انا عصبي جدا للاسف، انا والله طيب من جوايا مش بحب اذي حد وحنين، لكن اغلب الوقت بكون عصبي وخصوصا لو عندي ضغوضات من الامتحانات وكده، المشكله لو مضايق واللي قدامي نرفزني باي فعل حتي لو بسيط بنفجر فيه حرفيا ورده فعلي بتكون شديده، بحاول كتير اتعامل عادي لكن ساعات كتير مش بسيطر علي ده، المشكله اني بزعل اكتر من نفسي لما حد من اخواتي او امي تزعل مني وبحس نفسي انسان وحش لما حد يتعامل معايا حلو ويكون همه مصلحتي وانا رده فعلي مش بتكون كويسه وفي المقابل انا مزاجي متقلب بشكل كبير وده علي حسب مدي رضايا النفسي في الأيام دي
الغضب عاطفة زي باقي العواطف اللي ربنا خلقها فينا ومن غيرها مش هنحس إننا بشر ربنا خلق الغضب فينا عشان ننتصر على الظلم والفشل و نتعصب لديننا ولكرامتنا و لأعراضنا و يكون سبب للتغيير وإننا نبعد الظلم عن المظلوم لكن كل شيء لو زاد عن حده يتقلب ضده ، إنت حاسس بغضب إتجاه أهلك بدون داعي فده مش غضب دا صعوبة التحكم في الأعصاب والمطلوب مش إنك توقف غضب لأن دي حاجه مستحيله .. لكن إنك تتحكم في أعصابك وتتكيف مع غضبك و تتعامل معاه صح نصيحتي ليك: أول ما تحس بالعصبية خد بريك من كل حاجه حواليك وسيب اللي بتعمله وإبعد عن المكان أو عن اللي مضايقك خد نفس عميق وإهدى وإستغفر ربنا أو قول آيات قرانية أو إدعي وروح إتوضى و أقعد في مكان تاني مريح ليك و أفتكر مواقف حلوة في حياتك و أفتكر حاجات بتضحكك من الآخر إتعلم مهاره تشتيت نفسك وقت الغضب بإنك تغير المكان والزمان والإحساس وتوجهه تفكيرك لحاجه تانيه
تم النشر الخميس، ٩ مايو ٢٠٢٤
لعرض السؤال في فدني اضغط هنا