ما الهدف من استغلال الأطفال؟

Question

مساء الخير نفسي بس أعرف حاجه واحده إي الهدف من إستغلال الأطفال جنسيا لي تحاول تتحرش ببنت صغيره كراجل واعي او شاب ناضج وعارف ان دا غلط أنا حاليا عندي عقده من الولاد ابن عمي اكبر مني ب ٩سنين كان في الاعداديه تقريبا لما أخذني حمام المسجد وحاول يتحرش بيا وخلع هدومه ولما سمع حد داخل المسجد هددني وقال لي لو قلتي محدش هيصدقك ولو قلتي هقتلك طول طفولتي كنت بتهدد منه لو ما يستهوش هيفضحني ولو قلت لحد هيموتني اي ذنب طفله تعيش دا كله أنا حاليا عندي ٢٠سنه لما بشوفه بكرهه مش عارفه هوا ناسي ولا بيستعبط وبيعاملني باحترام أنا بكرهه ماما دايما تقول لي أسلوبك وحش معاه وليه بتتكلمي عليه كدا ولو قلتلها انه حاول يتحرش بيا مش هتصدق ولا حد هيصدق انا لما بشوفه بيلعب مع أي بيبي بخاف اوي ويراقبه ومش بخليه ياخدهم أنا مش قادره اتخذي الموضوع ولا قادره انسي هل أنا كوني كنت طفله ومقلتش غلطانه هل كان لازم اقول وهل كان حد هيصدقني أنا بقيت حتي اكره فكره الارتباط او اني أتجوز بقت مقززه اوي بالنسبه لي حتي فكره وجود الجنس في الحياه اكثر شي مقزز بيخلي الذكر ليه السلطه في التحكم في جميع الإناث لان عزيزتي اي فتاه يطلق عليها عاهره مع اول اعتراف لها بانها تعرضت للتحرش وان الذكر هو الملاااااك البريء الذي تم التبلي عليه من قِبَل فتاه عاهره ذهبت اليها بنفسه وهيا أصلا ما راحت له طيب أنا كنت طفله لو اعترفت هل هيقولوا نفس الكلام اللي اتقال لبنت كبيره اتعرضت للتحرش !!!!! ببساطه سؤال هل لما أجي احكي مع خطيبي المستقبلي اني اتعرضت للتحرش وانا صغيره هيوافق يتجوزني !!! الاجابه لا عزيزي القاريء مش هيوافق يتجوزني اسفه على الإزعاج مشاعر مكبوته مش بقدر اخفيها بحكي فيها من حين لآخر علشان أتنفس وشكرا 😊

Accepted Answer

مساء النور و افتكري انك هنا في مكان آمن تقدري تعبري فيه عن. كل اللي تاعبك مهما كان ،و بشكرك جدا على شجاعتك في انك تتكلمي عن موضوع زي ده و حتى لو من اكونت مجهول ، فالكلام في ده في حد ذاته محتاج شجاعه كبيرة ، و انا بتكلم من الحساب الأساسي و حصلت معايا تجربة مماثلة في صغري ، و كانت مؤذية نفسياً لأبعد الحدود الممكنة و يمكن من التجارب المؤلمة القليلة اللي بتضايق لما بفتكرها النهارده ، لدرجة ان ممكن اتخيل نفسه وانا بدبح الشخص ده بدم بارد و واقف شايفه وانا بضحك ، لكن وضعك اصعب من حيث انك بنت و من حيث ان الشخص ده انتي بتشوفيه كل يوم ، ده مش سهل خالص , لكن دايما كل مشكلة وليها حل و كلامك في اللي فات مع اهلك مش هيفيدك بغض النظر عن مدى نضجهم لكن الأكيد ان رؤويتهم ليكي و ظنونهم و شكوكهم هتشتغل و انتي في غنى عن العك ده ، التجربة مؤلمة جدا حقيقي لكن زيها زي أي تجربة سيئة لازم نحاول نشوفها بجانب إيجابي علشان نقدر نعيش حياتنا ، ربك له حكمة في ان موقف زي ده يحصل و خروجك منه بأقل الخسائر الممكنة دي نعمة كبيرة اوي من ربنا ، كان ممكن تكون النتيجة اسوأ بمراحل ، لكن انتي حالياً كبرتي و بتخافي على الأطفال من شخص مؤذي في المجتمع و ده إيجابي ، كرهك للجنس مؤقتاً في شئ من الإيجابية انه يحميكي من الاستغلالات المنتشرة في الزمن ده ، وانه وقت خطوبتك هتقدري تكتشفي النوايا دي بكل سهولة و مش هتوقعي ضحية للتمثيل الزائف ، التحربة صعبة اه لكن كل ما كانت التجربة صعبة كل ما بنقدر نبقى منها اقوى بكنير اقوى حتى من الناس العادية ، بس لو قررنا نبقى كده ، لما بشوف معاملتي و نظرتي للأطفال دلوقتي و اقول ان ممكن تجربتي تكون سبب في احساسي نحيتهم ان عايز احميهم و اساعدهم و اقدملهم كل اللي اقدر عليه فبحمد ربنا على تجربة خلتني أصلب من الطبيعي في مواقف و احن من الطبيعي في مواقف ، محدش فينا اختار اللي حصله في طفولته ده شئ أكيد ، بش اللي انا متأكد منه ان التحارب دي شكلت الماضي بتاعنا بدون اذننا و بدون تدخل مننا ، لكن ده مش معناه انها تشكل و تسرق مستقبلنا ، احنا اللي بنحدد هنشوفها ازاي و هتفيدنا بأيه ، و اه مازلت مش مسامح الشخص و عندي استعداد اقتله بدم بارد ، لكن التحربة نفسها ما باقتش مؤثرة فيا نفسياً ، فغيري نظرتك لتجربتك علشان تقدري تعيشي مستقبلك ، و دوري على الحكمة في اللي حصل و ايه الإنسانة اللي انتي عليها دلوقتي و اللي بالمناسبة اكيد هتبقى شخصية حلوة و ان التجربة الفظيعة دي كان ليها دور في الإنسانة اللي انتي عليها النهارده ، و بالنسبة لموضوع الخطوبة ، فما تعترفيش بنقطة زي دي إلا لما توثقي و تتأكدي من نضج الشخص و مدى تفهمه و هو لو المناسب ليكي انا متأكد انه هيتفهم تجربة صعبة زي دي و كمان هتخليه عايز يحاول يعوضك عنها بأي شكل ، و بالتوفيق 😊

Answer

بصي يا بنت الناس انتي مكنتيش غلطانة خالص ولا ليكي أي ذنب طفلة عندها 9 سنين قدام شاب كبير ده مكنش اختيار دي كانت لحظة رعب وسكوتك وقتها كان عشان خايفة على حياتك وعقلك وقتها عمل اللي يقدر عليه عشان يخليكي تعيشي وخوفك منه دلوقتي وقرفك من قربه لأي طفل ده مش عقدة ده جهاز إنذار عندك شغال صح عشان انتي عارفة حقيقته القذرة فمتجلديش نفسك ولا تلوميها على كرهك ليه ده حقك الطبيعي وفكرة إن مفيش حد هيتجوزك لو عرف دي وهم وتفكير مجتمعي عقيم مش الحقيقة لأن الراجل اللي بجد هيحترمك ويشيلك فوق راسه لانك واجهتي كل ده لوحدك ومش من حق أي حد يعرف سرك ده إلا بمزاجك انتي لو حابة تطلعي اللي في قلبك وتاخدي حقك ولو مآثر عليكي جامد تشوفي حد متخصص يفك معاكي عقدة الماضي دي عشان تعيشي حياتك صح ومتحرميش نفسك من الفرحة بسبب غلطة غيرك انتي أنضف من أي حد والوساخة في اللي عمل كده وفي اللي بيسكت عليه ومسيرك تنسي وتعيشي وتتخطى كل ده

Answer

الموضوع اكيد صعب عليكي جدا ربنا يعينك ويقويكي علي اللي انتي فيه وابن عمك ليه رب عادل جبار هيجبلك حقك منه سواء في الدنيا او في الاخرة من وجهة نظري انك لازم تقولي لمامتك بهدوء وتقولي انه هددك بالفضيحة والقتل وبما انك كنتي طفلة ف كنتي خايفة وكنتي خايفة انك متصدقنيش وانك حاليا تعبتي وخايفة انه يعمل كدا في اطفال تانية غيرك وانك دلوقتي بسببه خايفة من اي راجل وملقتيش حد امان تتكلمي معاه غيرها (والدتك لما تقولي كدا هتحس بيكي فعلا وانها مصدر امانك فهتصدقك ان شاء الله ) تاني حاجة بعدها حاولي تروحي لدكتور نفسي يمكن يقدر يساعدك في التخطي واستمري في قول حسبي الله ونعم الوكيل وربنا هينتقم منه ان شاء الله ويبرد قلبك ولو حبيتي تتكلمي ف اي وقت انا موجودة وهسمعك

ما الهدف من استغلال الأطفال؟

نفسية

اجتماعية

سؤال من احد أعضاء فدني

تم النشر السبت، ٢٨ مارس ٢٠٢٦

4 إجابة

3 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك