السلام عليكم، نفسك عاملة زي الطفل مينفعش توافقيها على كل حاجة وتستسلمي للي هي عاوزاه وتفضلي في منطقة الراحة. لو فيه طفل صغير مصمم يضع إصبعه في الكهرباء هل هتتركيه يعمل كده؟ أكيد لأ. نفس الحكاية تنطبق عليكِ، مينفعش تتركي نفسك تعمل اللي عاوزاه خاصة لو هيضرك. *** طبيعي النفس تميل للراحة والكسل وتبقى عاوزة تبعد عن أي شيء فيه ضغط أو بيسبب لها ألم، هنا دورك إنك تشدي عليها وتعملي المطلوب منك. طبعا هتعملي ده بطريقة مرنة وذكية عشان أي إحساس بالضغط هيخليك تميلي للتسويف، وزي ما نفسك تعودت على الكسل مش صعب تعوديها على عادات تانية مفيدة زي الاستمرارية والالتزام بالأهداف. خلي هدفك قُدام عينيك واكتبيه في ورقة علقيها في اوضتك أو فوق مكتبك وبرمجي أفكارك إن مبقاش ينفع استسلام للكسل والوضع لازم يتغير لو عاوزة تنجحي في الهدف بتاعك. *** مش مهم اللي فات انسيه تماما، إيه يعني مكنتيش بتذاكري السنين اللي فاتت، هل ده يمنع ترجعي تذاكري وتطوري عادة المذاكرة تدريجيا؟ شوفي على الإنترنت طرق المذاكرة بذكاء، ابحثي على يوتيوب عن (ذاكر أقل ذاكر بذكاء) وهتلاقي فيديوهات بتشرح ازاي تذاكري أقل وقت بأكثر تركيز وإنتاجية. *** وزي ما قالت أستاذة نهى في إجابتها، لو مستسلمة للكسل مفيش أي حد مننا يقدر يحفزك مهما اتكلمنا، فالتغيير ده لازم يبقى من جواكِ والتحفيز الداخلي هو اللي هيخليكِ مستمرة نحو هدفك. *** والأهم من كل ده، استعيني بالله وادعيه دايما بالتوفيق ورددي كتير (لا حول ولا قوة إلا بالله العلي العظيم) عشان يمدك بالطاقة والقوة على تغيير نفسك ووضعك. وبالتوفيق إن شاء الله.💚💚
لعرض الإجابة في فدني اضغط هنا