السلام عليكم، طبيعي جدا، كل ما هتحسي بضغط وخوف هتلاقيك بتتهربي وده اسمه تسويف... عقلنا مصمم إنه يحمينا من الألم، وبالنسبة له الضغط والخوف اللي حساه وقلقك ناحية الامتحان القريب ده مسبب لك ألم فالعقل بيخليكِ تتهربي في أي حاجة ملهاش علاقة بالمذاكرة. التسويف حله إنك تاخدي الخطوة، أول خطوة بتكون الأصعب بس بمجرد ما هتقعدي وتفتحي الكتاب هتلاقي نفسك اندمجتِ إن شاء الله. وعشان تاخدي الخطوة الأولى لازم تخادعي عقلك، بمعنى إنك تخليه ميحسش إنك داخلة على معركة ومذاكرة لوقت طويل... ده ضغط كبير. قولي لنفسك إنك هتقعدي 10 دقائق بس تراجعي الجزئية الفلانية أو تحلي كم سؤال على الدرس أو تتبعي أسلوب البومودورو (25 دقيقة) وبعدين راحة 5 أو 10 دقائق. والراحة اللي هتاخديها لازم تكون بعيدة عن التليفون عشان ميسرقش وقتك ويرجعك للتسويف. الأسلوب ده هيخليك متحسيش إن قدامك حِمل كبير ومجهود. ** توكلي على الله وادعي بالتييسر والتوفيق وابدئي.. اي دقيقة هتفرق معك إن شاء الله في الامتحان. وبالتوفيق.
لعرض الإجابة في فدني اضغط هنا