انا لسة مخلصة تالتة اعدادى والحقيقة جبت مجموع مش عارفة كويس او لا هو ٢٧٠ يعنى حوالى ٩٦% المشكلة دلوقتى انى محتارة ادخل ثانوى عام ولا تمريض مش عارفة اصلا احدد على اى اساس انا بحب كل المواد عموما جدا وخصوصا الرياضة والعلوم والاانجليزى والنحو وحاسة انى معنديش مشكلة فى حاجة معينة والحقيقة التمريض مغرى شوية وعاجبنى عادى بس حلسة انى مش لاقية حاجة اختار على اساسها انا عايزة ايه
وياريت اى حد عنده رأى يقوله لانى حاسة ان المشكلة أن محتاجة اسمع وجهات نظر مختلفة واتناقش فى الموضوع اكتر
بصي مبدئيًا كده قبل ما تفكري في تمريض أو ثانوي، اسألي نفسك المجموع ده فعلًا بيعبر عن مستواكي ومجهودك وتعبك طول السنة؟ وإنك فعلًا شاطرة في المواد دي وبتحبيها؟ ولا مجرد درجات وخلاص؟ لأن دي نقطة هتفرق جدًا في القرار. لو إنتِ فعلًا بتحبي الرياضة والعلوم والإنجليزي وبتستمتعي بالمذاكرة والفهم والحل، فخدي ده في الاعتبار كويس جدًا. وكمان شوفي شخصيتك عاملة إزاي، هل بتحبي تمشي في طريق واضح ومتحدد من بدري؟ ولا بتحبي يبقى قدامك اختيارات أكتر بعدين؟ التمريض مجال محترم جدًا ومش حاجة قليلة خالص، وميزته إنك من بدري بتبقي عارفة تقريبًا إنتِ رايحة في اتجاه إيه. أما الثانوي فبصراحة أنا مش شايفاه بالصعوبة المرعبة اللي الناس بتتكلم عنها. آه محتاج اجتهاد وتنظيم ومذاكرة، لكن بالنسبة لي شايفاه ضغط طبيعي موجود في أي مرحلة دراسية حتي لو الضغط اكبر ف دا مش هيفرق اللي هيفرق بجد هوا تعاملك معاه هيبقي ازاي. خصوصًا لو إنتِ متعودة تذاكري وبتعتمدي على نفسك. وعامة أنا كنت محتارة نفس الحيرة وكان فاضلي عن الدرجة النهائية تلات درجات، فمكنش الموضوع بالنسبة لي إني مضطرة أختار حاجة معينة أو إن مفيش قدامي غيرها. وكنت بحب الرياضيات جدًا والمواد العلمية عمومًا، ففضلت فترة طويلة بفكر وأسأل وأقارن بين الطريقين.بقولك بس عشان تعرفي اني كنت شبهك و ف نفس وضعك بالظبط. وفي الآخر بعد تفكير واستخارة اخترت الثانوي دفعة البكالوريا، والحمد لله لحد دلوقتي مش ندمانة على القرار. لكن ده لا معناه إن الثانوي أحسن لكل الناس ولا إن التمريض أحسن لكل الناس، لأن كل واحد وقدراته وميوله وظروفه مختلفة. وبرضو خلي بالك إن التعليم كل شوية بيحصل فيه تغييرات وقرارات جديدة، فمتحاوليش تبني قرارك كله على فكرة إن طريق مضمون ١٠٠٪ أو إن طريق تاني مفيهوش مستقبل، لأن محدش ضامن حاجة. وفي نفس الوقت متبصيش للثانوي على إنه مجرد دروس ومصاريف وضغط وخلاص، لأن لو عندك عزيمة وطموح وتعرفي تنظمي نفسك فدي مهارات هتفيدك طول حياتك. وأنا مش هقولك اختاري كذا أو سيبي كذا، لأن محدش أدرى بظروفك وقدراتك منك. شوفي رأي أهلك، ولو تعرفي حد في تمريض أو كلية تمريض أو حتى شغال في المجال الطبي اسأليه عن طبيعة الدراسة والشغل على أرض الواقع، وشوفي نفسك فعلًا مرتاحة فين. وفي الآخر صلي استخارة وتوكلي على ربنا، ومتخليش حد يحسسك إن مستقبلك كله واقف على القرار ده. لأن في النهاية اللي عنده عزيمة وعايز ينجح هيعرف ينجح مهما كانت ظروفه ومهما كان المكان اللي هو فيه. ربنا يوفقك ويختارلك الخير ويرضيكي بيه. 🤍
تم النشر الثلاثاء، ٢٣ يونيو ٢٠٢٦
أهلاً يا قمر، مبروك على المجموع الرائع ده (٢٧٠ درجة)! ده إنجاز يستاهل الاحتفال، ويفتحلك أبواب كتير. أنا فاهمة إنك محتارة بين ثانوي عام وتمريض، وده طبيعي جدًا في المرحلة دي، خاصة إنك لسه مش واضحة عندك الصورة الكاملة عن نفسك ومستقبلك. الاختيار ده لازم يكون مبني على أسس واضحة مش مجرد "عاجبني" أو "مغري". خليني أساعدك نفكر مع بعض بطريقة عملية: أسس مهمة للاختيار: اهتماماتك ونقاط قوتك : أنتِ قوية في الرياضيات والعلوم والإنجليزي والنحو، وده بيفتحلك مجالات علمية كتير. لو بتحبي الجانب العملي والتعامل المباشر مع الناس ومساعدتهم في أوقات ضعفهم، فالتمريض هيبقى مناسب جدًا. أما لو بتحبي التعمق في المواد النظرية والتفكير في خيارات جامعية أوسع (زي الطب أو الصيدلة أو الهندسة أو حتى التجارة)، فثانوي عام هيديكِ فرصة أكبر للاستكشاف. نمط الحياة المستقبلي : التمريض مهنة مستقرة ومطلوبة، وفيها فرص عمل سريعة بعد التخرج، وبتساعد الناس بشكل مباشر (وهذه قيمة إسلامية جميلة في خدمة الخلق). لكن ساعات العمل ممكن تكون طويلة ومتعبة، وبتحتاج صبر وقوة تحمل. أما ثانوي عام فهي مرحلة انتقالية، وهتديكِ وقت أطول عشان تقرري تخصصك الجامعي، لكن الطريق هيطول شوية. قيمك الشخصية والإسلامية : فكري في المهنة اللي هتساعدك تكوني مفيدة لنفسك وللآخرين، وتحققي توازن بين الدنيا والآخرة. التمريض فيه أجر كبير في مساعدة المرضى، لكن لو حاسة إنك عايزة مجال أوسع يسمحلك بالتطور والاختيار حسب ظروفك المستقبلية (زي الزواج والأولاد)، فثانوي عام ممكن يكون أكثر مرونة. خطوات عملية تساعدك تقرري: اكتبي قائمة بـ"إيجابيات وسلبيات" كل خيار من وجهة نظرك الشخصية (مش آراء الناس). جربي تتكلمي مع بنات أكبر منك في السنتين دول (في المدرسة أو العائلة) عن تجربتهم في كل مسار. فكري في أهدافك بعد ٥-١٠ سنين: عايزة تكوني شغالة بسرعة ولا عايزة تاخدي وقت أطول عشان توصلي لهدف أكبر؟ استشيري والديكِ أو معلمة موثوقة، لكن القرار النهائي لازم يكون قرارك أنتِ عشان تقدري تكملي فيه بحماس. لو حسيتِ إنك محتاجة تفاصيل أكتر عن كل مسار أو عايزة نساعدك نرتب أفكارك أكتر، قوليلي. وممكن تبحثي عن أسئلة مشابهة على فدني عشان تشوفي تجارب بنات تانيين. أنتِ قادرة تختاري اللي يناسبك، وهتكوني ناجحة فيه إن شاء الله. 💕
تم النشر الاثنين، ٢٢ يونيو ٢٠٢٦
شكرا جدا على النصيحة واكيد هفكر فيها كويس برده
تم النشر الاثنين، ٢٢ يونيو ٢٠٢٦
عادى جدا تعترضى وتناقشى ده مستقبلك ومش موضوع صغير .. لكن بما انى اكبر منك ومريت بتجارب ف بقولك من خلال تجربتى وجهة نظرى .. وخدى اراء ناس كتير ومنهم طبعا اهاك وقرايبك اللى معاهم كليات وشهادات كبيره والرأى اللى نرتاحى فيه خديه لانه ف الاول والاخر دى حياتك وقراارك ... ف لو ليا نصيحة هتبقى ثانوى ويبقى طموحك اعلى يعنى مش اقل من طبيبه .. بتفرق جدا ف الشغل والتعاما والحياه والزواج وكله .. واخيرا ربنا يقدرلك الخير
تم النشر الاثنين، ٢٢ يونيو ٢٠٢٦
مش عايزة يبان أنى يعاند وخلاص لكن دلوقتى لو خلصت التمريض اقدر ادخل بعدها كلية تمريض عادى ويبقى زيى زى اللى داخل تمريض من ثانوى بل أن فيه ناس ممتازة اعرفها كانت عايزة ادخل تمريض ومحموعها محابش فى ثانوى مش عارفة حاسة أن حكاية دا طموحى ولا لا مبقتش مقياس لان كل حاجة عاجبانى عادى بس برضه أنا مش عارفة أنا مش من الناس اللى بتحب الفلوس اوى بس عارفة انها اكيد مهمة وهى متوفرة كويس فى التمريض غير أن حالتنا المادية مش احسن حاجة يعنى مش هتستحمل اوى الثانوى ودروسه وكدة
تم النشر الاثنين، ٢٢ يونيو ٢٠٢٦
لو هدفك التمريض من البداية اوكيه .. لكن حتى لو دخلتى ثانوى وبعدها تمريض اعتقد افضل هتبقى رئيسه تمريض مش مجرد ممرضه صح .؟ .. انتى لسه صغيره وتفكيرك اكيد هيتغير شويه لما تكبرى ف مش عايزك لما تكبرى تندمى ان فاتح فرصه زى دى .. ف انتى دلوقتى قدامك خيار كويس تضمنى فيه كل حاجه وتجربى كل حاجه ومتحسيش ان فيه شئ فاتك او تندمى عليه .. ومجموعك حلو يدل انك حد كويس قد يكون لك مستقبل افضل وتكونى طبيبه افضل بكثير من ممرضه
تم النشر الاثنين، ٢٢ يونيو ٢٠٢٦
المشكلة أن عيوب الثانوى كثير زى ان مثلا مصاريفها كبيرة ودى حاجة حتى لو تغاضينا عنها بتظل عقبة وكمان انت مش عارف ومش ضامن أن كنت هتقدر تدخل الكلية اللى انت عايزها ولا لا بعد كل التعب والوقت والمجهود والفلوس فى حين انى مش حاسة أن عيوب التمريض كبيرة أو يمكن أنا مش شايفاها كويس
تم النشر الاثنين، ٢٢ يونيو ٢٠٢٦
ادخلى ثانوى أفضل .. التمريض حتى لو حبيتى تدخليه بعدين هيبقى متاح وهيبقى فيه غيره حاجات كتير تقدرى تختارى وقتها منهم اللى مناسب ليك .. لكن لو دخلتيه دلوقتى ف انت. حددتى هدف واحد .. ف لو ليا نصيحه ف هى ادخلى ثانوى طبعا .. ربنا يوفقك
تم النشر الاثنين، ٢٢ يونيو ٢٠٢٦
لعرض السؤال في فدني اضغط هنا