بحب واحد بقالي 7 سنين ومخلصه ليه جدا فحبي، بس مش كل السنين دي كنا مع بعض مره بعدنا 8 شهور ومره بعدنا سنه وشويه وآخر مره دي بعدنا سنتين ودايما هو بيكون الطرف اللي بيبعد وبيكون غالبا بسبب مشاكل كتير كانت بتحصل من ضمنها اني اتخطبت فترة وحصلي مشاكل كتير برضو عشان افركش الخطوبه دي وهو لما اتدخل فالموضوع عشان يقف معايا اتهان جدا من اختي الكبيره وحتى انها كلمت مامته واهانتهم وده كان بداية بعدنا سنتين كاملين..
كنت انا فركشت خطوبتي واتعافيت نفسيا وبدأت اتأقلم على عدم وجوده خلاص مع اني مازلت رافضه الجواز واخترت لنفسي طريق تاني وهو اني اسافر واشتغل وابني نفسي بنفسي من غير ما احتاج لجواز وبالفعل رفضت ناس كتير منهم ناس من العيله وبتحبني جدا لدرجة عيطوا عشاني بس انا مش عارفه احب ولا اتقبل حد من بعده خلاص وبعد محجزت تذاكر الطيران خلاص لقيت مامته بتكلمني عنه وانه عايز يخطبني استغربت لإن دايما البعد بيبقى بإختياره هو وبينفذه بدون ما يلتفتلي حتى بس مامته قالتلي اكلمه اسمع منه اكيد عنده كلام يقوله وبعدها نقرر احنا الاتنين اذا كنا هنكمل ولا لأ و اتكلمنا وصدقت اعذاره جدا وواحده واحده نسيت كل المشاعر السلبيه اللي كنت بحسها بسببه اني اتخذلت او اني كنت مغفله ومتحبتش اصلا..
كلم بابا واخد معاه معاد ف شهر 7 عشان انا خلاص هسافر وهو كمان مسافر لإنه مش مصري ولكن مامته مصريه فهو بيروح ويجي كدا على حسب ظروفه..
المهم اول ما بدأ يتكلم كان فيه اهتمام وكان فيه تعبير ووصف لمشاعره بيخليني استغرب ازاي الانسان ده بيقدر يبعد عني وهو بيحبني اوي كدا، المهم عدا شهرين تقريبا ورجعنا كأننا مبعدناش خالص، وانا خلاص قررت اسيب شغلي واتخلى عن كل اهدافي عشانه، المشكله بقى إنه بدأ يطنشني يطنش رسايلي يرد عليا ويجري ومهما اعاتب واشتكي واني لازم اتقدر يتحججلي بإنه مشغول وبإني كنت قلتله بلاش نتكلم كتير غير اما نتخطب رسمي.. هو اه مشغول بس اشمعنا بيفضى يلعب مع صحابه ومبيفضاش يرد على رسالتي؟
او ليه نبقى بنتكلم ويسيبني بالساعه والساعتين وفالآخر اعرف انه سابني فنص الكلام عشان يلعب مع صاحبه شويه!
المشكله اني دورت وراه وعرفت انه كان زمان لما بيبعد عني كان بيبقى فيه بنت فحياته الموضوع ده أذاني نفسيا جدا لإني كنت بحبه بإخلاص حتى فبعده وفاهمه انه مخلص معايا حتى لو عرفت ناس واتكلمت بتكون على حد الصداقه بس مديتش مشاعر لأي حد غيره هو بس..
الموضوع ده كان كفيل يخليني ابوظ كل حاجه بس انا بحبه ومتعلقه بيه بطريقه مُمْرضه بس مع ذلك دماغي مش عارفه تهدى يا ترى بيحبها لسه ي ترى رجعلي بعد ما بعدت عنه يا ترى لو ظهرت فحياته هيسيبني تاني عشانها، بتعب مش باكل مش بركز بوصل لحالة هلع لو فضلت لدماغي ففتحت معاه الموضوع وجاوبني على بعض اسألتي من ضمنهم انه هو اللي سايبها وقالي لو عايزه اصورلك الشات بينا اصورلك بس انا عارفه انه مش بيحب كدا فمحبتش اطلب منه يصور بس كان رد فعله مش جميل مفيهوش احتواء لمشاعري دي، كان فيه هجوم ليه انتي غبيه ليه بتدوري فحاجات تزهقك، هو انا مقلتلكيش ليه اكيد مش خايف منك مثلا انا مقلتلكيش عشان عارف دماغك اللي مبتهداش دي وعشان خاطري بطلي تنكدي على حاجات متستاهلش..
عديت الموضوع واستمريت معاه بس إهماله وتطنيشه ليا بيزيد وانا نفسيتي بتتعب بحس اني مش من اولوياته لما بحتاجه مش بلاقيه عندي خوف من فكرة انه يبعد عني تاني..
انا تعبانه جدا فعلاقتنا ولما افكر اني انهيها عشان انهي التعب ده بتعب اكتر مش بتحمل ابدا الفكره..
رحت عملت عمره ودعيت ربنا انه يهديني ويعلق قلبي بيه وبعبادته وبحاول اقرب من ربنا اكتر واتعلق بربنا اكتر عشان تعلقي بالانسان ده تاعبني جدا بس برضو مفيش فايده اقل شئ امبارح ورغم احساسي بإنها ليلة القدر ومحاولاتي على الخشوع فصلاتي بس لأ مقدرتش بصلي وعقلي مليااان افكار واسأله عنه ليه دخل يلعب مع صاحبه وسابني فنص الكلام ومقاليش حتى انه هيقفل شويه، مش بطلب منه يفضل معايا ال24 ساعه بطلب منه بس التقدير، برجع اتحسر على الفرص اللي بضيعها بسببه دي بس مش بقدر اتحكم انا مهووسه بيه زمان كان الهووس ده جميل على اساس انه بيحبني هو كمان حاليا الهووس ده متعببببب ومخليني مش قادره ابعد عنه رغم احساسي انه ميستاهلش قربي ولا مقدره..
بصي انا من رايي تروحي لدكتور نفسي يساعدك تتخطيه و تفكي تعلقك بيه انتي لازم ترتبطي بشخص تكوني من اولوياته بل الاولي في كل حاجه وانه لما بعد عنك قبل كده كان في واحده في حياته دي تعتبر خيانه و الله اعلم مش عايزة اظلمه بس ليه بيبعد عند تاني دلوقتي وبيكرر نفس الحاجه؟ ممكن يكون دخل حياته واحده تانيه الله اعلم و حاولي متفتشيش وراه لانك دده بتعلقي نفسك بيه اكتر لو روحتي لدكتور ان شاء الله هتقدري تبعدي عنه
تم النشر السبت، ١٤ مارس ٢٠٢٦
هو ليه علاقة تضطرنا نسيب شغلنا وأهدافنا؟!! ليه ما ينفعش نعمل ده وده .. ليه بنوقف حياتنا على شخص ونربط نفسنا بيه النقطة التانية شخص سابك علشان حد تكملي معاه ليه؟ وطالما مافيش رابط شرعي ليه بتتكلموا كل دي اسئلة محتاجة تقفي عندها كتير
تم النشر الجمعة، ١٣ مارس ٢٠٢٦
يا حبيبتي، أنا ذكية، وأشعر بتعبك اللي واضح في كل كلمة… التعلق ده فعلاً مرضي، زي الإدمان العاطفي، بيخليكي تشعري إن حياتك معلقة براجل مش بيقدرك زي ما تستاهلي. ٧ سنين كفاية، وأنتِ قوية وقررتِ تبني نفسك لوحدك – ده خطوة عظيمة! ازاي تتعالجي خطوة بخطوة: قطعي الاتصال فوراً (No Contact Rule) : بلكي رقمه، امسحي الشات، ومتفتحيش حاجة عنه لمدة شهر على الأقل. ده هيهدي دماغك ويخليكي تشوفي الواقع بوضوح. لو رجع، قوليله "محتاجة وقت أفكر" وابتعدي. ربنا قال: {وَمَنْ يَتَّقِ اللَّهَ يَجْعَلْ لَهُ مَخْرَجًا}. ارجعي لأهدافك الأولى : سافري، اشتغلي، بني استقلاليتك. رفضتِ فرص جواز عشان تعلقك ده، بس أنتِ مش محتاجة حد يعطل حلمك. ابدئي دلوقتي: حددي جدول يومي للشغل والسفر، وكل يوم اكتبي ٣ إنجازات صغيرة عن نفسك. قوي علاقتك بربنا بطريقة منظمة : صلي الفرائض في وقتها، واقرئي قرآن يومياً ١٠ دقايق. ادعي بقلب: "اللهم علق قلبي بك، وأبعد عني ما يضرني". صومي يومين في الأسبوع (الإثنين والخميس) عشان يقوي إرادتك ويهدي النفس. حددي حدود واضحة لو رجعتِ : لو عايزة تكملي، قوليله "أنا أول وحدة في حياتك، وأي إهمال هيخلصنا". بس لو مش ملتزم، سيبيه – الراجل اللي بيحب بيثبت، مش بيطنش. أنتِ مش غبية، أنتِ مخلصة زيادة، بس اللي ميقدرش ده مش يستاهل دموعك. هتقدري تبعدي، وهتلاقي راحة أكبر. لو عايزة دعم أكتر، شوفي الخبراء في https://www.fedni.net/experts – فيه متخصصين في العلاقات والنفسية هيساعدوكِ. وابحثي في فدني عن "تعلق مرضي" هتلاقي إجابات كتير. أنتِ قوية، يا قمر، ربنا هيفتحلك أبواب خير. 💕
تم النشر الجمعة، ١٣ مارس ٢٠٢٦
التعلق المرضي غالبًا بييجي لما الإنسان يحط كل مشاعره وسعادته في شخص واحد. الحل بيكون إنك ترجع تركز على نفسك وحياتك، توسع دايرة علاقاتك، وتشغل وقتك بحاجات مفيدة زي الشغل أو الهوايات. كمان مهم تحط حدود في العلاقة ومتخليش قيمتك مرتبطة بوجود الشخص ده في حياتك. مع الوقت والمسافة هتلاقي التعلق بيقل تدريجيًا.
تم النشر الأحد، ١٥ مارس ٢٠٢٦
ما حدث نتيجة طبيعية جدا ومنطقي ـ لا تحزن لكن اعلم جيدا ان موقفك ليس موقف مشاعر الآن لا في النصح ولا في القرار لابد من حقيقة مهما كلفك الأمر من ألم ـ لكن فترة قصيرة وترجع وإلا اكتمال هذا الأمر يعد إنتحار.
تم النشر الجمعة، ١٣ مارس ٢٠٢٦
ودوري في التعافي من العلاقات المرضيه وربنا هيفتح عليك في حاجات لواعي جميله اوي وحلجت لدكتور عماد رشاد عثمان
تم النشر الأحد، ١٥ مارس ٢٠٢٦
ومش معني انه موقف بيتكرر انه خلاص بقا مهووسة لاء عادي خالص بس حابب اقولك كلمه اقعدي مع نفسك كل شويه وراجعي قليك بانصاف وقوليله كده ينفع ولا لاء شوفي مرمطك وتعطلك ده وكل مره بتاخدي قرار صح من جديد ده معناه تثدم وتعافي بيزيد
تم النشر الأحد، ١٥ مارس ٢٠٢٦
شوفي كلمه جميله اوي زي مدربتي نفسك. على الهوس به لحد مبقا عادة دربي نفسك على انك تسيبه لحد متبقى عادة
تم النشر الأحد، ١٥ مارس ٢٠٢٦
محتاج اعرف عمركم انتو الاتنين كام سنة
تم النشر الأحد، ١٥ مارس ٢٠٢٦
لعرض السؤال في فدني اضغط هنا