الإجابة الأنسب محتاجة محاسب ضريبي، مش محامي. أنا مش محامي ولا محاسب، لكني في نفس ظروفك، ومطلع على بعض أحكام القانون. رسميا، أي دخل للأفراد من أصحاب المهن الحرة غير التجارية لازم يكون خاضع للضريبة، سواء كان دخل منتظم أم لا، لأن نص القانون استخدم وصف "المرتبات وما في حكمها"، ودة بيغطي أي دخل مع استثناءات محدودة جدا زي بدل السكن. المهن الحرة غير التجارية وصف لأي مهنة زي الطب والمحاماة والبرمجة والهندسة، والتي تعتمد على النشاط الذهني والمهني وليس رأس المال. القانون يطبق على أي مقيم داخل مصر، سواء مصري أو أجنبي، وبغض النظر عن مصدر الدخل - من داخل مصر أو من خارجها. قوانين الضريبة تطبق على الدخل السنوي، وليس الشهري. الضرائب تسدد شهريا كنوع من التقسيط، وتعملي تسوية في نهاية السنة لما تعرفي صافي الدخل السنوي بالضبط. لان الدخل الشهري لأي فري لانسر متغير بطبعه. مثال سريع: من يناير لمايو دخلك كان 300 دولار. كل شهر المفروض توردي ضريبة على أساس 300 دولار في 12 شهر. لكن ربنا أكرمك ومن يونيو لديسمبر الدخل الشهري كان 800 دولار. كدة صافي الدخل السنوي اتغيرت شريحته الضريبية، ولازم يبقى في تسوية. التسوية في المثال دة هتكون زيادة مستحقة عليكي، لاننا في اول كام شهر افترضنا 3600 دولار سنويا، لكن آخر السنة لقينا الدخل السنوي حوالي 7000 دولار. يضاف على تغير الدخل، تغير قيمة الدولار أمام الجنيه، لأن الضريبة تحسب على الدخل بالجنيه، فشهر قبضتي 300 دولار على 47 جنيه، والشهر التالي 300 دولار على 52 جنيه. دي زيادة في الدخل وتؤثر على اجمالي الدخل السنوي، وبالتالي شرائح الضرائب المطبقة. من الناحية البنكية، البنك ملزم يعرف مصدر الدخل كجزء من تعليمات البنك المركزي المصري لمكافحة الجرائم زي غسيل الأموال وتمويل الإرهاب. بعد بضع تحويلات واردة لحسابك في البنك، هتلاقي موظف البنك بيتصل بيكي وبيطلب منك إثبات مصدر الدخل. عادة الموقع اللي بتشتغلي من خلاله يقدر يديلك شهادة بالدخل، ولو متعاقدة مع العميل بشكل مباشر، خليه يدي لك عقد عمل. حتى الآن - وفي حدود علمي - البنك لن يبلغ الضرائب بالدخل، ولا توجد آلية للرقابة أو المتابعة. الخلاصة: قانونا المفروض تعملي بطاقة ضريبية وتوردي الضريبة. عمليا، محدش هيفتش وراكي حاليا. الرابط التالي يوضح شرائح الضريبة حسب شرائح الدخل السنوي، ويحتوي حاسبة بسيطة لحساب الضريبة السنوية المطلوبة، وهيوضح لك آلية احتساب الضريبة. الدخل السنوي أقل من 60 ألف جنيه - يعني 5000 جنيه شهريا - معفي من الضريبة. احسبي متوسط دخلك الشهري، في سعر الدولار النهاردة، واضربيه في 12 شهر، واكتبي الرقم في الصفحة اللي تحت. https://eg.andersen.com/الضريبة-على-الدخل-الشخصي/ سحب الفلوس والادخار الأكثر أمانا، ومن خلال ابليكشن البنك وعند الحاجة فقط، حولي الفلوس من حساب الدولار لحساب الجنيه - أكيد عندك حساب جاري او ادخار بالجنيه مش حساب دولاري بس. اطلبي خدمة الانترنت البنكي من البنك بتاعك لو مش مفعلة عندك، عشان تستخدمي الابليكشن. مش هتحتاجي تسحبي الدولار من البنك الا لو سعر السوق الموازي أعلى بكتير، ومش أمان وممكن الفلوس تتصادر بمجرد سحبها. التسجيل الضريبي سهل وبدون أي رسوم. ممكن تسجلي اونلاين، وممكن تروحي بنفسك لأقرب مأمورية ضرائب. انا سجلت بنفسي زمان قبل وجود البوابات الأونلاين، واستلمت البطاقة خلال يوم او يومين عمل على الأكثر. تسليم الاقرارات الضريبية بيكون من 1 يناير - عشان جايز يجي لك دخل يوم 31 ديسمبر مثلا - وبحد أقصى للأفراد 31 مارس. لو اتأخرتي عن آخر مارس هتفرض عليكي غرامة. من الأفضل الاستعانة بمحاسب عشان يقدم لك الاقرار ويحدد الاوعية الضريبية، واي اعفاءات ان وجدت، ويحسب لك التسوية ان وجدت برضه. في حالة اخترتي الطريق الرسمي.
لعرض الإجابة في فدني اضغط هنا