أنا صغيرة في السن 18 سنه من حوالي سنتين أو تلاته حد قريبي قالي انه بيحبني بس أنا كنت برفضه بعد سنتين من الإلحاح وافقت لما كنت 17 أنا مكنتش عايزة أقرب منه هو شخص كويس كشخصية دايما حضوره بيفرق والكل بيحبه وكلامه ورأيه مهمين بس أنا كنت عارفه انه بيدخن وكمان صحابه ناس مش أحسن حاجة وكنت بحسه بتاع بنات شال كل البنات اللي عنده ومسح كل التطبيقات ووعدني ان مش هيكون في غيري أنا كنت متردده في العلاقه دي لأسباب كتير أولها إن بابا مش موافق عليه كزوج ليا جيت مره قولتله اني مش هكمل وبعدين لما كنت عندهم ومسكت تليفونه بالصدفه لقيته اتعرف علي واحدة وبيتكلموا زعلت قوي وقولت خلاص دي اشارة من ربنا عشان مدخلش الطريق ده بس رغم كدا بعد ما اتحايل عليا شويه وشوية وعود وافقت وضعفت طول السنه دي مكلمش عليا حد فعلاً وعشنا قصة حب جميله حلوه طبعاً اكتشفت في عيوب منهم انه نرجسي نوعا ما وكرامته فوق كل شيء ومن ده وبعدين عن قريب اكتشفت ان في واحدة اتكلمت معاه هو فعلاً مش كلام كتير بس اتكلم معاها وبحسه بيبص علي البنات في كل وقت مع العلم ان حصل بينا تجاوزات السنه دي نسأل الله العفو وبعدين أنا اتكسرت قوي لأني خلاص حبيته بجد وبلكته من كل حته وبعدين كلمني من عند صاحبه ولما مردتش ارجع شتمني وبعدين قالي اسف هو عصبيته وحشه وبيقول كلام وحش وقتها وبيزعل وبيرجع يعتذر بعد وقت كتير متردده قطعت معاه تماما مفيش 10.أيام ورجع يكلمني بس مش مباشر مره يطمن عليا مره مش عارف ايه وبعدين دلوقتي حاسه شويه شويه بيسحبني ليه تاني أنا بحبه بس أنا مش قادره اسامحه خصوصا انه شايف ان الموضوع بسيط وان مفيش حاجة بينهم ولا اي حاجه حاولت اسامحه وارجع عادي مش عارفة وانا متعلقه بين اسيبه وأنا بحبه وعايزاه وبين كرامتي وديني وأنا ونفسي مش هتكون مرتاحه معاه الحل ايه أنا حاولت كتير وفي حيره كبيره بقول ان كل الناس بتغلط بس أنا مش عارفه اسامح وشايفه انها حاجة كبيره اعمل ايه؟؟؟؟؟؟
بصي يا بنتي من الآخر ومن قلب ديني وعن تجربة في الحياة ربنا لما بيكشف لك حد مرة واتنين دي مش صدفة دي رسالة صريحة عشان يحميكي من طريق آخره وجع قلب وندم أكبر بكتير الحب اللي فيه إهانة وشتم وتجاوزات وتوتر دا مش حب دا استنزاف لروحك ولدينك وكرامتك فوق كل شيء والرسول عليه الصلاة والسلام قال لا يُلدغ المؤمن من جحر واحد مرتين وإنتي اتلدغتي كتير فبلاش تدي فرصة تالتة ورابعة لشخص مش بيحترمك ولا بيتقي الله في مشاعرك التوبة هي البداية الحقيقية للراحة النفسية اقطعي العلاقة دي تماما لله وعشان خاطر نفسك وشوفي إزاي ربنا هيعوضك بسلام داخلي وشخص يقدرك بجد ويحافظ عليكي في الحلال بدون ما يكسر بخاطرك ولا يقلل من قيمتك استخيري وجمدي قلبك والبعد عنه دلوقتي هو المكسب الحقيقي لدينك ودنياكي. وجد والله ربنا يحفظك ويسعدك
تم النشر الأربعاء، ٢٥ مارس ٢٠٢٦
السلام عليكم - حسيت باللغبطة والحيرة اللي انتي فيها من طريقة كلامك بس مش من انك تبعدي عن الشخص دا ولا لاء من انك تفقدي الاهتمام وشعور انك محبوبة من الشخص دا . بالذات لما ذكرتي انه عنده شخصية قوية وكله بيحترمها بس لما قربتي اتصدمتي بالواقع وانه شخص مش محترم سواء بلسانه او افعاله وانتي لسه صغيرة وفي فترة مراهقة يعني مشاعرك متلغبظة وغالبا لسه مش فاهمة نفسك انتي محتاجة تهدي وتجمعي افكارك وتاخدي قرار انك تنهي الموضوع دا وبعدها تكوني شخص تاني خالص تكوني واثقة من نفسك وقريبة من ربك وشخصية قوية علشان لو حاول يكلمك تاني تقفي في وشه بدون خوف وتقولي لاء علشان هو بيستغل خوفك وانك مش قادرة تقولي لاء ومسيطر عليكي - ربنا يحفظك واسفة علي الاطالة
تم النشر الأربعاء، ٢٥ مارس ٢٠٢٦
اياكي ترجعيله تاني اسمعي الكلام هتندمي اوي لو رجعتيله تاني بلاش بلاش ترجعي لشخص كسرك قبل كدا لانه بعد شويه هيكسرك تاني وهيكلم بنات تاني لانه هو طبعه كدا وانتي ربنا بعتلك انذارات كتير قبل كدا بس انتي ماسمعتيش وعملتي نفسك مش شايفه حاجه اعتبري بقا اني سبب ربنا بعتهولك علشان يبعتلك الرساله دي بلاش ترجعي هتندمي اكتر مانتي ندمانه دلوقتى واقوى عذاب بعد عذاب النار هو الندم .. كانت اكبر غلطه اني رجعت وكلمته من تاني وفي الاخر ندمت .. اوعدي ربك انك تفتحي صفحه جديده وتبداي من جديد وتقربي من ربنا اكتر وصدقيني ربنا هيبعتلك احسن منه بكتير اوي حد يهتم بيكي ويحبك بجد ويحافظ عليكي من اي كلام او افعال .. وصدقيني ربنا بيبعد عنك اللى انتي عاوزاه دلوقتى علشان شايلك اللى هتكوني محتجاه بجد شايلك احسن منه بمليون مره .. وعوض ربنا افضل واحسن بكتير ...
تم النشر الأربعاء، ٢٥ مارس ٢٠٢٦
القاعدة الأساسية في للعلاقات ، ما تقدميش تنازلات سواء على الشخصية او العادات او حتى الوضع الاجتماعي او التعليمي إلا في حالة الزواج، كل ما هو قبل ذلك ، ما تتنازليش في سبيل حفاظك عل، علاقة مؤذيه ليكي نفسياً و جسدياً و الأهم دينياً ، الصفات اللي بتظهر وقت الخطوبة بتكون هي دي صفات الشخص اللي اتربى و اتعود عليها ،و مع الزقت هترجع تاني ، و مجرد الاعتياد بينكم بعد الجواز بيرجع الشخص لطبيعته و لعاداته القديمة ، لكن هل ده معناه ان محدش بيتغير ، لأ بيتغيروا عادي لكن اللي عايز يتغير ، غلشان نفسه مش علشان حد، لانه لو اتغير علشانك فبمجرد ما تحصل بينكم مشكلة ولو حتى بسيطة هيرجع زي ما كان ، لكن اللي بيتغير علشان هو عايز يتفير فهيقدر يعمل ده سواء كان فيه حد معاه او لأ ، فما تستهلكيش طاقتك في علاقة و مشاعر بتأذيكي مش بتفيدك ، و هيجيلك اللي ترضي بشخصيته و بأسلوبه و بعاداته من غير ما تحسي ان عيوبه عبئ عليكي ، و بالتوفيق 😊
تم النشر الأربعاء، ٢٥ مارس ٢٠٢٦
يا حبيبتي، أنا ذكية، وأنا هنا معاكِ دلوقتي، وأحس بكل اللي جواكِ.. اللي بتمرّي بيه ده صعب قوي، خاصة وأنتِ صغيرة وبتحبي بجد، بس خليني أقولك إن قلبك ده كنز، وكرامتك أغلى حاجة. المشكلة الأساسية : العلاقة دي مش شرعية من الأول (خلوة وتجاوزات، نسأل الله العفو)، وهو بيظهر علامات نرجسية زي الشتم ثم الاعتذار، والكلام مع بنات تانيين، وده بيقتل الثقة. هو مش شايف خطأه كبير؟ ده معناه مش هيتغير بجد، وأنتِ هتفضلي متوجعة. كل الناس بتغلط، بس الغلط ده مش بسيط لما بيتكرر ويجرح كرامتك ودينك. الحل العملي خطوة بخطوة : اقطعي الاتصال تماماً دلوقتي : بلوك كل حاجة، مش تردي ولا تطمني عليه ولا تقري رسايله. ده أصعب خطوة، بس هي اللي هتحرركِ. قولي لنفسك: "ربنا كاتب لي خير أحسن". استخيري ربنا : صلّي ركعتين استخارة، واسألي الله يهديكِ للي فيه الخير. الاستخارة دي هتريّح قلبك. ركّزي على نفسك : ابدئي هواية جديدة زي القراية أو الرياضة، أو طوري دراستك/شغلك. حددي هدف صغير يومي زي "النهارده هقرأ صفحتين قرآن"، ده هيبني ثقتك. الزواج الشرعي هو الطريق : لو عايزة شريك، خلّي أبوكِ يختار معاكِ، مش علاقات سرية. أنتِ 18، الوقت قدامك، وتستحقي واحد يحترم دينك وأهلك. لو الحيرة كبيرة : روحي على صفحة الخبراء في فدني https://www.fedni.net/experts وابحثي عن متخصص نفسي أو استشاري أسري، هما هيساعدوكِ بشكل شخصي. كمان، دوري على أسئلة مشابهة في فدني هتلاقي إجابات كتيرة. أنتِ قوية يا قمر، وده اختبار من ربنا عشان يحميكِ من أذى أكبر. هتمرّي، وهتلاقي اللي يستاهلك بإذن الله. لو عايزة تتكلمي أكتر، أنا هنا 💕. ربنا يفرّج همّكِ.
تم النشر الأربعاء، ٢٥ مارس ٢٠٢٦
لعرض السؤال في فدني اضغط هنا