هل الحب حرام يعنى لما أمشى مع شخص بحبه وتعامل باحترام حرام بس أنا تالتة اعدادى مش قادرة ابقى اقدر اقاوم الشعور؟ 🥺🥺🥺🥺🥺🥺🥺🥺♡♡♡♡♡
السلام عليكم، بصي يا قمر، الحب نفسه مش حرام تحسي به لكن يبقى حرام لما تحطيه في تصرف حرام. زي ما بتقولي (تمشي معه) حتى لو التعامل باحترام فمينفعش. *** الإسلام ربنا وضع حدود بين الأولاد والبنات وخلى التعامل والاختلاط يكون في حدود الضرورة. وده حماية للبنت قبل الولد. وأي ارتباط غير شرعي، يعني صحوبية ولا مشي ولا ارتباط فيه خروج وكلام من ده حرام. *** هتقولي بنتكلم ونتعامل باحترام، ده أولا ميمنعش إن الارتباط هيكون حرام، ثانيا، أنتِ متعرفيش امتى الشيطان هيتدخل وطالما فيه مشاعر ممكن يحصل ضعف في لحظة والشيطان يوسوس بتجاوزات هيبدأها بسيطة، زي إن عادي لو مشينا لوحدنا، عادي لو سمعني كلام حب، عادي لو مسكنا إيد بعض، ويفضل يتدرج معكم لحد ما تقعوا في غلط أكبر زي ما حصل للاسف مع بنات كتير من قبل. *** نقطة مهمة، أنتِ قلتِ إنك في ثالثة إعدادي، وطبيعي في المرحلة دي تحسي بالمشاعر والميل للجنس الآخر ولو ولد حاول يستميل مشاعرك سهل تتعلقي به ومتقدريش تقاومي الشعور ده. المرحلة دي حساسة جدا، والمشاعر لسه خضراء وقلبك لسه بيتعرف على الحب ولسه خبرتك قليلة ومتعرفيش الناس ولا اتقرصتِ من خداع الشباب ومكرهم فبلاش ترمي قلبك ومشاعرك بسهولة لأي حد. ** المطلوب منك دلوقتي، تركزي على دراستك وإنك تبني نفسك وشخصيتك وتفهمي الحياة والناس والعلاقات السوية عشان بعد كده تعرفي تختاري الإنسان الصح اللي هيحترمك ويصونك وييجي لحد بيتك يطلبك بالحلال، غير كده فأغلب الشباب (من إعدادي وأنتِ طالعة) بيتسلوا بالبنات وبيملوا فراغ عاطفي مش أكتر وكل العلاقات دي بتنتهي بكسرة قلوب البنات وخلاص. فحافظي على نفسك وركزي في مستقبلك لو عاوزة مصلحتك. وربنا يوفقك.💚
تم النشر الأربعاء، ٢٣ سبتمبر ٢٠٢٦
عموما اول خطوة صلّي و ادعي ربنا كتير اوي يبعدك عن الذنب ده و ابعدي عشان ربنا و صدقيني ده الافضل ليكِ، و ده بردو سن مراهقة وارد يحصل أخطاء او مشاعر زي كده بس لازم تبقي شخص قوي قصاد شيطانك و مشاعر مراهقتك
تم النشر الخميس، ٢٤ سبتمبر ٢٠٢٦
أنا بالنسبة ليا الحب مش حرام وبالنسبة لكل برضوا بشرط أختارى الشخص الصح فى الوقت الصح فى الطريق الصح ✅✅✅✅✅✅ ومن الضرورى أن تختارى بقلبك ومش بعقلك عشان تختارى صح ربنا معاكى وانتى لسة صغيرة حاولى تفكرى فحاجات أهم بالنسبة ليكى 🙂🙂🙂👌🏻👌
تم النشر الأربعاء، ٢٣ سبتمبر ٢٠٢٦
حبيبتي الحب ك مشاعر مش حرام لان ربنا اللي بيقلب القلوب اصلا، لكن التصرفات اللي بتنتج عنه ده الحرام، يعني حرام تكلمي ولد حتى لو كلامكم مش فيه حاجة وحشة يعني حرفيا لو بتقرأوا قران سوا ف هو حرام، لان الشخص ده غريب عنك كلامك لو ف الفون هو خلوة و لو بتتقابلوا ف ده اكبر، ربنا بيحرم ده عشان يحافظ علينا و يخلينا غاليين ل شخص يحافظ علينا، لو فعلا مشاعركم حقيقية ابعدوا عشان ربنا و لو ربنا كتب نصيب يمكن تتجوزوا او حتى ممكن مع الوقت المشاعر دي تتغير، ممكن صعب عليكي إنك تبعدي زي ما بتقولي بس بجد ربنا هيجازيكِ خير على تحملك و بعدك عن الغلط عشان تراضي ربنا، و متنسيش احنا اصلا اتخلقنا عشان نرضي ربنا دي اهم غاية.
تم النشر الخميس، ٢٤ سبتمبر ٢٠٢٦
حبيبتي حرام وبعدين انتي لسه صغننه ركزي في دراستك ومذكرتك احسن في السن ده
تم النشر الخميس، ٢٤ سبتمبر ٢٠٢٦
حرام اوي اوي وهيدمرك اساسا، حبيتي فلان او علان خليها من بعيد لأن المشاعر عادي انما جزئيه تقربي منه وتمشي معاه والكلام دا سيبك منه، اولا هو حرام وحسابه شديد عند ربنا يعني تخيلي بس رشه ريحه لو شمها ولد هتاخدي ذنوب م بالك بقا لما تمشي معاه، انتي متخيله قد اي الموضوع كبير عند ربنا، ثانيا بقا نفترض انك مش مقتنعه او حد بيشجعك علي دا، بصي، اي كد بنت او ولد قرب بسرعه ومن غير طريقه واضحه وحلال هيدمرك بمعنى ممكن اللي بتمشي معاه دا اساسا يعملك حاجه وحشه او يسوء سمعتك وقابليني لو عرفتي تخلعي منه، سيبك من الحاجات دي وركزي على نفسك، ابن الحلال بيجي دايما لوحده لحد باب البيت مش احنا اللي نروحله
تم النشر الخميس، ٢٤ سبتمبر ٢٠٢٦
ردك عليها جميل اوي وهتقدري تقنعيها بأسلوبك الطيب باذن الله ♥️♥️
تم النشر الخميس، ٢٤ سبتمبر ٢٠٢٦
حرام .. وعيب .. وغلط .. ومينفعش .. وميصحش ..
تم النشر الأربعاء، ٢٣ سبتمبر ٢٠٢٦
الرجاء الرد مجتاجة حد يرد 😍
تم النشر الأربعاء، ٢٣ سبتمبر ٢٠٢٦
لعرض السؤال في فدني اضغط هنا