طيب انا بابا جه من الخارج و كان معه ذره و بطيخ بس اختي و اخي الكبير نائمين مفيش غيري انا وماما و اخي الاخر
انا مستغربه ايه هو دافعه انه يجيب الذره لينا بس على حسب تحليلي انا الذره المشوي بتاعي كان فيه حاجه بيضاء بين حبات الذره انا رفضت اني أكلها و رحت وقلت لأهلي و هنا لاحظت انه بصلي بصه و بعد كده تكلم و قال ليه أن ده نوات الذره وانها بيضاء عادي بس انا ما سمعت له وبرده ما اكلتها
انا حاسه ان قصده الذره ده انه كان عاوز يكسب ثقتى فيه ان يظهر لنا انه مش بخيل او ما شابه ولما انا انتقدت الذره حسيت انه اضايق من جوه حسيت انه بيدور علي اي كلمه منطقيه يقولها ولو ما لاقي يكذب كذبه
هو عارف على ما اعتقد اني ما بصدقه تقريبا تقرييييبا هو عارف بس ما اعتقد السبب في تحليلي لكده انه أستنى شويه بعد كده جاوب عليه يعني هو كان بيدور علي حاجه يقولها عشان يبين لنا انه بيحتم بينا ده هو تحليلي
هل النرجسي ممكن يعمل حاجه بنية الخير؟ ملاحظه انا بنت عمري 13 سنه و ده تحليل انا حللته فعادي لو كان خاطئ و انا جيت اسال هنا عشان اعرف لو تحليلي صح او لا انا سالت الذكاء الاصطناعي بس هو فضل يطبل ليه 😂
واصلا الذكاء الاصطناعي يعني كل كلامه بيفضل يطبل فيه ومش بيقول اي حاجه وحشه بالمناسبه شخصيه والدي نرجسيه فبحاول اني أفهمه اكتر عشان ما اخليه يتملكني و شخصيه بابا هي النرجسي يعني الممثل نرجسي ممثل كده او ما شابه يعرف يدعي كويس اوي ان نيته خير بطريقه جباره تقريبا هو عرف الادعاء بسبب انه عاش فتره طويله عمره
بابا حاليا تقريبا 63 او 62 يعني كبير اوي ده غير كمان انه قابل ناس كتير في حياته و الناس دي اخرجوه من حياتهم فاكيد هو اكتسب خبره ف بقى يعرف يمثل بطريقه حلوه اوي و مقنعه بس رغم ده هو مش بيعرف يخفي ذاته نفسها وقت الغضب بيظهر على حقيقته كلها وخاصة لو كشفت عن نيته الحقيقيه فانا مره جربت كده و كشفته و حرفيا هو غضب غضب شديدا و فضل يعني يتهم ضحيته ال في العيله انها هي السبب في كل حاجه و يقول كلام نصفه مقنع و النصف الثاني تكمله لي الكذبه
السلام عليكم ورحمه الله وبركاته اولا انت سنك صغير 13 سنه بس واضح انك بتاخذي شويه معلومات من السوشيال ميديا والحاجات القصيره السريعه أو حتى الفيديوهات اللي ممكن تكون بتتكلم على موضوع معين اييي مندمجه انت جدا في النوعيه دي من المحتوى ومن قراءتي لسؤالك خليني اقول لك تحليلي بناء على خبرتي الشخصيه. انت متشبعه بافكار الافكار دي خليتك تبصي بشكل معين الشكل اللي انت واثقه في السؤال ان هو شخص نرجسي ما نقدرش طبعا نقول تحليلك ده صح ولا غلط بس اللي هكون متاكده منه انك اصغر بكثير جدا جدا ومعلوماتك سطحيه جدا جدا في انك تقدري فعلا تشخصي بني ادم كبير بالغ وعمره كمان 60 سنه بإنه شخص نرجسي او غيره او اي تشخيص غير مؤهله لدى تماما على حسب سنك وعلى حسب عوامل كثير قوي. ده مش هيكون مناسب اي تحليل انت هتحطيه انا هنبهك لنقطه مهمه وواضحه جدا من سؤالك وهو انك عندك افتقار للثقه تجاه باباكي في عندك خوف شديد منه ممكن يكون بسبب نوبات غضب أو الاوقات اللي هو بيزعق فيها او بيتصرف فيها بشكل غاضب وممكن يكون لاسباب اخرى وممكن يكون هو شخص طبيعي جدا ولكن زي ما قلت لك اندماجك في المحتوى اللي انت بتسمعيه وخصوصا في الحته دي بتاعه العنف الاسري او الشخصيات النرجسيه وتقصير الاباء هو اللي خلاك تبقي عماله بتعملي إسقاط على والدك في مواقف هي ممكن تكون عاديه ولكن انت عملت لها اسقاط عشان تدخليها تحت نفس البنود اللي انت عماله تسمعي معلومات عنها فاتمنى انك توقفي الحاجات اللي انت بتاخدي معلومات منها شويه وحاولي تشوفي الفرق اذا كنت هتفضلي بصه بنفس النظره ولا لا ولو حبيتي فعلا إنك تاخدي تحليل صح غير تحليلك ده خالص فانت ممكن تتكلمي مع طبيب نفسي او مع اي اخصائي هو يقدر يسالك الاسئله المناسبه اللي تعرفي بيها اذا كان فعلا والدك ده شخص في خطوره منه وعنده خلل ما ولا لا
تم النشر الثلاثاء، ٢٤ يونيو ٢٠٢٥
لعرض السؤال في فدني اضغط هنا