بحس نفسي غريبه عشان انا بحب الكوره و نفسي ادخل هندسة ميكانيكا و من كتر كلام صحابي و الناس اني كدا كأني ولد و أن دي حاجة الولاد بقيت بحس نفسي اني مش بنت انا ف الطبيعي مش بتأثر بكلام الناس لكن بليل الover thinking بيموتني هو انا فعلا مش بنت؟
و بقيت بحس اني عبء كبير على المجتمع عشان عندي ربو بس انا بحاول محسش اني كدا و وفاة عمتي كانت اكبر حاجة مؤلمه عليا ماتت قبل عيد ميلادي عمتي هي الي كانت مربياني هي الي حبتني و اهتمت بيا بجد مش زي بابا الي كان بيفرغ غضبه فيا كل يوم ولا زي امي الي سابتني وأنا عندي شهرين بس و مسألتش عليا
نفسي اروح واتكلم مع دكتور نفسي بس بابا مش راضي انا بجد تعبت من حاجات كتير معنديش ام معنديش اخوات مش هعرف العب في بيراميدز عشان عندي ربو و عمتي مش هشوفها تاني و ثانويه عامه السنه الجايه ضغوط كتيره محدش فاهمها و ابتديت اتجه لطريق غلط مش عارفه ارجع منه و هو العادة السرية بقيت بقرف من نفسي جامد
السلام عليكم و رحمة اللّٰه و بركاته كون إن اهتمامتك كدا ده شيء جميل جدا ما شاء الله اللهم بارك ، و أي حد عارضك ب قول إنك كدا مش بنت ده شخص بيحاول يحبطك و شايفك عندك طموحات و هو بلا طموح ف بيحاول يهدم طموحك عشان تبقي ذيه . [ كُلُّ نَفْسٍ ذَائِقَةُ الْمَوْتِ ۖ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ ۖ فَمَنْ زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ ۗ وَمَا الْحَيَاةُ الدُّنْيَا إِلَّا مَتَاعُ الْغُرُورِ] فقدان حد عزيز عليكِ عارفه إنه مش هين و لكن ده مش معناه إنك تقفي عند فقدانه و تعتقدي إن الحياة بفقدانه انتهت ،طبيعي يجيلك فترة الحزن بعد الفقدان ، بس في النهاية عايزاكي تفتكري إننا كلنا هنموت كل الي عليكِ انك تدعي لعمتك و تتصدقي لعل الصدقة تكون سبباً في إجتماعكم سويا في الجنة إن شاء الله. قال تعالى : [وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ أُوْلَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُوْلَئِكَ هُمُ الْمُهْتَدُونَ] خليكِ صبورة مش معنى إن ظروفك كدا يبقا تستسلمي للإكتئاب و الألم و تنسي إنك عندك رب رحيم بعباده ، كل متصبري على البلاء ربنا هيجازيكِ خير متخليش الفقدان يفهمك إن كدا خلاص مش هيبقا ليكي حد يهتم بيكي و يحبك ذي م عمتك الله يرحمها كانت بتحبك، يمكن بصبرك على البلاء ربنا يرزقك ب زوج صالح يرعاكِ و يديلك الإهتمام الي فقدتيه الله أعلم ،، أنتِ ذكرتي إن من أحد الضغوطات إن ثانوية عامة السنة الجايه برغم إنك مش عارفه هي هتبقا سنة خير عليكي ولا لاء.. أنا بردو كنت معتقده و أنا في تانيه نفس الإعتقاد بتاعك و من كلام الي حواليا عن ثانوية عامة خلاني أتوه و افقد امل حتى في اللحظات الحلوه الي كنت بعيشها في تانيه برجع اقول مش هتدوم عشان انا داخله تالته ،، [وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ] تالته ثانوي حقيقي خلت إيماني بالآيه يزيد مكنتش فاهمه الحكمة و كنت بفضل أقول يا ريتني كنت ف حاجه غير ثانوي و لكن ها أنا ذا من داخل تالته ثانوي حالياً و بتمنى إنها متخلصش و كل شهر بيعدي بحمد ربنا و بتمنى إن كل الشهور تبقا ذيه ، سبحان الله لما كنت في سنك مكنتش عارفه إن في تالته هبدأ تعلم علوم شرعية ولا كنت أعرف إن هتغير للأحسن ، اتعلمت حاجات كتيرة و درست سيرة نبوية ، توبت من ذنوب فاتت و تخليت عن الصحاب السوء نظمت حياتي تنظيم عمري مكنت أتخيل إن ربنا يوصلني للتنظيم ده ، اه في ضغوط مذاكرة و تراكمات كتيرة بس أنا من جوايا بقيت انسانه تانيه العلوم الشرعية عرفتني حقيقة الدنيا ،خلتني راضية بقضاء الله أيا كان هو إيه ، بقيت بتعب و اتوكل و أنا واثقة إن ربنا هيجازيني خير ، مكنش عندي هدف كنت تايهه مش عارفه انا بذاكر ليه بس السنادي عرفت هدفي الحقيقي الي كنت تايهه عنه و حطيته قدامي و إن شاء الله أقدر احققه ،، اللي حابه أوصلهولك من حكايتي إن متخليش كلام حد يأثر عليكي و يخلي عندك سوء ظن ب أقدار الله و خلي الآيه دي في دماغك دايماً [ لَا يُكَلِّفُ اللَّهُ نَفْسًا إِلَّا وُسْعَهَا] ربنا حاطك في الظروف دي و هو عارف إنك قدها استحالة يحطك في ظروف أكبر من طاقتك لذلك السخط على القدر و السلبية تجاه المستقبل مش هيفيدك أبدا بل هيبوظ حياتك و يدمرها ، أنتِ نفسك بسبب ده اتجهتي للعادة السرية و هتفضلي تدخلي نفسك في دوامات تهلكك اكتر و اكتر و ده اللي الشيطان عايزة.. [ فَلَا تَعْلَمُ نَفْسٌ مَّا أُخْفِيَ لَهُم مِّن قُرَّةِ أَعْيُنٍ جَزَاءً بِمَا كَانُوا يَعْمَلُونَ] فوقي لنفسك و توكلي على الله ، افتكري إن رب الخير لا يأتي إلا بالخير ، الله أعلم يمكن ربنا مخبيلك حاجة أنتِ مش هتقدري تتوقعيها من شدة جمالها ،حاجه تنسيكي كل الحزن الي فات ،، قال تعالى :[ أنا عند ظن عبدي بي، وأنا معه حين يذكرني، فإن ذكرني في نفسه؛ ذكرته في نفسي، وإن ذكرني في ملإ؛ ذكرته في ملإ خير منه، وإن تقرب إلي شبرًا؛ تقربت منه ذراعًا، وإن تقرب مني ذراعًا؛ تقربت منه باعًا، وإن أتاني يمشي؛ أتيته هرولة ] أحسني الظن بالله و و الله لن يخيب الله ظنك أبدا ،مفيش حد هيساعدك تفوقي من الي وصلتيله غير الله عز و جل ، صلي ركعتين توبة ابدأي بخطوات بسيطة و داومي عليها للتقرب منه ، أقطعي عاداتك السيئة اللي كنتي بتعمليها و أي حاجه تفكرك بيها تماماً ، صلي و أدعي ربنا يعينك على التخلص من كل العادات السيئة و يعينك على التقرب منه أكتر و أكتر ،، اسأل الله لك التوفيق و الهدايه 🤍
تم النشر الأربعاء، ١٠ ديسمبر ٢٠٢٥
"أنا قريت كلامك كله، وواضح قد ايه انك شايلة فوق طاقتك… بس خليني أوضحلك حاجة مهمة: انتي مش محتاجة دكتور عشان تبدأي تتحسني. انتي تقدري تساعدي نفسك بإيدك… وده مش كلام، ده حقيقة. مجرد إنك واعية بمشاعرك وبتحاولي تفهمي نفسك ده أول وأقوى خطوة. ربنا بيقول: ﴿إِنَّ اللَّهَ لَا يُغَيِّرُ مَا بِقَوْمٍ حَتّى يُغَيِّرُوا مَا بِأَنْفُسِهِمْ﴾ وده دليل إن البداية دايمًا من جواك… من قرار صغير إنك تقومِي تكمّلي، حتى لو تعبانة. وانتي مش مضطرة تبقي زي أي حد… مش لازم طبعك يبقى شبه البنات، ولا تفكيرك شبه الناس. ربنا خلق كل واحد مميز بطريقة مختلفة، وانتي عندِك ميزة إنك فاهمة نفسك وبتفكّري وبتحسّي بعمق… وده مش عيب. ده قوة. واللي بيقولّك إنك غريبة… هو اللي مش فاهم. التميّز دايمًا بيبان غريب في الأول. اسعي ورا حلمك حتى لو الطريق صعب. انتي قلتِ عايزة هندسة ميكانيكا… وده لوحده يبين إن دماغك كبيرة ومختلفة. محدش نجح وهو مرتاح… لكن كل اللي نجحوا بدأوا من لحظة تعب زي اللي انتي فيها دلوقتي. ركّزي على ٣ حاجات بس: – إنك تساعدي نفسك كل يوم بخطوة صغيرة. – إنك متسمعيش كلام الناس اللي بيقلل. – وإنك مؤمنة إن ربنا شايف تعبك وهيعوّضك. وبالنسبة للعادة اللي بتحسي إنها مضايقاك، أهم حاجة تفهمي نفسك وتحلي السبب… ساعات الملل أو التوتر أو الوحدة بيكون سببها. جربي الخطوات دي: – اشغلي نفسك بحاجة مفيدة أو ممتعة كل ما تحسي بالرغبة، زي دراسة، رياضة، هواية، أو موسيقى. – لما تيجي الرغبة، خلي عندك خطة بسيطة: ٥ دقايق تنفسي بعمق، تشغلي إيدك بحاجة، أو تمشي شوية. – قللي الوقت اللي بتكوني فيه لوحدك أو قدام الموبايل لو ده محفز. – كافئي نفسك على أي نجاح صغير… حتى يوم واحد بدون العادة يعتبر تقدم كبير. افتكري دايمًا: كل خطوة صغيرة ليها أثر كبير، ومفيش حد بيبدأ ويتقلب كل حاجة في يوم واحد. الصبر والمثابرة هما مفتاح التغيير. ربنا بيقول: ﴿وَمَن يَتَوَكَّلْ عَلَى اللَّهِ فَهُوَ حَسْبُهُ﴾ يعني طول ما انتي ماسكة في ربنا… عمرك ما هتقعي. ومهما حسّيتي إنك تايهة… صدقيني، انتي أقوى بكتير من اللي بتفتكريه. ولو في حد يستحق يكمّل ويحارب عشان حلمه… فهي انتي."
تم النشر الأربعاء، ١٠ ديسمبر ٢٠٢٥
حاولي تبدأي تتعرفي على بنات من سنك وتنزلي وتخرجي معاهم عشان تطلعي من الكبت دا وأدعي ربنا قبل ماتنامي كل يوم يخلصك من المعصية دي وحاولي تنفتحي كدا علي الحياة وتخرجي وتتعاملي مع الناي
تم النشر الأربعاء، ١٠ ديسمبر ٢٠٢٥
انا مش هلومك ولا هكثر عليك نصائح لأن اللي حصل من والدتك شئ مش هين ولا حول ولا قوة إلا بالله ولكن لعله خير يمكن وجودها يكون أصعب .. أو يمكن راحت وهي مغلوبة على أمرها ومقهوره وعايزة ترجع / المهم حاليا سيبي اللي حصل وركزي على الحاضر حاليا استعيني بالله وادعيه وسيكفيكي ان شاء الله عن الناس وعن اي ادمان
تم النشر الأربعاء، ١٠ ديسمبر ٢٠٢٥
لعرض السؤال في فدني اضغط هنا