السلام عليكم ورحمة الله وبركاته
انا سنه اولى طب بشري اهليه قبل م ادخل الجامعه دي مكنش حد راضي غير ماما وحتى بابا مكنش موافق بس الحاح ماما عليه خليته يوافق
المهم اني اول موديول كنت بتدلع ومكنتش بذاكر عدل فجيت بعد م خلصنا الترم وكدا لقيتني شايله 3 مواد المديول دا ومادتين، منهم ماده انا كنت مذاكراها وحاله فيها كويس وشيلوني على درجه ونص، فماما لما عرفت بهدلتني وبتاع وقالتلي كلام وحش اوي وكان عندي بعدها باسبوع امتحان على المديول الاول في الترم التاني وقالتلي اعملي حسابك عشان تقولي لابوكي قولتلها طب لما اخلص امتحانات فوافقت
المهم خلصت امتحانات وكدا ولحد حالا معنديش الجرأه اني اقول لبابا بردو ولسه ماما قايلالي من يومين انه بابا لو عرف هيبهدل الدنيا وبتاع واني لو لا قدر الله شيلت تاني الترم دا فهيحولي من الكليه خالص
انا بقيت في رعب من ساعة كدا لان انا اصلا حابه الكليه اوي بس ضغطها وحش اوي اوي بجد والمفروض اي انسان طبيعي بعد ما يسمع الكلمتين دول يقعد يذاكر ويلم الدنيا عشان عندي امتحان يوم الخميس الجاي اصلا
لا، انا قعدت اتمرقع وبنام كتير كتير اوي بجد وانا في سكن اصلا ومبعرفش اعمل اكل فمباكلش يعتبر وبنام نص اليوم ولما بصحى بذاكر قليل جدا ومبقدرش ابطل تفكير خالص وخوف لاشيل تاني
الفكره هنا انا مش عارفه اعمل اي وحالتي النفسيه وحشه اوي بجد ومش عارفه هل انا فعلا مستحقش الكليه دي ومقامي مش فيها ولا دا طبيعي ولا اي المشكلة ان الاهل ميشجعوش خالص وانا لسه بحاول اجرب طرق مذاكره فلسه مش مستقره ومش عارفه اذاكر ولا عارفه اعيش حياتي واللي يقهر اكتر اني معايا ناس بردو في بشري وعايشين حياتهم عادي وبينجحو كمان ويجيبو تقدير فبيعملوها ازاي دي انا مش عارفه
آسفه ع الاطاله
بصي، اللي انتي فيه دا مش معناه خالص إنك “مش قد الكلية” أو إن مكانك مش فيها… دا ضغط طبيعي جدًا في أول سنة + صدمة نظام جديد + ضغط أهل، وكل دا متراكم مرة واحدة. انتي عدّيتي بكذا حاجة تقيلة: نقلتي من موديل لموديل، شيلتي مواد، كلام سلبي من مامتك، خوف من باباكي، وسكن لوحدك… طبيعي جدًا يحصل لك لخبطة ومش هتعرفي تذاكري كويس أو تركزي. دا مش فشل، دا إرهاق نفسي. خليني أقولك على كام نقطة مهمة بشكل واضح: الناس اللي شايفاهم عايشين عادي مش بالضرورة مرتاحين زي ما باين. في ناس بتعرف تخبي، وفي ناس اتأقلمت بدري شوية، بس دا مش مقياس ليكي. مشكلتك الأساسية دلوقتي مش ذكاء ولا قدرات… مشكلتك تنظيم + نفسية. طول ما انتي خايفة وبتفكري كتير، مخك أصلًا مش هيدّيكي طاقة تذاكري. انتي محتاجة ترجعي تبدأي بصغير مش تحاولي تعملي كل حاجة مرة واحدة. ممكن تبدأي كدا (او أنتِ ادري بالنظام اللي يناسبك ) ذاكري ساعة بس في اليوم في الأول (مش أكتر)، حتى لو قليل اقسمي الساعة دي نصين، وكل نص مادة سيبي الموبايل بعيد وقتها لما تخلصي، اعتبري دا إنجاز مش قليل و لازم لازم تفوقي لنفسك لنفسك..الامتحانات مش هتستناكي لحد م تفوقي و تذاكري. وبالنسبة للأكل والنوم..حاولي تاكلي أي حاجة بسيطة (سندوتشات، زبادي، أي حاجة سهلة) عشان جسمك أصلاً تعبان النوم الكتير دا هروب من الضغط، فحاولي تصحي حتى لو بالعافية شوية بدري ( لان كل اللي حصل دا مش مبرر عشان تأذي نفسك) وبخصوص كلام أهلك: مامتك ضغطت عليكي بطريقة غلط، بس دا مش معناه إنها شايفاكي فاشلة… هي غالبًا خايفة عليكي بطريقتها. ولو مش قادرة تواجهي باباكي دلوقتي، مش مشكلة، ركزي بس إنك تعدّي الفترة دي. آخر حاجة بجد: انتي مش متأخرة ولا ضايعة… انتي بس محتاجة “تهدي السرعة” وتاخدي الموضوع خطوة خطوة. أي حد مكانك كان هيتهز كدا. ولو فضلتي ثابتة حتى بكم قليل جدًا كل يوم، هتتفاجئي بعد فترة إنك رجعتي تمسكي الدنيا تاني. متنسيش ان دخولك كلية الطب لوحده نعمه و حلم ناس كتير بتتمناه ف حافظي عليه و اسعي انك تنجحي فيه..و بإذن الله تبقي اشطر دكتوره. ربنا يعدّي لك الفترة دي على خير ويطمن قلبك 🤍
تم النشر الأحد، ١٢ أبريل ٢٠٢٦
بصي يا دكتورة ارمي كل اللي فات ورا ضهرك وبطلي تأنبي في نفسك عشان لوم النفس مش هيخليكي تفتحي كتاب ركزي بس في امتحان الخميس اللي جاي ده وانسي موضوع باباكي خالص دلوقتي متخليش الخوف يشلك إنتي قدها بدليل إنك وصلتي هنا ابدأي بالمواد التقيلة والحاجات اللي بتيجي في الامتحانات والقطي درجات على قد ما تقدري وموضوع النوم الكتير ده هروب قومي فوقي واشربي حاجة وفطري نفسك كويس عشان تركزي ومتقارنيش نفسك بحد كل واحد وليه قدراته وطريقته في المذاكرة وانتي لسه في سنة أولى يعني لسه بتتعلمي تروحي وتيجي في الكلية ازاي استعيني بالله وقومي دلوقتي افتحي أهم محاضرة وابدأي فيها وربنا هيوفقك وهتعدي منها على خير ان شاء الله
تم النشر الأحد، ١٢ أبريل ٢٠٢٦
يا دكتورة، هوني على نفسك.. مفيش حاجة في الدنيا تستاهل إنك تدمرى صحتك ونفسيتك بالشكل ده. أولاً، لازم تعرفي إن اللي بتمري بيه ده "طبيعي جداً" في أول سنة طب. صدمة المناهج وتغيير طريقة المذاكرة عن الثانوي بيلخبط أشطر الناس، وفي دكاترة كبار وشطار جداً دلوقتى شالوا مواد في سنة أولى والدنيا موقفتش، إنتِ بس محتاجة وقت تتأقلمي على "السيستم" الجديد.بخصوص أهلك: الخوف والهروب بالنوم مش هيحل المشكلة، بالعكس هيزود الضغط عليكي. المواجهة صعبة بس مريحة حاولي تخلي ماما تمهد لبابا الموضوع بهدوء، وتقوله إنك محتاجة دعمه عشان تعوضي اللي فات، وإن الضغط الزيادة هو اللي مأثر على تركيزك. الصراحة هتشيل حمل كبير من على كتافك وتخليكي تركزي في اللي جاي مادة يوم الخميس: انسي اللي فات خالص دلوقتى، وفكري بس في امتحان الخميس.ابدأي "شابتر بشابتر"، وحلي أسئلة كتير لأنها أهم من الحفظ الكتير في النظام ده. ولو تقدري تخرجي تذاكري في مكتبة أو مع صحاب يشجعوكي او لو مش عارفه تبدائي ازاى اسأليهم هما، ده هيخرجك من حالة السكن المكتئبة. جسمك وعقلك هما "أدواتك" عشان تنجحي، قلة الأكل والنوم الكتير بيضعفوا تركيزك أكتر. قومي اتوضي وصلي، واستعيني بالله، وابدأي صفحة جديدة.. الطب مش سباق مين بيخلص الأول، الطب للي بيفضل صامد ومكمل للاخر وربنا يوفقك ❤️
تم النشر الأحد، ١٢ أبريل ٢٠٢٦
نصيحة من زميل اكبر منك انا في تالتة بشري عام بصي مش هكدب عليك بس انتي عرفتي مستواك وقدراتك فا المفروض تلتزمي مش شوية لا تلتزمي على أقصى ما يكون الكلية بتاعنا بذات سنة أولى مش حمل دلع ايوه في ناس بتجيب مجاميع حلوه بمجهود اقل لكن دي عقليات وانا عندي منها كتير زمايل وفي ناس تاني تدعك ليل نهار ويادوب لكن بصي انتي حاولي تشدي وتجربتي اكتر من طريقة للمذاكرة والحفظ لحد ما ترسي على حاجه انتي كويسة فيها وبتنفع معاكي انا عن نفسي ف سنة أولى جربت اكتر من طريقة واللي نفعت معايا اني بسمع الريكورد بتاع المحاضرات واشوف الدكتور ركز ع ايه وحذف ايه وبعدها أقرأ المحاضرة ع السريع واحاول احفظ المهم وبعدها احل عليها وخلاص كدا لكن اجي اخر الاسبوع اراجع عليهم ايوه هكون نسيت أغلبهم بس هيكون افضل من اول مرة وبعمل كدا قبل ليلة الامتحان وبكدا قريت المحاضرة ٣ مرات وتقريبا يثبت بنسبة ٧٠٪ ودا حلو مش وحش يعني الخلاصة انتي في الأمر الواقع لازم تثبتي نفسك زميالك مش احسن منك وكلوا هيتحسن بالتدريج متزعليش نفسك ع اللي راح بس لازم تشدي وفي الاخر الامتحانات دي توفيق من ربنا ودراستك وتعبك يجي بعد كدا متكسليش وركزي وربنا كريم واللي شلتي دا هتقدري تنجحي فيه متقلقيش بس لازم يكون جواكي الدافع اللي يخليكي تكملي ربنا حطك في المكان دا يبقى انتي تستحقي فرصة وشدي حيلك وهتنجحي وقصة ابوكي ميعرفش دا غلط لازم تصاريحه بكل حاجه علقك مش حمل يشيل هم مزاكرة وهم ابوكي وأهلك وخلاص اللي حصل حصل بس لازم تعوضي حطي هدفك قدامك واسعي وإن شاء الله هتكوني احسن دكتورة ف يوم من الايام
تم النشر الاثنين، ١٣ أبريل ٢٠٢٦
وعليكم السلام ورحمة الله وبركاته يا حبيبتي ذكية 🌸 أول حاجة، متقلقيش خالص، أنتِ مش لوحدك في ده.. السنة الأولى طب بشري أهلية صعبة أوي على الكل، وكتير من اللي دلوقتي بيجيبوا تقدير عالي كانوا شايلين مواد في الأول. ده طبيعي، وأنتِ مش "مش مستحقة" الكلية خالص – بالعكس، حبك ليها دليل إن مقامك فيها، بس محتاجة خطة وصبر. اللي هتعمليه دلوقتي خطوة بخطوة (ابدئي النهاردة قبل الخميس): رتبي يومك زي الساعة : نامي 7-8 ساعات بس (مثلاً 11 مساءً لـ7 صباحاً). قسمي اليوم: 4 ساعات دراسة مقسمة (ساعة دراسة + 10 دقايق راحة)، باقي الوقت أكل وصلاة وقراية قرآن عشان تهدي بالك. حملي تطبيق زي "Forest" يمنع الموبايل أثناء الدراسة. الأكل مش هيقتلك : في السكن، اشتري موز، تفاح، زبادي، خبز مع جبنة أو بيض مسلوق. كلي وجبة كل 4 ساعات، حتى لو صغيرة – الجوع بيخلي الدماغ مش يشتغل. الدراسة الفعالة : ركزي على المادة اللي شيلتيها (اللي كنتِ كويسة فيها قبل كده). اكتبي ملخصات قصيرة بإيدك، حلي أسئلة امتحانات قديمة. هدف صغير: 1 فصل النهاردة بس، وهتقدري. الخوف والأهل : قولي لماما "هعمل خطة وأثبتلك، بعد الامتحان ده نقول لبابا مع النتيجة الجديدة". تذكري قول الله تعالى: {وَمَنْ يَتَّقِ اللَّهَ يَجْعَلْ لَهُ مَخْرَجًا} – صلي ركعتين استخيرة كل يوم، وادعي "يا رب سهلها عليّ". الضغط ده هيروح لما تبدئي النجاح. أنتِ قادرة، يا بنتي! اللي عايشين حياتهم عادي بيعملوا كده بالضبط: روتين يومي صارم + توكل على الله. لو شيلتِ تاني، هتتعلمي أكتر، مش نهاية الدنيا. ابحثي في فدني عن "دراسة طب أهلي سنة أولى" هتلاقي إجابات كتير من خبراء وطلاب نجحوا. لو عايزة دعم أكتر، روحي صفحة الخبراء https://www.fedni.net/experts وابحثي عن مدربين دراسيين أو نفسيين. هتقدري، أنا فخورة بيكِ بالفعل 💪 ادعيلي برضو! إيه رأيك نبدأ مع بعض؟ قوليلي إيه أول خطوة هتعمليها النهاردة؟
تم النشر الأحد، ١٢ أبريل ٢٠٢٦
أكبر غلطة فكرة عدم إرادة الأب لأنه للأسف هو المسئول الأول ف الضغطة النفسية من الناحية ديه لازم تتعلمى تتعاملى معاها من بدرى لأنك هتفضلى فيها طول فترتك فى الكليه وهنا بتكلم من ناحية الأهل لسه مذكرتش الكلية ...... كلية الطب تقيلة وعايز واحد مجتهد وبايع الدنيا أو بيعرف يجيب المفيد وينجح ودول قليلين المهم صعوبة الكلية هتتزايد مش هتقل يعنى أولى أقل سنة من حيث الصعوبة بس مشكلتها إنها بداية الارتطام بالحياة الجامعية وهنا تكمن صعوبتها المهم لازم تفرقى بين أنا بحب الطب و بحب كلية الطب وهنا فرق شاسع تمام .... نصيحتى وهتعملى إيه ... مش هتواجهى والدك وتبلغى أمك تصبر لحد أخر السنة علشان انشغالاك ومتوتركيش هتنعزلى تماما عن الحياة وتحطى كامل طاقتك وتركيزك فى الكلية الترم دا لازم تطلعى بأفضل النتائج تعويضا للترم الأول وبعد ما السنة تخلص تشوفى المستوى العام وساعتها تقررى سواء تواجهى أو لا لأنك ساعتها هتعرفى تقدرى ولا متقدريش ربنا يوفقك يارب ويكرمك ويعديلك الترم دا موفقة يا دكتور 🤍
تم النشر الأحد، ١٢ أبريل ٢٠٢٦
شوفي اول حاجه لازم نحدد المشكلات كامله الي بتعطلك عن المذاكرة يعني لما بتصحي بتقعدي تعملي اي؟ اكيد في النص يوم الي متبقيلك بتعملي حاجه فلنقل بتقعدي على الريلز فقدامك حل انا بعمله عن نفسي وجايب نتيجه وهي اني محمل برنامج يقفل الريلز وكل برامج الالهاء وخصوصا في ايام الامتحانات بقفل كل حاجه وكمان بحلف على نفسي اني مش هفتح اليوتيوب (لاني مدمن عليه) الا بعد يوم الجمعه (يوم اجازتي) وطبعا انا طالما حلفت مش هينفع اخلف حلفاني خصوصا ان عليه كفاره وبضيف عل ذلك اني مسحت الفيسبوك والتيكتوك ومعنديش انستا واي شيء يلهيني اقدر امسحه بمسحه واريح دماغي من الدوبامين.... ممكن حالتك غير حالتي وطبعك غير طبعي بس حبيت اشارك طرقتي لعل وعسى يجيلك الهام لطريقه تناسبك .... وبخصوص الوالد متخليش الموضوع مأثر عليكي حاليا وركزي في المواد الجايه وانقذي ما يمكن انقاذه وصارحيه بالموضوع بس اختاري وقت كويس او اقنعي الوالده تقوله لانها في الغالب هتعرف تهديه ويعدي الموضوع .... وحاولي متضيعيش الفجر وخلي صلاه الفجر اساسي عندك وده هيفرق معاكي جدا باذن الله في تظبيط النوم حتي لو نومتي قبل الفجر بساعه لا اصحي للفجر واياكي وتطبيق وخصوصا لو داخله الامتحان لا تدخليه مطبقه
تم النشر الأحد، ١٢ أبريل ٢٠٢٦
@Hagar A. لا انا الحمدلله مش شايفه نفسي غير طب وربنا موفقنيش تمام التوفيق في الامتحانات عشان كدا مدخلتهاش حكومي ودخلتها اهلي لانه حلمي انا كل كلامي اني مش متعوده على الضغط دا انا كانت حالتي النفسيه في ثانويه عامه احسن بكتيرر ومكنتش شايله هم السنه اصلا وبذاكر عادي اما دلوقتي انا يعتبر كل مديول بدخله بثانويه عامه بضغطها بقا وقرفها فاهماني،، انما لي قولتي انها مش مكاني عشان بس مذاكرتش اول مديول؟ انا ايوا ادلعت بس مذاكرتي كانت تنجحني بمقبول على الاقل مش اشيله ف مدايقه من دا وبشتكي من دا بس!!
تم النشر الأحد، ١٢ أبريل ٢٠٢٦
بصي هقولك ع حاجه دا م مكانك يعني انتي دخلتي طب وانتي مكنتيش بتذاكري طبيعي يحصل كد عشان دا م مكانك مقصدش انك فاشله لا بس مكانك ف حته تانيه انا بفضل الجامعات الاهليه للعيال الي فعلا ذاكرت وجابت آخرها ومثلا اتظلمت ف الدرجات او مثلا ربنا موفقهاش ف ماشي دي تدخل اهليه وهتنجح وهتمشي فيها لانو اصلا متعود يذاكر ف هيذاكر او مثلا واحد فرقت معاه بشري ع حاجه بسيطه اه دا برضوا يدخل اهليه وينفع فيها م معني كد اني بنتقدك او كد لا خالص لو انتي اي نموذج م دول فماشي انتي بقا م اي نموذج منهم وحابه الكليه اسعي طيب هتسعي امتي وربنا يوفقنا جميعا
تم النشر الأحد، ١٢ أبريل ٢٠٢٦
لعرض السؤال في فدني اضغط هنا