@Psy-a'laa M. Abdulhamidهو انا ازاى احدد انا مين
انا كل ماحارب ع حته بزهق و بمل انا فين او مكانى في يعنى انا بجاهد نفسي ع ربنا يس انتكست كتيير حتى في رمضان انتم متخيلين نفسي اوسع لبسي و حجابى يبق صح
و بس الاناشيد و الابتهالات و القران و الشيخ محمد صديق المنشاوي
و البودكاستات الدينيه
و برضو جوايا واحده هاديه بتحب الاغانى الهادي القديمه و الجديده و الالوان الهاديه مش الفاقعه و برضو عاوزه يكون لبسي صح يعنى م عاوزه اعصى ربنا
و برضو جوايا شخصيه شغوفه و عاوزه تبقى قويه و غامضه ليها شخصيه مستقله تعمل فلوس و بزنس و يكون ليها اسم و كرير و معايا عربيه و بايك و بسمع الموند الى بيغنى راب ع ده مثلي الاعلى و بسمع بودكاستات تنميه بشريه و بلبس اسود بس
بس الحقيقه انى غلبانه غلب بس ظروف كتييير بوظتنى
انا م عارفه انا مين ولا اسعى لاى ولا اعمل اى و محاطه بانتقادات من اهلى و من كل حاجه و غير كده نفسى و عقلي و قلبي متحكمين فيا يمكن اقرب حد ليا روحى قلبي مايل للهدوء و الدين عقلي مايل للكرير و انى ابقى حاجه و اخد حقي من الدنيا
بس اى الصح والله انا حتى م عارفه كتبت الكلام ده ازاى موجوعه اوي
انا كل يوم قبل منام صدرى بيتخنق او احساس زي ضغط و قلبي بيدق جااااااااامد بنام بمعاناه ببق نفسي محسش كد تانى بقلق وسط النوم و حاجات كتير تفكيير دايم
انا بس عاوزه ربنا ميزعلش منى و اعرف اعمل اى
في البداية خليني انبهك لحاجة مهمة التدين عمره ما كان ضد الكارير وانك تبقي مسؤولة وناجحة ومستثمرة مفيش تعارض ما بين الاتنين نهائيا اللي بتوصفيه بيكون طبيعي في مرحلة معينة ووقت معين واحيانا بيكون مشكلة وممكن توصل لاضطراب نفسي . . وفي كل الأحوال تواصلي مع أخصائية تساعدك تفهمي نفسك وترتبي أولوياتك وتشتغلي عليها
تم النشر الأحد، ٨ مارس ٢٠٢٦
بصي ربنا بيحاسبنا على السعي مش على الوصول للكمال. إنك بتجاهدي نفسك في اللبس أو الصلاة وبتقعي وترجعي، ده في حد ذاته عبادة أعظم بكتير من حد مثالي مش بيتعب. ربنا مش زعلان منك، ربنا شايفك وأنتي بتحاولي، وده كفاية جداً. ومتغيريش حياتك كلها في يوم وليلة عشان متتخنقش. نفسك في لبس واسع؟ ابدئي بقطعة واحدة مريحة وشكلها حلو. بتسمعي راب وعايزة تقربي من ربنا؟ خلي فيه وقت مستقطع في يومك للمنشاوي أو بودكاست، من غير ما تمنعي التاني فوراً. التوازن هييجي بالتدريج. ومين قال إن البنت الناجحة اللي عندها بيزنس وعربية وكارير بعيدة عن ربنا؟ بالعكس! انوي إن نجاحك وفلوسك وقوتك دي عشان تكوني مؤمنة قوية ،بتساعد الناس ومكتفية بنفسها. كده بقى شغلك ومذاكرتك صلاة وعبادة طول اليوم. الخنقة اللي بتجيلك قبل النوم دي سببها جلد الذات. قبل ما تنامي، قولي ..ربي أنا عملت اللي قدرت عليه النهاردة، وسامحني على التقصير، وأنا متوكلة عليك في بكرة... سلمي حمولك لربنا ونامي.. أنتي مش مسؤولة عن تدبير الكون، أنتي مسؤولة عن سعيك بس. وأنتي غلبانة فعلاً زي ما قلتي، بس الغلبان ده ربنا هو اللي بيده القوة. حبي نفسك بكل تناقضاتها، وواحدة واحدة الدنيا هترتب نفسها. بعتذر عن الإطالة 😊 وجد ربنا يحفظك ويسعدك
تم النشر الأحد، ٨ مارس ٢٠٢٦
لعرض السؤال في فدني اضغط هنا