سلام عليكم، هدخل على طول فـ الموضوع.
انا و ابن خالي كانت علاقتنا و احنا صغيرين عشوائية جداً..
يعني..، بنحب ننكش بعض نهزر مع بعض، الحجات دي (دا لما كنا اطفال).
و بعدين مع الوقت أدركت اني بحبو.
و هوَ من النوع العفوي أوي و حرفياً كل اللي يعرفو بيحبو عشان شخصيتو المرحة و شكلو الحلو و كدا.
فـَ هوَ لما بيبقى قريب مني بيبقى هادي و بيركز فـ كلامو معايا كأنو بيعاملني كأني حاجة رقيقة ممكن تتكسر من اي كلمة بسيطة متعجبنيش.
و كذا مرة نكون فـ القعدات العائلية و بيبقى الكل بيضحك و كدا و عيني تيجي فـ عينو.
و دايماً بحس نظراتو عليَ.
و في حجات بيعملها بحس انها تلميحات منو، زي مثلاً..
كنا بناكل في بيت خالي (باباه) و لما قلت لأختو انا عايزة ماية كانت الكباية معاه فـَ هيَ قالتلو فـَ أداهلها و ربع الكباية او حاجة بسيطة منها كان مليان و لما شافها هتديني الكباية راح خد الكباية و جري غسلها و ملاها و بعدين جابهالي.
و بردو فـ مرة كان اخو الصغير اخد مني حاجة و لما قلتلو هاتها و مـَ جابهاش كان هوَ قاعد ورايا (ابن خالي) و قالو يديهاني بصوت واطي راح اخو أداهاني.
غير كزا موقف تاني بردو.
فـَ سؤالي هوَ..
هل هوَ بيحبني بجد؟، ولا انا واهمة نفسي؟
السلام عليكم، مش عارفة كم عمركم ومش هقدر أحكم بس من كلامك، في النهاية هتبقى احتمالات. فنصيحة بلاش تعلقي نفسك احتمالات قد تصيب أو تخطئ، ممكن يكون فيه مشاعر وممكن تكون نفسك بتتمنى ده فبتخليكِ تفسري أي نظرة وتصرف صغير منه تفسير مختلف. الحب عامة مش بالنظرات و لا التلميحات. لو فيه مشاعر ناحيتك وكان جاد، فالمفروض ياخد خطوة رسمية ويتقدم لأهلك، غير كده متبنيش قصور في الهواء وتعلقي نفسك بحاجة مش مؤكدة. لو انتم الاتنين صغيرين أو مش في سن مناسب للزواج حاليا فأنصحك تركزي حاليا في دراستك وحياتك وطوري من نفسك وتفكيرك بحيث تبقي فاهمة نفسك أكتر ومستعدة بعد كده لخطوة الزواج في وقتها، وهو لو فيه حاجة من ناحيته وقرر يتقدم يبقى جميل ساعتها فكري واعطيه فرصة وشوفي تنفعوا تكملوا سوا ولا لأ. لو مفكرش يتقدم فخلاص ممكن مش في دماغه أو مش مستعد فتكوني حميتِ نفسك من تعلق ممكن متقدريش تتخلصي منه بعدين. وعامة ادعي ربنا دايما يكتب لك اللي فيه الخير ويرزقك بالشخص اللي يستحقك. بالتوفيق
تم النشر الأربعاء، ٢٢ يوليو ٢٠٢٦
السلام عليكم ورحمه الله وبركاته مش عارفه سنك قد ايه ولكن بشكل عام المواقف اللي بيكون فيها اهتمام من شخص تجاهنا الاهتمام ده بيبان ان هو لينا احنا واحنا مميزين بيه فده دليل على ان في درجه من الغلاوه وفي درجه من القيمه في علاقتنا اعلى من علاقات الآخرين. هل نقدر ناكد ان ده الحب اللي احنا بنسال عليه الحب اللي هو بسببه هنختار بعض نكون زوج وزوجه او يكون من شركاء في الحياه مش شرط لكن هي بتأكد المواقف اللي زي دي انه في درجه من الاهتمام هي طبعا درجه لطيفه ودرجه يعني بكثير في النفس كده. مشاعر حلوه وكل انسان بيحب يحس ان هو متقدر ومميز وغالي عند اللي قدامه فبحكم ان من وأنتم اطفال وانتوا مقبلين مع بعض وليكن تفاصيل مع بعض فده يخلي فيه ما بينكم عليه طبعا مع السن ومع ان احنا نعدي مرحله البلوغ ومرحله المراهقه ده طبعا بيبدا ينضج ويظهر بشكل ثاني مش بيكون متوضح قوي جوه كل بني ادم بالشكل ده ولكن مع الوقت كده بنقدر نشوف ده بالأفعال.
تم النشر الثلاثاء، ٢١ يوليو ٢٠٢٦
السؤال هنا انتي كبنت ليه توصلي نفسك لمرحلة هل الشخص ده بيحبني او لا البنت دايما هي اللي تبقي عليها زحمة حبك ليه غلط من الاساس وانك بتقللي من نفسك وانتي مستنية نظرة او كلمة من شخص انا كبنت عارفة قيمة نفسي مش بدي لا لابن عمي ولا ابن خالي فرصة للكلام معايا حتى مع ان كل اعمارهم مقاربه لعمري واحد اكبر بسنه وابن عمي تاني اكبر مني بتلت سنين وولاد خالي برده اكبر واحد فيهم م متجوز مع ذلك م بديهم فرصة للكلام معايا لان اللي عايزني بابانا مفتوح واللي مش عايزني ميستهلش ذره حب فالشخص اللي هيكون عايزني لازم احافظ ع نفسي وقلبي علشانه ليه بجد بتهدري مشاعرك!!!؟ انتي تستهالي تتحبي قبل ما تحبي بلاش تقللي من نفسك
تم النشر الأربعاء، ٢٢ يوليو ٢٠٢٦
بغض النظر عن طريقة تفكيرك ، سواء بيحبك او لأ مينفعش يحصل ما بينكم اي تواصل او تصرف من ورا أهلك
تم النشر الخميس، ٢٣ يوليو ٢٠٢٦
لعرض السؤال في فدني اضغط هنا