هو انا ليه فاشله في المدرسه
انا بنت عندي 12 سنه كانت في سنه خامسه درجاتي جيدا جدا الوقتي انا في سته درجاتي نزلت تحت خالص
السلام عليكم، أولًا متقوليش خالص عن نفسك فاشلة وركزي مع الكلام اللي بتقوليه لنفسك، لو فضلتِ تقولي لعقلك إنك فاشلة هتثبتي الصفة عليكِ ومش هتقدري تغيريها. خلي دايما كلامك لنفسك إيجابي. بدل ما تقولي أنا فاشلة، قولي أنا نجحت السنين اللي فاتت واللي حصل مجرد وقعة بسيطة وهرجع أحسن من الأول. ** ثانيًا، ما دام كان مستواكِ كويس السنين اللي فاتت يبقى أكيد فيه حاجات حصلت جديد في حياتك وأثرت على دراستك. ** مثلًا، هل بقيتِ تقضي وقت طويل على الموبايل وتتابعي سوشيال ميديا أو غيرها؟ هل شلة أصحابك في المدرسة تغيرت؟ كنتِ مثلا مصاحبة ناس بتذاكر وتجتهد ودلوقتي العكس أو حتى مكنتيش مصاحبة ومركزة في دراستك ودلوقتي بقيتِ مشغولة مع صحابك؟ هل بتقابلك مشاكل مع المدرسين؟ مش بتفهمي منهم أو مش بيقدروا يوصلوا لك المعلومة؟ هل المناهج بقت أصعب وعندك مشكلة معها؟ نظام مذاكرتك إيه اللي تغير فيه؟ عدك مشاكل بالبيت أو حياتك عامة؟ صحتك ونظامك الغذائي عامل إيه؟ هل مش بتنامي أو تتغذي كويس أو بتكوني مش مركزة أو فيه أنيميا أو أي مشاكل صحية؟ كل دي حاجات تأثر على مذاكرتك ومستواكِ. *** اقعدي مع نفسك كده وراجعي يومك عامل ازاي وحاولي تشوفي إيه التغيرات اللي حصلت جديد ولو حاجة سلبية زي تضييع الوقت تعدليها، صحاب مش بيساعدوكِ على التفوق وبيضيعوا وقت في تفاهات ابعدي عنهم أو انصحيهم يتغيروا. واستعيني بالله وإن شاء الله ربنا يوفقك.
تم النشر الثلاثاء، ١٨ نوفمبر ٢٠٢٥
بدام درجاتك كويسه ولكن بعدها لاحظتي انها معدتش في نفس المستوى يبقي اكيد في تغييرات حصلت في حياتك صلحي التغييرات ورجعيها كما كانت واجتهدي ومفيش إنسان بيجتهد وبيفشل وتذكري قول الله "وأن ليس للانسان إلا ما سعى وأن سعيه سوف يرى ثم يجزاه الجزاء الأوفى"
تم النشر الأربعاء، ١٩ نوفمبر ٢٠٢٥
السلام عليكم ، حبيبتي أنتِ مش فاشلة ولا حاجه متقوليش على نفسك كدا ، لإنك كونك بتقولي كدا عقلك هيصدق ده و هتوقفي سعي و مذاكرة و ده غلط ، بصي يحبيبتي تعاملي مع الموضوع ب هدوء شوفي الغلط فين هل ف شرح مُدرس ف مادة معينه هي السبب و نزلت مستواكِ؟ أو هل بتذاكري ف جو فيه تشتت؟ جربتي طرق مذاكرة غير الي بتذاكري بيها ؟ اقفي مع نفسك و متحبطيهاش لسه قدامك الطريق طويل و هيبقا مستقبلك إن شاء الله جميل و تقدري تحققي حلمك و تبقي اشطر واحده ، الأهم متزعليش نفسك أبدا و متسيبيش الشيطان يوسولك عشان يزعلك ، أدعي ربنا و بعد متخلصي مذاكرة قولي اللهم إني أستودعتك ما حفظت و ما قرأت و ما تعلمت ف رُده لي عند كل حاچة إنك على كل شيءٍ قدير ،و بالتوفيق يجميلة 🫶💗
تم النشر السبت، ٢٢ نوفمبر ٢٠٢٥
قولي هسعى قولي انا اتاخرت شويه بس هرجع اقوم وافوق تاني وال متفهميهوش عيديه تاني براحه كانك بتشرحي لحد مش مجرد بتحفظي كمان اوعي تقارني نفسك بال حوليكي او اصحابك او تسيبي كلام حد يأثر عليكي ع قد ما تقدري ولو مثلا مستواكي نزل ف امتحان او ف سنه ع التانيه اكتبي مثلا ايه ال نزلت فيه ايه ال انا ضعيفه فيه هركز عليه وف الاول و الاخر انت طول ما بتسعي سبي النتيجه لربنا زي ما تيجي تيجي مثلا حليتي ف امتحان وحش وعرفت الاخطاء متزعليش قولي انا عرفت هركز ع ايه واكتبي ال غلطي فيه دايما الحجات ال بنغلط فيها هي اكتر حاجه بتثبت... وأهم حاجه حبي نفسك خليكي حنينه على نفسك عملي نفسك زي ما بتعاملي اكتر حد بتحبيه.. ربنا يوفقك ف حياتك كلها يا جميله ❤️
تم النشر الجمعة، ٢١ نوفمبر ٢٠٢٥
متقوليش على نفسك فاشله ربنا كرم الإنسان ازاي انتي تقولي على نفسك كدا بقا ممكن تقولي اي ال اتغير في حياتك السنه دي عن السنه ال فاتت مشاكل في البيت أو صاحبتي أصدقاء جداد السنه دي
تم النشر الثلاثاء، ١٨ نوفمبر ٢٠٢٥
طول ما انتي بتقومي نفسك بنفسك يبقى انتي مش فاشلة الفاشل اللي بيستسلم للفشل بس انتي شطورة وبتلومي نفسك وده هيخليكي تركزي وتبقي أحسن إن شاء الله
تم النشر الأربعاء، ١٩ نوفمبر ٢٠٢٥
لعرض السؤال في فدني اضغط هنا