عاوزه نصيحه من أي خبير في العلاقات الاجتماعيه و اقصد بالعلاقات هنا (الصداقه)....انا طالبه في ثانوي و من أول ما بدأت السنه الدراسية الجديده اتعرفت على بنت معايا في الفصل و لقيتها بتشاركني في حاجات معينه و حبيت اني اتقرب منها و نبقى اصدقاء مقربين بس بعد بداية الترم التاني بدأت بنت تانيه تتقرب منها و بقوا قريبين من بعض و انا بقيت بينهم و لا شيء مجرد تمثال ....حاولت كتير اعرف سبب تقربها من البنت دي و فكرت أن ممكن يكون لان البنت دي بتراعي مشاعرها و بتظهر مشاعرها و بتهتم بيها فحاولت اني اعمل كده رغم أن و لا مره في حياتي حاولت اني اظهر مشاعري لصديقه و لأني مش بعرف ده فحاولت اني اهتم بيها على الاقل و هي كانت مكتأبة فكلمتها على الواتس و قعدت اقولها على طرق تتخلص بيها من الاكتئاب و قولتلها أن لو عاوزه تكلمني فأنا موجوده في اي وقت بس بعد كده حسيت بالندم اني بعتلها كل الكلام ده فمسحت الرسائل تاني و كمان لأني حسيت ردها و كأنها بتسلك ليا يعني ردت و قالتلي شكرا انك مهتمه و بس كده و لما اتقابلنا في المدرسه كان في فسحه و كنا بننزل مع بعض بس هي اول ما شافت البنت التانيه راحت اخدتها و نزلت بسرعه من غيري و محاولتش تستناني أو تقولي هتنزلي معانا حتى ......آسفة على الكلام الكتير ده بس من المواقف الي حكيتها دي تنصحوني احاول اتقرب منها تاني و لا خلاص استسلم؟
احنا لا نملك الاشخاص.. يعني شئ طبيعي جدا اننا يكون لينا اصدقاء تانية .. ومتحاوليش تعملي حاجه انتي مش عايزاها عموما .. يعني مثلا انتي مكنتيش عايزة تشاركي مشاعرك ؟ فالسؤال هنا انتي مش عايزة تشاركي مشاعرك معاها ليه؟ ولما شاركتيها اضايقتي علشان انتي شاركتيها ولا علشان حسيتي بأن هي قابلت الموضوع بجفاف شديد منها .. ! كمان عايزة اقولك على حاجه الاصدقاء او البشر عموما مراحل ... يعني اتعرفتي ع حد فترة ما .. هتيجي فترة هتشوفي حد تاني .. والله اللي كمل كمل واللي مكملش خلاص ... الموضوع مش بالسوء اللي انتي فكراه .. كل حد هيدخل في حياتك هيعلمك حاجه، ووجوده في حد ذاته له حكمة .. سواء ليكي او له .. ف متزعليش انتي لسه صغيرة وهتقابلي ناس كتير جدا .. المهم متحاوليش تاخدي الموضوع بحساسية شوية .. العادي والطبيعي ان ممكن يكون ليكي صحاب مقربين حتى لو 3 او 4 ... ومش من حق حد منهم يقولك انا عايزاكي ليا صحبتي لوحدي! ده مش منطقي ومش طبيعي ... ده اسمه امتلاك .. اما عن سؤالك ف انك تقربي منها ولا لا ... خلى كل واحد ع راحته .. يعني ايه؟ يعني انتي عملتي اللي عليكي اتجهاها .. حاولتي تقربي وهي ع الجانب التاني من حقها تختار برده تقرب ل مين ومتقربش ل مين .. الحياة اختيارات .. زي ما برده من حقك تختاري ... ف سبيها براحتها .. وخلى الخطوة الجاية بتاعتها هي ... زي ما بيقولوا انتي قدمتي السبت سبيها هي تقدم الحد ..
تم النشر الخميس، ٤ مايو ٢٠٢٣
من خبرة الحياة وكقاعدة فى العلاقات عموما مش شرط اللى نتقرب منهم يفضلوا قريبين واغلب العلاقات هتنتهى والقليل منها هو اللى هيثبت رغم الظروف المتغيرة. ولسه ياما هتقابلى ناس تقررى تبعدى عنهم رغم حبك ليهم او انجذابك لشخصياتهم او لمجرد انك مرتاحتيش بس فى قربهم رغم انهم كويسين . انك تقربي او تبعدى عن حد مش لازم يكون بسبب ميزة معينة او عيب معين فيكى....ده بيحصل عاادى جدا بخصوص البنت دى بالذات ...هى لقت البنت التانيه اقرب ليها وانتى اكتشفتى انها مش شبهك ومش مستوعبه اختلافكم عن بعض ...فهى مش احسن حد تقربياه انتى اصلا او تعملى مجهود تجاهه انك تفضلى قريبه....كفاية على علاقتكم انها تكون على مسافه بعيدة وبس كده
تم النشر الخميس، ٤ مايو ٢٠٢٣
حاولي تاخدي الموضوع ببساطة و عقلانية شويه . اولا الاصدقاء مراحل ف حياة بعض و محدش بيبقى لحد بمعني اني متضايقيش نفسك ع حد بعد مرة واحدة أو بيتجاهلك و غيره و استحسني الظن برده لعل و عسى ربنا بيبعد عنك شر و انت شايفاه حلو الله اعلم ف الاول و ف الآخر و بالنسبة للموقف أو الوضع اللي فيه حاليا فانا رأيي و الله اعلم اذا كان صح و لا غلط او حتى يناسبك ولا لا اني ببساطة هتعامل مع الشخص زي ما كنت يعامله عادي جدا طالما انا شايفه كويس و مش بيعرضني لأي أذى و هعامله بما يرضى الله غير كده لو بيقلل مني أو شايفني أقل منه لا هبعد بهدوء خالص و اريح دماغي . و نصيحة بعيدا عن الموضوع ده حاولي انك توسعي دائما دائرة الاصدقاء و انك تقويها مش مجرد زمالة وربنا يوفقك و يوفقنا في حياتنا .
تم النشر الخميس، ٤ مايو ٢٠٢٣
لا تفعلي شيء لا تحبينه فعله لأحل الاحتفاظ بمخلوق في حياتك، لأنه وبعد مدة من الزمن سيعتاد ذاك الإنسان على ما تقدميه، ويظن أنه من حقه، ثم يلومك وقت أن تختاري التوقف عن فعل ما لا يرضيكِ ويضايقكِ ... هي اختارت الابتعاد ... لا بأس ... حاولتِ بما فيه الكفاية لفهم الأمر وفعل أشياء للإبقاء على صداقتكما، والآن ليس عليكِ سوى مواصلة حياتك، دون الاكتراث بشيء آخر، أو التنازل لأجل أن تبقى في حياتك. وتذكري أننا فترات في حيوات بعضنا، ليس شرطًا أن نبقى في حياة بعضنا البعض أبد الدهر ... بل على العكس أجمل ما في الحياة من رأيي هو تجدد العلاقات في حياتنا، واكتسابنا معرفة شخص جديد في كل مرحلة من حيواتنا ... رزقكِ الله بالصحبة الصالحة المحبة والداعمة
تم النشر الاثنين، ٨ مايو ٢٠٢٣
لعرض السؤال في فدني اضغط هنا