سلام عليكم ..
انا عندي 16 سنة وبما إن كل اخواتي اللي هنا اكبر مني كنت حابب اخد رأيكو في حاجة ... بحس اني مش شبه اللي في سني في حاجات بس في الناحية التانية عاوز اعيش الحاجات دي ومعجب بإعجاب الناس بيهم ...
يعني انا منفسيش اكلم 60 واحدة وبخاف حتى اعلق بنت بيا واسيبها بس عاجبني الهالة اللي حوالين الشخص .... وفي نفس الوقت عمري ما حطيت سجارة بس بحب قعدة الناس دي ومع الوقت شئت أو ابيت هشرب طالما فضلت مصاحبهم وملازم الاماكن اللي بيروحوها
أعمل ايه ولو بعدت عنهم هيتقال عليا وحش+ المفروض داخل تالتة ثانوي السنة الجاية بس أهملت دراستي السنة دي جدا عشان كل الكلام اللي فوق ده وصعبان عليا اهلي لأنهم حاطين توقعات عالية اعمل اييييييه
حاسه بكل ذرة صراع جواك من كلامك، وعارفه إنك بتبقى هتموت وتعمل زي أصحابك بس بتفرمل نفسك بالعافية عشان عارف إن ده حرام وغلط وما يرضيش ربنا. عايزه اقولك إن الوجع اللي بتحس بيه وأنت بتمنع نفسك ده هو (أعظم عبادة) أنت بتعملها دلوقتي، ده 'جهاد النفس' اللي ربنا بيحبه، وصدقني أنت مش ضعيف، أنت بطل حقيقي لأنك بتغلب شيطانك كل يوم. قاعدة (الصاحب ساحب): أصحابك اللي بيشربوا سجاير وبيروحوا أماكن مش تمام، حتى لو أنت مش بتشرب زيهم، 'ريحتهم' هتمسك فيك. سمعتك، وقتك، وطاقتك النفسية بتستهلك معاهم. الصاحب اللي ما يسحبكش لفوق للنجاح والصلاة، هينزلك لتحت للضياع. انسحب منهم تدريجياً، والصاحب اللي يزعله إنك عايز تبقى أحسن يبقى مكنش صاحب من الأول. الأماكن دي (فخ): القعدة في أماكن فيها غلط بتموت فيك الإحساس بالغلط مع الوقت. ابعد تماماً، وبدل القعدة دي بحاجة تبنيك (جيم، رياضة، أو حتى قعدة في مكان هادي للمذاكرة). لازم تعود عقلك إن مكانه في (القمة) مش في الأماكن ، مستقبلك ده هو "رأس مالك" والوحيد اللي هيعيش معاك العمر كله، وتالته ثانوي اللي جاية دي هي المحطة اللي هترسم ملامحه. نصيحتي ليك إنك تبص للصورة الكبيرة؛ المتعة اللي بتيجي من قعدة غلط أو صحاب بيسحبوك لتحت بتمشي في دقيقة، لكن طعم النجاح والفخر في عين أهلك والشهادة اللي هتفتح لك أبواب الشغل المحترم بتعيش العمر كله. استثمر في نفسك من دلوقتي، ابدأ السنة الجاية وأنت "عايز نجاح"، وركز إنك تبني "شخصية قوية" بتعرف تقول "لأ" لأي حاجة تهز صورتك قدام نفسك. صدقني، بكرة لما توصل وتحقق اللي بتتمناه، هتشكر نفسك ألف مرة إنك كنت راجل وما استسلمتش لضعفك في اللحظات الصعبة، وهتلاقي ربنا بيفتح لك أبواب رزق وراحة بال مكنتش تتخيلها أبداً. .
تم النشر الاثنين، ١٣ أبريل ٢٠٢٦
بص انت في سن صعب دلوقتي وللاسف البيئة اللي بقينا فيها مش بتساعد انها تبني شباب صالحة ف الحل انك تتحدي الدنيا والبيئة لسبب واحد وهو ابتغاء مرضات الله يعني السجاير حرام خلاص يبقي حرام مهما فكرت الناس هتقول عليا ايه خليك فاكر انك انت اللي هتشيل ليلتك ومفيش حد هيتحاسب مكانك وانت عارف كويس ان صحابك دلوقتي مصدر شر ليك فابعد ويقولوا اللي يقولوه مش مهم المهم رضا ربنا عنك وصاحب اللي ياخد بايدك للخير اللي يقولك يلا نصلي في الجامع يلا نذاكر اللي قبل ما تعمل الغلط يقولك حرام ولو ملقتش يبقى خلاص اكتفي بنفسك وخليك واثق من جواك انك بتجاهد نفسك ابتغاء رضا الله - وبالنسبة لموضوع البنات فاكيد انت عارف انه كاس وبيدور فلو عملت كدا هيحصل في اختك وحتى لو معندكش اخوات بنات ممكن تلاقيه في بنتك فيما بعد وانت شاب مسلم وعربي ويمكن صعيدي ف اكيد دمك حامي وبتخاف على اهل بيتك يبقى كمان تخاف على اهل بيت اخوك المسلم - بالنسبة لتالتة ثانوي فمتقلقش اي حاجة وقعت منك المدرسين بيشرحوها تاني لو احتاجتها ركز انت بس دلوقتي في تانية على امتحاناتك واقف وقفة رجالة كدا مع نفسك انك هتجاهد نفسك وتجاهد الدنيا من حولك علشان أرضي ربنا وعلشان ابعد عن الحرام وعلشان ربنا يكرمني وعلشان اكون شاب صالح وعلشان اكون سبب دخول اهلي الجنة وعلشان اكون قدوة حسنة لشباب كتيرة علشان ربنا يرزقني راحة البال ونعمة الصحة والستر علشان ربنا يرزقني بزوجة واولاد صالحين ......... المغريات الحرام كتيرة بس المغريات والنعم الحلال اكتر واحسن
تم النشر الاثنين، ١٣ أبريل ٢٠٢٦
انت مش تايه انت بس واقف بين نسختين من نفسك نسخة عايزة تعيش بسرعة علشان تحس انها كبيرة ونسخة أذكى فاهمة ان النضج مش في السجاير ولا البنات ولا القعدة مع ناس أكبر النضج في الاختيار ، اللي أنت شايفه عند غيرك مش دايما حياة أحسن ساعات بيكون هروب متغلف في شكل حرية وكل واحد مستعجل يكبر بيكتشف بعدين إنه ضيع أجمل مرحلة وهو بيجري ورا صورة مش حقيقية كونك مختلف عن سنك دي ميزة مش عيب وكونك مش شبهم معناه انك لسه محافظ على حاجة فيك ناس كتير ضيعتها بدري اما الدراسة واضح إن الضغط مأثر عليك بس سنة زي دي مش محتاجة جلد ذات محتاجة هدوء وتنظيم الناس كده كده هتتكلم يومين وتسكت لكن مستقبلك هو اللي هيفضل معاك ركز تبني نفسك وسيب الباقي لوقته في حاجات لما تيجي بدري بتبوظ ولما تيجي في وقتها بتبقى أجمل بكتير
تم النشر الأربعاء، ١٥ أبريل ٢٠٢٦
وعليكم السلام ورحمة الله يا بطل 💪 أول حاجة، أنت مش ضايع خالص، أنت بس في مرحلة انتقالية طبيعية في الـ16 سنة دي، واللي بتحسه كتير من الشباب زيك. الضغط الاجتماعي ده زي الوباء، بس أنت أذكى من إنك تقع في فخّه. خلينا نرتب الأمور عمليًا، خطوة بخطوة، عشان ترجع مسيطر وتفرح أهلك: 1. الدراسة أولوية رقم 1 (ثالثة ثانوي مش هزار) : ابدأ النهاردة: حدد جدول يومي بسيط (مثلًا 4 ساعات دراسة مقسمة: ساعتين صباحًا، ساعتين مساءً). استخدم تقنية "بومودورو" (25 دقيقة دراسة + 5 دقيقة راحة). ركز على المواد الضعيفة أولًا، وحل امتحانات سابقة يوميًا. هتاخد عزيمة وثقة في أسبوعين. قول لأهلك بصراحة: "أنا هعدل الوضع، بس محتاج دعمكم"، وأظهرلهم الجدول. هيفرحوا ويحسوا بفخرك. 2. الضغط الاجتماعي والـ"هالة" دي : الهالة الحقيقية مش من سجاير أو بنات أو شرب (دول حرام في الإسلام وهيدمروك صحيًا ونفسيًا). الهالة الحقيقية من الشاب الناجح اللي بيبني نفسه: رياضة يومية (جري أو جيم 30 دقيقة)، اقرأ كتب زي "قوة العادات" أو سيرة الصحابة، وطور مهارة زي البرمجة أو التصميم ع اليوتيوب. اختار صحاب صالحين: دور على مجموعات دراسية أو رياضية في المدرسة/الحي، مش اللي بيروحوا أماكن مشبوهة. لو بعدت، محدش هيقول عليك وحش؛ اللي هيقولوا دول مش أصدقاء حقيقيين. معجب بالبنات؟ طبيعي، بس الإسلام بيقول احفظ نفسك للزواج. ركز على تطوير شخصيتك، والهالة هتيجي لوحدها. 3. خطة يومية سريعة لبناء الثقة : | الوقت | النشاط | |--------|---------| | 5 صباحًا | صلاة + قرآن 10 دقايق (هيديك هدوء وقوة) | | بعد المدرسة | دراسة + رياضة | | مساء | هواية مفيدة + نوم باكر | هتعيش حياة أحسن من "قعداتهم"، وهيحسدوك أنت! أنت شاب قوي وقادر تغير كل ده في شهر. لو عايز تفاصيل أكتر عن الجدول أو كتب، قولي. دور في فدني على أسئلة مشابهة هتلاقي إجابات كتير، ولو محتاج خبير نفسي أو دراسي، شوف https://www.fedni.net/experts. ربنا يوفقك يا ولدي، أنت هتبقى فخر أهلك! 🌟
تم النشر الاثنين، ١٣ أبريل ٢٠٢٦
عادي فترة مراهقة هتبقى عاوز تعمل دة وتجرب دة بس ابعد عنه عشان دة طريق مفيهوش رجوع وهتلاقي ناس شبهك او قريبين من تفكيرك عادي زي ما حصل معايا وحاول ذاكر عشان انا دلوقتي تالته وبعافر عشان مش متعود عليها وابعد عنهم دي اهم حاجة
تم النشر الاثنين، ١٣ أبريل ٢٠٢٦
عدم انكارك للحاجة الغلط دا بيطعن في هويتك، تقبلك للغلط كدا دا معناه أنك سهل تتسحب في أي اتجاه، لازم تبني لنفسك هوية كمسلم، النهي عن المنكر واجب شرعي وخوفك من أنك تقول لحد دا غلط عشان ما اخسرهوش أو يقول عنك حاجة هو ضعف إيمان لازم تعالجه من سنك دا عشان هتتعب في الآخرة وقبلها حياتك الدنيا، كلامي شديد بس دا اللي لازم أعمله أكيد مش هحقر من حاجة مهمة زي كدا، لو عايز مفتاح فابحث عن "د. إياد قنيبي" على يوتيوب ولو بتحب تقرأ فاقرأ كتبه ومقالاته، وربنا يوفقك يا حبيبي وينير طريقك.
تم النشر السبت، ١٨ أبريل ٢٠٢٦
وعليكم السلام ورحمة الله وبركاته، عايزة أقولك أن المفروض دا الطبيعي الطبيعي إنك ما تكلمش بنات ولا تشرب سجارة، عندنا في الإسلام مفيش حاجة إسمها فترة مراهقة، بمعنى أنت حاليًا في سن التكليف يعني ذنوبك أخطائك مكتوبة عليك فاهمني، يعني مثلًا أنت شايف أصحابك في السن ده عايشين حياتهم بس صدقًا هما لو ماتوا وعندهم ١٦ سنة هيتحاسبوا زي الـ عنده ٧٠ سنة برضو، المختصر بما إنك داخل تالتة ثانوي، صاحب صحبة صالحة لأنك هتمر بضغط والضغط دا لو كان مع صحبة سوء هدمرك هيخدوك طُرق خطأ، وبعدين هتكمل في الجامعة بنفس النهج، فأنت بجد ألحق نفسك صاحب صحبة صالحة وروح المسجد وتعلم حاجات وصاحب ناس طموحة شغالة علي نفسها وكمان أقرأ عن الفتيان في الإسلام كانوا صغار في السن بس كانوا صالحين وقدوة...حالك دالوقتي هيحدد حالك بعدين وبجد لو قعدت معاهم أكتر..هتعمل نفس العادات بتاعتهم، فأنت أختار وقرر
تم النشر الجمعة، ١٧ أبريل ٢٠٢٦
تقبل إختلافك وراعي نفسك .. يعني خلي وقت تعمل فيه الحاجات اللي بتمثل قيمك وأخلاقك ..... حاجات بسيطة ودائمة ومن أهمها قراءة القرآن
تم النشر الأربعاء، ١٥ أبريل ٢٠٢٦
لعرض السؤال في فدني اضغط هنا