شوفي ياقمراية مبدئيا كده انتي عيزاه يقولك ايه؟ يقولك انا بتسلى بيكي او بقضي وقتي معاكي لغاية ما اتجوز؟ مهو طبيعي انه يقولك هاجي وهتقدم! مش كلهم بيلعبوا بالبنات ولكن هذه الاغلبية ومن باب اني احفظ نفسي مكلمش ولاد خالص لغاية ما يجي نصيبي حتى لو اتاخر ولا اي؟ شوفي جايز والدك مش قريب منك خالص بناءً على كلامك والاب دوره مهم جدا جدا جدا لاننا بكل بساطة بنميل للجنس الاخر يعني والدك لو معوضكيش بالحنان ده انتي هتروحي تدوري على الحنية في شخص تاني زي ما انتي بتقولي دلوقت انه قد ايه لطيف وحنين وكده ولكن مخدهاش حجة بقا اني اعمل كده مش معنى ان والدي مش مهتم بيا وعندي نقص وعايزة حد يعوضني مكانه يبقا اروح للحرام لا اشد على نفسي ده نصيبي واعوض نفسي بنفسي خليكي كده عارفة مصلحتك، انا معرفش انتي عارفة ان الي بتعمليه ده حرام ولا لا ولكن ربنا بيقول"(ولا تقربوا الزنا)" ولم يقل ولا تزنوا لان دي اسمها مقدمات الزنا اولا بنبدا بكلام وبعدها نتكلم صوت وهي دي المقدمات، عشان كده مينفعش بنوتة تصاحب ولد ولا نقول احنا اخوات، طبيعي مابين اي ولد وبنت يبقا فيه مشاعر الا لو ليها حدود بمعنى انا بحب اخويا جدا وجايز اغير عليه كمان ولكن انا عارفة انه اخويا يعني محرم عليا وده مخلي لمشاعري حدود ولكن احنا اخوات لا احنا صحاب كده كده هيبقى فيه مشاعر وهنا مفيش حدود، تصرف والدك واخوكي صح ولكن بطريقة غلط يعني كان المفروض اه والدك يزعقلك لما يعرف حاجة زي كده لان الرجالة بتغير على اهل بيتها جدا ووالدك مهما كان عايز يحافظ عليكي لغاية ما تتجوزي ولكن انه يخلي اخوكي يضربك كده وكل ده لا صعب وصدقيني لو والدك كان قريب منك مكنتيش هتفكري تكلمي واحد من وراه وتخوني ثقته، والدتك هي اكتر حد كلمك بالعقل وكلامها صح جدا ولكن انتي اصريتي ورحتي كلمتيه تلجرام مهانش عليكي الي حصل! ليه متخليش كل حاجة لوقتها انتي دلوقت في 3 ثانوي دي سنة دراسة العمر الي بيعدي مش بيرجع ومش هتقدري تعيديها تاني ودي سنة مصيرية جايز في اولى كلية تفكري تتخطبي او تتجوزي وتكملي تعليم في بيت جوزك لو موافق لكن ليه دلوقت المشاعر في الوقت ده لو متحكمناش فيها وفي تصرفاتنا يبقا احنا بندلع، انا مش هقدر اقولك حاجة غير سيبيه سيبيه لان ده الاحسن ليكي ولما تكبري كده هتقولي ايه الي عملته في نفسي ده انتي بتظلمي نفسك، ركزي في دراستك حتى لو السنة دي وفي ناس بدأت دلوقت ووصلت والله بس لو هتقدري تستحملي الضغط وكم المذاكرة لان ده الحل الوحيد مينفعش تضيعي وقت في الزعل لازم تعقلي الامور كده، مفيش ناس معندهاش خلافات في بيتها واكتر من كده كمان، لو حصل موقف ضايقك من اهلك فكري في الناس الي معندهاش اهل خالص وبيتمنوا لو بس يشوفوهم ومش عايزين اكتر من كده و بردو لو فقدتي حد منهم لا قدر الله هتستحملي ده؟ جايز يكونوا مكرهينك في عيشتك كلها ولكن هل هتستحملي ولا هتقولي ياريت يرجعوا ان شاء الله لو يموتوني بس يبقا عندي اهل لو صورة بس بدل نظرة الشفقة اني وحيدة ومعنديش اهل، طبعا الاهل لازم تعاملك بلطف وتنصحك براحة ولكن ده نصيب ومش علشان اهلي مش كده يبقو وحشين والدك بيشتغل عشان انتي متبصيش لحاجة حد ولو لطيف ولكن مش موفرلك الي عيزاه جايز هتحسي بنقص وتقولي يشتغل احسن ما يهتم بيا الا لو انتي راضية ودي اهم حاجة، بصي مش بقولك كده اني بقول ان تصرفهم صح وكده ولكن الاهل في حد ذاتها نعمة مش كل الناس عندها البيت الدافئ الي كل اهله حياتهم وردي، احمدي ربنا عليها وحاولي تقنعي نفسك بيها وانك حاسة بفراغ من نحية الاهتمام هتحسي بفراغ الوحدة ومش كل الناس حياتها زي ما بتظهر يعني مش عشان اب بيتمشى مع بنته ومراته وشكلهم بيحبوا بعض يبقا حياتهم وردي ما جايز بيخرجهم كل شهر او شهور ومش لطيف خالص، حاولي ترجعي لربنا صلي وحافظي على فروضك ومتفوتيهاش محدش اهم كله بيروح ربنا هيبقا احن عليكي من محمود ومن ابوكي ومن اخوكي ومن البشر دي كلها هو الوحيد الي هيحققلك الي عيزاه بس اصبري كل حاجة في وقتها اتقربي لربنا بس ومتشيليش هم. ربنا يوفقك🤍
حاولي تحافظي على بر والدك وخلاص يعني عامليه كويس لانه والدك "(وبالوالدين احسانا)" وخليكي كده اتعاملي زي ما انتي وركزي في مذاكرتك عشان خلاص الوقت بيعدي وبإذن الله ربنا هيكرمك وهتدخلي الكلية الي عيزاها وبإذن الله إن كان لينا عمر هستناكي تقوليلي دخلتي كلية واياً كانت فهو ده نصيبك وسعيدة بكلامي معاكي جدا ربنا يوفقك يارب ياجميلة🤍
تم النشر السبت، ١ مارس ٢٠٢٥
ولا طولتي ولا حاجة انتي تحكي براحتك، حلو جدا بجد الالتزام فالصلاة ربنا يثبتك ياجميلة، بصي مش شرط كل الناس الي بنحبهم ميكونش منهم موقف ضايقنا بمعنى ان اللهم بارك والدك كويس معاكي ولكن انه بيقول عليكي مش كويسة وبيصغرك قدام اخوكي ده مينفعش كان كلمك بهدوء ولكن احنا هنعذره ونقول من صدمته،ممكن تقعدي معاه بهدوء وتكلميه ان خلاص انا الحمد لله رجعت لنفسي ومش هعمل كده تاني ونفسيتي تعبت من كلامك معايا،بجد بحيكي جدا انك مكلمتيهوش تاني، انا فهماكي جدا والله لاني حساسة زيك وبتضايق من اقل كلمة بس لازم تعرفي ان لو فضلتي كده من كتر التعب النفسي هتتعبي جسدياً، لازم تعرفي ان كلنا بنغلط والله ولازم نتقبل ده صدقيني ما خفي كان اعظم كل الناس عندها ذنوب سر وعلانية بس هم تقبلوا ان كل الناس بتغلط ومكرروش الغلط وكملوا حياتهم ومعاشوش بذكرى الماضي، بإذن الله هتدخلي الكلية الي بتحبيها بس شدي حيلك كده في الي اتبقى خلاص اتبقى حاجة بسيطة خااالص والسنة تخلص حاولي تعملي اقصى اقصى مجهود وبالذات في رمضان وقته مبارك بس انتي ثقي في ربنا وهتشوفي وقتك هيتضاعف ازاي، ومين قال بقا إن محدش بيحبك طب دا من ردك ده باين عليكي شخصية جميلة جدا اللهم بارك انا حبيت كلامك جدا، شوفي مميزاتك انتي متركزيش على مميزات حد وتقولي اصلي مش كده انا مليش لزمة...لا خالص خليكي واثقة ان كل إنسان اتخلق لرسالة معينة محدش معندوش قدرات او مميزات يفيد بيها غيره وفي حجات كتير مكتسبة بجد حياتك مهمة جدا صدقيني، حاسة انك متاخرة في مذاكرتك! محدش مقفل الدنيا اوي انتي لو معاكي صاحبة شاطرة في مادة بتبقا موقعة مادتين تلاتة تانيين انتي مش شيفاهم بس هي بتحاول تلم الدنيا ومحدش مش مراكم اوي يعني مانا كمان مراكمة واهو بحاول الم حاجة حاجة وكل يوم بقول بإذن الله احسن من الي بعدو، وياستي لو بعد كل ده ولسه مقتنعة ان محدش بيحبك متبقيش انتي كمان مش بتحبي نفسك...حبي نفسك بجد ومتقسيش على نفسك احنا بشر عندنا مشاعر مش حجر لو قسيتي على نفسك متستنيش حد يحن عليكي بقا اهم حاجة انتي تتقبلي نفسك بعيوبها ومميزاتها..العيوب نصلح فيها واحدة واحدة والمميزات نطورها ونكتسب مهارات جديدة، حاولي دايما تحافظي على شغفك في التعلم والحياة محدش هيمشي منها بصحاب ولا كل ده، حاولي تتحدي نفسك كده وتخلي الشهر المبارك ده احسن شهر عدى عليكي دراسياً ودينياً ونفسياً وكل الجوانب، وكل عام وانتِ بخير ياجميلة.
تم النشر السبت، ١ مارس ٢٠٢٥
طبعا اول حاجه شكرا ع كلامك و نصيحتك الجميله الي انا حاسه انها طالع من قلبك اول حاجه انا فعلا بدات التزم ف الصلاه و خصوصا اننا داخلين ع رمضان و حقيقي حاسه ب فرق كبير و راحه و الحمد لله اما من نسبه ل بابا ف هو مش وحش و هو كويس معايا الي حدا ما و اكيد انا مقدره ان اي حاجه بتحصل منه ف هو بسبب صدمته من الموقف انا بس مشكلتي اني شخصية حساسه زياده عن اللزوم و اي كلمه بتتقال حقيقي بتقطع فيا و ع فكره انا بحب بابا جدا و مش تاعبني غير انو زعلان مني و هو اه ممكن مكنش بيديني اهتمام او حنان بس هو كان مديني ثقه و الشيطان ضحك عليا و خلاني استخدمها غلط بس صدقيني انا نفسيتي تعبانه من كلام بابا لانو عمال يقول عليا اني مش كويسة و مصمم انو يكسرني قدام اخويا و قدام الكل و غير أني مش قادره ابطل تفكير ف كلامه الي بيقوله يعني انا ممكن أفضل اعيط بجد ب الساعات بسبب كلامه لانو جارح جدا و حاسه ان كل الي فارق مع بابا ان لو حد عرف اهم حاجه الناس طب و انا مفقرش عندك ف حاجه من نسبه ل محمود صدقيني سبتها ع ربنا و عايزه اقولك ان جالي كذا فرصه اني اكلمه و مكلمتهوش عارف حسيت اني اتقفلت منه كدا مره واحده و من غير اسباب انا بس حاسه اني تعبت من حياتي و بدل ما كنت هتخلص ثانوي و اعيش حياتي ف الكليه و ابني نفسي هبقي بتعرض لضغط و مشاكل و دا لو بابا رضي يدخلني كليه و غير أني حاسه اني مقفوله من الدنيا عايزه ابعد عن كل الناس و ابقي لوحدي مش عارفه حضرتك فهماني ولا لا بس والله انا تعبت و حاسه اني مش قادره اتخطي ولا اكمل حياتي و صدقني الموقف الي انا فيه دا ولا حاجه من حياتي لاني بجد اتأذيت كتير اوي و مبقتش متحمله اكتر من كدا و غير أني فاقده الشغف ف مذاكرتي و حاسه اني متاخره عن الكل و احسه اني فاشله مفيش حاجه ف حياتي ناجحه فيها و محدش بيحبني و كل دا بجد مأثر ع نفسيتي حياتي ملهاش لزمه حاسه اني لو موت هيبقي احسن بس ف الاول و الاخر مفيش ف ايدي حاجه و شكرا بجد ع كلامك و تسلميلي و اسفه لو طولت عليكي
تم النشر الجمعة، ٢٨ فبراير ٢٠٢٥
لعرض الإجابة في فدني اضغط هنا