السلام عليكم
كنت عاوزه احكي إني حاسه إني بعمل ذنب بسبب إني مش لابسه حجاب على الرغم إني مسلمه وحافظه القرآن وأكاد أختمه وبالغه عندي ١٩ سنه لبسي مش ضيق لكنه ما يناسبش الإسلام ودا كلام الناس اللي حواليا
ليه ما يناسبش الإسلام طالما انا قريبه من ربنا وعارفه الدين وبحافظ على الفروض ومش بغضب ربنا سواء بإني ارتكب فواحش او اكلم ولاد مش بعمل الحاجه دي
كمان انا مش حاسه اني لازم البس الحجاب لكن عارفه في نفس الوقت ان دا فرض يعني جنه ونار لكن كل اما شوف بنت محجبه الاغلبيه منهم لابسين حجاب مبين نص شعرهم واللبس مش مناسب كمان هل دا الإسلام من وجهة نظر المجتمع!!!
بالنسبه لعيلتي البنت اللي لابسه حجاب على بنطلون جينز مسلمه وانا كدا بغضب ربنا
انا مش بقول ان الحجاب حاجه وحشه بقول انه عفه واحترام وجميل جدا
بس انا مش متقبله أبقى محجبه
لكن في نفس الوقت عارفه انه هيجي يوم وهلبس الحجاب بس ساعتها عايزه ألبسه كحجاب شرعي لان مش متقبله فكره لبس الحجاب علي بنطلون جينز
لاني شايفه اللي لابس طرحه مبين نص شعره وعلى بنطلون جينز نفس اللي مش لابس طرحه ومتبرج زيييي زي ما عيلتي بتقولي
انا مش بقارن بيني وبين حد وعارفه ضوابط الحجاب وعارفه إن ربنا قال في كتابه العزيز ﴿وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ﴾صدق الله العظيم
بس ليه المجتمع مش بيحاول ياخد فكره حلوه عن البنت اللي مش محجبه وفي فكره دايما انها عاهره ومش محترمه ليه بيقولوا علينا متبرجين!!!
الكلمه دي من أسوأ الكلام اللي ممكن بسمعها في يومي
أتمنى تاخدوا فكره كويسه كمجتمع عننا وكمان بطلب ان كان كلامي غلط انكم تصححوا لي وتنصحوني وانا بجد هحاول بس المحاوله مش بسهوله أبدا وانا مش ملاك واكيد عندي شيطاني بيوسوس لي اني أجمل من غير حجاب لكن يعلم الله اني بحاول بس لسه مجاش الوقت وانا خايفه اتأخر ربنا يقبض روحي وانا مش جاهزه لسه
يا ريت تفيدوني وتقولولي اتصرف ازاي ونصيحتكم تهمني طبعا ولو في بردو اتهامات وكلام جارح هتوجهوه ليا معنديش مشكله لاني جربت الكلام الجارح دا كتير وأرجو اني ما اكون طولت وازعج حضراتكم
والسلام عليكم ورحمه الله وبركاته
السلام عليكم ورحمة الله وبركاته - انتي عارفة كويس ان الحجاب فرض زيه زي الصلاة والصوم واننا بنحاسب على لبسه من وقت البلوغ فشوفي بقى انتي عليكي كام سنه -يمكن انتي مش بترتكبي فواحش بس انتي عاصية ربنا علي فرض هو فرضه عليكي والفرض دا اصلا في مصلحتك ولحمايتك من عيون الناس ومن لسانهم - مين قالك ان اللي كاشفة نص شعرها ولا لابسة ضيق او قصير انهي في نظر المجتمع كويسة ولا ان هي كدا مسلمة لاء على فكرة عارفة بينظروا ليها ازاي ؟ انها واحدة رخيصة مبينة جسمها وشعرها لكل الناس وفي الاغلب بتبقى علشان تعجب الشباب وتتعاكس بس عارفة لما حد من الشباب دول يجي يتجوز هو عمره ما هياخد واحدة من دول عارفة ليه ؟ هيقول ان كل الناس شافتها وشافت جسمها بتفاصيله انا عايز واحدة محترمة - والمحترمة في نظر المجتمع اللي لابسه لبس واسع مش مبين اي تفاصيل في جسمها اللي لابسة حجاب طويل وساتر اللي ماشية عنيها في الارض -الشكل اول انطباع الناس بتاخده عن البنت -اما كلمة تبرج فدي مذكورة في القران بسم الله الرحمن الرحيم ( وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَى )سورة الاحزاب عارفة انتي بقي ايه مشكلتك ؟ 1- عارفة مدي حرمانية عدم ارتداء الحجاب وسامحة للشيطان بانه يوسوس لك بس هينفع بإيه الجمال وقت الحساب 2- انك مركزة مع الناس والمجتمع ومين بيقول إيه ومين لابس ايه -كل واحد هيتحاسب لنفسه عارفة بقى انك كدا بتشيلي والدك ووالدتك ذنب لان انتي مسئولة منهم -عن عبد الله بن عمر رضي الله عنهما عن النبي صلى الله عليه وسلم قال: (أَلَا كُلُّكُمْ رَاعٍ، وَكُلُّكُمْ مَسْئُولٌ عَنْ رَعِيَّتِهِ، فَالْأَمِيرُ الَّذِي عَلَى النَّاسِ رَاعٍ، وَهُوَ مَسْئُولٌ عَنْ رَعِيَّتِهِ، وَالرَّجُلُ رَاعٍ عَلَى أَهْلِ بَيْتِهِ، وَهُوَ مَسْئُولٌ عَنْهُمْ، وَالْمَرْأَةُ رَاعِيَةٌ عَلَى بَيْتِ بَعْلِهَا وَوَلَدِهِ، وَهِيَ مَسْئُولَةٌ عَنْهُمْ، وَالْعَبْدُ رَاعٍ عَلَى مَالِ سَيِّدِهِ وَهُوَ مَسْئُولٌ عَنْهُ، أَلَا فَكُلُّكُمْ رَاعٍ، وَكُلُّكُمْ مَسْئُولٌ عَنْ رَعِيَّتِهِ) - آسفة اني طولت في الكلام -ربنا يرشدك للطريق الصحيح اللهم امين
تم النشر السبت، ١٧ يناير ٢٠٢٦
وعليكم السلام ورحمة الله وبركاته يا حبيبتي 🌸 أول حاجة، أشكركِ إنكِ فتحتِ قلبكِ كده بصدق، وده دليل على إيمانكِ القوي اللي ربنا سبحانه يحبه. أنتِ بنت 19 سنة، حافظة قرآن، تقومي بالفرائض، ومش بتقعي في فواحش… ده كله يخليكِ قريبة من ربنا أوي، وهو يعلم نيتكِ ومحاولاتكِ. ربنا قال: {إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ} ، فأنتِ من التوابين دول إن شاء الله. عن الحجاب والمجتمع: الحق الديني واضح : زي ما قلتِ، القرآن فرضه في {وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ} ، وهو غطاء كامل للشعر والجسم (غير الوجه والكفين عند الأغلبية)، مع لبس فضفاض غير ضيق أو شفاف. بس مش شرط يكون "وحش"، في حجاب أنيق وجميل يناسب ستايلكِ تمامًا، وده اللي هتحبيه لما يجي وقته. مشكلة المجتمع : للأسف، كتير من الناس بيحكموا بالشكل الخارجي بس، وينسوا إن الحكم لله وحده. المحجبة اللي على جينز ضيق مش "أفضل" منكِ، واللي مش محجبة زيكِ مش "عاهرة" أبدًا – الكلام ده سم جارح. المجتمع بياخد فكرة غلط عشان الشيطان بيوسوس للكل، وكمان عشان الناس بتحب "التصنيف" السهل بدل النظر للقلوب. نصيحتي العملية لكِ (خطوات بسيطة، مش صعبة): ابدئي تدريجيًا : النهاردة، جربي غطاء شعر خفيف (زي شال واسع) لمدة ساعة يوميًا في البيت، وقولي "اللهم اجعله حجابًا خالصًا لوجهك". هييسر عليكِ مع الوقت، زي ما ربنا وعد: {فَإِذَا عَزَمْتَ فَتَوَكَّلْ عَلَى اللَّهِ} . ركزي على القلب : اقرئي سورة النور يوميًا (5 دقايق)، وادعي: "ربي يسر لي الحجاب واجعله حبًا في قلبي". تجاهلي كلام العيلة والناس وركزي على قلبك وزيادة حب ربنا فيه وساعتها هتحبي الحجاب بسهولة. لبس محتشم دلوقتي : اختاري ملابس فضفاضة أكتر شوية، مش لازم حجاب كامل فورًا، بس خطوة صغيرة تريح ضميركِ. لو حسيتِ ضغط : اكتبي إيجابيات الحجاب (عفة، جمال داخلي، رضا ربنا) في مذكرة، واقريها كل يوم. وتذكري، الشيطان بيقول "أجمل بدون"، بس ربنا بيقول "أجمل معه". أنتِ مش متأخرة خالص، يا قمر – ربنا غفور رحيم، وهو يحب محاولتكِ دي. لو عايزة دعم أكتر، شوفي خبراء الإسلام والاستشارات الأسرية في https://www.fedni.net/experts، أو ابحثي في فدني عن أسئلة مشابهة هتلاقي إجابات كتيرة زيكِ. ربنا يثبت قلبكِ وييسر أمركِ، ويجعل حجابكِ تاج شرف. أنتِ بنت رائعة، استمري كده 💕 والسلام عليكم ورحمة الله وبركاته.
تم النشر السبت، ١٧ يناير ٢٠٢٦
أكتر حاجه البنت بتحبها (الزينه) وأكتر حاجه الولد بيحبها (البنت) وربنا سبحانه وتعالى أمرنا بالستر وأكد على غض البصر للرجال علشان يختبر صدقنا وإننا فعلًا ممكن نعمل حاجه عكس اللي بنحبها تماما تسليما لأمر الله وده في معظم العبادات زي ما الإنسان بيحب الراحه بس بيجاهد نفسه ويقوم يصلي ،،،، كونك مش متقبله الحجاب أمر طبيعي جداا لإن التزين هو الغريزه الأولى عن أي بنت لكن إنتي أكيد متقبله أمر الله وده اللي واضح من كلامك ،، ومن رحمة ربنا بينا إنه لم يمنع التزين بشكل عام لكن وضع له حدود .. وده من طرق إظهار إن المرأه غاليه ماينفعش تكون متاحه لأي حد يشوفها بسهوله كده وببلاش لإن الرجل أكيد كل هدفه يشوف جمالك فمن السذاجه إن البنت تخرج متزينه بتلبي حبها للزينه وبتنسى إنها بتقول للرجال انظروا مجانا 😅.. الحاجه الأخيره إن البنت اللي لابسه حجاب صحيح بتاخد حسنات من لحظة خروجها لحد ماترجع لبيتها ،،، ربنا يرزقك الحجاب عاجلا 💟💟 بالشكل الذي يرضيه عنكِ ،، ومش معنى كده إن البنت تخرج مبهدله لأ. الخروج يكون بشكل مرتب ومنظم لكن غير ملفت والأفضل القرار في البيت 💗
تم النشر السبت، ١٧ يناير ٢٠٢٦
السلام عليكم .. اقرأي كلامي للآخر .. اول حاجة لازم انا من رأيي انك تغييي الجهة اللي بتبصي بيها للأمور / سيبك من تقييم المجتمع خالص وخليكي على التقييم الصحيح / التقييم الصحيح هو :"إن أكرمكم عند الله أتقاكم" .. التقوى معناها الخوف من الله .. هل كل اللي بيلبسوا حجاب هم خايفين من الله ؟ لا .. في منهم بيلبسوا النقاب عشان يتخفوا من الناس .. في بنات عندهم حجاب ومعندهمش صلاة وفي بنات معندهمش حجاب بس عندهم خمس صلوات ... فأول حاجة والأصل هو التقوى اللي في البني آدم ... فالنظرة الصحيحة مش بس بتقتصر عالمظاهر وكذلك بالنسبة للرجال ففي شيخ ملتحي وبيقدم فتاوى سمعوا عنه الناس انه بيضرب أمه .. فالرحمة والعطف والأخلاق مش بالظاهر .. فعلى العموم سيبك من المجتمع وركزي على القلب وإصلاحه وتقواه ... فلو سبتي نظرة الناس وأصلحتي قلبك بالصدق تلقائيا هترتاحي للبس الحجاب / التشتت اللي جالك هو بسبب انك اهتميتي لرأي الناس والناس مبيرضيهمش حاجة .. لو لبستي الحجاب هيقولوا معقدة ولو ملبستيش هيقولوا فاسدة .. اشتري دماغك وارضي الله
تم النشر السبت، ١٧ يناير ٢٠٢٦
قصد الاستاذ يوسف ان البنت اللي بتلبس حاجة ملفته او حتى بتتعطر خارج بيتها هي في حكم (الزانية ) وبتاخد ذنب كل واحد بيشوفها او يشم عطرها - ومش معنى كدا انه مش عليه ذنب انه مش بيغض البصر لاء عليه بس البنت هتبقى اكتر لان مئات الناس هتشوفها كدا وهتاخد ذنب كل حد يشوفها -وفي الآخر كل واحد هيتحاسب
تم النشر السبت، ١٧ يناير ٢٠٢٦
لو حجابك ملفت للانظار، هل انت عندك استعداد تشيلي ذنب كل واحد هيبصلك و هيتأثر بشكلك؟ و انا هنا مش بتكلم عن ٢ او ٣ ده رقم شوفي كام واحد ممكن يشوفك في الشارع
تم النشر السبت، ١٧ يناير ٢٠٢٦
شكرا على كلامك
تم النشر السبت، ١٧ يناير ٢٠٢٦
شكرا لحضرتك عالتوضيح
تم النشر السبت، ١٧ يناير ٢٠٢٦
طالما محتاره اتحجبي عشان نفسك وربك وسيبك من كلام الناس
تم النشر السبت، ١٧ يناير ٢٠٢٦
مش فاهمه حضرتك بس كل اللي فهمته ان انا ممكن ألفت الانظار طيب ليه حضرتك ما فيش غض البصر حضرتك طيب ليه المجتمع ياخد فكره مش كويسه عني ويقول إن انا متبرجه اوك حضرتك وجهة نظرك تحترم
تم النشر السبت، ١٧ يناير ٢٠٢٦
لعرض السؤال في فدني اضغط هنا