عمري ما حبيت الطب ولا شفت نفسي فيه، رغم ان اغلب الاطفال كانوا بيتمنوا يبقوا دكاتره. وكل ما الايام بتعدي بحس اني متمسكه اكتر بالرياضه، وفي نفس الوقت الطب بحسه مرهق جدًا بالنسبالي وبيعتمد بشكل كبير على الحفظ، ودي نقطه بتخوفني.
بس ف نفس الوقت بابا وماما نفسهم جدًا ابقى دكتوره، وحاطين امل كبير فيا. ولما صارحتهم اني بفكر ف الهندسه، والدي رفض الفكره وقال ان الهندسه للولاد وفرصها للبنات اقل، وانه عايزني ف وظيفه مضمونه ومستقره زي الطب.
اما ماما فبحس انها بتحاول تبينلي ان القرار قراري، لكن جوايا حاسه ان الموضوع كاسرها شوية، وانها كانت متخيله شكل معين لمستقبلي، وده بيخليني حاسه بالذنب وخايفه اكون بخيب املهم.
وحتى لو وافقوا بعد اصرار مني، بحس انهم ممكن يفضلوا زعلانين جواهم لحد ما يشوفوا نجاح حقيقي، ومحدش ضامن عمره او المستقبل اصلًا.
وفي نفس الوقت انا بحب جدًا قصص الناس اللي اختارت الطريق اللي بتحبه رغم اعتراض اللي حواليها ونجحت فيه، وده اوقات بيخليني اميل لفكرة اني اختار اللي بحبه فعلًا. لكن بعدها ارجع اقول لنفسي: “خليكي واقعيه”، خصوصًا ف الظروف الحاليه وان الناس كلها بقت تدور على الامان الوظيفي وخلاص.
وكمان انا اصلًا مش مركزه على كلية هندسه نفسها قد ما انا بحب اي حاجه فيها رياضيات وتفكير وتحليل.
بس برضو مش عايزه اضحك على نفسي او اتغر لمجرد اني بحب ماده معينه، واروح اغير مستقبلي كله بسببها.
انا كمان شخصيتي مش من النوع العنيد اوي، يعني قبل كده لما احتارت بين الثانوي والتمريض، سبت القرار لأهلي وربنا يختار اللي فيه الخير، وقدرت اتأقلم عادي. فالمشكله اني اصلًا مش عارفه انا عايزه ايه بنسبة 100%.
وعشان كده ياريت محدش يقولي بس “ادخلي اللي بتحبيه” او “محدش هيذاكر غيرك”، لأني فعلًا محتاره وخايفه من الاختيارين، ومحتاجه آراء واقعيه وصريحه من ناس عندها خبره
وياريت خصوصًا الناس اللي ف الطب أو الهندسه فعلًا، أو حتى خريجين من المجالات دي، يقولولي رأيهم بصراحه بعيد عن الكلام المثالي، عشان اكيد انتو شايفين الحقيقه من جوه اكتر مني.
وشكرًا جدًا لأي حد قرأ للآخر و أفادني برأيه. 🤍
توكلي على الله واسمعي كلام والدك واللي متفوق في الرياضيات زيك يبقى اكيد هيتفوق في الفيزياء و الكيمياء والبايلوجي واساسا اي مادة محتاجة مذاكرة واجتهاد من نار سواء شاطرة فيها او لأ وفعلا الطب للبنات احسن لان شغل هندسة صعب ومرهق للولاد حتى فما بالك للبنات بالتوفيق والنجاح ان شاء الله
تم النشر الاثنين، ٨ يونيو ٢٠٢٦
السلام عليكم انا أحمد خريج هندسة ميكاترونكس الصراحة انا أعتقد أنه رأي والدك سليم لأن التخصصات اللي يتناسب البنت في هندسة هما حاجتين هندسة معمارية او هندسة اتصالات ( شبكات - برمجة) والمجالين مش بيعتمدوا ع الرياضة بشكل أساسي اصلا بالرياضة فممكن حتي لو وصلتي للكلية متحبيهاش وده من وجهة نظري لأن البنت مكانها مش في موقع وسط ١٠٠ عامل فالصح انك تختاري الامان الحياتي والوظيفي الملائم لوضع البنت وهو الطب
تم النشر الثلاثاء، ٢ يونيو ٢٠٢٦
السلام عليكم طالما بتتعاملى بالاحساس بس يبقي الموضوع هيفضل محيرك ضرورى تحطى الامور بالتقدير المنطقى يعنى تحطى لنفسك امتحان فى الرياضيات ...وتقعدي تحليه وتشوفى هتخلصيه فى اد ايه وامتحان فى الأحياء والفيزياء وتشوفى هتحليه فى اد ايه وكمان تسجلى مع الوقت ...درجة توترك وانتى بتحلى كانت كام من عشره واى احاسيس اخرى وانتى بتحلى الاتنين انسي بقي موضوع الشغف ده لانه مش مقياس نقطة تانيه مهمه جدا حددي لنفسك هدف عموما فى حياتك ..مش لازم يكون هدف اكاديمى اى هدف وشوفى انهى فرع ممكن يدعم الهدف ده مثلا ..لو هدفك تكونى فرد نافع لعيلتك بشكل عام ...يبقي ممكن بالنسبة لعيلتك ولظروفها انهى افضل وهكذا لو هدفك تكونى ام تذاكر لاولادها.. يبقي انهى فرع بردوا ممكن يساهم اكتر وهكذا خلى بالك ان العلمى مش كله طب والرياضيات مش كلها هندسة ...محتاجة تشوفى بحر الفروع اللى ممكن تتخصصى فيها وهتنبهرى وهتلهمك بأفكار كتير ان شاء الله تساعدك فى قرارك
تم النشر الاثنين، ١ يونيو ٢٠٢٦
بصي يا بنت الناس كلامك واضح ومفهوم ومينفعش تدفني نفسك في مكان مش شبهك لمجرد الأمان الوظيفي أو عشان ترضي حد الطب كله حفظ ومذاكرة طول العمر وإنتي بتقولي بعضمة لسانك إنك بتكرهي الحفظ وبتموتي في الفهم والتحليل والرياضة يبقى إيه اللي يرميكي في سكة هتتعبك نفسيا ومجال الهندسة والتكنولوجيا دلوقتي مبقاش حكر على الولاد خالص والبنات مكسرين الدنيا فيه وشغالين في أحسن الشركات وبمرتبات خيالية كمان وطبيعي تخافي من الفروع الجديدة في الرياضة بس طالما دماغك بتلقط الفكرة وبتفهم مش بتحفظ يبقى هتسلكي في أي حاجة كبرتي وبقا ليكي مستقبل تحدديه بنفسك واقعدي مع بابا وماما وفهميهم براحة إن شطارتك ونجاحك الحقيقي هيكون في المكان اللي بتحبيه وبتفهمي فيه مش في المكان اللي هما شايفينه مأمون عشان لما تنجحي وتتفوقي هما أول ناس هيفرحوا بيكي وبإنجازك فبلاش تظلمي نفسك وتضيعي ميزتك في الفهم والاستنتاج وروحي للحاجة اللي شبهك بجد.... مش بقلك كدا عشان مجالي والله .....بس متنسيش أن طبيعه المكان اللي انتي فيه ليها دور كبير في المسار اللي تختارية
تم النشر الاثنين، ١ يونيو ٢٠٢٦
أهلاً يا قمر، شكراً إنك شاركتِ تفاصيلك بصراحة. الصراع بين الشغف والأمان طبيعي في سنك، خاصة مع ضغط الأهل. الرياضيات تبدو شغفاً حقيقياً لأنكِ تستمتعين بالفهم والاستنتاج، لكن للتأكد جربي استكشاف فروع أخرى مثل التفاضل أو الإحصاء عبر فيديوهات أو كتب بسيطة. أما الطب فهو يعتمد على الحفظ والجهد الطويل، وقد لا يناسب شخصيتكِ كما وصفتِ. الواقع: الهندسة لها فرص جيدة للبنات في مجالات مثل البرمجة أو التصميم، لكن الطب أكثر استقراراً في بعض الدول. قراركِ يحتاج توازناً بين رغبتكِ واحترام والديكِ. تحدثي معهما بهدوء، اشرحي أسبابكِ العملية، واطلبي منهما السماح بتجربة مواد هندسية. إذا احتجتِ آراء متخصصة، زوري صفحة الخبراء على Fedni.net/experts، وابحثي عن أسئلة مشابهة في التطبيق لآراء إضافية. أنتِ قادرة على الاختيار بحكمة، خذي وقتكِ. 🤍
تم النشر الاثنين، ١ يونيو ٢٠٢٦
مش عارفه لكن حسيت أرآئهم واقعيه شويه و منطقيه و كمان مكنتش حابه اتحمس اوي و اختار شغفي و خلاص من غير م اراعي النقاط المهمه التانيه..مشكور لرأي حضرتك.
تم النشر الأربعاء، ٣ يونيو ٢٠٢٦
تسلمي. اللهم امين..ربنا يجازيكي خير يا رب 🌷
تم النشر الاثنين، ١ يونيو ٢٠٢٦
العفو ويارب تلاقي القرار اللي يسعدك ويريحك
تم النشر الاثنين، ١ يونيو ٢٠٢٦
لو انت متخيلة نفسك مهندسه يبقي انتي مهندسه لو انت بتحبي ماده فعلاً من قلبك يبقي ليه بتهتمي برأي الناس هما هيشتغلوا و يعيشوا مكانك؟
تم النشر الأربعاء، ٣ يونيو ٢٠٢٦
صراحه بحس دا بيشتتني جداا و معنديش قدره ولا صبر افضل ادور ف كدا كتير..بس شكرا ليكي
تم النشر الاثنين، ١ يونيو ٢٠٢٦
صلي استخاره اولا ولو خايفه انك ما تحبيش الهندسه في المستقبل ممكن مثلا تسألي الذكاء الاصطناعي عنها وتقوليله بتكون عامله ازاي والمواد ايه وهكذا وكذلك الطب ممكن تحبيه اكتر من هندسه ومن رأي لو فعلا كارهه الطب ما تدخليهوش لانك ممكن ما تحبيش تذاكريه اصلا وهتلاقي جروبات ومجموعات علي الفيس بوك لطلاب الهندسه والطب ممكن تقرأي تجاربهم او مشاكلهم في الكليه هناك وهتلاقي برضو اشخاص علي اليوتيوب متخرجين من الكليه بيقولو السلبيات والايجابيات
تم النشر الاثنين، ١ يونيو ٢٠٢٦
لعرض السؤال في فدني اضغط هنا