سلام عليكم
انا بنت في تالته ثانوي عندي اصحابي اتنين تقريبا هما اقرب اتنين ليا انا داخله السنه دي وانا عندي هدف وعندي حلم عايزة اتعب واسعى جدا عشان احققو وابني نفسي وابعد عن اهلي اللي سبب كل مشاكلي وتعبي في الحياه بحاول أجتهد ومع ذلك حاسه اني مش بعمل ربع اللي عليا
في الجانب الآخر بقى صحابي دول هما اه شاطرين وكل حاجة بس مش واخدين الموضوع بجدية اوي زيي ومتهاونين شويه فبقينا مختلفين عن بعض أفكارنا مختلفه بقيت دايما مش عاجباهم وتفكيري مش عاجبهم وبيقعدو دايما ينظرو على اللي انا بعملو في المذاكره أو في الحياه يعني من ساعة ما الدراسه بدأت بقى موضوع ضاغطني جدا ومش حاباه ومش عارفه اعمل ايه
السلام عليكم، مقدرش أقول إنهم غلط أو أنتِ غلط، هو مجرد اختلاف في التفكير والتوجه مش أكتر. جايز هم شايفين إن مش صح ياخدوا الموضوع على أعصابهم من الأول فيحصل لهم احتراق نفسي بعد كم شهر وميقدروش يتابعوا ويكرهوا المذاكرة (وده حصل مع ناس كتير) خاصة إن الثانوية العامة فعلا مش محتاجة ضغط وتوتر وحرق مجهود شديد من البداية. غير إنك قلتِ عندك حلم وظروف حياتية معينة تخلي المذاكرة مهمة جدا بالنسبة لك وهم ممكن مش عندهم نفس الظروف اللي تدفعهم زيك. لو هم أصحاب كويسين وصحبة صالحة فتعاملوا عادي وبلاش تخسريهم. *** وخدي بالك، لو بتحسسيهم في كلامك إنهم مقصرين ومتهاونين ممكن ده يضايقهم ويخليهم يردوا ردود تضايقك زي إن تفكيرك مش عاجبهم أو ينظروا على مذاكرتك. فحاولي تتجنبوا الكلام عن إزاي المذاكرة تكون وإن كانوا هم صح أو أنتِ اللي صح. لأن على فكرة، ممكن من زاويتك أنتِ متنتبهيش إن زي ما كلامهم ضغطك وحسسك بمشكلة إن ممكن كلامك برضه يعمل لهم ضغط ويحسسهم إنهم مقصرين ومهملين وبالطريقة دي مش هيلحقوا ومش هيجيبوا مجموع، وممكن ده بدل ما يشجعهم يذاكروا زيك يعمل لهم إحباط ويعقدهم. *** لكن خلينا نركن موضوع صحباتك على جنب، فيه نصيحة مهمة لازم أقولها لك. زي ما قالت فاطم، أنتِ محسسة نفسك إنك داخلة حرب. الثانوية العامة مش عاوزة ضغط نفسي ولا تعلق شديد بهدف معين وتعليق آمالك كلها عليه فلو لا قدر الله حصل أي حاجة ومحققتيش الهدف ده تحبطي وتنكسري. المطلوب إنك تسعي وتجتهدي بتوازن من غير ما تحرقي نفسك ومن غير ما تتعلقي بحلم معين وتسلمي أمرك لله لأنه وحده اللي عارف الخير فين. ** مش بقول لك متفكريش في حلم ولا تطمحي في مستقبل معين، لأ اطمحي واسعي عادي لكن بدون تعلق وهوس عشان أولا ده بيجيب نتيجة عكسية وثانيا عشان الإحباط وخيبة التوقعات لو الطريق أخدك لاتجاه تاني ربنا يكون كاتب لك فيه الخير لكن إحساسك بالخيبة والكسرة يمنعك تشوفي الخير ده وتكملي نحوه. فاهدي خالص كده واستعيني بالله وخليكِ مرنة وذاكري واجتهدي من غير ضغط زائد. وربنا يوفقك إن شاء الله.💚💚
تم النشر السبت، ١٠ أكتوبر ٢٠٢٦
وعليكم السلام ورحمة الله وبركاته هوني على نفسك يا بنتي سنة وهتعدي. بصي أنتِ قولتي هما شاطرين وكمان لعل وعسى هما صحبة صالحة وكويسه! الحل مش إنك تبعدي عنهم أولًا هما عشان السنة في البداية فـ عادي يعني ما عايزين يضغطوا نفسهم ولكن عاملين الـ عليهم! الفكرة فيكِ أنتِ شايفة نفسك داخلة حرب وبالعكس تالتة ثانوي عايزة رفقة معاكِ عشان البداية مختلفة تمامًا عن الوسط مختلفة تمامًا عن النهاية فهماني، أنتِ حاليًا في حماس البدايات وعايزة تسيبي صُحبتك بس دا تفكير خطأ جدًا جدًا جدًا أصحابك دول هيشدوا بس مش دالوقتي ومش صح إنك من أول السنة تحبسي نفسك السنة طويلة وعايزة طاقة ورفقة! هوني على نفسك هوني على نفسك 💜 متسببش أصحابك. أصحابك حالهم هيتغير عشان هما في البداية فـ طبيعي يكون عندهم ترفيه أو واخدين الموضوع عادي لكن بعدين هتلاقي الوضع أختلف فـ بلاش تتسرعي من البداية وتسبيهم وتقفلي على نفسك دا خطر خطر جدًا عشان طاقتك هتقل وهتضعفي. الله يعينك الرحلة محتاجة رفقة💜.
تم النشر السبت، ١٠ أكتوبر ٢٠٢٦
بصي بنت الناس بطلي تدي الموضوع أكبر من حجمه وتزعلي نفسك عشان ناس مش مقدرة تعبك ولا طموحك في تالتة ثانوي طالما حطيتي هدف قدام عيونك وعاوزة تبني نفسك وتبعدي عن أي ضغط يبقى تدوسي على الصعب ومحدش يكسر مجاديفك أصحابك دول مش شبهك دلوقتي وكل واحدة في طريق فمش معقول هترجعي لورا عشانهم ولا تخليهم يكرهوكي في المذاكرة ركزي في كتابك ومستقبلك وخليهم في حتة لوحدهم لحد ما تعدي السنة دي على خير وتحققي اللي في بالك وتثبتي لنفسك إنك قدها.
تم النشر السبت، ١٠ أكتوبر ٢٠٢٦
وعليكم السلام ورحمة الله. أول حاجة، أنا فاهمة إحساسك تمامًا، وهو طبيعي جدًا في المرحلة دي. أنتِ بتمري بتغيير كبير في أولوياتك وأهدافك، وده بيخلّي الاختلاف مع أصحابك يبان أكتر، خاصة إنك بتحاولي تبني نفسك وتبتعدي عن ضغوط أهلك. الضغط اللي بتحسيه من انتقاداتهم مش بس بيأثر على مذاكرتك، لكنه كمان بيخلّيكِ تشكي في نفسك، وده شيء شائع لما الأفكار تتباعد. عشان تتعاملي مع الاختلاف ده بطريقة عملية، ابدئي بخطوة بسيطة: حاولي تتكلمي معاهم بهدوء وصراحة، بدون ما تتهميهم. قولي لهم إنك بتمري بمرحلة مهمة وبتحتاجي تركيز، وإنك بتقدري دعمهم حتى لو الأسلوب مختلف. لو استمروا في النظر والانتقاد، خلّي مسافة صحية بدون ما تقطعي العلاقة فجأة – يعني قللي اللقاءات أو الدردشات اليومية، وركزي على اللي بيفيدك. في نفس الوقت، ابحثي عن أشخاص جدد يشاركونك نفس الجدية، سواء في المدرسة أو من خلال مجموعات دراسية، لأن الصحبة الصالحة بتساعد على التقدم. تذكري إن هدفك الأساسي هو بناء نفسك، وده مش هيحصل لو فضلتِ تتأثري بآراء الآخرين. استمري في الاجتهاد حتى لو مش بتعملي "الربع" اللي نفسك فيه دلوقتي، كل خطوة صغيرة بتتراكم. لو حابة تاخدي نصيحة أكتر تخصصية، ابحثي عن أسئلة مشابهة على فدني عشان تشوفي تجارب الآخرين. أنتِ قادرة، وهتعدي المرحلة دي بإذن الله.
تم النشر الجمعة، ٩ أكتوبر ٢٠٢٦
طموحك واجتهادك رغم الضغوط العائلية شيء يدعو للفخر. بالنسبة لأصدقائك، من الطبيعي أن تختلف وجهات النظر خلال مرحلة الدراسة، والضغط الذي يمارسونه عليك غير مقبول. أنصحك بتحديد حدود واضحة معهم والتركيز على أهدافكِ الشخصية، وربما البحث عن بيئة دراسية أكثر دعمًا.
تم النشر الأحد، ١١ أكتوبر ٢٠٢٦
نصيحه مصلحتك اهم انتي تجتهدي وتركزي على حلمك وبس وعاوزه تصاحبي قربي من الناس اللي هتشدك اوي بس انا ك نهي بفضل تنعزلي وملكيش دعوه بيهم هما شايفين انك مزوداها معلش دي وجهه نظرهم متخليهاش تأثر فيكي نصيحه ركزي ع مذاكرتك ومصلحتك بس هما وقفت معاهم حاجه اشرحيها لكن تخططو وتذاكرو و معلش يعني كل واحد وقدرته ف متمشيش ع خططهم اعلمي اللي يريحك اهم حاجه تبقي مش مقصرة ف نظر نفسك لكن نظرتهم دي لنفسهم
تم النشر السبت، ١٠ أكتوبر ٢٠٢٦
لعرض السؤال في فدني اضغط هنا