ازاي بتعرفوا صفات الشخص البخيل؟
لو جاب ليا انا و هو سينابون واحدة بس بنشير فيها و اختي و ابنها واحدة والحركة مكنتش حلوة خالص
ومغدناش آخر اليوم رغم إن في بيتنا عزمناهم مع عيلته ٣ مرات عزومة كبيرة
بس دفع حق اوبر و وداني ملاهي و هو الي دفع بردو يعني و يعتبر صرف مبلغ كبير بس مغدناش في الآخر
انا بقول دي قلة خبرة منه مش بخل
و أهله خرجنا نروح نجيب الشبكة معاهم مجبوش أي حاجة لينا ولا ماية ولا عصير ولا أي حاجة ولا حتى عزموا و اخويا هو الي راح جبلهم
بالنسبة لموقف اهله ده ايه؟ انا مش قادرة احدد
أول حاجة، أنا فاهمة إنكِ محتارة ومش قادرة تحددي الصفات دي بخل ولا قلة خبرة أو اختلاف في التربية، وده طبيعي جدًا لما بنكون بنشوف مواقف مختلطة زي كده. خليني أساعدكِ نفكر فيها بهدوء. بالنسبة لموقف السينابون: إن الشخص يشتري حاجة واحدة ويشاركها، ويتصرف بطريقة مش مريحة، ممكن يكون فعلاً بخل أو عدم مراعاة، خاصة لو العائلة عندكم عملت عزومات كبيرة ثلاث مرات. بس في نفس الوقت، إنه دفع أوبر وملاهي وصرف مبلغ كبير في يوم واحد بيظهر إن فيه استعداد للصرف في بعض الأمور. ده بيخلينا نقول إن الموضوع مش بخل مطلق، لكنه ممكن يكون "انتقائي" أو إنه لسه مش متعود يفكر في الضيافة والمشاركة بشكل يومي. قلة الخبرة واردة، بس لو استمرت التصرفات الصغيرة دي، هتحتاجي تشوفي إذا كان مستعد يتغير ولا لأ. أما بالنسبة لأهله لما جابوا الشبكة ومجبوش أي حاجة (مية أو عصير أو حتى عزيمة بسيطة)، فده سلوك بيُعتبر في ثقافتنا قلة ذوق أو عدم مراعاة للضيافة، ومش شرط يكون بخل متعمد. أحيانًا العائلات بتكون عندها عادات مختلفة، أو مش بيلاحظوا إن الطرف التاني بيبذل مجهود. لكن لما أخوكِ هو اللي راح يجيب لهم، ده بيوضح فرق كبير في طريقة التفكير بين العائلتين. الموقف ده مش سهل تتجاهليه، لأنه بيعكس إزاي هيتعاملوا معاكِ بعد الجواز. نصيحتي لكِ: راقبي السلوك ده على مدى فترة أطول، وجربي تتكلمي معاه بهدوء عن توقعاتكِ في المواقف اليومية (مش كاتهام، لكن كـ"أنا بحب الضيافة والمشاركة"). لو لقيتِ إنه بيحاول يتفهم ويعدل، يبقى الموضوع قابل للحل. أما لو استمر التباين ده، فكري في مدى التوافق ده مع قيمكِ وقيم عائلتكِ، لأن الجواز مش بس علاقة بين اتنين، لكنه كمان دمج عائلتين. خدي وقتكِ ومتستعجليش على قرار. لو عايزة تتكلمي أكتر عن موقف معين، أنا هنا.
تم النشر الخميس، ٢٣ يوليو ٢٠٢٦
البخيل دايما بيكون عنده خوف من الصرف حتى لو كان الموقف يستدعى الكرم وديما بيشتكي من المصاريف والحياة حتى في ابسط الأشياء العادية اليومية بيربط كل شيء في حياته بالفلوس وبيقيس جودة علاقاته على مدى الصرف والكلام ده وغيرها من الصفات اللي غالبا مش بتروح بعد الزواج حسن التصرف إنه يكون العادي بتاعه كريم بس منظم في طريقة صرفه وبيحاول يستثمر الفلوس في أفضل خيار ممكن بس بيصرف عادي في المواقف اللي تستحق بالنسبة للي حضرتك قولتيه ده خلينا اكون صريح معاكي خاصة اللي حصل من أهله ده مؤشر خطير إن ده طبع العائلة وهو واحد منهم عادي يعني متأثر من طبعهم خليني بقى اقولك امر اخر خاص بالخطوبة الخطوبة في الاسلام مش زواج هي مجرد وعد بالزواج يعني كل طرف لسه اجنبي عن التاني فياريت تراعي الحدود بينك وبينه الهدف من الخطوبة إن كل طرف يتعرف على الاخر في حدود الشرع يشوف طباعه وصفاته وهل هو مناسب ولا لاء الاحترام والجدية مهمين جدا جدا في الفترة دي عشان ميكونش فيه استغلال او تلاعب بيكي الكرم وحسن المعاملة مهمين اوي في الفترة دي لانها بتحدد هيتعامل معايا ازاي بعد كده معاملته مع اهله مؤشر قوي خدي بالك منه لانه هيكون دليل على حسن اخلاقه معاكي في صفات بحرف الكاف ابعدي لو لاقتيهم عنده ( الكبر - الكذب - الكسل) طبعا اضافة إلى البخل لو كان موجود فعلا لو لقيتي دول اهربي فورا من العلاقة دي في الخطوبة المفروض يكون فيه (قبول شكلي - ارتياح نفسي - تكافئ اجتماعي وتعليمي ) لو مش موجودين يبقى تهربي برضوا خدي بالك إن الفترة دي فترة تجملات كل واحد من الطرفين بيعمل احسن اللي عنده فالوضوح والصراحه مهمين جدا جدا في الفترة دي احذري من التجمل ربنا يوفقك لما يحب ويرضى واسف لو بعض كلماتي ازعجتك
تم النشر الأحد، ٢٦ يوليو ٢٠٢٦
هوا صعب نحكم عليه بالبخل من كام موقف بس خصوصًا إنك بتقولي إنه دفع أوبر وخرجك الملاهي ودفع مبلغ كبير ف ده مش تصرف واحد واضح إنه بخيل. جايز يكون الموضوع قلة خبرة أو إنه مش واخد باله إن في تفاصيل صغيرة زي دي بتفرق وبتدي انطباع معين،،، بس في نفس الوقت لو الحاجات دي مضايقاكي متتجاهليهاش..مش عشان تحكمي عليه لكن عشان تفهمي طريقته في التفكير. ممكن تكلميه ف الموضوع دا لو عادي بالنسبه لك وتقولي له إن في مواقف معينة بتحسي فيها إن الذوق والواجب محتاجين اهتمام أكتر وتشوفي رد فعله... وبالنسبة لأهله فممكن يكون سوء تصرف منهم أو إنهم مش بيركزوا في التفاصيل دي ومش شرط معناه بخل.. بس طبيعي إنك تاخدي بالك من الحاجات دي خصوصًا في بداية العلاقة،،، و البخل مش بيبان من موقف واحد، بيبان من طريقة الشخص عمومًا في حياته وتعاملاته، خصوصًا لما يكون قادر ومتعمد يستخسر حاجة معينة..
تم النشر الخميس، ٢٣ يوليو ٢٠٢٦
يمكن مكنش عامل حسابه او مكنش يعرف ان اسعار الملاهى غاليه مثلا او حالته الماديه مش احسن حاجه او ف اخر الشهر والفلوس قليله معاه انتى اللى تقدرى تحددى إذا كان بخيل او لا
تم النشر الخميس، ٢٣ يوليو ٢٠٢٦
لعرض السؤال في فدني اضغط هنا