نفسي اخس و ابقى جميله نفسي اعيش كويس نفسي بس مش عارفه انا برضع طبيعي و كل ما اسال دكتور تخسيس اقول اكتبلي حاجه تحرق الدهون و تسد النفس يقولي مش ينفع اعمل اي نفسيتي زفت و كرهت شكلي و جسمي و كمان انا عندي مقاومة انسولين
بصي ي حبيبتي انتي مش محتاجة تخسي ، انتي محتاجه تتقبِّلي نفسك الأول ، السوشيال ميديا هي السبب في تفكيرك ونظرتك السيئة دي نحو نفسك ، كل ما تشوفي بنات جميلة على النت تقارني نفسك بيهم و نفسيتك تتحطم وتكرهي شكلك ونفسك وتعيطي ووووووو ...كل دا سببه ( السوشيال ميديا ) فانا بنصحك لو فعلا عاوزة تتغيري اقطعي السوشيال ميديا انعزلي عنها خالص ، خلي اول اسبوع دا هو فترة محاولة انعزالك عن المواقع اللي بتسببلك غِيرة وكره لنفسك ، ثم بعدها ابدئي ابني علاقة قلبية مع ربنا وليس علاقة جسدية فقط ولو متعرفيش يعني اي اسألي شات أو أي موقع Ai عشان بس رسالتي متبقاش طويلة ، اشكي لربنا وعيطيله وحاشاه أن يخذلك ، قوليله يارب مش عاوزة أزدري نِعَمك عليَّ يا رب فاهدي قلبي وأنعِم عليه بالقبول والرضا ، ادعي كتير ، والله ربنا قادر انه يغير شكلك ويخليكي تعيدي النظر لشكلك تاني وهتحسي انك فعلا جميلة انا ازاي كنت بفكر كدا ! ، ثم بقا ابدئي اهتمي بنفسك و في طرق كتير للتخسيس وربنا هيرزقك التوفيق بدا لإن علفكرة انتي ممكن تعملي كل طرق الأسباب المحتلة لإنك تخسي بس برده متخسيش لإن ربنا مش موفقك لإنك تخسي فكل حاجة بتوفيق من ربنا فاسعي لرضا ربنا الأول.
تم النشر الجمعة، ٢١ أغسطس ٢٠٢٦
حبيبتي ألف سلامة عليكي ❤️ طالما بترضعي والدكتور قالك مينفعش يبقى كلامه هو اللي يتسمع. صحتك وصحة البيبي أهم من أي حاجة. **الأنسولين ومقاومة الأنسولين وقت الرضاعة:** 1. جسمك دلوقتي بيحرق لوحده عشان اللبن. دي فرصة كويسة جدا. 2. ممنوع أي أدوية تخسيس أو أعشاب من نفسك وقت الرضاعة عشان بتنزل في اللبن. **تخسي ازاي بأمان وانتي بترضعي:** 1. **الأكل**: قللي سكر وعيش أبيض ورز. ركزي على بروتين + خضار + مية كتير. ده بيظبط الأنسولين لوحده. 2. **المشي**: 30 دقيقة في البيت أو في الشارع بالبيبي. بيفرق جدا مع الأنسولين. 3. **الرضاعة نفسها**: بتحرق من 300 ل 500 سعرة في اليوم. بعد ما تفطمي ارجعي لدكتور تغذية وباطنة يعملك نظام مناسب لحالتك. ربنا يقويكي ويباركلك في البيبي
تم النشر الخميس، ٢٠ أغسطس ٢٠٢٦
السلام عليكم، بصي سواء هدفك خسارة وزن أو زيادة فالنفسية مهمة في كل الأحوال وبتفرق جدا. فأنتِ اشتغلي على نفسيتك ضروري، لأن طول ما عندك مشكلة مع زيادة الوزن وكارهة نفسك وشكل جسمك مش هتقدري تحققي هدفك. طبعا الدكاترة مش هيقدروا يكتبوا حاجة طالما بترضعي عشان ميحصلش أي مشاكل للرضيع. يعني حتى مش هقدر أنصحك تدوري على حاجات طبيعية عشان برضه هتنزل في اللبن وممكن تضره. ممكن تستشري دكتورة من اللي تابعتِ معهم إذا كان الصيام المتقطع مفيش فيه مشكلة مع الرضاعة ومش هيؤثر على البيبي ولو كويس امشي عليه. *** لو مفيش إمكانية تروحي جيم فاعملي تمارين في البيت، شوفي أنتِ هدفك تحرقي دهون ولا نحت الجسم ولا تخسيس منطقة معينة. اكتبي على يوتيوب نوعية التمارين اللي عاوزاها وتدربي كل يوم مع طبعا وضع أيام للراحة عشان عضلاتك متتعبش. *** وامشي كتير وتحركي في الشقة باستمرار ولو فيه سلالم وأسانسير استخدمي السلالم أفضل في الطلوع والنزول ولو رايحة مشوار قريب امشي له بدل ما تركبي توكتوك أو مواصلة. ده كله هيساعدك تحرقي سعرات ويخلي جسمك مرن حتى لو لسه وزنك زائد. *** وخدي بالك، إلى جانب النفسية، مهم تعملي حسابك إن خسارة الوزن والوصول للشكل والوزن المثالي ده هدف بيحتاج وقت وصبر، يعني مش تبدئي تمارين ونظام غذائي وتفضل تبصي على نفسك في المراية وتزعلي إنك مش شايفة أثر للريجيم والتمارين. ده هيحبطك ويخليك توقفي ومتكمليش النظام. الموضوع ممكن ياخد شهور حسب وزنك الحالي وطبيعي مع الرضاعة ومقاومة الأنسولين ياخد وقت. فأنتِ استعدي نفسيا وفكريا للنقطة دي وحطي خطة من النهاردة لكم شهر حتى لو وصلت لسنة على ما توصلي للشكل المثالي. ممكن تتابعي وزنك ومقاساتك كل شهر مثلا وعلى أساسها شوفي تزودي تمارين أو تعدلي حاجة معينة. *** ونصيحة، متكرهيش نفسك ولا جسمك ولا تقاومي مشكلة الوزن الزائد بطريقة سلبية، عشان مقاومة الشيء بتزوده. وحبك لنفسك أهم حاجة وهو اللي هيساعدك تركزي على الهدف اللي يخليها أفضل. بالتوفيق إن شاء الله.💚💚
تم النشر الاثنين، ١٧ أغسطس ٢٠٢٦
أنا فاهمة شعورك تمامًا يا قمر، ومش لوحدك في اللي بتمرّي بيه. كره الجسم والنفسية المتعبة ده شيء طبيعي جدًا بعد الولادة، خاصة مع الرضاعة ومقاومة الإنسولين اللي بتخلي الجسم يحتفظ بالدهون أكتر. بس الحمد لله إنك قادرة تطلبي المساعدة، وده أول خطوة مهمة. الرضاعة الطبيعية بتحتاج سعرات حرارية كويسة عشان الحليب يفضل مغذي، فممنوع تمامًا أي أدوية حرق دهون أو سد شهية دلوقتي. الدكاترة بيقولوا كده عشان سلامتك وسلامة طفلك. بدلًا من كده، ركزي على تغييرات بسيطة وآمنة تناسب حالتك: كلي وجبات متوازنة فيها بروتين (زي اللبن، البيض، الفراخ، السمك) وخضروات وألياف، وقللي السكريات والنشويات البيضاء عشان مقاومة الإنسولين. مثال: فطارك يكون بيض مع خضار، ووجبة الغدا فيها سلطة كبيرة مع مصدر بروتين. امشي يوميًا 20-30 دقيقة بعد الرضاعة، ده بيساعد في حرق الدهون بدون إجهاد. اشربي مية كتير ونامي كويس لما الطفل ينام. نفسيتك مهمة جدًا، فابدئي بخطوات صغيرة زي لبس حاجة تحسسك بالراحة، أو كتابة 3 حاجات بتحبيها في جسمك كل يوم. الجسم ده أمانة، والتغيير بيحصل بالصبر والاستمرار مش بالسرعة. لو عايزة خطة أكتر تفصيلاً، ابحثي عن أسئلة مشابهة على فدني عشان تشوفي تجارب تانية، واستشيري دكتور تغذية متخصص في الرضاعة ومقاومة الإنسولين. أنتِ قادرة، وهتوصلي للي نفسك فيه خطوة بخطوة. ❤️ (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الأحد، ١٦ أغسطس ٢٠٢٦
الجمال مش بالشكل بس ياقلبي المهم الروح الحلوه💙
تم النشر الخميس، ٢٠ أغسطس ٢٠٢٦
الصيام المتقطع والله جميل جدا وكمان انك تزودي بروتين وتقللي نشويات
تم النشر الأربعاء، ١٩ أغسطس ٢٠٢٦
اشربي كركديه 🌺 وامنعي اكل بعد الساعه 8 وامنعي العيش او الدقيق الابيض وخففي توتر وقلق علشان الكورتيزول واهم حاجة الصيام المتقطع ضروري
تم النشر الثلاثاء، ١٨ أغسطس ٢٠٢٦
متتعقديش من حاجه و خير ان شاء الله بس خليكي علي نظام صحي و كل حاجه هتيجي
تم النشر الثلاثاء، ١٨ أغسطس ٢٠٢٦
لعرض السؤال في فدني اضغط هنا