ازاي ارجع شغف مذاكره ثانويه عامه
انا أولى جامعه ومليش نفس أذاكر وبجاهد بس مش عارف وعمال أسوف
حد عنده حل؟
(حاسبات ومعلومات)
متربطش المرحلتين ببعض ثانوية عامه كانت مرحله وانتهت ركز على مرحلتك دلوقتي شوف سبب التسويف ايه انت يا اما خايف يا اما مضغوط داخليا من كم الحاجات اللي عايز تعملها قسم الحاجات وطمن دماغك انه واحده واحده وقلل توقعاتك من نفسك التسويف ملهوش علاقة بالشغف ممكن انت محتاج تاخد يومين بريك تفصل فيهم دماغك من غير كل شوية مذاكرة وتستمتع وبعدها ترجع تاني عادي
تم النشر الأحد، ٢٣ نوفمبر ٢٠٢٥
مفيش حاجه اسمها شغف ثانويه كل وقت وليه الشغف الخاص بيه يعني كل مرحله بتخلف عن التانيه مثلا أنت بقيت تسوف وتقول هذاكر بكره لا بعده الخ ٠٠لكن في حل لدا أكييييد وهو انك تحارب حاجه إسمها التأجيل إنك تأجل lecture لمجرد انك قلت هذاكرها بكره دا بداية الضياع يعني مفيش غير حل واحد وهو انك تحارب التسويف لأن لاتؤجل عمل اليوم إلى الغد هتقولي بس انا مراكم!! هقولك مفيش مشكله ابدأ بمذاكرة الجديد مش القديم حاول تنظم وقتك اللي مش معناه تعمل جدول والكلام الاهبل اللي كنا بتعمله لا مش كدا المقصود بتنظيم وقتك شوف انت بتعرف تذاكر امتى يا ترى الفجر ولا العصر ولا بالليل ويا ترى انا نايم كويس فتره تخليني مركز وبتخليني مش بفكر في النوم أثناء المذاكره شوف المكان اللي بتحب تذاكر فيه مثلا انا اوقات بزهق من البيت ممكن اذاكر في الكُتّاب في مكان بعيد عن الكل ممكن بروح المسجد أو اطلع مكتبه عامه او كافيه بتغير نفسيتك وبتعرف تذاكر احسن حاول بقا تكرر الlecture على فترات متباعده مش هتنساها ابدا وصدقني الجدع اللي بيذاكر وبيحارب في اسوأ حالاته وإن شاء الله خير وربنا يوفقك ودا كان وجهة نظري ي ريت اكون أفدتك في حاجه🙏
تم النشر الأحد، ٢٣ نوفمبر ٢٠٢٥
بصراحه انا عندي فكره وعن تجربه بس اهم حاجه تنفذها بحذافيرها انه انت هيبقى عندك شغف في كل شيء بتعمله في حياتك كلها ان شاء الله كل يوم تصلي الفجر وطول الاذكار ربنا يكرمك كل يوم تصلي الفجر في ميعاده جماعه بقى في الجامع في البيت بس في الجامع افضل بيزيد البركه ماشي تواظب على قراءه الاذكار الصباح والمساء واهم شيء اما ترجع من الكليه يا ريت انه انت تشوف دروسك اول ما توصل البيت وتقعد تذاكر ان كان وراك صلاه صليها وقراءه الاذكار بعد كل صلاه او تسبيحه لها 33 33 33 بس ماشي خلصت التسابيح تقوم جاي واخد الذكر الاخير بعد كل صلاه "لا إله إلا الله وحده لا شريك له له الملك وله الحمد وهو على كل شيء قدير" كده يعني خلصت تقوم جاي قايم ورايح على فين تروح تذاكر تعمل ايه قبل ما تذاكر تقرأ بس حاجه صغيره من القرآن الكريم هيصفي ذهنك بإذن الله وهيطرح في عقلك البركه هيوفقك إن شاء الله بس ده بعد كل صلاه يعني مثلا نص صفحه صفحه كامله إذا عرفت وبالليل زي ما انت عاوز اقرأ بقى زي ما انت عاوز شد على نفسك زي ما انت عاوز وفي الصلاه اهم شيء ما تسيبش فرض فرضك تمها على أكمل وجه الخمسه وقراءة الاذكار كل يوم وإن شاء الله ربنا يوفقك وتنجح
تم النشر الأربعاء، ٣ ديسمبر ٢٠٢٥
بسط الأمور واشتغل بخطوات صغيرة بوتيره مناسبه لقدراتك انت وكافئ نفسك بعد كل تارجت تحققه... عقلنا مش بيحب الانضباط الا لما يعرف انه هيتكافئ بعد ما ينجز المهمه الي قدامه أيا كانت
تم النشر الثلاثاء، ٢٥ نوفمبر ٢٠٢٥
عادي دا طبيعي انا نفسي كدا بص كافئ نفسك واعمل خطه يوم بس تبقي بسيطه وفهم نفسك انو لازم عشان متشلش مثلا بعيد الشر حدد هدفك اصلا من الكليه هل عايز تنجح وخلاص وتاخد كورسات بره وتشتغل ولا عايز تبقي معيد علي حسب كل هدف هتلاقي نفسك في حاجه فعلا انت بتسعي وراها كنت في الثانويه بتذاكر عشان كان في طموح بقي وهدف وعايز مجموع وكدا نفس النظام حدد هدفك وبراحه علي نفسك خالص في الاول عشان متهربش من المذاكره وكافئ نفسك اول باول ويا ريت نبعد عن الفون مش عشان المذاكره بس عشان الحياه دي مش هتتعاش وانت قاعد علي الفون
تم النشر الأحد، ٢٣ نوفمبر ٢٠٢٥
وانا برضو فى أولى كلية ومش عارفة اذاكر
تم النشر الثلاثاء، ٢٥ نوفمبر ٢٠٢٥
خالط المجتهدين وانت هتتأثر بهم
تم النشر الثلاثاء، ٢٥ نوفمبر ٢٠٢٥
لعرض السؤال في فدني اضغط هنا