السلام عليكم ورحمه الله وبركاته
أنا في تالته ثانوي دخلت علمي علوم عشان أهلي رغم أنهم خيروني بس طبعا بيخيروني وهما يختاروا هما عايزين طب وأنا حبيت الطب عشان اسمع عنه كتير وأنه حلو والكل بيتمناه بس طبعا مافيش حاجه باالسهل
وكنت دائما اقول لنفسي أني هحاول رغم أني شاكه في قدراتي لانو لازم اكون متفوقه أو جيد جدا بس مستواي متوسط وللاسف بدأت احس انه نزل اكتر
انا الحاجه الوحيده اللي كان نفسي فيها اكون طبيب نفسي بس اكتشفت أنه مش هتنفع وكدا وأهلي مش هيرضوا بس من أول الثانويه وأنا كنت بفكر فيها أي لو دخلت فنون لانو بحب الرسم بس أهلي لا بيكرهوه يشوفوني برسم وبالذات لو ايام الدراسه وأنا صراحه لو جبت كليه فنون مش هزعل بس أهلي هيزعلوا وإذا زعلوا هيعايروني بابن عمي وبنت عمي،
يعني مثلا بابا قالي لو مش جبتي مجموع ههزقك في الرايحه والجايه وامي قالت مش هرحمك فعلا كرهت نفسي وكرهتهم انا علاقة بأهلي مش كويسه وأنا صراحه بكرههم لأني دائما مجبوره على حاجات كتير بس مش بقدر اعمل حاجه
كمان كان ليا اخ كبير مش جاب المجموعه مع أنه كان بيذاكر كتير ما شاء الله وصار مشاكل بالعيله بسبب عمتي شمتت فينا عشان ابنها دكتور وغلطت في امي علي الرغم من ابويا بيحب اخويا عشان الكبير وشافوا أنه تعب في السنه بس طبعا مش سكت وسمعه كلام في أول شهرين وهو بيقولوا لو شفناك تعبت مش هنتكلم طبعا دا كذب بيقولوا كدا عشان يحمسوني بس أنا عارفه عمري ما هعجبهم وعمري مش هحقق حلمهم لانه حلمهم مش انا كنت بداية السنه متحمسه وبقول سنه وهتعدي وكنت بحاول اعمل اللي اقدر عليه
بعدين راكمت حصص وغيرت مدرسين ونفسيتي تعبت شويه بعدين بقبت بكره اذاكر وبنسى ومش عارفه احفظ والسنه خلصت ولسه لغاية الآن أنا من البداية مش كنت عايزة وفي الآخر مش هجيب طب لانو أنا مش عملت لنفسي حاجة وعارفه اني في الآخر هتعاقب وهتذل بس مش فارقه كدا كدا كان الموضوع صعب حتى لو دخلت الكليه كان ممكن افشل بس كان نفسي اسكتهم وادخل طب مش اكتر
ربنا ييسر لك أمرك ويرزقك الصواب،اولا استعيني بالله استخيري، متفهمة جدا مشاعر الحيرة والضغط اللي بتمري بيها بين رغبتك ورغبة الاهل ومهم اوي تختارى اللي متناسب مع قدراتك حتى لو على غير رغبه اللي حواليكي،وفي نفس الوقت توضحي بأسلوب طيب اسبابك، لان حتى لو الاهل لهم رغبه مختلفه في النهايه نجاحك هيسعدك ويسعدهم حتى لو في الأول كان على غير رغبتهم، مهم إن في رحلتك تحددي النيه وتفكري نفسك ليه اختارتي مسار دونا عن الآخر ، الاهل ثقافتهم الاهتمام والتفوق بطبيعة الحال ده امر منتشر في مجتمعنا، محتاجة تختارى أساليب ودودة تتفاهمي معاهم وتقعدي مع نفسك قعده تكتبي كل الاختيارات اللي من وجهة نظرك انتي شايفه قدراتك متناسبة معاها، مش إلزام عليكي تدخلي كليه طب عشان ابن عمك وبنت عمك دخلوها، ممكن الكليه تكون مناسبه مع قدراتهم، وبرده الضغط اللي بتمري به حاليا هياثر سلبيا على قرارك فانتي مش محتاجة القرار حاليا على اد ما انتي محتاجة تبدأى، اقتراحي ليكي حاليا اعملي خطة مذاكرة عشان تقللي التراكمات عليكي، ابدئي بماده سهلة ومحببة ، شابتر بتحبيه ، ابدئي بنص ساعه وابدئي واحده واحده زودي، عينك تكون على الجزء اللي هتبدئي تذاكريه مش على كم التراكمات اللي مطلوبه منك وربنا يوفقك.
تم النشر الاثنين، ٢٠ أبريل ٢٠٢٦
وعليكم السلام ورحمه الله وبركاته بصي يا بنت الناس الرزق ده بتاع ربنا مش بتاع مجموع ولا دكاترة ربنا لما بيقفل باب بيفتح قصاده مية باب بس احنا اللي بنبقى مركزين مع الباب المقفول هونى على نفسك وقولي يارب انا عملت اللي عليا والباقي عليك انت مش مطالبة بهدم نفسك عشان ترضي حد حتى لو كانوا اهلك لان ربنا مش هيحاسبك دخلتي كلية ايه بس هيحاسبك على سعيك وعلى صبرك وعلى حالك اللي بتهلكيه ده استهدي بالله كده واعرفي ان لو الدنيا كلها اجتمعت عشان يمشوكي في طريق ربنا مش كاتبه مش هتمشي فيه ولو ربنا راد ليكي خير في فنون او غيرها والله لو وقفوا على حواجبهم هتدخليها وتنجحي فيها كمان فوضي امرك للي خلقك وقولي يا رب اختار لي ولا تخيرني وارضي باللي يقسمهولك ربنا هتلاقي قلبك ارتاح وبطلي تشيلي هم بكرة اللي هو اصلا في ايد الكريم وحده ومتخليش الشيطان يدخل بينك وبين اهلك بالكره ادعي لهم ربنا يهديهم ويفتح بصيرتهم بس خليكي انتي مع ربنا وهو اللي هيحنن القلوب عليكي في الآخر وتأكدي ان اللي جاي دايما خير طالما رميتي حمولك على الله وجد ربنا يحفظك ويسعدك 🌷
تم النشر الاثنين، ٢٠ أبريل ٢٠٢٦
أهلنا ديما بيكونوا عايزين يشوفونا احسن من اي حد وهما بيفكروا من وجهة نظرهم فقط وانتي خدي كلامهم كنوع من التحفيز والدافع حتى لو مش عايزه طب بس اعملي اللي عليكي ونظمي وقتك وذاكري وفي النهايه هتدخلي اللي ربنا كاتبه ليكي حتى لو مش على هوى الاهل وكلية الفنون دي حاجه جميله جدا ومش شرط اني ابقى دكتور عشان اكون ناجح لان نجاحك مرتبط بحبك لمجالك ايا كان. نظمي وقتك وخلي هدفك النجاح والتفوق وكملي في الهوايه اللي بتحبيها وارسمي ونمي موهبتك مع المذاكره واتمنالك التوفيق ان شاء الله وتدخلي فنون جميله اللي كان نفسي ادخلها لكن قدر الله وما شاء فعل والحمد لله على كل اقداره وربنا يوفقك لما فيه الخير
تم النشر الاثنين، ٢٠ أبريل ٢٠٢٦
وعليكم السلام ورحمة الله وبركاته يا حبيبتي 🌸 أول حاجة، أنتِ مش غلطانة خالص في إنك زهقتي من نفسك ، ده شعور طبيعي جداً لما الضغط يزيد والحلم مش بتاعك. أنتِ في ثالثة ثانوي، وده وقت صعب خاصة مع توقعات الأهل العالية. بس خليني أقولك: أنتِ مش مسؤولة عن أحلامهم، أنتِ مسؤولة عن سعادتك وقدراتك . الله سبحانه خلقكِ بمواهب معينة، زي حبك للرسم أو الطب النفسي، وده مش عيب – ده نعمة! شوية نصائح عملية عشان تخرجي من الدائرة دي: رتبي أفكارك وحددي هدفك الحقيقي : اجلسي لوحدك ١٠ دقايق كل يوم واكتبي إيه اللي بيفرحك فعلاً (رسم؟ مساعدة الناس نفسياً؟). الطب مش الوحيد اللي يسكت الأهل – فكري في صيدلة، تمريض، أو حتى كلية تربية فنون لو مجموعتك تسمح. طب نفسي ممكن بعدين في الجامعة كتخصص فرعي. كلمي أهلك بذكاء : مش هتقوليلهم "أنا بكرهكم"، قوليلهم "أنا بحاول أوي بس نفسي أختار اللي يناسبني عشان أنجح وأفرحكم". اختاري وقت هادئ.ولو زعلوا، اصبري وادعي ربنا يلين قلوبهم – الدعاء يغير الأقدار! ارجعي للدراسة بطريقة ذكية : قسمي اليوم: ساعة دراسة + ١٠ دقايق رسم عشان تريحي دماغك (مش كره، ده وقود!). ركزي على نقاط القوة (علمي علوم مش مستحيل)، واستخدمي تطبيقات زي Anki لحفظ سريع. لو راكمتِ حصص، ابدئي دلوقتي بجدول أسبوعي صغير – هتقدري تجيبي مجموعة كويسة وتختاري اللي يناسبك. أنتِ مش فاشلة، يا قمر – أخوكِ كبير وتعب ومع ذلك بيحبوه، يعني مش المجموع بس اللي مهمة. كره نفسك هيخليكِ أسوأ، فابدئي بـ"الحمد لله على نعمة الصحة والعقل" كل صباح، وربنا هيفتحلكِ أبواب. لو عايزة دعم أكتر، ابحثي في فدني عن أسئلة مشابهة أو روحي لصفحة الخبراء https://www.fedni.net/experts ، فيه مدربين حياة ونفسيين هيساعدوكِ. أنتِ قوية وهتنجحي إن شاء الله، بس بطريقتكِ 💪❤️ قوليلي إيه رأيك نعمل خطة صغيرة مع بعض؟
تم النشر الأحد، ١٩ أبريل ٢٠٢٦
وعليكم السلام ورحمة الله وبركاتة أهلك مش هما لوحدهم كدا تقريبا أهالى كل من فى الثانوية كانوا كدا أو على الأقل المعظم كدا الفكرة والأهم دلوقتى انتى متبصيش على بعد كدا سواء طب أو فنون أو غيرة خليكى دلوقتى انتى بتعملى إيه وقادرة تعملى إية فى الفترة ديه أنا عارف انك بتحبى الرسم بس تفكيرك فى فنون خصوصا فى الفترة ديه هو وساوس عقلك بيصنعها بحيث يقولك مش لازم مجموع عالى ف بالتالى ممكن مجموع قليل ونخش حاجة انتى بتحبيها أهو ف بالتالى نخف مذاكرة ونراكم بس اللى هيحصل انك لو فضلتى كدا لا هتحصلى طب ولا هتجيبى فنون ف نصيحتى ليكى تسيبيك من أهلك خالص دلوقتى واسمعى ومتخليش الكلام يأثر عليكى تسيبك من ماذا بعد الثانوية خليكى فى النهاردة خليكى فى دلوقتى أنا هعمل إيه النهارده هعمل ايه بكرا من مذاكرة وغيرة تبذلى أقصى طاقتك فى المذاكرة علشان متجيش بعد كدا انتى شخصيا تندمى انك معملتيش اللى عليكى يعنى اجتهدى واتعبى أوووى اوووى وحطى كل طاقتك ومجهودك فى الفترة ديه ومتضيعيش دقيقة واحدة بحيث لما النتيجة تظهر أيا كانت تكونى انتى مطمئنة نفسيا انك عملتى اللى عليكى ربنا يوفقك ويكرمك ويعديلك السنة دية على خير
تم النشر الاثنين، ٢٠ أبريل ٢٠٢٦
إيه العبث ده ..... كل اللي عليكي إنك تركزي في المذاكرة بس أما كل الحوارات دي سيبيكي منها خالص، ولما السنه تخلص وتجيبي مجموع تبقو تشوفوا إنتي حابه تدخلي إيه ،، وبالنسبه لموضوع أولاد عمك وعمتك اللي بتشمت دي المفروض أصلًا إنك ما تلتفتيش ليهم أبدًا كل إنسان له صفاته الخاصة وإنتي ليكي شخصيتك اللي المفروض تحبيها زي ما هي وتهتمي بيها وما تغيريهاش علشان حد ،،،، والحاجه الأخيرة إنتي اللي بإيدك تدي لكلامهم (الانتقاد) قيمة أو تخليه بلا قيمه 👈🏻عن طريق ردود أفعالك إنتي ، لما حد يكلمك خلي ردودك مختصرة جداا (أنا بعمل اللي عليا ومبسوطه كده الحمدلله) ده أثناء الفتره دي أما بعد النتيجه وبعد ما تدخلي الكلية اللي ربنا مقدرهالك (ربنا وفقني للخير والحمدلله مبسوطه باللي ربنا اختارهولي) الأمر بسيط لإنك إنتي اللي بتتحكمي الحوارات تكتر ولا لأ ،،، ربنا يوفقك لكل خير ويجبرك 💌💌 ثقي في قدراتك واثبتي على قرارك وما توافقيش تدخلي حاجه مش حباها، مش كلية ولا مجموع اللي بيحددوا قيمة الإنسان خالص ، الإنسان مكرم لكونه انسان فقط *ولقد كرمنا بني آدم ..*
تم النشر الاثنين، ٢٠ أبريل ٢٠٢٦
ادخل الحاجه اللي بتحبها نصيحه لوجه الله اسوء ڜئ انك تكون فى شئ لاتحبه
تم النشر الجمعة، ٢٤ أبريل ٢٠٢٦
لعرض السؤال في فدني اضغط هنا