السلام عليكم ورحمه الله وبركاته
من كام سنه كنت مصاحبه واحده اسمها & بسبب مشكله تافه وكنا صحاب قوي واي مدرس يشوفنا كان عرفنا أننا صحاب قوي وكنا شطار المهم بعد ما حصل خناقه وانا اتعصبت فحسبت اني غلطانه فكلماتها الأول يعني على اساس انو مشكله وخلاص
المهم لاقيتها مش عايزانا نرجع زي الاول مش قالت حاجه بس حسيت انها خلاص نسيت ونسيتني كمان فطنشت مع انو بحبها المهم في آخر السنه او بعد بسنه صاحبت واحده اسمها # صراحه حبيتها وعادي وكنت بروح معها مشاويرها وكنا مع بعض وروحت بيتها
للعلم امي مش بترضى اروح بيت حد واتفقنا نتفسح في العيد قلت ماشي روحت لاقيت أنها بتقول استنيتك ولما اتأخرتي مشيت للعلم مش تأخرت قوي بس حسيت أنها أصلا مش حاطاني في بالها ولما اتفقنا تاني وخلاص هنروح لاقيتها بعت رساله بتقول امها مش راضيه وحسيت من دا كله انو امها السبب ومش عايزانا نبقي أصحاب
وامي قالت انها اتخانقت مع ستي بس من زمان يمكن لسه شايله أو مش شايفني شاطره المهم أخدنا الإجازة وبدأنا سنه جديده أول مره كنت بركب مواصله لاقيت الاتنين مع بعض واللي كنت اتخانقت معها وكلمتها سلمت عليا والتانيه عملت نفسها مش شايفاني قلت يمكن مش خدت بالها قلت اطنش الموضوع
للعلم كنت متحمسه أقابلها بعد الإجازة الطويله ودايما لما يشوفهم مع بعض كنت اقول خسرت الحقيقة الاولى يعني وضحكت عليا التالته للعلم هي عرفت خناقتي مع الاولى لاني قولتلها بعد كدا لما اشوفها اقول ياريتني ماعرفت الجديده وحاولت أصلح مع الاولي
المهم صرت أكره التانيه وما أطيقها وافضل ادعي عليها كل لما اشوفها اتشائم بكرهها لأنها ظلمتني واجت عليا ونفسي أصارحها بس كرامتي وكبرياء وفي الآخر مش هعرف آخد منها حق أو باطل ومش عارفه اعمل ايه وزهقت من تصرفاتها.
السلام عليكم، واضح من سؤالك إن لسه سنك صغير، وأنا متفهمة مشاعرك وتأثير اللي حصل عليكِ، بس لسه ياما هتقابلي ناس وتصاحبيهم وتفترقوا. اللي حكيتيه يقول إن دي مكنتش صداقة، ممكن نقول زمالة، صحوبية، رفقة طريق. علاقات سطحية بتاخد وقتها وبتنتهي. الصداقة عامة أعمق من كده ومش شرط أي واحدة تقابليها وترتاحي لها شوية إنها هتكون صديقة... الصداقة بتتطور وتتعمق مع الوقت وبيظهر معدنها. اللي أنصحك به تكوني متوازنة في علاقاتك الجاية، يعني لا تتعلقي وترسمي آمال فتتخذلي لما يحصل مواقف زي دي تاني ولا تكوني حذرة وجافة تمامًا فتبعدي عنك ناس كان ممكن يكونوا فعلا أصدقاء جيدين في المستقبل... خليكِ وسط. ومش لازم أبدا تلاقي الأصدقاء الحقيقيين في سن الطفولة أو الشباب، عادي ممكن تقابليهم في أي فترة من رحلة حياتك، المهم بس تعرفي إزاي توازني علاقاتك وتحمي مشاعرك ونفسيتك. ربنا يوفقك وإن شاء الله يرزقك صحبة صالحة تستحقيها.
تم النشر الاثنين، ١٧ نوفمبر ٢٠٢٥
بصي ي سكر انتي شكلك طيبه و بتحبي الناس بسرعه ودي ميزه حلوه لو اتحكمتي فيها ومش عاوزاكي تكرهي حد او تحقدي عليه الموقف ده يعلمك ويعلمني انو الناس انواع واتوقع من اي حد انو يعمل كده وهو في الاول وفي الاخر هي اللي خسرتك انتي مش خسرانه حاجه لما بنت او بنتين يبعدو عنك وزي م قولتي انتي شاطره عاوزاكي متشغليش بالك بيهم وتوريهم انك مش محتاجاهم وانك افضل حالا من غيرهم
تم النشر الخميس، ٢٠ نوفمبر ٢٠٢٥
السلام عليكم ورحمة الله وبركاته اختي الغالية متفهم شعورك لازم تعرفي انك تعودي نفسك على عدم التمسك بأحد إلا الله يعني صاحبه تروح صاحبه تانيه تيجي وهكذا متعلقيش نفسك بحد الانسان مننا مش بيحب حد أحسن منه غير اولاده فخلي بالك دايما مهما وصلت الصداقه بينكم انتم اصدقاء لازم هيحصل خلافات ممكن تكون صديقه وفيه وتتحمل الخلافات معاكي وكل واحد يسامح من جهته وممكن تكون هي مش متسامحه ومتقبلش تكمل معاكي عند أول صدام خلي كل تعلقك بالله وحده ودايما ادعي ربنا يرزقك الصحبه الصالحه اللي تعينك على دينك ودنياكي وخليكي عارفه إنك يامه هتعرفي ناس وتنسي ناس انتي شكلك لسه صغيرة عشان كده الموقف مأثر فيكي آخر نصيحه خليها حلقه في ودنك الصحاب بتروح وتيجي مفيش غير بنا هو اللي باقي.
تم النشر الأربعاء، ١٩ نوفمبر ٢٠٢٥
أحب اقولك ان ولا واحدة منهم كانت صاحبة كويسة والاتنين مفيش واحدة منهم كانت بتحبك بجد ودول مش صداقات حقيقية لان الصحبة بجد مش هتسيبك على أتفه الاسباب وحتى لو حصل مش هتسيبك بالسنة او نص سنة فدول مش هنعتبرهم اصحاب -انتي يمكن اللي خلاكي تتمسكي بيهم في الاول انك عايزة يبقى في حد في حياتك تتكلمي معاها وتروحوا مع بعض الدروس تكلميها لو مدايقة يعني كنتي بتشغلي الفراغ اللي جواكي فمتزعليش نفسك عليهم بالعكس انسيهم وطنشيهم وحسسيهم إنك أحلى من غيرهم وانصحك مفيش احسن من امك علشان تصاحبيها على الاقل لا هتتخانق فيكي ولا هيجي يوم وتسيبك.
تم النشر الاثنين، ١٧ نوفمبر ٢٠٢٥
واياكم
تم النشر الثلاثاء، ١٨ نوفمبر ٢٠٢٥
إن شاء الله جزاك الله خيرا
تم النشر الثلاثاء، ١٨ نوفمبر ٢٠٢٥
بالتوفيق ان شاء الله
تم النشر الثلاثاء، ١٨ نوفمبر ٢٠٢٥
تمام شكرا لحضرتك
تم النشر الثلاثاء، ١٨ نوفمبر ٢٠٢٥
خدي منه منفعتك واتركيه بعدها
تم النشر الثلاثاء، ١٨ نوفمبر ٢٠٢٥
للأسف العلاقات أغلبها لما بتبوظ مبترجعش زي الاول خصوصا لو عدا فترة طويلة ركزي في مذاكرتك واتعرفي على اصدقاء جديدة واتعاملي بحدود مع الاتنين أما بخصوص انك تصاريحها فملوش لزوم هي من الاول مختارتش تكون صريحة معاكي وخدت جنب مع نفسها
تم النشر الأربعاء، ١٩ نوفمبر ٢٠٢٥
المشكله مدرسين عاملين جروبات وكمان صور السبورة و الدروس اونلاين فعشان كدا من غير تفكير العب فيه
تم النشر الثلاثاء، ١٨ نوفمبر ٢٠٢٥
انا متفهم مشاعرك بس مترميش نفسك على الناس وركزي في مستقبلك وتعليمك والناس هي اللي هتيجي تتعرف عليكي واضح من كلامك ان سنك صغير لسه فأول نصيحه ابعدي عن الموبايل لأن الوقت والفراغ اللي هتضيعه عليه بدون كنترول هيضيع من عمرك كتير.
تم النشر الثلاثاء، ١٨ نوفمبر ٢٠٢٥
لعرض السؤال في فدني اضغط هنا