السلام عليكم ورحمه الله وبركاته
حابه اخد رايكم في حاجه ...أنا حاسه بالتوهان ومش عارفه اتصرف صح بقى لي فتره أنا بأحب شخص من واحنا في نهايه الثانويه وحاليا احنا في نهايه الجامعه اتعرفنا صدفه ولكن اتكلمنا وفضلنا فتره مش صغيره مع بعض وانا - تقريبا - اول حد حس بالمشاعر دي ليه كنا صحاب وبس بدون اي مشاعر كل واحد فينا بيحترم التاني ،
يمكن اتعلقت واتعودت معنديش فكره نهائي عن مشاعره هو كويس جدا معايا ولكن احنا كنا حاسين بالذنب وبعدنا كتير ورجعنا ودائما أنا كنت باتعب جدا في البعد دا وحاليا في نهايه الجامعه ومش قادره اخد خطوه الخطوبه نهائي ومش متقبله الفكره لدرجه اني تنازلت عنها تقريبا كليا .....
أنا حبيته بس علاقتنا مكانتش علاقة اتنين بيحبوا بعض تقريبا حب من طرف واحد ما اعرفش اي سبب عدم حبه هل لاننا مش مناسبين أو مش جاهز أو اي الله اعلم وبعدنا بعد مدخلنا الجامعه اكتر من سنه وحاولت أكلمه واتكلمنا بس هو واخد قرار يبعد وحقيقي رسمي جدا في التعامل
*ملحوظه* هو لسه ما اتخرجش ومش جاهز يخطب والمفروض مفيش بنت في حياته
هو شخص متدين وكذلك أنا وبعدنا اكتر من مره بالذات من طرفه بسبب احساسنا بالذنب
أنا مش عارفه ولا قادره انسى نهائي نهائي ومستحيل آخد خطوه الخطوبه نهائي .....مش عارفه اي الصح واي اللي المفروض اعمله تايهه جدا جدا 🥀
متوقفيش حياتك على حد طلاما بتقولي حب من طرف واحد ونقطة كمان هو لسه مش جاهز وبيدرس ف ده صعب الموضوع اكتر حاولي تدي ل نفسك فرصة بالحلال فالنهاية الخطوبة دي مجرد فترة للتعارف حاولي تنسيه وتعيشي حياتك وحاولي تبعدي عن نفسك أي شيء يخصه وحاولي أبعدي انتي كمان وركزي ف حياتك فقط اتمنى تقدري تنسي وتعيشي حياتك طبيعي يا رب .
تم النشر الاثنين، ١٩ يناير ٢٠٢٦
وعليكم السلام ورحمة الله وبركاته يا حبيبتي، أشعر بتوهانك وألمك ده كويس جداً، وده طبيعي لما بنتعلق بإنسان كان جزء من حياتنا لفترة طويلة. بس خليني أقولك إن قراركم بالابتعاد كان صحيح 100% من البداية، عشان العلاقات دي خارج الإطار الشرعي بتجيب ذنب وتعب نفسي زي اللي انتي عايشاه دلوقتي. الحمد لله إنكم متدينين ومحترمين، وده يعني إن فيكم خير كبير. اللي المفروض تعمليه دلوقتي، خطوة بخطوة عملية: اقطعي الاتصال تماماً : هو واضح إنه رسمي وبيبتعد، وده قرار محترم منه. متكلميهوش تاني، عشان كده هتقدري تنسي تدريجياً. الاستمرار هيزود التعب بس. ركزي على نفسك واللي جاي : انتي في نهاية الجامعة، ده وقت ذهبي لبناء مستقبلك! حددي أهداف زي شغل أو تطوير مهارات، وادعي الله يرزقك اللي أحسن لكِ. تذكري قول الله تعالى: {وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ}. لو عايزة خطوبة أو زواج : خليها تيجي بالطريق الشرعي تماماً – عبر أهلك، ومع حد جاهز ومبادل مشاعرك بوضوح. متتنازليش عن فكرة الزواج، بس مع اللي يقدرك ويحترم حدود الشرع. للنسيان والراحة : اقرئي قرآن يومياً (سورة الشرح خاصة للضيق)، صلي النوافل، ومارسي هوايات جديدة زي الرياضة أو القراية. مع الوقت، هتحسي إن قلبك خفيف. يا قمر، الله مش هيسيبك تايهة؛ هو عنده خطة أجمل بكتير. لو عايزة دعم أكتر، دوري على أسئلة مشابهة في فدني أو شوفي الخبراء هنا: https://www.fedni.net/experts – في متخصصين في الإرشاد الأسري والنفسي هيساعدوكِ. ربنا يفرج همك ويرزقك السعادة الحقيقية، ويجعل اللي فات خيراً لكِ. 💕 إنتِ قوية، هتعدي!
تم النشر الاثنين، ١٩ يناير ٢٠٢٦
وعليكم السلام ورحمه الله وبركاته إحنا ساعات بنعشق الوجع ونفضل ماسكين في حد مش لينا. ربنا بيقول في كتابه: {وَعَسَى أَنْ تُحِبُّوا شَيْئًا وَهُوَ شَرٌّ لَكُمْ}. إنتي شايفة إنه "جميل"، بس يمكن ربنا شايف إنه لو كان دخل بيتك كان هيتعبك أو يكسر قلبك أكتر. فكري إن "بُعده" ده هو رحمة من ربنا بيكي مش عقاب. القلب ده ملك لربنا، وإنتي لما ملأتيه بشخص مش من نصيبك، تعبتِ. جربي تفرغي المساحة دي لربنا. قولي يا رب أنا سبته عشانك، وعشان مش عاوزه أغضبك ولا أعلق نفسي بوهم.. عوضني واللّٰه ربنا لما بيعوض، بيبهر بالخلف. الدين مفيش فيه "أصلنا كنا بنحب بعض ومن طرف واحد". فيه "واحد جاهز وخبط على الباب". كونه مش جاهز أو مش واخد خطوة، ده معناه إن الموضوع مش مكتوب دلوقتي. متوقفيش حياتك وتضيعي شبابك على أمل هو نفسه مش بيسعى ليه. ربنا كرم المرأة، وميرضاش ليكي إنك تحاولي تتكلمي وهو يرد رسمي تعاملك معاه بعد كدة لازم يكون بقمة الرسميه اللي عاوزك، هيعرف يوصلك لما يكون راجل جاهز.. غير كده، اعتبريه فصل في كتاب وخلص. استغفري كتير: بنية إن ربنا يبرد نار قلبك. امسحي أي حاجة بتفكرك بيه. ادعي بصدق: "اللهم باعد بيني وبين حبٍّ لا يرضيك، وقرّب لي من يحفظني ويتقي الله فيّ". الخلاصة: إنتي غالية أوي، والوجع اللي إنتي فيه ده "تطهير" عشان لما ييجي الشخص الصح اللي ربنا كاتبهولك، تكوني نضجتِ وعارفة قيمة نفسك. متخليش "نصيب" لسه مجاش يكرهك في "رزق" ربنا بعتهولك (زي الخطاب اللي بيتقدموا). 😊 بعتذر عن الإطالة ربنا يسعدك
تم النشر الاثنين، ١٩ يناير ٢٠٢٦
لعرض السؤال في فدني اضغط هنا